Yezhanq 11

Lazsazluq Tai

1Miz goanz puj chaej ux, minxzwh rongx hoak Lazsazluq, dix zawh dij goanz ndaw Boahdaqnih, song goanz jex dix Maxliqyaq daj Maxdaq yuq longq naeh ndowj. 2Laemh goanz Maxliqyaq naeh zoq zawh goanz doaklaeng aeu sowh yuzsaw hom yaengh hom naeh daz din Zaeuj, yaq naengz aeu koanto dix jiat din Zaeuj kawq naeh. Lazsazluq goanz nongx zaiz paenqdix naeh baenzchaej. 3Maxliqyaq daj Maxdaq nemz dij goanz bae dih Yezsuz naeh haxdoq Yezsuz: "Zaeuj aj, goanz mawz nwh naeh baenzchaej yah." 4Yezsuz ruxnyinz, zoq hax: "Aen chaej naeh mboq rux hawj dix tai daengznauq, zawh hawj daenh leztaen najta dij Sen. Dij Sen aeu aen chaej naeh hawj daenh leztaen lug zaiz dix miz najta."

5 Yezsuz daeq zwzrawz maz bwnz nwh Maxdaq, Maxliqyaq, Lazsazluq. 6Baenzzaqnaeh dix ruxnyinz Lazsazluq baenzchaej, naengz yuq dih gaeuq dix ndowj naeh ndowj song vaenz. 7Doaklaeng dix daj cohsaenz dix hax: "Gaenqraeuz daeuq mwz mbanj Yaeuhdaq eh." 8Cohsaenz dix hax: "Lazbix, vaenzranz naeh puj saeq puj Yaeuhtaiq daz aeu tin saeuh mawz, mawz naengz mwz dih naeh maj?" 9Yezsuz hax: "Zang'vaenz mboq zawh miz sipngih aen zungztaeuh maj? Jixzawh dij goanz zang'vaenz daeq loh, dix leztaen gaenqrungh dawj fax naeh, dix zoq mboq rux faedlaemx. 10Jixzawh dij goanz zang'hwnz daeq loh, ndaw hoakri dix mboq miz gaenqrungh, dix toj faedlaemx mboqyaq." 11Yezsuz hax gaemz kauq naeh yaq, dix daeuq daj paenqdix hax: "Dungzbownh raeuz Lazsazluq noanzlaep, gux mwz byoak dix." 12Cohsaenz dix hax: "Zaeuj aj, jixzawh dix zawh noanzlaep, zoq rux daeuq ndae maz." 13Yezsuz hax gaemz naeh zawh hax Lazsazluq haeuz tai yaq, gaj cohsaenz dix faeklaih dix zawh hax noanzlaep zaeh. 14Yaq Yezsuz zoq haxdoq paenqdix swhlit: "Lazsazluq haeuz tai yaq yaj. 15Gux mboq yuq dih Lazsazluq naeh, zawh cholaeng hawj su gajfa sinq gux baenz, baenzzaqnaeh gux how su zaemz. Gannaeh gaenqraeuz mwz dih dix naeh eh." 16Dozmax goanz rongx hoak Lugsoah naeh, daj cohsaenz ndai hax: "Dix hax mwz, venj mbeh'ej, gaenqraeuz goj daj dix zaemh mwz tai eh."

