Yezhanq 12

Maxliqyaq Aeu Sowh Yuzsaw Hom Yowngh Hom Naeh Daz Din Yezsuz

1Daekgoanq Jeng Gvaq choak vaenz, Yezsuz mwz longq Boahdaqnih naeh, zoq zawh longq Lazsazluq goanz Yezsuz hawj dix daeuq zaeu naeh. 2Miz dij goanz yuq dih naeh qingj Yezsuz mwz jinkaeuj. Maxdaq goj mwz kvej, Lazsazluq daj puj ndai daj Yezsuz zaemh naengh zongz jinkaeuj. 3Maxliqyaq aeu gaen yuzsaw hom yaengh hom ux maz, ndaw yuzsaw miz sowh nahdah biangz taeuq naeh dwk. Dix aeu gaenq naeh daz din Yezsuz, daeuq aeu koanto hoakri dix bae jiat. Ndaw rownz mizgaj sowh yai hom naeh. 4Cohsaenz Yezsuz Yaeuhdaq, goanz dij goanz Zazyoah, goanz doaklaeng aeu Yezsuz kai hawj sowh puj daj Yezsuz hoak dangqbaih naeh, 5dix hax: "Baenzzaqrawz mboq aeu gaenqhom naeh kai sam baeg dowhnah#12:5 Zwz naeh goanz puj hoak gaengx ux hoak gaengx vaenz ux zoq ndaej dowhnah ngaenz ux. yaq aeu saeh puj luk mux?" 6Dix hax gaemz kauq naeh, mboq zawh dix nwh puj luk zaeh, zawh dix zawh puj laek, dix gaem jenz cohsaenz Yezsuz, kwnz jin jenz daengzle. 7Yezsuz hax: "Laek hax dix, dix hoakzaqnaeh hoak zawh hoak nyaengx vaenz aeu gux moak naeh. 8Bae'naj, gaenqsu lej mboq ndaej daj gux zaemh yuq, gaj gaenqsu saeh puj baenzluk lej naengz miz jizhoiq lai."

9Puj Yaeuhtaiq miz yaengh boangx dwx ruxnyinz Yezsuz yuq Boahdaqnih, paenqdix zoq maz, gaj paenqdix mboq zawh cho gaj Yezsuz, paenqdix goj maz lez Lazsazluq, goanz tai yaq Yezsuz hawj daeuq zaeu naeh. 10-11Puj Yaeuhtaiq miz goanz lai taeuq, cholaeng Lazsazluq, paenqdix mboq nowngz sowh goanz gvanx puj mbud dij Sen naeh, maz sinq Yezsuz. Baenzzaqnaeh sowh goanz gvanx puj mbud dij Sen naeh, paenqdix dwkgangz daz kaj daengz Lazsazluq.

Yezsuz Mwz Yezluqsaxlaengx, Goanzlai Daeuj Raep Dix

12Vaenzlaeng, sowh puj haeuz mwz Yezluqsaxlaengx jin'jeng naeh miz goanz raengh taeuq, paenqdix ruxnyinz hax Yezsuz zaekgaj maz taeng Yezluqsaxlaengx, 13zoq gaem ngah maexmba'baet bae raep dix, paenqdix caqsiq rongx:

"Hoahsanxnah!#12:13 Hoahsanxnahzawh kauq Cizboahlaiz, zoq zawh hax: "Vanz mawz jeuq piu." Jeh Yezsuz naeh puj Yaeuhtaiq aeu gaemz naeh biangz dij Sen.

Ngwz dij Sen gumx goanz dij Sen nemz daeuj naeh!#12:13 Gaemz kauq naeh haeuz yuq Sw Lownx 118:26.

Ngwz dij Sen gumx laux hongz Yixsowhleh!"

14 Yezsuz cha ndaej do dij loix ex ux, zoq kviq mwz now dix, daj ndaw Sw Dij Sen mai naeh dungzlumj, ndaw Sw Dij Sen hax:

15"Dij goanz ndaw Ciz'anz aj,#12:15 Ciz'anzzoq zawh hax Yezluqsaxlaengx chaenh. laek mbu.

Su lez, laux hongz su kviq dij loix ex maz yah."#Saxzazliqyaq 9:9.

