Yezhanq 20

Yezsuz Daeuq Zaeu

1Cinzqiztenz, gau fax naengz mboq rungh naeh, Maxliqyaq yah ndaw Moahdaqlaz naeh mwz dih aen ngomz mohbujreuh aeu Yezsuz nyaengx naeh, leztaen kvaix tin dingz baeg ngomz naeh haeuz gauq ni yaq.#20:1 Gaenq raeuz vaenz cinzqiztenz naeh, nganq puj Yaeuhtaiq maz hax haeuz zawh cinzqiz ux vaenznduq dix naeh. 2Dix zoq lenh bae dih Cizmaenh-bihdowh daj goanz cohsaenz Yezsuz ngaiq naeh, daj paenqdix hax: "Gawz tam Zaeuj daeq mohbujreuh bae rawz yaq eh, daekcih gawz aeu dix bae nyaengx rawz cihloh." 3Bihdowh daj goanz cohsaenz gaengnaeh zoq og bae, mwz dih mohbujreuh naeh. 4Song goanz dix zaemh lenh, gaj goanz cohsaenz gaengnaeh lenh kvaiq nyeuz, mwz taeng mohbujreuh daekgoanq. 5Dix gaeuz to lez mwz ndaw ngomz, leztaen kvaix paeng banq naengz yuq dih gaengnaeh, gaj dix mboq ndonj mwz. 6Cizmaenh-Bihdowh goj nowngzlaeng maz taeng, dix ndonj mwz ndaw ngomz mohbujreuh, leztaen kvaix paeng banq naengz yuq dih gaengnaeh, 7goj leztaen kvaix paeng aeu toq to Yezsuz naeh mboq daj kvaix paeng banq zaemh yuq, haeggaj yuq dih ux, jip ndae'ndowq. 8Sowh gaunaeh, goanz cohsaenz gaengnaeh goj ndonj mwz, leztaen zoq sinq Yezsuzdaeuq zaeu. 9Mbaednduq paenqdix naengz mboq ruxndeq gaemz ndaw Sw Dij Sen hax Yezsuz tai yaq daeuq zaeu zuxbaenz naeh zawh hax gaeng. 10Yaq song goanz cohsaenz naeh zoq dauh daeuj dih hoakri ndowj naeh.

Yezsuz Hawj Maxliqyaq Yah Ndaw Moahdaqlaz Naeh Taen

11Gaj Maxliqyaq in yuq baihnog mohbujreuh haej. Gau dix haej naeh, dix gaeuz to lez mwz ndaw mohbujreuh, 12leztaen miz song goanz bin dij Sen, nungh sowj kau rux rungh, naengh dih mbaednduq aeu Yezsuz nyaengx naeh, goanz ux yuq baih to naeh, goanz ux yuq baih din naeh. 13Bin dij Sen cham dix: "Yah nyingz, mawz baenzzaqrawz haej ah?" Maxliqyaq hax: "Miz goanz laez Zaeuj gux, gux mboq ruxndeq paenqdix laez dix bae nyaengx rawz." 14Maxliqyaq hax gaemz naeh yaq, zoq ueq dauhlaeng, leztaen miz goanz ux yuq dih naeh, gaj dix mboq ruxndeq goanz naeh zoq zawh Yezsuz. 15Yezsuz daj dix hax: "Yah nyingz, mawz baenzzaqrawz haej ah? Mawz cha gawz ah?" Maxliqyaq faeklaih dix zawh goanz dawz sown naeh, zoq daj dix hax: "Cuh aj, jixzawh zawh mawz laez dix ni, vanz mawz haxdoq gux, mawz aeu dix nyaengx rawz, hoakzaqnaeh gux zux daeuq tam dix dauh maz baenz." 16Yezsuz daj dix hax: "Maxliqyaq." Maxliqyaq zoq ueq maz, aeu kauq Cizboahlaiz daj dix hax: "Lazboznih!" Lazboznih zoq zawh hax: "lauxswz." 17Yezsuz hax: "Gux naengz mboq mwz zawj Dez ndaw fax gah, zoangq mungz mawz ndeh, mawz bae dih boangx bihnongx gux naeh, zoq zawh bae dih boangx sinq gux naeh, haxdoq paenqdix gux zaekgaj mwz zawj Dez gux, goj zawh Dez su, zaekgaj mwz zawj dij Sen gux, goj zawh dij Sen su." 18Maxliqyaq yah ndaw Moahdaqlaz naeh zoq bae haxdoq paenq cohsaenz Yezsuz: "Gux haeuz leztaen Zaeuj eh!" Dix goj aeu suq kauq Zaeuj daj dix hax naeh haxdoq paenqdix.

