Zawxkauq 20

Bauxloah Bae Mbanj Maxqihdunq Daj Mbanj Cizlah

1Mbaed saeh naeh byaek yaq, Bauxloah rongx cohsaenz Yezsuz maz, byongz paenqdix, yaix paenqdix caqsiq maengx dij Sen, dix zoq daj paenqdix dungzbyaeg, loangzdin bae mbanj Maxqihdunq. 2Dix daeq daengz mbanj gaengnaeh, hax lai taeuq byongz cohsaenz Yezsuz, yaix paenqdix caqsiq maengx dij Sen, yaq dix bae mbanj Cizlah. 3Dix yuq Cizlah ndowj ndaej sam ndown. Zwz dix daz naengh lowz dauh bae mbanj Ciqliqyaq naeh, ruxnyinz puj Yaeuhtaiq daz haiq dix, dix zoq bae ka mbanj Maxqihdunq naeh. 4Miz dij goanz daj dix zaemh bae, le goanz daj dix zaemh bae naeh zawh: Soaxbaztowh goanz dij goanz ndaw Biqlixyaq chaenh, goanz lug zaiz Bihloahsez naeh, Yaqlixdahgux daj Cizgungzduz, doiq naeh zawh dij goanz ndaw Tehsaxloahnihzaz chaenh, Tihmoaxtaiq, Gaizyaeuh goanz ndaw Towhbiq chaenh naeh, Toizjizgux daj Towhloahfaezmoah, doiq naeh zawh dij goanz mbanj Yaqciqyaq. 5Paenqdix bae daekgoanq, bae ndaw Towhloahyaq chaenh taj piu. 6Gvaq Jeng Mboq Miz Fahfaenx naeh yaq, gaenqpiu yuq ndaw Faezlihbix chaenh naengh lowz, haj vaenz yaq gaenqpiu bae taeng Towhloahyaq daj paenqdix dungzmex, yuq dihnaeh ndowj ndaej jiat vaenz.

Yuq Ndaw Towhloahyaq Chaenh Dij Sen Hawj Yaeuhtoizgux Daeuq Zaeu

7Cinzqiztenz,#20:7 Gaenq raeuz vaenz cinzqiztenz naeh, nganq puj Yaeuhtaiq maz hax haeuz zawh cinzqiz ux vaenznduq dix naeh. gaenqpiu zaemh yuq biangz dij Sen, peg binx. Bauxloah koanx kauqfaengz dij Sen dwk paenqdix, vaenzlaeng piu baenz ni paenqdix, baenzzaqnaeh haemh gaengnaeh Bauxloah koanx kauqfaengz dwk paenqdix taengdiak byonghhwnz. 8Piu yuq hauh ngih sam, gowh piu yuq naeh miz lai aen daeng. 9Miz maeng ux, minxzwh rongx hoak Yaeuhtoizgux, yuq baeg ruzdangq naengh biak, Bauxloah goq koanx koanx, Yaeuhtoizgux moih gvaq, noanzlaep, daeq hauh daih sam naeh doak bae dihndin, gau puj ndai bae fowz dix naeh, dix haeuz tai yaq. 10Bauxloah loangz bae, kaemj bae now dix, umj dix, hax: "Gaenqsu laek huangz, minghkoan dix naengz yuq ndang!" 11Yaq daeuq dauh mwz ndaw rownz, peg binx, jin yaq, koanx ndowj taeuq, taengdiak faxrungh, zux ni bae. 12Yaeuhtoizgux daeuq zaeu, ndaw zaw paenqdix zux daeh rowngh, daengzle zaemz taeuq, soangq dix dauh mwz rownz.

Bauxloah Daeq Towhloahyaq Chaenh Bae Mixliqduz Chaenh

13 Bauxloah yaix piu naengh lowz bae Yaqsoah chaenh, hawj piu bae dihnaeh taj dix, hoakri dix daeq loh bae. 14Doaklaeng dix bae Yaqsoah daj piu dungzmex, piu raep dix kwnj mwz ndaw lowz, zaemh bae taeng Mixtoizliqnih chaenh. 15Piu daeuq naengh lowz ni dih naeh, vaenzlaeng bae taeng doiqfaeg Jiz'az haixdaux. Daeuq vaenzlaeng, bae taeng Saxmoah haixdaux. Daeuq gvaq vaenz ux, bae taeng Mixliqduz chaenh. 16Bauxloah zawx dauh mwz Yezluqsaxlaengx naeuz kvaiq ux, dix ngwz daekgoanq Jeng Kaeuj Mawq naeh dauh mwz taeng. Baenzzaqnaeh, mboq bae Yixfuhsoax chaenh, yaj yuq ndaw mbanj Yaqciqyaq dangzgoah ndowj gvaq.

