Yezhanq 8

1Yaq dangq goanz dangq dauh mwz rownz, gaj Yezsuz mwz Bo Maeghit. 2Fax zaekgaj rungh maz, dix daeuq dauh mwz gumhhongh rownz dij Sen, daengzle daeuq maz dih dix naeh, dix zoq naengh daeuj, zau paenqdix. 3Sowh lauxswz zau Sw Dij Sen naeh daj dij goanz Fahliqsaiq zowz maz yah ux, gau yah naeh naengh laux ndai naeh zoah daenh jenj zoah. Paenqdix yaix yah naeh in jinghzang, 4zoq daj Yezsuz hax: "Lauxswz, gau yah naeh naengh laux ndai naeh zoah daenh jenj zoah. 5Fahlih Moahciz yaix raeuz aeu tin saeuh sowh yah naeh tai, mawz hoakrawz hax mux?"#8:5Sowh fahlih naeh yuq Sw Liqvaeq 20:10, Sw Fahlih Daih Ngih 22:22-24, gaj fahlih goj hax baenz hawj sowh goanz puj zaiz gaengnaeh tai. 6Paenqdix hax gaemz naeh zawh ciqzaw Yezsuz, daz cha saek yowngh gauq dix. Gaj Yezsuz gaeuz raengx dix, aeu neuxmungz yuq dihndin laiz sw. 7Paenqdix goq cham cham dix, dix zoq ed raengx dix, daj paenqdix hax: "Gaenqsu gawz mboq miz gaenqloang, gawz zoq aeu tin saeuh dix daekgoanq." 8Yaq dix daeuq gaeuz raengx dix, aeu neuxmungz yuq dihndin laiz sw. 9Paenqdix ruxnyinz gaemz kauq naeh yaq, daeq puj jeq goq daeuj daeuj, hoak goanz hoak goanz og bae, low gaj Yezsuz, yah gaengnaeh naengz yuq dih gaengnaeh in. 10Yezsuz ed raengx dix maz, cham yah gaengnaeh: "Paenqdix yuq rawz ah? Mboq miz saek goanz ganz hax mawz hoak loang hoj tai maj?" 11Yah gaengnaeh hax: "Zaeuj aj, mboq miz." Yezsuz hax: "Gux goj mboq hax mawz hoj tai gah. Bae ndeh, daeq gannaeh mwz laek daeuq hoak loang tem mbeh."]]

Yezsuz Zawh Gaenq Rungh Dij Goanz Dihndin

12 Yezsuz daeuq daj goanzlai hax: "Gux zawh gaenqrungh dij goanz dihndin, gawz nowngz gux hoak cohsaenz gux, toj mboq ndaej yuq dih ndaem daeq, naengz ndaej sowh gaenqrungh hawj dij goanz ndaej aen mingh naeh." 13Dij goanz Fahliqsaiq daj dix hax: "Hoakri mawz haeggaj hax mawz zawh gawz, gaenq mawz hax naeh mboq suanq zawh zaeh." 14Yezsuz yaeng: "Hoakri gux ruxndeq gux daeq rawz daeuj, mwz rawz. Baenzzaqnaeh, daengz gaenqgux haeggaj hax gaenqgux zawh gawz, gaenq gaenqgux hax naeh goj suanq zawh zaeh. Gaj gaenqsu mboq ruxndeq gux daeq rawz daeuj, mwz rawz. 15Gaenqsu hax dij goanz hoak loang zawh lez gaj baihnog, gaj gaenq gux mboq hax dij goanz hoak loang. 16Daengz gux hax dij goanz hoak loang, gaenq gux hax naeh goj hoj mboqyaq. Unj, gux mboq zawh goanz doag haeggaj hax, zawh daj Dez nemz gux daeuj naeh zaemh hax. 17Fahlih su hoakzaqnaeh hax, miz song goanz hax ndaej taen raj hax ndaej ruxnyinz zux suanq zawh zaeh. 18Daih aet gux haeggaj saeh hoakri haxdoq daenh gux zawh gawz, daih ngih, Dez nemz gux daeuj naeh goj saeh gux haxdoq daenh gux zawh gawz." 19Paenqdix cham: "Dez mawz yuq rawz ah?" Yezsuz yaeng: "Gaenqsu mboq ruxndeq zaw gux, goj mboq ruxndeq zaw Dez gux. Jixzawh gaenqsu ruxndeq zaw gux, zoq goj ruxndeq zaw Dez gux." 20Suq kauq naeh zawh zwz Yezsuz yuq gumhhongh rownz dij Sen zau daenh naeh hax, zawh yuq haenz gowh aeu nyaengx sowh ngaenzjenz daenh aeu hawj dij Sen naeh hax. Gaj zwz naeh naengz mboq taeng zwz dix, baenzzaqnaeh mboq miz gawz goangz dix.