Yezsuz Hawj Cohsaenz Dix Taen

19Vaenz gaengnaeh, zoq zawh cinzqiztenz zang'haemh dix, cohsaenz Yezsuz maz zaemh yuq, paenqdix mbu puj saeq puj Yaeuhtaiq, paenqdix zoq seh baegdu nauq. Yezsuz daeuj, daj paenqdix zaemh in, hax: "Ngwz gaenqsu yuqvangq." 20Hax gaemz naeh yaq, zoq aeu mungz daj bangxchangj hawj paenqdix lez. Cohsaenz Yezsuz leztaen Zaeuj zoq faengz taeuq. 21Yezsuz daeuq daj paenqdix hax: "Ngwz gaenqsu yuqvangq! Dez ndaw fax hoakzaqrawz nemz gux daeuj, gux goj hoakzaqrawz nemz su og bae." 22Hax gaemz naeh, dix zoq baeuq bae doq paenqdix umq yai ux, hax: "Gaenqsu deq Minghkoan dij Sen ndeh! 23Gaenqsu yangq gaenq hoakloang gawz, gaenq hoakloang gawz zoq ndaej yangq. Gaenqsu mboq yangq gaenq hoakloang gawz, dix zoq haeggaj ndaej tw gaenq hoakloang dix."

Yezsuz Daj Dozmax Hax Kauq

24Sipngih goanz cohsaenz Yezsuz naeh, miz goanz ux rongx hoak Dozmax, goj rongx hoak Lugsoah. Gau Yezsuz daeuj naeh, dix mboq daj cohsaenz ndai zaemh yuq. 25Cohsaenz ndai daj dix hax: "Piu haeuz leztaen Zaeuj eh." Gaj Dozmax hax: "Laugaj gux haeggaj ndaej ta taen baegmbaed mungz dix dih aeu dengdinz dog naeh, aeu mungz gux lumh dih baegmbaed aeu dengdinz dog naeh, daeuq aeu mungz gux lumh bangxchangj dix, jixmboqzawh gux toj mboq rux sinq!"

26Gvaq ndaej biad vaenz, cohsaenz Yezsuz daeuq maz ndaw rownz zaemh yuq, Dozmax goj daj paenqdix zaemh yuq. Baegdu goj seh nauq. Yezsuz daeuj, daj paenqdix zaemh in, hax: "Ngwz su yuqvangq." 27Yaq daj Dozmax hax: "Aeu neuxmungz mawz nyaengx inxnaeh, lez mungz gux; ed mungz mawz maz, lumh bangxchangj gux. Laek hoakzaq koax daekgoanq naeh mboq sinq, sinq ndeh!" 28Dozmax hax: "Zaeuj gux aj! Dij Sen gux aj!" 29Yezsuz hax: "Mawz cholaeng leztaen gux zux sinq maj? Sowh dij goanz mboq ndaej taen zoq sinq gux naeh faengz yah."

Baenzzaqrawz Laiz Bwnz Sw Naeh

30 Yezsuz yuq doqnaj cohsaenz dix hoak sowh saeh hawj paenqdix ruxndeq dix zawh gawz naeh lai taeuq, gaj mboq mai nyaengx bwnz naeh nauq. 31Gaj mai suq naeh, zawh hawj gaenqsu sinq Yezsuz zawh Jizduz, zawh lug zaiz dij Sen, goj hawj su cho'mbaiq sinq dix, maengx zwh dix ej ndaej aen mingh mawq.

Currently Selected:

Yezhanq 20: ZHN

Highlight

Copy