Joel 2
2
1Oq'uesinaic oq'ues ta wits Sión,
ac'a ta na'el ta ch'ul wits yu'un Cajwaltic te ya xtal swocolil.
Ac'a jajch'icuc ta nijq'uel ta spisilic te mach'atic nainemic ta Judá,
melel nopolix sc'aalelal te Cajwaltique:
2Sc'aalelal te ijc' q'uinale,
sc'aalelal te tocaletic soc xiweltic sba axinal.
Guerra ya yac' c'ulubetic
Jchajp soldadoetic c'oem,
mero bayal, soc mero bayal yipic,
la spuc sbaic ta ba witsetic,
jich bit'il saquil q'uinal ya xchicnaj te c'alal ya sacube.
Ma'yuc jich chicnajem ta ilel
soc ma'yuc bi ora ya xchicnajix,
ma'yuquix pajal soc ya xchicnaj.
3Pajalic soc c'ajc', te spisil ya slajine.
Ya xchic'awan te c'alal ma to xc'ax ae,
soc manchuc me c'axemix a, pero ya to xchic'awan xan a.
Te c'alal ma to xjulic ae,
mero c'ax t'ujbil te q'uinale;
te c'alal ya xbajt'ique,
pajal soc jochol taquin q'uinal ya xjil yu'unic.
Ma'yuc bila col jilel yu'unic.
4Jich yilelic te bit'il caballo,
jich ya x'animajic te bit'il
mach'atic moemic ta caballo.
5Te c'alal ya xwilic bael ta witse,
jich sc'op te bit'il sc'op te carretaetic yu'un guerra,
jich xch'ititet te bit'il taquin yabenal
te ya xtil ta c'ajq'ue.
Pajal soc jchajp soldadoetic te bayal yip
te xcholoj sbaic yu'un guerra.#Ap 9.7-9.
6Te mach'atic ya yilic ya xjajch'ic ta nijq'uel yu'un,
spisil sit-yelawic ya xch'ay xch'ich'elic yu'un.
7Jichic te bit'il winiquetic te ma xiwic ta guerra,
ya x'animajic, ya xmoic ta ts'ajq'uetic,
ya xbajt'ic ta animal,
mero toj nax ya xbeenic bael.
8Ma ba stenten sba ya xbeenic,
ta juju-jcojt' ya xbeen ta sbeic;
xcholoj sbaic ya xwilic bael ta yolil
yat'ejibalul t'imalte'etic;
jun ayic, ma ba ya sjin sbaic.
9Ya yochintay te lume,
ya x'animajic ta ba ts'ajq'uetic,
ya xmoic ta ba nanatic, ya x'ochic ta ventana jichuc j'eleq'uetic.
10Te lumq'uinal ya stij sba ta stojolic,
te ch'ulchan ya syuc' sba yu'unic,
te c'aal te u ya xch'ay xojobil,
te eq'uetic ya x'ijc'ub yu'unic.#Am 8.9; Ap 8.12.
11Te Cajwaltic neel yac'oj sba ta stojol
te soldadoetic c'oem yu'une,
ya yac' chicnajuc yaw ta mero tulan.
Mero bayal te soldadoetic c'oeme,
ma x'ajtabaj te mach'atic ya xch'uunbey smandale.
Mero muc' soc mero xiweltic sba te sc'aalelal te Cajwaltique.
Ma'yuc mach'a ya xcujch' yu'un.#Ap 6.17.
Xc'uxul yo'tan Cajwaltic
12Ya yal te Cajwaltic:
—Pero yo'tic in to, sujt'anic tel ta jtojol,
sujt'anic ta jtojol ta spisil awo'tanic.
Coma awe'elic, awunanic,
oq'uetaya abaic#Dt 4.29; Jer 29.13. —xi' te Cajwaltique.
13Sujt'anic tel ta stojol te Awajwalic,
te Dios awu'unique.
Jatsaic jichuc pac' te awo'tanique,
ma ja'uc x'ajatsic te ac'u'ique.
Melel te Cajwaltique, sts'ujetotic ta yo'tan,
ya sna' yo'bolil jbajtic;
ay perdón ta yo'tan stuquel,
mero c'uxotic ta yo'tan.#Ex 34.6; Neh 9.17; Sal 86.15.
Spisil ora ya xju' yu'un te ya slajinbey sc'oplal te castigoe.
14Ma wan ya yac'beyex castigo,
ya wan sticunbeyex bendición:
sit trigo soc vino yu'un smajt'an te Awajwalic,
te Dios awu'unique.
15Oq'uesinaic oq'ues ta wits Sión.
Tsobaic te yajwal lum, coma awe'elic;
16tsobaic te lum yu'un Dios, ch'ultesaic.
Tsobaic te mamaletic soc te alaletic,
asta te alaletic ya to xchu'unique.
Soc te mach'a nujbinelic to, ac'a loq'uicuc tel ta na yu'un nujbinel.
17Ac'a oq'uicuc te sacerdoteetic,
ja' te abatetic yu'un te Cajwaltique.
