Zawxkauq 18

Bauxloah Yuq Ndaw Goazlinhdoz

1Doaklaeng, Bauxloah ni Yaxdenx chaenh, mwz Goazlinhdoz chaenh. 2Yuq ndaw Goazlinhdoz, dix mex goanz puj Yaeuhtaiq ux minxzwh rongx hoak Yaqjizlaz. Goanz naeh yuq ndaw Baenxduz zowngx. Ndaujndeq laux hongz Gowhlauxdeuz nemz puj Yaeuhtaiq ni Loahmax chaenh, baenzzaqnaeh ndaujzawjraeuz Yaqjizlaz daj mijmez dix Bowhjizlaz daeq ndaw mbanj Yiqdaqliq aen chaenh rongx hoak Loahmax naeh maz Goazlinhdoz. Bauxloah bae dih paenqdix. 3Paenqdix zawh puj hoak zangjpungh hoakjin, Bauxloah goj zawh saeh daenh hoak zangjpungh hoakjin. Baenzzaqnaeh, Bauxloah bae daj paenqdix zaemh ndowj, zaemh hoak gaengx. 4Vaenz Cednoiq rawz, Bauxloah goj mwz rownzndawcowq daj puj Yaeuhtaiq daj dij goanz Cizlah laemh kauq dij Sen, chownq paenqdix sinq Zaeuj. 5Zwz Cizlaz daj Tihmoaxtaiq daeq mbanj Maxqihdunq maz naeh, Bauxloah zoq vaenz vaenz aeu kauqfaengz dij Sen koanx dwk daenh, haxdoq puj Yaeuhtaiq Yezsuz zoq zawh Jizduz. 6Gaj paenqdix dix dix, moakndai dix. Dix zoq daep mowdmoanz ndangnungh dix, hax: "Gaenqsu haeggaj tw gaenq hoakloang su, gaenqnaeh daj gux mboq miz gaeng! Daeq vaenz naeh mwz, gux aeu kauqfaengz bae koanx dwk puj yowngh ndai yah." 7Hax gah, dix zoq bae rownz Tihdoz-yaeuhswqduz. Goanz naeh mboq zawh puj Yaeuhtaiq, gaj dix ruxndeq mbu dij Sen. Rownz dix yuq zawj rownzndawcowq. 8Jizliqsezbuq goanz gvanx rownzndawcowq naeh daj daengz rownz dix sinq Zaeuj. Dij goanz Goazlinhdoz goanz lai taeuq, biak kauqfaengz dij Sen yaq zoq sinq Zaeuj, yaq hoak diauq zauh soiq naeh. 9Miz hwnz ux, Zaeuj hawj Bauxloah daj paen'hwnz dungzlumj taen Zaeuj daj dix hax: "Laek mbu, mawz yumq koanx, laek ced, 10gux daj mawz zaemh yuq, mboq rux miz gawz rux haiq mawz, aen chaenh naeh miz goanz lai taeuq gux aeu hoak dij goanz gux." 11Bauxloah yuq dihnaeh ndowj ndaej bi ux laeng choak ndown, aeu kauq dij Sen zau paenqdix. 12Jeh Zazleuh yuq ndaw mbanj Yaqgaizyaq hoak saeq dwx naeh,#18:12 "Mbanj Yaqgaizyaq" zoq zawh hax mbanj Cizlah. puj Yaeuhtaiq hoak baih hax Bauxloah. Paenqdix laeg dix mwz fahtinh, 13hoakzaqnaeh hax dix: "Goanz naeh coak daenh mboq nganqzauq fahlih biangz dij Sen." 14Bauxloah hiamq zaekgaj aj baeg, Zazleuh zoq daj puj Yaeuhtaiq hax: "Puj Yaeuhtaiq su aj! Jixzawh goanz naeh mboq biak fahlih Loahmax rux hoak mbowq dwk daenh, gux dauq caqsiq biak su, saeh su hoaksaeh. 15Gaj jixzawh su zawh cholaeng fahlih Yaeuhtaiq su dungzjinj, gaemz kauq ux gojndae, aen minxzwh ux gojndae, gaenqsu haeggaj hoaksaeh, gux mboq saeh su hoaksaeh." 16Yaq dix zoq daem paenqdix ni fahtinh. 17Bae taeng baihnog fahtinh, paenqdix jenj Soaxtihnih goanz gvanx rownzndawcowq naeh, yuq doqnaj fahtinh dub dix. Gaj sowh naeh Zazleuh goj mboq gvanx.

