Yezhanq 21

Yezsuz Hawj Jiat Goanz Cohsaenz Dix Taen

1Gvaq ndauj ux yaq, Yezsuz yuq haenz kow Tihbixlixyaq#21:1 Kow Tihbixlixyaq goj rongx Kow Zazliqliq. hawj cohsaenz dix taen. Dix hoakzaqnaeh hawj paenqdix taen: 2Zwz gaengnaeh miz Cizmaenh-Bihdowh, Dozmax goanz goj rongx hoak Lugsoah naeh, Nahdanqyeh goanz ndaw mbanj Zazliqliq longq Zaznah naeh, doiq lug zaiz Cizpihtaiq, naengz miz song goanz cohsaenz tem, paenqdix zaemh yuq. 3Cizmaenh-Bihdowh daj paenqdix hax: "Gux bae dwkbya." Paenqdix hax: "Piu goj daj mawz zaemh bae." Yaq paenqdix zoq bae, kwnj mwz ndaw lowz, gaj haemh gaengnaeh paenqdix gaeng goj dwk mboq ndaej. 4Gau fax hiamq rungh naeh, Yezsuz in dihliangx, gaj cohsaenz dix mboq ruxndeq dix zoq zawh Yezsuz. 5Yezsuz daj paenqdix hax: "Paenq reauh aj, dwk ndaej dij bya vah?" Paenqdix yaeng: "Mboq ndaej neh." 6Yezsuz hax: "Aeu mowngx sauq bae baih qensa lowz, zoq ndaej eh." Paenqdix zoq sauq mowngx, ndaej dij bya lai gvaq, yaeuj mowngx maz ndaw lowz mboq ndaej.

7Goanz cohsaenz Yezsuz ngaiq naeh hax mwz doq Bihdowh: "Zawh Zaeuj!" Gau gaengnaeh Cizmaenh-Bihdowh ndangndiang, dix daeh ruxnyinz zawh Zaeuj, zoq heux gongzsowj riz ux, yoangh bae ndaw naemx. 8Gau gaengnaeh, paenqdix daj dihliangx mboq gvae lai, miz teq song baeg azmax#21:8 Azmax ux riz baenzzaq qensog mwz taeng byai mungz naeh. Song baeg azmax riz teq song baeg qiat sip qix ux naeh. ux naeh, cohsaenz ndai zoq uaij lowz ix, laeg mowngx bya gaengnaeh maz.

9Paenqdix maz taeng dihliangx, leztaen dih gaengnaeh miz faez, now faez aeu dij bya daj binx jiq. 10Yezsuz daj paenqdix hax: "Aeu dij bya gaunduq su dwk ndaej naeh maz jij do ux." 11Cizmaenh-Bihdowh zoq kwnj mwz ndaw lowz, laeg mowngx maz dihliangx. Aen mowngx gaengnaeh zawh gaj dij bya dwx gangq, daengzle miz baeg ux laeng hajsip-sam do. Ndaej dij bya lai baenzzaqnaeh, gaj mowngx mboq riag. 12Yezsuz daj paenqdix hax: "Gaenqsu maz, jin ngaiz zaeux eh." Cohsaenz dix ruxndeq dix zawh Zaeuj, baenzzaqnaeh mboq miz gawz ganz cham dix: "Mawz zawh gawz ah?" 13Yezsuz daeq maz, aeu binx daj dij bya hawj paenqdix. 14Yezsuz daeuq zaeu yaq, mbaed naeh zawh mbaed daih sam hawj cohsaenz dix taen.

Yezsuz Daj Bihdowh Hax Kauq

15Paenqdix jin ngaiz zaeux yaq, Yezsuz cham Cizmaenh-Bihdowh: "Cizmaenh goanz lug zaiz Yezhanq naeh aj, mawz daj paenqdix zawh mawz ngaiq gux nyeuz vah?"#21:15 Gaemz kauq naeh goj ingj rux zawh hax: Cizmaenh goanz lug zaiz Yezhanq naeh aj, mawz ngaiq gux nyeuz ngaiq le gaenqnaeh vah? Dix yaeng: "Zaeuj aj, wnh, mawz ruxndeq gux ngaiq mawz." Yezsuz hax: "Mawz dawz dij mbej ex gux." 16Yezsuz mbaed daih ngih daeuq cham dix: "Cizmaenh goanz lug zaiz Yezhanq naeh aj, mawz ngaiq gux vah?" Dix yaeng: "Zaeuj aj, wnh, mawz ruxndeq gux ngaiq mawz." Yezsuz hax: "Mawz dawz dij mbej gux." 17Yezsuz mbaed daih sam cham dix: "Cizmaenh goanz lug zaiz Yezhanq naeh aj, mawz ngaiq gux vah?" Bihdowh cholaeng Yezsuz mbaed daih sam cham dix: "Mawz ngaiq gux vah?" Ndaw zaw dix zoq yuqraix, dix daj Yezsuz hax: "Zaeuj aj, mawz mboq miz saek yowngh mboq ruxndeq, mawz ruxndeq gux ngaiq mawz." Yezsuz hax: "Mawz dawz dij mbej gux. 18Gux haxdoq mawz swhlit, zwz reauh mawz, haeggaj nungh ndangnungh, ngaiq bae ngaiq dauh. Gaj baenz puj jeq maz, mawz ed mungz maz, daenh saeh mawz nungh, zowz mawz bae dih mawz mboq zawx bae naeh." 19Yezsuz hax gaenqnaeh zawh hax mwznaj Bihdowh rux cholaeng hoakzaqnaeh zoah daenh kaj, ej hawj daenh leztaen najta dij Sen. Hax gaenqnaeh yaq, Yezsuz daeuq daj Bihdowh hax: "Mawz nowngz gux ndeh!"

Yezsuz Laemh Taeng Goanz Cohsaenz Dix Ngaiq Naeh

20 Bihdowh ueq naj maz, leztaen goanz cohsaenz Yezsuz nwh naeh nowngzlaeng, goanz naeh zoq zawh goanz haemh jin byaeuz Jeng Gvaq naeh, yuq zawj baeg'aek Yezsuz, cham Yezsuz: "Zaeuj aj, goanz kai mawz naeh zawh gawz ah?" 21Bihdowh leztaen dix, zoq cham Yezsuz: "Zaeuj aj, goanz naeh mwznaj baenzzaqrawz ah?" 22Yezsuz yaeng dix: "Jixzawh gux hawj dix zaeu mwz taeng deg zwz gux daeuq dauh daeuj naeh, daj mawz miz gaeng mux? Mawz yumq nowngz gux mbeh'ej zawh eh!" 23Yaq gaemz kauq naeh zoq leuz bae dih bihnongx naeh, hax goanz cohsaenz gaengnaeh mboq rux tai. Gaj laemh zaeh maz Yezsuz mboq zawh hax goanz cohsaenz gaengnaeh mboq rux tai, dix zawh hax: "Jixzawh gux hawj dix zaeu mwz taeng deg zwz gux daeuj naeh, daj mawz miz gaeng mux?" 24Goanz ndaej ta'taen le gaenqnaeh, goj mai le gaenqnaeh, zoq zawh goanz cohsaenz Yezsuz nwh naeh. Gaenqraeuz ruxndeq le gaenq dix hax naeh zawh zaeh. 25Sowh gaenq Yezsuz hoak naeh, naengz miz lai yowngh taeuq. Jixzawh hoak yowngh hoak yowngh laiz, gux nwh maz, sowh sw laiz dix naeh daengz dawj fax nauq naengz mboq doh laep.

Currently Selected:

Yezhanq 21: ZHN

Highlight

Copy