Yezhanq 18

Daenh Maz Goangz Yezsuz

1 Yezsuz hax suq kauq naeh yaq, zoq daj cohsaenz dix og bae, gvaq ndoang Jihlunh. Dih naeh miz oax sown ux, dix daj cohsaenz dix zoq ndonj mwz. 2Yezsuz kwnzkwnz daj cohsaenz dix bae dih naeh, baenzzaqnaeh Yaeuhdaq goanz aeu Yezsuz kai hawj sowh puj daj dix hoak dangqbaih naeh goj ruxndeq dih naeh. 3Yaeuhdaq zowz maz boangx bin ux, goj zowz sowh bin dawz du rownz dij Sen naeh maz. Sowh bin dawz du rownz dij Sen naeh zawh sowh goanz gvanx puj mbud dij Sen naeh daj puj Fahliqsaiq nemz maz. Boangx bin gaengnaeh, tw daeng, tw bongz faez, tw gaenq dungzsaeuh, maz ndaw sown. 4Yezsuz ruxndeq sowh saeh zaekgaj daeuj doq hoakri naeh, zoq og daeuj daj paenqdix hax: "Gaenqsu cha gawz?" 5Paenqdix yaeng: "Cha Yezsuz ndaw Nazsahlowh." Yezsuz hax: "Gux zawh Laux gaengnaeh."#18:5 Laemh zaeh maz Yezsuz mboq zawh hax: "Gux zawh Laux gaengnaeh" Dix zawh hax: "Gux zawh." Gaj loah'ej aen minxzwh Yez'hoahhuah naeh goj zawh hax: "Gux zawh." Baenzzaqnaeh Yezsuz hoakzaqnaeh hax, gaemz ux dix ingj rux zawh hax "gux zoq zawh Yezsuz," gaemz ux goj ingj rux zawh hax: "Gux zawh Yez'hoahhuah." Yaeuhdaq goanz aeu dix kai hawj sowh puj daj dix hoak dangqbaih naeh goj daj paenqdix zaemh in dih naeh. 6Yezsuz daeh hax: "Gux zawh Laux gaengnaeh," paenqdix zoq nyiat dauh laeng, laemx bae dihndin. 7Dix daeuq cham paenqdix: "Gaenqsu cha gawz?" Paenqdix hax: "Cha Yezsuz ndaw Nazsahlowh." 8Yezsuz hax: "Gux haeuz haxdoq su yaq, gux zawh Laux gaengnaeh. Jixzawh gaenqsu zawh maz cha gux, zoq hawj le goanz naeh ni ndeh." 9Yezsuz hoakzaqnaeh hax zawh hawj gaemz kauq koax daekgoanq dix hax naeh baenzzaeh. Gaemz kauq koax daekgoanq dix hax naeh zawh: "Sowh dij goanz mawz aeu hawj gux naeh, gux mboq hawj lamq goanz rawz."#Yezhanq 17:12. 10Cizmaenh-Bihdowh goanz cohsaenz Yezsuznaeh tw maeg remz ux, dix it maz, mbaeg mwz doq baih daenh goanz ux, mbaeg chu sa goanz gaengnaeh laenq. Goanz gaengnaeh zawh puj koij laux puj mbud dij Sen laux saeq dwx nyeuz daengzle naeh, dix rongx hoak Maxlowhgux. 11Yezsuz daj Bihdowh hax: "Aeu remz naep bae ndaw paek dix ndeh! Aen zung kaem dez gux aeu hawj gux naeh, gux hoakrawz mboq ndut mux?"

Puk Yezsuz Mwz Doqnaj Laux Yaqnah Naeh

12Yinhzangx, yaq boangx bin gaengnaeh, yaq puj Yaeuhtaiq sowh bin dawz du rownz dij Sen naeh, paenqdix jenj Yezsuz, puk dix, 13zowz dix mwz dih Yaqnah naeh daekgoanq. Yaqnah zawh daq oanq Gaizyaqfah, bi gaengnaeh zawh Gaizyaqfah hoak puj mbud dij Sen goanz saeq dwx nyeuz daengzle naeh. 14Gaizyaqfah zoq zawh goanz koax daekgoanq ndaej daj puj saeq puj Yaeuhtaiq hax "Goanz ux how goanzlai tai, zawh gaenq ndae."

