Zawxkauq 25

Bauxloah Vanz Kaixsax Saeh Dix Paeg

1 Faezsezduz hiamq hoak goanz gvanx daengz mbanj Yaeuhdaq naeh ndaej sam vaenz, zoq daeq Kaixsaxliqyaq chaenh mwz Yezluqsaxlaengx. 2Sowh goanz gvanx puj mbud dij Sen naeh daj puj saeq puj Yaeuhtaiq zoq mwz dih dix naeh gauq Bauxloah. 3Paenqdix vanz dix zowz Bauxloah maz Yezluqsaxlaengx, paenqdix daz yuq doangh loh dej Bauxloah kaj. 4Faezsezduz yaeng: "Bauxloah gannaeh yuq ndaw Kaixsaxliqyaq kaeng, gaenqgux mboq ndowj mbeh'ej dauh bae Kaixsaxliqyaq eh. 5Gaenqsu sowh puj hoak saeq naeh daj gux zaemh bae, jixzawh goanz gaengnaeh miz gaeng mboq hoj, zoq gauq dix." 6Faezsezduz yuq ndaw dih paenqdix zux ndowj teq sip vaenz ux naeh, zoq dauh bae Kaixsaxliqyaq. Vaenzlaeng dix zoq yuq fahtinh puj Loahmax paeg saeh, nemz daenh zowz Bauxloah maz. 7Bauxloah maz yaq, puj Yaeuhtaiq sowh puj daeq Yezluqsaxlaengx daeuj naeh zoq in haenzhenz dix, gauq Bauxloah hoak loang dwx lai taeuq, gaj mboq miz gaenqrawz miz goak miz laeg. 8Bauxloah yaeng: "Gux mboq sanz hoak gaeng hoak loang fahlih puj Yaeuhtaiq, hoak loang rownz dij Sen, rux hoak loang Kaixsax." 9Gaj Faezsezduz zawx hawj puj Yaeuhtaiq zaemz dix, dix zoq cham Bauxloah: "Mawz venq mwz Yezluqsaxlaengx, hawj gux yuq Yezluqsaxlaengx saeh su paeg mbaed saeh naeh vah?" 10Bauxloah hax: "Gannaeh gux in aen fahtinh Kaixsax aeu paegsaeh naeh, dih naeh zux zawh dih hoj jinj gux. Gux mboq sanz hoak loang puj Yaeuhtaiq, gaenqnaeh mawz goj ruxndeq singjringh. 11Jixzawh gux hoak gaeng mboq hoj, hoak gaeng hoj tai, daengz tai gux goj tw mboqyaq. Gaj jixzawh gaenq paenqdix gauq gux naeh mboq miz saek yowngh zawh zaeh, gawz goj mboq jinx aeu gux hawj paenqdix. Gux hawj Kaixsax laux hongz Loahmax naeh saeh gux paeg." 12Faezsezduz daj dij goanz ndaw hoiq dix dwkgangz yaq, zoq daj Bauxloah hax: "Mawz hax hawj Kaixsax saeh mawz paeg, haenx, zoq soangq mawz mwz dih Kaixsax naeh."

