Zawxkauq 27

Bauxloah Naengh Lowz Mwz Loahmax Chaenh

1 Faezsezduz hawj piu naengh lowz bae mbanj Yiqdaqliq dih Kaixsax yuq naeh. Dix hawj goanz leanhzangx ux soangq Bauxloah daj puj kaenglauz ndai bae. Minxzwh goanz leanhzangx naeh rongx hoak Yaeuhleuh, Yaeuhleuh zawh bin buqdoiq rownzhongz Loahmax. 2Miz aen lowz ux daeq Yaqdaqmixteanh maz, daz daeq mwz baih mbanj Yaqciqyaq naeh, gaenqpiu zoq kwnj mwz aen lowz naeh. Miz goanz ux daeq Tehsaxloahnihzaz chaenh maz, dix zawh dij goanz Maxqihdunq, minxzwh dix rongx hoak Yaqlixdahgux, dix daj piu zaemh mwz. 3Vaenzlaeng gaenqpiu mwz taeng Cizdunq chaenh. Yaeuhleuh doiq Bauxloah ndae taeuq, hawj Bauxloah bae lez dungzbownh dix. Hoakzaqnaeh dungzbownh Bauxloah aeu gaenqjin gaenqnungh hawj Bauxloah. 4Yaq gaenqpiu daeuq naengh lowz loangzdin dihnaeh. Miz laemz baeuq maz naj lowz piu, mwz naj raix gvaq, aen lowz piu naengh naeh zoq bae Saiqpuxluqsez haixdaux, bae baih laemz baeuq mboq zoah naeh.#27:4 Aen lowz paenqdix naengh naeh, ndaw dix miz saeu, boaj saeu miz mbangh paeng kven, laemz baeuq zoah mbangh paeng naeh lowz zoq chaeg. 5Gaenqpiu gvaq zoah haenz mbanj Jizliqzaz daj mbanj Panghfaezliqyaq naeh, mwz taeng dihliangx Maexlaz chaenh, Maexlaz chaenh yuq ndaw mbanj Loixzaz. 6Yaeuhleuh goanz Lenhzangx gaengnaeh yuq dih naeh cha mex aen lowz ux daeq Yaqlihsanzdaq chaenh maz. Aen lowz naeh daz mwz mbanj Yiqdaqliq. Dix zoq daj piu kwnj mwz aen lowz naeh. 7Jijgaj vaenz dungzdam, lowz mwz bwnq taeuq, ndowj ndowj zux mwz taeng doiqfaeg Gowhnihtux chaenh. Miz laemz dwx baeuq maz naj lowz piu, mwz naj raix gvaq, aen lowz piu naengh naeh zoq bae Kowhlixtowh haixdaux, bae baih laemz baeuq mboq zoah naeh, gvaq zoah doiqfaeg Saxmoahnih chaenh. 8Lowz daeq haenz dihliangx mwz, doanghloh mwz raix taeuq, hoakrawzraeuh zux mwz taeng dih rongx hoak Baeghaij Yawz naeh, dih naeh yuq haenz Lazcizyaq chaenh.

9Gaenqpiu dangzgoah lai vaenz taeuq, Jeng jenjkaeuj hoakri naeh haeuz gvaq yaq,#27:9 Jeng jenjkaeuj hoakri naeh rownzsaeq ingj zawh Ndown'jip. Jeh naeh, dih paenqdix rux miz laemz dwx daj miz paen. ndauj naeh lowz yuq ndaw haij nyinzndang taeuq, Bauxloah zoq chownq daengzle: 10"Daengzle, gux lez maz, jixzawh gaenqraeuz mboq ced, naengz gaj mwz naj, mboq zawh hax rux laem gaj aen lowz daj za'hoq, daengz aen mingh raeuz naengz dohbaeuh." 11Gaj leanhzangx sinq kauq goanz zangxngoah lowz naeh daj zaeuj lowz, mboq biak kauq Bauxloah. 12Baeghaij Yawz naeh goj mboq zawh dih hoh zwzgoangj aeu lowz nyaengx. Baenzzaqnaeh goanzlai venq naengh lowz ni, ndaw zaw nwh mbangjbaez mwz taeng Faeznihjiz chaenh ndaej, yuq ndaw Faeznihjiz ndowj goanq, taj zwzgoangj gvaq yaq goanq daeuq mwz naj. Faeznihjiz yuq baeghaij Kowhlixtowh haixdaux, baeghaij Kowhlixtowh haixdaux naeh miz baih ux ueq mwz doq baih ciznanh, miz baih ux ueq mwz doq baih cizbowh.