21 Yezsuz daeuq daj paenqdix hax: "Gux mwz yah, mwznaj gaenqsu cha gux, yaq gaenqsu tai, gaenq hoakloang su goj naengz mboq ndaej yangq. Dih gux mwz naeh, gaenqsu mwz mboq baenz." 22Yaq puj saeq puj Yaeuhtaiq hax: "Dix hax: ‘Dih gux mwz naeh, gaenqsu mwz mboq baenz.’ Lau dix daz haeggaj hawj hoakri tai max?" 23Yezsuz hax: "Gaenqsu zawh daeq dihndin maz, gaj gaenqgux zawh daeq ndaw fax daeuj. Gaenqsu zawh gaenq dawj fax, gaj gaenqgux mboq zawh gaenq dawj fax. 24Baenzzaqnaeh gux daj gaenqsu hax, mwznaj gaenqsu tai, gaenq hoakloang su goj naengz mboq ndaej yangq. Jixzawh gaenqsu mboq sinq gux zawh Laux gaengnaeh,#8:24Gaemz kauq naeh yuq Sw Yixsaiqyaq 43:10. Laux gaengnaehmbaednduq bwnz zawh hax Yez'hoahhuah, minxzwh dij Sen. Yezsuz hoakzaqnaeh hax zoq zawh hax hoakri dix zawh dij Sen. mwznaj gaenqsu zoq tai, gaenq hoakloang su goj naengz mboq ndaej yangq." 25Paenqdix zoq cham: "Mawz zawh gawz?" Yezsuz hax: "Daeq zwz rawz maz gux haeuz bwnz haxdoq su. 26Gux miz lai yowngh taeuq hwt gaenqsu, hax gaenqsu hoak loang gaeng. Gux haxdoq su, Laux nemz gux daeuj naeh dix hax gaeng goj hax zaeh mboqyaq, gux yuq zawj dix ruxnyinz gaeng, gux zoq haxdoq dij goanz dihndin." 27Paenqdix mboq ruxndeq Yezsuz zawh laemh Dez ndaw fax. 28Baenzzaqnaeh Yezsuz hax: "Gaenqsu yaeuj goanz rongx hoak Lug Dij Goanz naeh yaq,#8:28 Yezsuz hax gaemz kauq naeh: Gaenqsu yaeuj goanz rongx hoak Lug dij Goanz naeh, dix zawh hax paenqdix mwznaj aeu dix lamh mwz maexngamzchaz tai. toj ruxndeq gux zoq zawh Laux gaengnaeh, goj ruxndeq mboq zawh hoakri gux haeggaj hoak gaeng. Dez ndaw fax hoakzaqrawz zau gux, gux zoq hoakzaqrawz laemh. 29Laux nemz gux daeuj naeh daj gux zaemh yuq, gux zwzzwz hoak sowh saeh dix zaemz naeh, baenzzaqnaeh dix mboq viangh gux, mboq hawj gux goanzdoag haeggaj yuq." 30Gau Yezsuz hax le gaemz kauq naeh, zoq miz goanz lai taeuq sinq dix.

Kauqjing Toj Hawj Su Hoakkoij Gah

31 Yezsuz daj puj Yaeuhtaiq sowh puj sinq dix naeh hax: "Jixzawh gaenqsu goq goq biak sowh gaenq gux zau su naeh bae hoak, gaenqsu zoq zawh cohsaenz gux zaeh eh. 32Gaenqsu toj ruxndeq kauqjing, kauqjing toj hawj su hoakkoij gah." 33Paenqdix hax: "Gaenqpiu zawh luglan Yaqboahlazhanq, mboq sanz zoah gawz aeu hoakkoij, mawz baenzzaqrawz hax: ‘Gaenqsu toj hoakkoij gah’ mux?"

34 Yezsuz hax: "Gux haxdoq su swhlit, gawz hoak loang gawz zoq suanq zawh puj koij gaenq hoakloang. 35Puj koij mboq ndaej yuq rownz zaeuj dix ndowj daengznauq, mizgaj lug zaiz zux ndaej yuq daengznauq. 36Baenzzaqnaeh, jixzawh lug zaiz dij Sen hawj gaenqsu hoakkoij gah, gaenqsu zoq mboq zawh puj koij eh. 37Gux ruxndeq gaenqsu zawh luglan Yaqboahlazhanq. Gaj zaw su mboq zaemz kauq gux, baenzzaqnaeh gaenqsu daz kaj gux. 38Sowh gaenq gux laemh naeh, zawh gux yuq zawj Dez gux taen. Gaj sowh gaenq su hoak naeh, zawh ruxnyinz zawj dez su maz."