Jich ac'a yalic ta yolil te yochibal
Ch'ul Awilal
soc te scajtijib ta chiq'uel majt'anile:
“Cajwal, pasbeya perdón te lum awu'une;
ma xawac' te ay mach'a ya xlabanot yu'un te mach'atic awu'une;
ma xawac' te ya x'u'uninot yu'un yantic nación,
soc te jich ya yalic te mach'atic ma ba xch'uunejate:
‘¿Banti ay te Dios yu'unique?’#Sal 79.10. xiic me”, xiuc me sc'op te sacerdoteetique.
18Te Cajwaltic jich la yac' ta ilel xc'uxul yo'tan ta stojol te lum yu'une, la sna'bey yo'bolil sba te lum yu'une. 19Jich la yal:
—Ya me jticunbeyex trigo, vino soc aceite,
ja' to teme noj ach'ujt'ique.
Ma'yuquix bi ora ya cac' slabanex te mach'atic ma ba xch'uunejone.
20Ya me jloq'uesbeyex ta atojolic te c'ulubetic ya xtalic ta norte,
ya me cac' bael ta jochol taquin q'uinal.
Ya me cac'bey sjic' ja' ta Mar Muerto
te j'il-q'uinal yu'un ta naile,
ya me cac'bey sjic' ja' ta Mar Mediterráneo
te j'il-q'uinal yu'un ta spate.
Tey me ya xc'a' sbaq'uetalic, tey me ya xtuub a.
Muc' me te bitic ya jpase —xi'.
21Binuc nax me awo'tan, lumq'uinal, ma me xiwat,
melel te Cajwaltic ay bitic muc' ya spas.
22Ma me xiwex, ja'ex ja'mal chambalametic,
melel ya me xyaxubiquix xan te aquiltique.
Ya me xcha'yac' xan sit te te'etique,
ay me bayal higueraetic soc ts'usubetic.
23Binuc nax me awo'tanic, ja'ex te nainemex ta Sión,
binuc nax me awo'tanic ta stojol
te Cajwaltic Diose.
Ja' stuquel la yac'beyexix tel ta yorail te ja'ale,
ja' te ja'al ya xtal ta yorail invierno
soc ta yorail primavera,
mero jich nix te bit'il la spasbeyex
ta neelal toe.
24Ya me xloc' lec sit atrigoic,
bayal me ya x'esmaj te aceite awu'unic,
soc tsobol me ya x'esmaj te vino awu'unique.
25Ya yal te Cajwaltic:
—Jo'on me ya jeltaybeyex te ja'wiletic
te ch'ay awu'unic te ja'exe,
te ch'ay ta swenta c'ulubetic,
te jlajinwanej-soldadoetic c'oem cu'un
la jticunbeyex ta atojolique.
26Te ja'exe, ya me xwe'ex ta lec,
ja' to teme noj ach'ujt'ique.
Jich me ya awalbonic yutsil jc'oplal
jo'on te Ajwalilon te Dioson awu'unique,
melel te jo'on ay bayal jchajp at'eliletic
muq'uic la jpas ta awentaic.
Ma me ayuquix bi ora ya xtaot yu'un q'uexlal te lum cu'une.
27Ja'ex israeletic, ya me sc'an ya ana'ic
te joinejex jo'on te Ajwalilon,
te jo'on Dioson awu'unic te ma'yuc mach'a yan ay awu'unic.#Is 42.8; 45.5-6,18; Ez 36.11.
Ma'yuquix bi ora ya xtaotic yu'un q'uexlal te lum cu'une —xi'.#Jl 3.17.
Ya xtal espíritu yu'un Dios
28Jich ya yal te Cajwaltic:
—C'alal ya xc'ax ta spisil te bitic la cale,
spisil te ants-winiquetic ya me jmalbey
ta stojolic te espíritu cu'une.#Hch 2.17-21.
Te aquerem-nich'nabic, te awantsil-nich'nabic
ay me bi ya yalic ta jwenta,
te mamaletic ay me bila ya swaichinic,
te queremetic ay bitic ya x'ac'bot yilic ya yaiyic.
29Soc nix ta stojolic te abatetic te ants-winiquetique
ya me jmalbey ta stojolic te espíritu cu'un
te c'alal ya xc'ot sc'aalelale.
30Ya me cac' chicnajuc jchajp at'eliletic
ta ch'ulchan soc ta lumq'uinal te muc' sc'oplale:
Ch'ich', c'ajc' soc pimil ch'ail ta lumq'uinal.
31Ya me x'ijc'ub te c'aale,
te u, jich me ya xc'ot yilel te bit'il ch'ich',#Mt 24.29; Mr 13.24-25; Lc 21.25; Ap 6.12-13.
ja' me te c'alal ma to xc'ot sc'aalelal a
te Cajwaltique,
ja' te sc'aalelal te mero muc' sc'oplale,
ja' te sc'aalelal te mero xiweltic sbae
—xi' te Cajwaltique.
32Spisil te mach'atic ya yalbey wocol te Cajwaltic
ya me xcol stuquelic.#Ro 10.13.
Ta wits Sión, ta Jerusalén,
tey ya xjul a te colele,
jich nix te bit'il yaloj te Cajwaltique.
Te mach'atic stsaoj stuquel
cuxulic me ya xjil stuquelic.
Currently Selected:
Joel 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.