Bihdowh Mboq Yinq Dix Ruxnaj Yezsuz

15 Cizmaenh-Bihdowh daj goanz cohsaenz ux nowngzlaeng Yezsuz bae. Goanz cohsaenz gaengnaeh puj mbud dij Sen goanz saeq dwx nyeuz daengzle naeh ruxnaj dix, goanz cohsaenz gaengnaeh zoq ndaej daj Yezsuz zaemh mwz gumhhongh rownz puj mbud dij Sen goanz saeq dwx nyeuz daengzle naeh. 16Gaj Bihdowh yuq baihnog baegdu in. Goanz cohsaenz gaengnaeh, zoq zawh goanz puj mbud dij Sen saeq dwx nyeuz daengzle ruxnaj naeh og daeuj, daj goanz puj koij nyingz dawz du naeh hax gaemz ux, zoq zowz Bihdowh ndonj mwz. 17Goanz puj koij nyingz dawz du naeh daj Bihdowh hax: "Mawz goj zawh cohsaenz goanz gaengnaeh wzmax?" Dix hax: "Gux mboq zawh." 18Zwz gaengnaeh goangj gvaq, puj koij daj sowh puj dawzdu rownz dij Sen zoq ndaengfaez, in dih naeh nau faez. Bihdowh goj daj paenqdix zaemh in nau faez.

Puj mbud Dij Sen Goanz Saeq Dwx Nyeuz Daengzle Naeh Jinj Yezsuz

19Puj mbud dij Sen goanz saeq dwx nyeuz daengzle naeh jinj Yezsuz, jinj le gaenq dix zau naeh, daj jinj dix cohsaenz dix zawh gawz raeuh. 20Yezsuz yaeng: "Daeq zwzrawz maz, gux koanx gaeng gux goj bwnz yuq doqnaj doqta goanzlai koanx, gux kwnz yuq rownzndawcowq daj rownz dij Sen, zoq zawh yuq sowh dih daengzle puj Yaeuhtaiq kwnz maz zaemh yuq naeh zau daenh, gux mboq lupliamx yuq rawz koanx gaeng. 21Gaenqsu baenzzaqrawz jinj gux mux? Cham sowh goanz ndaej biak naeh maj, paenqdix ruxndeq gux ndaej koanx gaeng." 22Yezsuz hax gaemz naeh, sowh bin dawz du rownz dij Sen naeh goanz in haenz naeh zoq saeuh dix mbaed faeg ux, hax: "Mawz ganz hoakzaqnaeh yaeng puj mbud dij Sen goanz saeq dwx nyeuz daengzle naeh maj?" 23Yezsuz hax: "Jixzawh gux hax loang, mawz zoq hax ijrawz loang; jixzawh gux hax hoj, mawz baenzzaqrawz dup gux mux?" 24Yaqnah naengz gaj mboq hih Yezsuz, nemz daenh zowz Yezsuz mwz dih Gaizyaqfah goanz puj mbud dij Sen saeq dwx nyeuz daengzle naeh.

Bihdowh Daeuq Mboq Yinq Dix Ruxnaj Yezsuz

25 Cizmaenh-Bihdowh naengz gaj in haenz faez nau faez. Miz dij goanz daj dix hax: "Mawz goj zawh cohsaenz dix wzmax?" Bihdowh mboq yinq, dix hax: "Gux mboq zawh." 26Miz goanz puj koij ux, zawh puj koij goanz puj mbud dij Sen saeq dwx nyeuz daengzle naeh, goanz naeh daj goanz zoah Bihdowh mbaeg mbaw chu laenq naeh baenz bihnongx, dix hax: "Gux leztaen mawz daj dix zaemh yuq ndaw sown wzmax?" 27Bihdowh daeuq mboq yinq, gaunaeh dij gaeq zoq kaen.

