Zwz Nduq 12

Dij Sen Hawj Yaqbozlanh Ni Rownz Dix

1Miz vaenz ux Yez'hoahhuah daj Yaqbozlanh hax:

"Mawz ni goakrownz mawz,

Ni changzrownz mawz,

Ni rownz dez mawz,

Mwz dih gux haeggaj lingz mawz mwz naeh.

2Gux hawj luglan mawz raengh huhhuh,

Hawj paenqdix baenz goh dwx,

Gux gumx mawz,

hawj daenh aeu zwh mawz hoak dwx,

puj ndai ndaelaeng mawz.

3Gawz doiq mawz ndae, gux zoq gumx dix.

Gawz lezmboqqix mawz, gux zoq fah dix.

Gux cholaeng mawz gumx dij goanz dihndin, changz rawz goj gumx."

4 Yaqbozlanh zoq biak dij Sen ni Hazlanh. Loahdowq goj daj dix zaemh mwz. Zwz Yaqbozlanh ni Hazlanh naeh dix ndaej qiatsip-haj bi. 5Yaqbozlanh zowz mez dix Sazlaih, Loahdowq goanz lug zaiz goz dix naeh, boangx puj koij dix daeq ndaw Hazlanh mwz Zaznanh. Tw za'hoq daj ndaq doihdo ndaw Hazlanh mwz nauq. Paenqdix mwz taeng Zaznanh yaq, 6naengz goj mwz mwz, mwz taengdiak Swqjenq, dih go mbamq maex dwx Moahliq naeh. Zwz naeh, puj Zaznanh naengz yuq dih naeh ndowj. 7Dij Sen daeuj daj Yaqbozlanh hax: "Gux aeu dih inxnaeh hawj luglan mawz." Yaqbozlanh yuq dih dij Sen hawj dix taen naeh hoak aen kuq tin mbud dij Sen ux. 8Doaklaeng, dix daeq dih gaengnaeh ban mwz ndaw bo. Bo paenqdix ban mwz naeh zawh yuq jinghzang longq Boztowhliq daj longq Aiq. Bo naeh baihtang'vaenz'og zawh longq Aiq, baihtang'vaenzdoak zawh longq Boztowhliq. Yaqbozlanh yuq dih naeh daengj zangjpungh, dix goj yuq dih naeh daengj aen kuq tin ux aeu mbud Yez'hoahhuah, aeu Yez'hoahhuah hoak dij Sen maengx. 9Doaklaeng Yaqbozlanh daeuq ban, gaj ndowj gaj ban bae Nanqdiq.

Yaqbozlanh Bae Aizjih

10Zwz naeh, Zaznanh kaeujpyaek mboq yawz, jenjyaeg. Baenzzaqnaeh Yaqbozlanh zoq ban bae taeng Aizjih, yuq dih naeh ndowj goanq. 11Zwz paenqdix zaekgaj bae daeux Aizjih naeh, Yaqbozlanh daj mijmez dix Sazlaih hax: "Mawz lez, mawz najta yawz, 12puj Aizjih leztaen mawz, daenh rux hoakzaqnaeh hax mboqyaq, hax mawz zawh mez gux. Hoakzaqnaeh daenh kaj gux leux gaj mawz. 13Mawz haxdoq daenh mawz zawh nongx nyingz gux, gux zoq cholaeng mawz ndaej yuqvangq, ndaej yuqndae, daenh zoq cholaeng mawz mboq kaj gux." 14Paenqdix hiamq bae taeng Aizjih, puj Aizjih leztaen mijmez dix najta yawz. 15Puj saeq baihdawj laux hongz Aizjih, miz goanz leztaen Sazlaih, zoq yuq doqnaj laux hongzAizjih hax Sazlaih yawz. Yaq Sazlaih zoah daenh zowz mwz rownz laux hongz Aizjih. 16Cholaeng Sazlaih laux hongzAizjih doiq Yaqbozlanh ndae taeuq, zoq aeu dij moaz, dij mbej, loahtoah, dij loix taek, dij loix meh, puj koij zaiz, puj koij nyingz, aeu le gaenqnaeh hawj dix lai yaengh lai.

17Gaj Yez'hoahhuah cholaeng laux hongz Aizjih zowz Sazlaih goanz mez Yaqbozlanh naeh mwz, dix zoq hawj laux hongzAizjih daj dij goanz yuq rownz laux hongzAizjih naeh baenzchaej naek. 18Yaq laux hongzAizjih zoq rongx Yaqbozlanh maz, cham dix: "Mawz baenzzaqrawz daj gux hoakzaqnaeh hoak? Baenzrawz mboq haxdoq gux dix zawh mez mawz? 19Baenzrawz hax dix zawh nongx nyingz mawz, yaq hawj gux raep dix mawj? Mez mawz yuq inxnaeh, zowz dix bae ndeh." 20Yaq laux hongz Aizjih nemz dij goanz soangq Yaqbozlanh daj mez dix bae, soangq daengz doihdo dix daj suq za'hoq dix bae nauq.

Currently Selected:

Zwz Nduq 12: ZHN

Highlight

Copy