Zawh Yezsuz Hawj Dij Goanz Daeuq Zaeu, Zawh Dix Aeu Aen Mingh Hawj Dij Goanz

17 Yezsuz mwz taeng longq Boahdaqnih, zoq ruxndeq Lazsazluq haeuz nyaengx ndaw ngomz mohbujreuh ndaej siq vaenz. 18Laemh longq Boahdaqnih naeh daj Yezluqsaxlaengx chaenh dungzliq mboq gvae lai, miz teq siphaj swztazdih ux naeh.#11:18 Siphaj swztazdih gvae teq cho liz ux naeh. 19Puj Yaeuhtaiq miz goanz lai taeuq daeuj lez Maxdaq daj Maxliqyaq, nongx zaiz doiq naeh mboq miz, paenqdix daeuj byongz doiq naeh. 20Maxdaq ruxnyinz Yezsuz maz, zoq bae raep dix, gaj Maxliqyaq naengz yuq ndaw rownz naengh. 21Maxdaq daj Yezsuz hax: "Zaeuj aj, jixzawh mawz maz taeng inxnaeh zaeux tem, nongx zaiz gux zoq mboq rux tai eh. 22Daengz gannaeh, gux goj ruxndeq, daengz mawz daj dij Sen vanz gaeng, dix goj hawj mawz mboqyaq." 23Yezsuz hax: "Nongx zaiz mawz daeuq zaeu mboqyaq." 24Maxdaq hax: "Gux ruxndeq taeng vaenz now ndin mowd, vaenz hawj dij goanz daeuq zaeu naeh zwzrawz, dix toj daeuq zaeu." 25Yezsuz hax: "Zawh gux hawj dij goanz daeuq zaeu, zawh gux aeu aen mingh hawj dij goanz. Sowh puj sinq gux naeh, daengz tai yaq, goj rux daeuq zaeu mboqyaq. 26Sowh dij goanz naengz zaeu sinq gux naeh, toj mboq rux tai daengznauq. Mawz sinq gaemz kauq naeh vah?" 27Maxdaq hax: "Zaeuj aj, zawh lox, gux sinq mawz zawh Jizduz, zawh lug zaiz dij Sen, zawh goanz dij Sen ndaej hax toj rux daeuj dihndin naeh."

Yezsuz Haej

28 Maxdaq hax suq kauq naeh yaq, zoq dauh mwz rongx nongx nyingz dix Maxliqyaq, dix lupliamx daj nongx dix hax: "Lauxswz maz yah, dix rongx mawz." 29Maxliqyaq ruxnyinz, cenq dwnq maz, bae dih Yezsuz naeh. 30Gau gaengnaeh, Yezsuz naengz mboq ndonj maz ndaw longq, naengzgaj yuq dih Maxdaq bae raep dix naeh. 31Sowh puj Yaeuhtaiq daeuj rownz Maxliqyaq byongz Maxliqyaq naeh, leztaen Maxliqyaq gajbaeuh-gajbeh og nog, zoq nowngzlaeng dix bae, faeklaih dix bae dih ngomz mohbujreuh naeh haej. 32Maxliqyaq bae taeng dih Yezsuz naeh, dix leztaen Yezsuz, zoq gvih bae doqnaj Yezsuz, hax: "Zaeuj aj, jixzawh mawz maz taeng inxnaeh zaeux tem, nongx zaiz gux zoq mboq rux tai eh." 33Yezsuz leztaen dix haej, goj leztaen sowh puj Yaeuhtaiq daj Maxliqyaq zaemh daeuj naeh haej, ndaw zaw dix zoq jih taeuq, daengz ndaeng saemj nauq, 34zoq hax: "Gaenqsu aeu dix mwz nyaengx rawz ah?" Paenqdix hax: "Zaeuj aj, mawz daj piu zaemh mwz lez." 35Yezsuz haej. 36Puj Yaeuhtaiq zoq hax: "Mawz lez, dix nwh goanz naeh baenzzaqnaeh." 37Gaj paenqdix miz goanz hax: "Daengz puj ta'mbud dix naengz rux daeuq hawj leztaen, dix laek hawj goanz naeh tai mboq baenz maj?"

Lazsazluq Daeuq Zaeu

38 Yezsuz daeuq jih taeuq, maz taeng baihnaj mohbujreuh. Aen mohbujreuh naeh zawh aen ngomz ux, baeg ngomz miz kvaix tin ux dingz. 39Yezsuz hax: "Ngex kvaix tin naeh ni." Maxdaq, jex goanz tai naeh, daj dix hax: "Zaeuj aj, dix haeuz mboq miz ndaej siq vaenz yaj, ndang dix toj maennaeuh mboqyaq." 40Yezsuz yaeng dix: "Gux mboq ndaej daj mawz hax yaq mawx ‘Jixzawh mawz sinq, zoq leztaen dij Sen miz najta baenzzaqrawz mboqyaq.’" 41Yaq paenqdix ngex kvaix tin gaengnaeh ni. Yezsuz ngangh to lez mwz ndaw fax, hax: "Dez aj, gux mbaiq mawz, unj mawz haeuz biak gux daj mawz hax kauq. 42Gux le dauq ruxndeq mawz zwzzwz biak gux daj mawz hax kauq naeujgoax, gaj gux yuq doqnaj boangx goanz in yuq haenz naeh hoakzaqnaeh mbaiq mawz zawh cholaeng hawj paenqdix sinq gux zawh mawz nemz daeuj." 43Hax gaemz kauq naeh yaq, zoq caqsiq rongx: "Lazsazluq, og daeuj!" 44Goanz puj tai gaengnaeh zoq og daeuj, mungz dix daj ka dix miz paeng toq, naj dix miz jiatnaj toq. Yezsuz hax: "Hih paeng ndaw ndang dix ni, hawj dix daeq!"