Bihlazdoz Jinj Yezsuz

28Fax hiamq rungh, puj saeq puj Yaeuhtaiq zowz Yezsuz daeq dih Gaizyaqfah naeh mwz dih laux saeq gvanx mbanj naeh. Hoakri paenqdix mboq ndonj mwz dih Bihlazdoz, laux saeq gvanx mbanj naeh, paenqdix mbu ndonj mwz hawj hoakri mboq saw, zoq mboq ndaej jin byaeuz Jeng Gvaq.#18:28 Zwz naeh puj Yaeuhtaiq jixzawh paenqdix mwz rownz puj yowngh ndai, paenqdix zoq byenqbaenz mboq saw. Gvaq ndauj ux yaq, zux daeuq byenq saw. Jixzawh gawz mboq saw gawz zoq mboq ndaej jin'jeng. 29Bihlazdoz zoq og daeuj, bae dih paenqdix naeh, hax: "Su gauq goanz naeh gaeng ah?" 30Paenqdix yaeng: "Jixzawh goanz naeh mboq hoak mbowq, gaenqpiu zoq mboq aeu dix hawj mawz eh." 31Bihlazdoz hax: "Gaenqsu haeggaj zowz dix bae, haeggaj nganq fahlih su saenxpanq dix ndeh." Puj saeq puj Yaeuhtaiq hax: "Gaj daengz gaenqpiu saenxpanq dix, gaenqpiu goj mboq miz qenhliq kaj dix.#18:31 Zwz nawh mizgaj puj saeq Loahmax miz qenhliq hax gawz hoak loang hoj tai, mizgaj paenqdix miz qenhliq kaj goanz." 32Yezsuz ndaej hax hoakri rux hoakzaqrawz tai, gannaeh paenqdix hoakzaqnaeh hoak, bae'naj zoq hawj gaemz Yezsuz ndaej hax naeh baenzzaeh.#Yezhanq 12:32-33. 33Bihlazdoz daeuq ndonj mwz dih dix ndowj naeh, yaq rongx Yezsuz maz, daj Yezsuz hax: "Mawz zawh laux hongz puj Yaeuhtaiq vah?" 34Yezsuz yaeng: "Gaemz naeh zawh mawz haeggaj hax rux gau daenh laemh now to gux naeh daj mawz hax mux?" 35Bihlazdoz hax: "Gux zawh puj Yaeuhtaiq maj? Dij goanz goh mawz daj sowh puj gvanx puj mbud dij Sen aeu mawz hawj gux, mawz hoak saeh raeng mux?" 36Yezsuz yaeng: "Goh gux mboq zawh gaenq dihndin. Jixzawh goh gux zawh gaenq dihndin, sowh puj baihdawj gux naeh zoq saeh gux gaenx yah, zoq mboq hawj gux doak bae dawj mungz puj saeq puj Yaeuhtaiq yah. Gaj goh gux mboq zawh gaenq dihndin." 37Bihlazdoz daj dix hax: "Haenx, mawz zawh laux hongz lox?" Yezsuz yaeng: "Zawh gaemz mawz hax naeh. Gux swn daeuj dihndin, zawh aeu kauqjing haxdoq daenh. Gawz daeq ka loh kauqjing naeh, gawz zoq biak kauq gux." 38Bihlazdoz cham dix: "Kauqjing wznaex?" Bihlazdoz hax gaemz naeh yaq, daeuq og daeuj dih puj saeq puj Yaeuhtaiq naeh, daj paenqdix hax: "Gux lez mboq og dix hoak loang gaeng hoj chaenxfah gah. 39Taeng Jeng Gvaq zwzrawz, gaenqsu zauh hawj gux zoangq goanz puj kaeng lauz ux hawj su, gaenqsu venq hawj gux zoangq laux hongz puj Yaeuhtaiq vah?" 40Paenqdix daeuq caqsiq rongx: "Mboq aeu dix gah, aeu Bazlazbaz!" Laemh goanz Bazlazbaz naeh luanq hoak luanq bae, luanq kaj goanz.

Currently Selected:

Yezhanq 18: ZHN

Highlight

Copy