16Mbaednduq cohsaenz Yezsuz mboq ruxndeq le gaenq vaenz gaengnaeh zawh hax gaeng, taengdeg Yezsuz tai yaq daeuq zaeu, ndaej najta yaq, paenqdix zux nwh taeng suq kauq ndaw Sw Dij Sen mai naeh, zux ruxndeq suq kauq naeh zawh hax Yezsuz daj sowh gaenq goanzlai hoak bae doq Yezsuz naeh.

17Koax daekgoanq Yezsuz rongx Lazsazluq daeq ndaw ngomz mohbujreuh og daeuj, hawj Lazsazluq daeuq zaeu naeh, sowh dij goanz daj Yezsuz zaemh yuq naeh, leztaen zoq aeu mbaed saeh naeh bae goq koanx koanx dwk goanzlai. 18Baenzzaqnaeh goanzlai ruxnyinz sowh saeh ndaw fax Yezsuz hoak naeh, zoq bae raep dix. 19Dij goanz Fahliqsaiq zoq goanz lej daj goanz hax: "Su lez, dij goanz dawj fax bae nowngz dix nauq eh, gaenqraeuz deaz dih hoak rawz mboq miz mah!"

Puj Cizlah Zawx Taen Yezsuz Ta Ux

20Sowh dij goanz mwz Yezluqsaxlaengx jin'jeng, biangz dij Sen naeh, mbangj goanz zawh puj Cizlah.#12:20 Inxnaeh hax puj Cizlah ingj mboq zawh hax gaj puj Cizlah, ingj rux zawh hax daengzle sowh puj mboq zawh puj Yaeuhtaiq naeh. 21Paenqdix bae dih cohsaenz Yezsuz goanz rongx hoak Faezliq naeh. Goanz naeh zawh dij goanz ndaw mbanj Zazliqliq longq Boahsaiqdaq naeh. Paenqdix daj dix hax: "Cuh aj, gaenqpiu zawx taen Yezsuz ta ux." 22Faezliq bae haxdoq Anzdowhleh, Anzdowhleh zoq daj Faezliq zaemh bae haxdoq Yezsuz. 23Yezsuz hax: "Taeng zwz dij Sen hawj Lug Dij Goanz ndaej najta yah. 24Gux haxdoq su swhlit, maet kaeujmeg ux jixzawh mboq doak bae ndaw namh tai yaq, naengzgaj zawh maet doag. Jixzawh doak bae ndaw namh tai yaq, ngaed, maj zoq og rongz ndaej lai maet taeuq. 25Gawz ngaiq gaj aen mingh dihndin naeh, gawz zoq laem aen mingh daengznauq naeh. Gawz venq viangh aen mingh dihndin naeh, gawz zoq ndaej aen mingh daengznauq naeh. 26Gawz kvej gux, zoq baenz nowngz gux; gux yuq rawz, sowh dij goanz kvej gux naeh goj yuq rawz. Gawz kvej gux, Dez gux toj zaenzzungq dix mboqyaq."

27"Gannaeh ndaw zaw gux dij taeuq, gux hax gaeng ndae nyeuz nix? Hax gaemz naeh maj: ‘Dez aj, jeuq gux ni sowh gaunaeh.’ Gaj gux zawh cho gaenqnaeh daeuj. 28Dez aj, hawj daenh leztaen najta mawz!" Gau gaengnaeh miz hiang kauq daeq ndaw fax daeuj, hax: "Gux haeuz hawj daenh leztaen najta gux, naengz daeuq hawj paenqdix leztaen najta gux." 29Sowh goanzlai yuq haenz in naeh ruxnyinz hiang gaengnaeh yaq, mbangj goanz zoq hax: "Faxumj yah." Goj miz dij goanz hax: "Miz bin dij Sen daj dix hax kauq." 30Yezsuz hax: "Hiang naeh mboq zawh cholaeng gux chung, zawh cholaeng su chung. 31Mbaenqnaeh zawh zwz dij goanz dihndin zoah saenxpanq. Mbaenqnaeh do gvanx dihndin gaengnaeh zoah daem og nog.#12:31 Inxnaeh hax do gvanx dihndin gaengnaehzoq zawh hax: "do pi dwx nyeuz daengzle naeh." 32Zwz gux daeq dihndin zoah yaeuj mwz naeh, gux zoq lingz daengzle maz zawj gux." 33Yezsuz hax dix zoah yaeuj mwz zawh hax dix rux zoah hoakzaqrawz tai. 34Yaq goanzlai daj dix hax: "Gaenqpiu ruxnyinz ndaw Sw Dij Sen hax, Jizduz zaeu daengznauq.#Lownx 89:36. Gaj mawz baenzzaqrawz hax: ‘Lug Dij Goanz daeq dihndin zoah yaeuj mwz zuxbaenz’ mawj? Goanz Lug Dij Goanz naeh zawh gawz ah?" 35Yezsuz hax: "Gaenqrungh yuq dih su mboq ndowj yah. Gannaeh naengz miz gaenqrungh, gaenqsu baenz daeq yah, yaj zawj su hubhaeb gaj dih gaj ndaem. Sowh puj yuq dih ndaem daeq naeh, mboq ruxndeq bae rawz. 36Gannaeh naengz miz gaenqrungh, gaenqsu baenz sinq gaenqrungh naeh, hawj su baenz yaiz lug gaenqrungh." Yezsuz hax suq kauq naeh yaq, zoq ni paenqdix lamq mwz rawz mwz.