Bauxloah Saengq Sowh Goanz Gvanx Zauqhoiq Naeh

17 Bauxloah yuq ndaw Mixliqduz chaenh yaix dij goanz mwz Yixfuhsoax, rongx sowh goanz gvanx dij goanz zauqhoiq naeh maz ndaw Mixliqduz chaenh. 18Paenqdix maz taeng yaq, Bauxloah hax: "Gaenqsu daengzle ruxndeq gux hoakrawz hoak goanz. Daeq vaenz gux daeuj mbanj Yaqciqyaq inxnaeh, suq gux daj su zaemh yuq naeh, zwzrawz gojvenj, gux zwzzwz hoakzaqnaeh, zoq zawh, 19kvej Zaeuj, hoak gaeng goj mboq baegbongz, puj Yaeuhtaiq hoak mbowq dwk gux, hawj gux ndaej jinkaem lai taeuq, gux goj naengz gaemx. 20Gaenqsu goj ruxndeq, yuq rownz gawz gojndae, yuq doqnaj daengzle gojndae, gux goj caqsiq zau su. Nanghgaj hax gaeng doiq su ndae, gaemz ndae gaemz raix gux goj hax nauq. 21Gux goj chownq puj Yaeuhtaiq daj dij goanz Cizlah hoak loang yauq rux gaix, dauh maz doq dij Sen, sinq Zaeuj raeuz Yezsuz. 22Gannaeh Minghkoan dij Sen choi gux, yaix gux mwz Yezluqsaxlaengx naeuz kvaiq ux. Gux mboq ruxndeq mwz taeng dih naeh rux miz gaeng saeh. 23Gux ruxndeq gaj Minghkoan dij Sen yuq chaenh rawz goj haxdoq gux, hax gux rux ndaej kaenglauz, rux miz aen nanq. 24Gaj nanghgaj daeq mowd ka loh gux, hoak nauq gaenq Zaeuj raeuz Yezsuz yaix gux hoak naeh, hawj daenh ruxndeq kauqfaengz, ruxndeq dij Sen yumq doiq dij goanz ndae daengzhwx, daengz hawj gux tai gux goj mboq miz gaeng. 25Koax gvaq maz naeh gux zwzzwz daj su bae'dauh, koanx Goh Dij Sen dwk daengzle, gaj vaenz naeh gux ruxndeq, mwznaj su mboq ndaej taen naj gux eh. 26-27Vaenz naeh, gux daj su hax zaeh zaeh, dij Sen yaix hoakzaqrawz hoak, gaemz ndae gaemz raix gux goj hax nauq. Baenzzaqnaeh mwznaj su gawz lown gojndae, daj gux mboq miz gaeng. 28Minghkoan dij Sen hawj su gvanx daengzle, gaenqsu zoq baenz saeh hoakri hem, goj saeh daengzle hem, zowngx dij goanz zauqhoiq dij Sen. Dij goanz zauqhoiq dij Sen zawh dix aeu lowd lug zaiz dix taeq maz. 29Gux ruxndeq, gux ni su yaq, rux miz sowh goanz ux nyinzndang taeuq maz, maz yai dij goanz zauqhoiq su. Paenqdix daj ma'naez dungzlumj rux maz haiq boangx mbej gaenqsu. 30Daengz zauqhoiq gaenqsu goj rux miz dij goanz dwnq maz hax daj kauq dij Sen dungzbej, yai cohsaenz Yezsuz nowngz paenqdix. 31Baenzzaqnaeh, gaenqsu caqsiq hem oaj. Sam bi naeh gux vaenzlinzhwnz saengq su daengz naemx ta daeuj saw, su caqsiq nyen. 32Gux aeu su hawj dij Sen zauzhuz, goj hawj su ruxndeq kauqfaengz, ruxndeq dij Sen yumq doiq dij goanz ndae. Sowh kauq faengz naeh rux hawj gaenqsu sinq vwnxcih, hawj su daj daengzle sowh puj ndaej hoak dij goanz dij Sen naeh zaemh ndaej sowh gaenq dij Sen yinq aeu hawj dij goanz dix naeh. 33Gux mboq sanz mowh jim, ngaenz, ndangnungh gawz. 34Gaenqsu ruxndeq, gux, yaq sowh puj daj gux zaemh hoak najgaengx Zaeuj naeh, gaenqpiu yungq zoah gaeng, gux goj haeggaj bae kux. 35Gux gaeng goj hoak hawj su lez, hawj su zaep, gux hoakzaqnaeh hoak, zau su hoak gaengx naeuz chaekndae ux, do saeh sowh puj oanq'e naeh, goj caqsiq nyen kauq Zaeuj raeuz Yezsuz, dix hax: ‘Goanz aeu hawj naeh faengz nyeuz goanz dej naeh.’"

36Hax nauq suq kauq naeh, dix zoq daj daengzle gvih bae dihndin daj dij Sen hax kauq. 37Daengzle haej, gud hoz dix, zaep naj dix daj dix dungzbyaeg. 38Paenqdix yuqraix baenzzaqnaeh zawh gaunduq Bauxloah hax: "Mwznaj su mboq ndaej taen naj gux eh." Doaklaeng, daengzle soangq dix kwnj mwz ndaw lowz.

Currently Selected:

Zawxkauq 20: ZHN

Highlight

Copy