Ndaw Haij Miz Laemz Dwx

13Sowh gaunaeh, miz chaq laemz ix ux daeq baih nanhfangz baeuq maz, paenqdix faeklaih mwz naj baenz yaj, zoq caeu koaliak aeu lamh lowz hawj lowz ced naeh, bae ka haenz Kowhlixtowh haixdaux naeh. 14Gaj mboq ndowj lai, miz laemz dwx daeq baih Kowhlixtowh naeh baeuq maz, sowh laemz naeh minxzwh rongx hoak Yaeuxlazgowhloah. Yaeuxlazgowhloah zoq zawh hax laemz dwx baih dungzbowh. 15Lowz zoah laemz dwx baeuq, mwz naj mboq baenz, gaenqpiu dih hoakrawz mboq miz, jizzaz lowz ngaiq bae baih rawz zoq bae baih rawz. 16Doaklaeng bae taeng aen haixdaux ix ux minxzwh rongx hoak Gauzdaq. Aeu lowz piu naengh naeh miz aen lowz ix ux, aeu leux jeuq mingh, zwzndai kwnz aeu laemh baih laeng aen lowz dwx naeh. Gaenqpiu yuq haenz haixdaux baih laemz baeuq mboq zoah naeh, yuq dih naeh caqsiq taeuq zux laeg ndaej aen lowz ix naeh. 17Puj uaij lowz laeg aen lowz ix naeh kwnj maz ndaw aen lowz dwx naeh yaq, zoq aeu zowg heux daengz aen lowz dwx. Paenqdix mbu lowz rux bae dihpenj Saiq'exdix, paenqdix zoq caeu kvaix paeng now lowz naeh, lowz lae bae rawz, piu zoq zaemh bae rawz. 18Laemz dwx baeuq jinx taeuq, vaenzlaeng paenqdix zoq aeu za'hoq viangh bae ndaw haij. 19Vaenz daih sam, daengz paeng daj zowg paenqdix goj aeu viangh. 20Jijgaj vaenz dungzdam, lez mboq taen tang'vaenz daj ndaundiq, laemz dwx goq baeuq baeuq maz, gaenqpiu nwh maz ingj zoah tai mboqyaq eh. 21Daengzle haeuz jijgaj vaenz mboq jin gaeng, Bauxloah in doqnaj daengzle, dix hax: "Daengzle, jixzawh koax daekgoanq gaenqsu biak kauq gux mboq ni Kowhlixtowh haixdaux, zoq mboq rux laem lai baenzzaqnaeh. 22Gannaeh, gux chownq su, laek mbu, yumq yuq vangqdangh, mizgaj aen lowz naeh rux vaih, gvaqmaz gaenqsu mboq miz saek goanz rux tai. 23Baenzzaqrawz gux hoakzaqnaeh hax mah? Zawh dij Sen gux, dij Sen gux kvej naeh, bin dix haemhvaz in haenz gux, daj gux hax: 24‘Bauxloah, laek mbu, mawz ndaej in doqnaj Kaixsax mboqyaq. Mawz vanz dij Sen, dij Sen haeuz ruxnyinz, hoakzaqnaeh dix goj jeuq sowh dij goanz daj mawz zaemh naengh aen lowz ndeu naeh.’" 25Bauxloah daeuq hax: "Baenzzaqnaeh, daengzle laek mbu yumq yuq vangqdangh. Gux sinq dij Sen hoakzaqrawz daj gux hax, dix zoq hoakzaqrawz hoak baenz mboqyaq. 26Gaj aen lowz gaenqraeuz rux bog zoah aen haixdaux ux mboqyaq."