Puj Yaeuhtaiq Mboq Sinq Yezsuz

37 Yezsuz yuq doqnaj paenqdix hoak sowh saeh ndaw fax naeh lai taeuq, gaj paenqdix goj naengzgaj mboq sinq dix. 38Paenqdix mboq sinq dix zoq teu kauq Yixsaiqyaq, goanz puj zawxkauq hax naeh, hawj suq kauq dix hax naeh baenz zaeh. Yixsaiqyaq hoakzaqnaeh daj dij Sen hax:

"Zaeuj aj, gaenq gaenqraeuz laemh dwk daenh naeh, miz gawz sinq mux?

Mawz hawj gawz ruxndeq doakriangz mawz mux?"#12:38 Gaemz kauq naeh yuq Sw Yixsaiqyaq 53:1.

39Baenzzaqrawz paenqdix mboq rux sinq? Zawh Yixsaiqyaq goj ndaej hax:

40"Dij Sen hawj ta paenqdix mbud,

hawj zaw paenqdix hax nyaeb,

Yaj ta paenqdix leztaen,

ndaw zaw paenqdix ruxndeq,

Yaj paenqdix dauh maz doq gux,

gux zoq ya paenqdix ndae."#12:40 Le gaemz naeh haeuz yuq Sw Yixsaiqyaq 6:9-10.

41 Yixsaiqyaq hax suq kauq naeh zawh Yixsaiqyaq haeuz leztaen najta Jizduz, suq kauq naeh zawh hax Jizduz.

42Daengz baenzzaqnaeh, puj saeq goj miz goanz lai sinq Yezsuz. Gaj paenqdix mboq ganz yuq doqnaj doqta daengzle yinq paenqdix sinq Yezsuz, jixzawh paenqdix yuq doqnaj daengzle yinq paenqdix sinq Yezsuz, dij goanz Fahliqsaiq rux daem paenqdix ni rownzndawcowq. 43Paenqdix mboq yuq doqnaj daengzle yinq paenqdix sinq Yezsuz zawh paenqdix ceu hawj dij goanz haenh nyeuz ceu hawj dij Sen haenh.

44 Yezsuz caqsiq hax: "Gawz sinq gux, mboq zawh sinq gaj gux, goj zawh sinq laux nemz gux daeuj naeh. 45Gawz leztaen gux, zoq zawh leztaen laux nemz gux daeuj naeh. 46Gux zawh gaenqrungh, gux daeuj dihndin hawj sowh puj sinq gux naeh daengzle yuq dih ndaem ndowj gah. 47Gux daeuj dihndin mboq zawh daeuj saenxpanq dij goanz, zawh daeuj jeuq dij goanz dihndin, baenzzaqnaeh, dij goanz gawz ruxnyinz kauq gux yaq mboq biak, mboq zawh gux haeggaj saenxpanq dix. 48Sowh dij goanz viangh gux, mboq zaemz kauq gux naeh, haeggaj miz gaenq saenxpanq dix, vaenz now ndin mowd naeh zawh sowh kauq gux koanx naeh saenxpanq dix, hax dix hoak loang gaeng. 49Baenzzaqrawz mah? Gux mboq zawh pinh hoakri gux koanx, zawh Dez nemz gux daeuj naeh nemz gux, hawj gux hax gaeng, koanx gaeng. 50Gux goj ruxndeq gaenq dix nemz naeh zawh hawj dij goanz zaeu daengznauq. Baenzzaqnaeh, sowh gaenq gux koanx naeh zoq zawh gaenq Dez nemz gux koanx naeh."

Currently Selected:

Yezhanq 12: ZHN

Highlight

Copy