39Paenqdix hax: "Dez mawz, dez piu wznaex? Puj jeq rownz piu zawh Yaqboahlazhanq, mawz mboq ruxndeq max?" Yezsuz hax: "Jixzawh gaenqsu zawh luglan Yaqboahlazhanq zaeh, toj hoak sowh saeh Yaqboahlazhanq hoak naeh mboqyaq. 40Gux aeu sowh kauq gux ruxnyinz daeq zawj dez gux naeh, sowh kauq jing naeh haxdoq su, gaj gannaeh gaenqsu daz kaj gux. Yaqboahlazhanq mboq sanz hoak sowh saeh naeh. 41Sowh gaenq su hoak naeh zawh gaenq dez su hoak." Paenqdix hax: "Gaenqpiu mboq zawh lugdangz. Gaenqpiu zux miz goanz dez doag, zoq zawh dij Sen." 42Yezsuz hax: "Gux zawh daeq zawj dij Sen daeuj, jixzawh dij Sen zawh dez su, gaenqsu toj ngaiq gux mboqyaq. Gux haeuz daeuj inxnaeh, gux mboq zawh haeggaj daeuj, zawh dij Sen nemz gux daeuj. 43Kauq gux kaeuj chu su mboq ndaej, gaenqsu zoq mboq ruxndeq kauq gux zawh hax gaeng. 44Dez su zawh do gvanx dij pi naeh naeh, su daj dez su dungzlumj, dez su nwh gaeng, gaenqsu goj zaemh hoak gaeng. Daeq zwzrawz maz dix zoq zawh puj kaj goanz. Zaw dix mboq miz yowngh rawz jing, baenzzaqnaeh dix mboq sanz hax zaeh. Dix bwnz zawh puj haxyai, goj zawh dez puj haxyai. Baenzzaqnaeh haxyai zawh gaenqdix bwnz baenz. 45Gux aeu kauqjing haxdoq su, gaenqsu zoq cho gaenqnaeh mboq sinq gux. 46Gux mboq sanz hoak loang gaeng, gaenqsu mboq miz gawz miz zaenqjiq hax gux hoak loang gaeng. Gux aeu kauqjing haxdoq su, gaenqsu baenzzaqrawz mboq sinq gux mux? 47Gawz zawh dij goanz dij Sen, gawz zoq biak kauq dij Sen mboqyaq. Gaenqsu mboq biak, unj gaenqsu mboq zawh dij goanz dij Sen."

Naengz Mboq Miz Yaqboahlazhanq Haeuz Bwnz Miz Yezsuz

48Puj saeq puj Yaeuhtaiq daj Yezsuz hax: "Gaenqpiu hax mawz zawh dij goanz Saxmaxliqyaq, yaq naengz zoah dij pi mwz ndang, biak kauq dij pi, gaemz kauq naeh mboq loang saek'i zaeh." 49Yezsuz yaeng: "Gux mboq zawh zoah dij pi mwz ndang. Gux zaenzzungq Dez gux, gaj gaenqsu mboq zaenzzungq gux. 50Gux mboq zawh cho najta hoakri, gaj miz laux ux zawh hawj gux miz najta, hax gux hoak hoj. 51Gux haxdoq su swhlit, gawz biak kauq gux, zoq mboq rux tai, taengdeg daengznauq." 52Puj saeq puj Yaeuhtaiq daj dix hax: "Gannaeh gaenqpiu ruxndeq mawz zoah dij pi mwz ndang zaeh yah. Yaqboahlazhanq haeuz tai yaq, daengzle puj zawxkauq dij Sen goj haeuz tai yaq, mawz naengz hax: ‘Jixzawh gawz biak kauq gux, zoq mboq tai daengznauq.’ 53Mawz naengz dwx nyeuz puj jeq rownz piu Yaqboahlazhanq maj? Dix tai yaq, daengzle puj zawxkauq dij Sen goj tai yaq. Mawz faeklaih mawz zawh gawz ah?" 54Yezsuz yaeng: "Jixzawh gux zawh cholaeng hawj hoakri miz najta, najta gux zoq mboq suanq zawh gaeng; laux hawj gux miz najta naeh zawh Dez gux, Dez gux zoq zawh laux su hax zawh dij Sen su naeh. 55Gaj gaenqsu mboq ruxndeq zaw dix, gux lej ruxndeq zaw dix. Jixzawh gux hax gux mboq ruxndeq zaw dix, gux zoq daj su dungzlumj zawh haxyai. Gaj gux ruxndeq zaw dix, goj biak kauq dix. 56Puj jeq rownz su Yaqboahlazhanq, dix nwh taeng ndauj gux naeh dix zoq faengz, doaklaeng zwz dix leztaen naeh, dix zoq faengz taeuq." 57Puj saeq puj Yaeuhtaiq daj dix hax: "Mawz daengz hajsip bi naengz mboq ndaej, hoakrawz ndaej taen Yaqboahlazhanq mux?" 58Yezsuz hax: "Gux haxdoq su swhlit, naengz mboq miz Yaqboahlazhanq, gux haeuz bwnz miz yaq yah." 59Yaq, paenqdix zoq zaep tin daz saeuh dix, gaj Yezsuz ni gumhhongh rownz dij Sen, lamq mwz rawz mwz.

Currently Selected:

Yezhanq 8: ZHN

Highlight

Copy