Bauxloah Dauh Mwz Anztih'az Chaenh

18 Bauxloah yuq ndaw Goazlinhdoz daj bihnongx zauqhoiq dihnaeh zaemh ndowj ndaej ndauj ux yaq, dix zoq ni paenqdix, dix daj Bowhjizlaz, yaq daj Yaqjizlaz goanz po Bowhjizlaz naeh loangzdin bae henz haij naengh lowz bae mbanj Ciqliqyaq. Ndaujndeq dix ndaej daj dij Sen haxgoak daekgoanq diauq ux. Dix mwz taeng Jenzgowhlix chaenh, ndauj dix hax naeh mowd, dix zoq ead to.#18:18 Puj Yaeuhtaiq mbangjzwz rux daj dij Sen haxgoak daekgoanq, aeu ndauj ux hoak puj cej, mboq jinx hoakri ead to, mboq jinx ndut laeuj, mboq jinx jin maegkaeu'it, mboq jinx lumh do tai daj puj tai. Hoak mowd zwz rawz paenqdix zoq rux hoak gaenq ux hoak daiqbiaux, baenzzaq ead to aj naeh. Lez Sw Anq Dij Goanz Yixsowhleh 6:1-8. 19-20Bae taeng Yixfuhsoax chaenh, Bauxloah hawj Yaqjizlaz daj Bowhjizlaz haeggaj yuq Yixfuhsoax ndowj. Gaj hoakri dix bae rownzndawcowq, daj puj Yaeuhtaiq laemh kauq dij Sen. Paenqdix qingj dix do ndowj jij vaenz ux, gaj dix mboq ndowj. 21Yaq dix daj paenqdix dungzbyaeg, hax: "Jixzawh dij Sen venq, gux naengz rux daeuq dauh maz dih su inxnaeh." Yaq dix zoq naengh lowz ni Yixfuhsoax. 22Bauxloah yuq ndaw Kaixsaxliqyaq chaenh loangz lowz, dix zoq mwz Yezluqsaxlaengx taennaj zauqhoiq, yaq bae Anztih'az chaenh.

23Yuq ndaw Anztih'az ndowj ndaej ndauj ux yaq, dix zoq ni dih naeh, bae mbanj Zazlaztaiq, mbanj Fuhloixzaz, sowh longq miz cohsaenz Yezsuz naeh, zau paenqdix kaem'zaw daeq ka loh dij Sen mwznaj.

Yaqbozloah Yuq Ndaw Yixfuhsoax Koanx Kauq Dij Sen

24Zwz naeh, miz goanz Yaeuhtaiq ux, minxzwh rongx hoak Yaqbozloah, daeuj taeng Yixfuhsoax chaenh. Goanz naeh yuq ndaw Yaqlihsanzdaq chaenh zowngx. Dix miz aen gvai, rux aeu kauq ndaw Sw Dij Sen koanx dwk daenh taeuq. 25Goanz naeh ndaej biak sowh kauq laemh ka loh Zaeuj naeh, ndaw zaw dix goj ndaed raedraed, dix laemh sowh saeh Yezsuz naeh laemh ndaej hoj taeuq, gaj hoak diauq zauh soiq naeh dix zux ruxndeq gaj gaenq Yezhanq naeh. 26Yaqbozloah yuq rownzndawcowq koanx kauqfaengz dij Sen, ngoah taeuq. Bowhjizlaz daj Yaqjizlaz ruxnyinz yaq, zoq qingj Yaqbozloah maz, aeu sowh kauq laemh ka loh dij Sen naeh haxdoq Yaqbozloah naeuz tiq ux. 27-28Yaq Yaqbozloah zawx bae mbanj Yaqgaizyaq,#18:27-28 "Mbanj Yaqgaizyaq" zoq zawh hax mbanj Cizlah. bihnongx sowh puj yuq ndaw Yixfuhsoax ndowj naeh zoq saeh dix, laiz cinq hawj cohsaenz Yezsuz sowh puj yuq ndaw Yaqgaizyaq naeh, yaix paenqdix raep dix. Dix bae taeng yaq, dix yuq doqnaj daengzle daj puj Yaeuhtaiq dungzjinj, jinj bex puj Yaeuhtaiq, aeu Sw Dij Sen haxdoq daenh Yezsuz zoq zawh Jizduz. Dix hoanx naeh saeh ndaej sowh puj dij Sen yumq hawj sinq Zaeuj naeh lai taeuq.

Currently Selected:

Zawxkauq 18: ZHN

Highlight

Copy