Dij Goanz Ndaw Hoiq Puj Yaeuhtaiq Dwkgangz

45Sowh puj Yaeuhtaiq maz lez Maxliqyaq naeh, miz goanz lai taeuq, leztaen sowh saeh Yezsuz hoak naeh, zoq sinq Yezsuz. 46Gaj paenqdix goj miz dij goanz bae dih dij goanz Fahliqsaiq naeh, aeu sowh saeh Yezsuz hoak naeh haxdoq paenqdix. 47Yaq sowh goanz gvanx puj mbud dij Sen naeh daj dij goanz Fahliqsaiq zoq rongx daengzle dij goanz ndaw hoiq puj Yaeuhtaiq #11:47 Dij Goanz Ndaw Hoiq Puj Yaeuhtaiq zawh puj Yaeuhtaiq, paenqdix gvanx puj Yaeuhtaiq hoakri, puj Yaeuhtaiq miz gaeng saeh zawh hawj paenqdix paeg. maz dwkgangz, paenqdix hax: "Goanz naeh hoak sowh saeh ndaw fax naeh lai taeuq, gaenqraeuz hoakzaqrawz hoak mux? 48Jixzawh gaenqraeuz jizzaz dix hoakzaqnaeh, gawz goj sinq dix. Dij goanz Loahmax zoq daeuj longx rownz dij Sen raeuz, longx puj Yaeuhtaiq raeuz." 49Gaj paenqdix miz goanz ux rongx hoak Gaizyaqfah, bi gaengnaeh zawh goanz naeh hoak puj mbud dij Sen goanz saeq dwx nyeuz daengzle naeh. Goanz naeh daj paenqdix hax: "Gaenqsu gaeng goj mboq ruxndeq, 50goj mboq nwh, goanz ux daeb goanzlai tai, mboq hawj sowh dij goanz hoakri naeh lown, gaenqnaeh doiq su ndae." 51Dix hoakzaqnaeh hax gaemz kauq naeh, mboq zawh hoakri dix haeggaj nwh taeng, zawh bi gaengnaeh dix hoak puj mbud dij Sen goanz saeq dwx nyeuz daengzle naeh, baenzzaqnaeh dij Sen hawj dix hax mwznaj Yezsuz rux daeb puj Yaeuhtaiq tai. 52Yezsuz mboq zawh cho gaj puj Yaeuhtaiq tai, goj zawh cho puj yowngh ndai tai, nanghgaj zawh lug dij Sen puj gaeng gojndae, yuq dungzgvae gajrawz goj rongx maz zaemh yuq, hoak boangx ndeu. 53Daeq vaenz gaengnaeh maz, paenqdix zoq dwkgangz kaj Yezsuz. 54Baenzzaqnaeh, Yezsuz mboq yuq mbanj Yaeuhdaq naeh yuq doqnaj doqta daenh hoak gaeng. Dix ni dih gaengnaeh, bae aen chaenh rongx hoak Yixfahleanh naeh, dix daj cohsaenz dix yuq aen chaenh naeh ndowj, aen chaenh naeh yuq haenz doanghmowz. 55Zaekgaj taeng Jeng puj Yaeuhtaiq Jeng Gvaq naeh. Naengz mboq taeng Jeng, miz goanz lai taeuq daeq ka'mowngz mwz Yezluqsaxlaengx chaenh, mwz dih naeh hoak sowh gaenq zauh hawj hoakri saw naeh. 56Paenqdix yuq ndaw Yezluqsaxlaengx cha Yezsuz, gau paenqdix yuq rownz dij Sen in naeh, goanz lej daj goanz hax: "Gaenqsu hoakzaqrawz nwh mux? Dix mboq maz jin'jeng naeujbojleh?" 57Sowh goanz gvanx puj mbud dij Sen naeh daj dij goanz Fahliqsaiq haeuz ndaej yaix daenh, jixzawh miz gawz ruxndeq Yezsuz yuq rawz, zoq maz haxdoq paenqdix, hoakzaqnaeh paenqdix zoq bae gaep dix.

Currently Selected:

Yezhanq 11: ZHN

Highlight

Copy