Laux hongz Yaqjizpaq Biak Mbong Saeh Bauxloah Naeh

13Gvaq ndaej ndauj ux, laux hongz Yaqjizpaq daj mijmez dix Bowhnihjiz daeuj Kaixsaxliqyaq. Doiqdix maz taennaj Faezsezduz. 14Paenqdix yuq dihnaeh ndowj ndaej jijgaj vaenz yaq, Faezsezduz aeu mbaed saeh Bauxloah naeh laemh dwk laux hongz Yaqjizpaq, dix hax: "Inxnaeh miz goanz puj kaenglauz ux, minxzwh rongx hoak Bauxloah, zawh zwz Faezlihsez naeh aeu nyaengx. 15Jiabndeq gux mwz Yezluqsaxlaengx, sowh goanz gvanx puj mbud dij Sen naeh daj puj Yaeuhtaiq sowh puj jeq miz najta naeh gauq dix, hax hawj gux paeg dix hoak loang. 16Gux haxdoq paenqdix, sowh dij goanz rawz gojndae, jixzawh sowh goanz zoah gauq naeh daj sowh goanz gauq naeh naengz mboq ndaej yuq ndaw fahtinh dungztaen baeg ndiang, jixzawh sowh goanz zoah gauq naeh naengz mboq ndaej hax gaenqdix ndaej mboq ndaej hoak, zoq aeu goanz zoah gauq naeh hawj sowh goanz gauq dix naeh, dij goanz Loahmax mboq zauh hoakzaqnaeh paeg. 17Doaklaeng paenqdix maz dih inxnaeh, gux mboq dangzgoah, vaenzlaeng cenq saeh paenqdix hoaksaeh, nemz dij goanz rongx Bauxloah maz. 18Koax daekgoanq gux faeklaih sowh gaenq paenqdix gauq dix naeh zawh gaenq mbowq zawz wznaeh. Gaj gau paenqdix in gauq dix naeh, gux zux ruxndeq gaenq paenqdix gauq naeh mboq zawh gaenq mbowq. 19Paenqdix daj dix dungzjinj, dungzjinj sowh saeh dij Sen paenqdix nowngz naeh, naengz cholaeng goanz ux minxzwh rongx hoak Yezsuz dungzjinj. Goanz naeh haeuz tai yaq, gaj Bauxloah hax dix daeuq zaeu. 20Paenqdix hoakzaqnaeh dungzjinj, gux mboq ruxndeq hoakzaqrawz paeg. Gux zoq cham Bauxloah: ‘Mawz venq mwz Yezluqsaxlaengx, yuq ndaw Yezluqsaxlaengx hawj daenh saeh su paeg vah?’ 21Gaj Bauxloah hax hawj dix yuq inxnaeh, taeng zwz maz hawj Kaixsax saeh dix paeg. Gux zoq yaix dij goanz aeu dix kaeng bae ndaw lauz, taj soangq mwz dih Kaixsax naeh." 22Yaqjizpaq daj Faezsezduz hax: "Hoakri gux goj zawx biak goanz naeh hoakzaqrawz koanx." Faezsezduz hax: "Vaenzbig mawz maz biak." 23Vaenzlaeng, miz dij goanz daj Yaqjizpaq daj Bowhnihjiz vae owd'owd, mwz yawhyawh, miz yinhzangx, dij goanz ndaw chaenh sowh puj miz najta naeh, paenqdix mwz aen rownz paegsaeh naeh. Faezsezduz yaix gaemz ux, zoq miz dij goanz zowz Bauxloah maz. 24Faezsezduz hax: "Laux hongz Yaqjizpaq daj daengzle sowh puj yuq inxnaeh naengh naeh aj, gaenqsu lez goanz naeh, dix zoq zawh goanz puj Yaeuhtaiq inxnaeh daj puj Yaeuhtaiq ndaw Yezluqsaxlaengx rongx vaxvax, yaix gux kaj dix tai naeh. 25Gaj gux cha mboq zoah dix hoak loang gaeng hoj tai. Hoakri dix hax hawj Kaixsax saeh dix paeg, baenzzaqnaeh gux daz soangq dix mwz. 26Hax taeng goanz naeh, gux damz mboq miz gaeng singjringh laemh dwk Kaixsax. Baenzzaqnaeh gux zowz dix maz doqnaj mawz, laux hongz Yaqjizpaq aj, daj doqnaj daengzle su, jinj dix yaq gux zux miz yowngh laemh dwk Kaixsax. 27Gux lez maz, soangq puj kaeng lauz mwz dih Kaixsax naeh, jixzawh mboq hax goanz kaeng lauz naeh daj daenh miz gaeng saeh, zawh mboq hoj."

Currently Selected:

Zawxkauq 25: ZHN

Highlight

Copy