27Vaenz yuq ndaw haij ndaej sipsiq vaenz naeh, zang'haemh dix, lowz naengzgaj yuq ndaw haij Yaqdowhlixyaq lae bae lae dauh. Teq byonghhwnz ux naeh, puj uaij lowz faeklaih zaekgaj daeux dihliangx yaj, 28zoq aeu zowg viangh bae ndaw naemx daeg, naemx ndaek ngihsip vaz, daeuq mwz naj ixux, daeuq daeg mbaedmawq, naemx ndaek siphaj vaz. 29Paenqdix mbu lowz bog zoah tin, zoq yuq tang lowz zoangq siq koaliak aeu lamh lowz, hawj lowz ced, ngwz fax rungh naeuz kvaiq ux. 30Puj uaij lowz daz lupliamx ni aen lowz dwx naeh, zoq zoangq aen lowz ix aen aeu jeuq mingh naeh bae ndaw naemx, hoakdoi yuq to lowz zoangq sowh koaliak aeu lamh lowz naeh. 31Bauxloah daj leanhzangx daj bin hax: "Jixzawh paenqdix mboq yuq ndaw lowz, gaenqsu tai mboqyaq." 32Yaq bin zoq daek laenj zowg lamh aen lowz aeu jeuq mingh naeh, jizzaz aen lowz ix aeu jeuq mingh naeh lae. 33Sowh gau fax zaekgaj rungh naeh, Bauxloah chownq daengzle jin gaenqjin. Dix hax: "Sipsiq vaenz naeh, gaenqsu yuq mboq vangq mboq dangq, gaeng goj mboq jin. 34Gaenqsu baenzrawz mboq ndaej gah, daengz laenj koanto ux naengz mboq rux baenzrawz, baenzzaqnaeh gux chownq su jin i gaenqjin ux, hoakzaqnaeh zux miz doakriangz." 35Hax gaemz kauq naeh yaq, Bauxloah zoq gaem binx, yuq doqnaj daengzle mbaiq dij Sen, yaq peg binx jin. 36Gaemz kauq Bauxloah hax naeh byongz daengzle, ndaw zaw daengzle yuqvangq nyeuz, zoq jin. 37Gaenqpiu daengzle miz song-baeg-laeng-jiatsip-choak goanz yuq ndaw lowz. 38Daengzle jin imq yaq, zoq aeu kaeujmeg low viangh bae ndaw haij, hawj lowz nawj nyeuz saek'i.

Aen Lowz Bae Dih Pyenj

39Fax rungh maz, paenqdix mboq ruxnaj dih gaengnaeh zawh dih rawz, gaj leztaen dih utgoaz ux miz raiq ux. Paenqdix zoq daz uaij lowz bae raiq naeh ced. 40Yaq paenqdix zoq daet zowg koaliak aeu lamh lowz naeh, jizzaz koaliak yuq ndaw haij, goj hih sowh zowg puk kvaix maex rongx hoak doaq naeh,#27:40 Kvaix maex rongx hoak doaq naeh yuq baihlaeng lowz, zawx hawj lowz bae baih rawz zoq ngaux kvaix maex naeh. yaq daeuq kven kvaix paeng now lowz naeh, hawj laemz baeuq lowz bae dihliangx. 41Gaj bae taeng dih ux, lowz bog zoah tin, to lowz laemq bae dawj, chaeg mboq baenz, tang lowz zoah naemx ndaw haij fowd maz bog vaih. 42Bin mbu puj kaenglauz heuz ni, zoq daz kaj paenqdix. 43Gaj leanhzangx zawx jeuq Bauxloah, zoq mboq jinx paenqdix hoakzaqnaeh. Dix yaix sowh puj rux heuz naemx naeh, yoangh bae ndaw naemx, heuz mwz dihliangx daekgoanq. 44Puj ndai luz sowh maex baenz kvaix naeh rux luz sowh maex aen lowz vaih naeh bae dihliangx. Hoakzaqnaeh, daengzle ndaej jeuq nauq, mwz dihliangx baenz.

Currently Selected:

Zawxkauq 27: ZHN

Highlight

Copy