Hebreos 12

Ac'a me jtojlintic ta ilel te Jesuse

1Te bit'il joytaybilotic yu'un tsobol ta jtul testigoetic te la yaq'uiquix ta ilel te bit'il ay xch'uunjel yo'tanique, jich yu'un te jo'otique ac'a quijq'uitaytic jilel te bila ya smacotique soc te mulil te ya xchucbotic te cacantique. Junuc me co'tantic ac'a animajucotic bael te banti ya xc'ootic te ay ta jtojoltique. 2Ja' me ya jtojlintic ta ilel te Jesuse te la yac'botiquix quiltic te bit'il ya sc'an ya cac' xch'uunjel co'tantic ta stojol te Diose, soc te ya yac' ju'uc cu'untique. Melel te Jesuse soc sbujts' yo'tan la sts'ic swocol ta milel ta cruz, soc ma'yuc sc'oplal ta yo'tan te sq'uexlal te lajel ta cruz. Yu'un sna'oj stojol teme c'ax swocole, ya me sta bayal sbujts' yo'tan yu'un ta patil, soc la snajc'anix sba ta swa'el smuc'ul nactijib te Diose.#Fil 2.6-11; Heb 2.9.

3Jich yu'un te ja'exe ja' me x'ana'ic spisil ora te Jesuse, te bayal c'ax swocol ta sc'ab te jmulawiletique. Jich ma ba ya xpejc'aj te awo'tanique soc ma xlaj yip awo'tanic yu'un te awocolique. 4Melel ma to ayuc amaloj ach'ich'elic yu'un te bit'il contro ya awilic te mulile. 5¿Yu'un bal ch'ayix ta awo'tanic te tac'uyel yu'un Dios te bit'il yal-snich'anexe? Melel jich ya yal te Sjune:

“Jnich'an, ma me x'ap'aj te tojobtesel ya awich' yu'un te Cajwaltique,

soc ma me xpejc'aj awo'tan yu'un teme la awich' comel yu'une.

6Melel te Cajwaltique ya stojobtes te mach'a c'ux ya yaiy ta yo'tane,

soc ya yac'bey majel te jayeb mach'a ya yic' yal-snich'anine”,#Job 5.17; Pr 3.11-12. te xie.

7Teme ya sts'ijc' awu'un te tojobtesele, yu'un nanix ja' yal-snich'anat Dios abi. ¿Melel ay bal jtuluc tatil awaiy te ma'yuc tojobtesel ya yac'bey te snich'ane? 8Yan teme ma xyac'beyex tojobtesel te Diose, yu'un ma yal-snich'anuquex abi, soc ma ja'uc mero Atatic te Diose. 9Te c'alal alalotic toe, la yac'botic tojobtesel te jtatic te ayotic ta balumilal soque, soc la quich'tic ta muc'. ¿Ja'uc to bal a te Jtatic te ay ta ch'ulchane? C'ax jich ya sc'an ya quich'tic ta muc' stuquel, swenta yu'un jich me ya xcuxinotic sbajt'el q'uinal. 10Te jtatic te ayotic ta balumilal soque, la yac'botic tojobtesel swenta nax jcuxlejaltic ta q'uinal, ja' chican bit'il la sc'an yo'tanic te la yaq'uique. Yan te Jtatic Diose, ya stojobtesotic ta swenta cutsteseltic, swenta yu'un pajal me ya quich'beytic te ch'ul yutsilale. 11Melel te tojobtesel ya quich'tique, ma bujts'anuc ya caiytic soc c'ux ya caiytic te c'alal ya quich'tique. Ja'uc me to, ta patil ya me sitin ta swenta te bila leque, soc lamal q'uinal ya yaiy yu'un te mach'a ya xch'uun tojobtesele.#Dt 8.5; 1 S 7.14; 1 Co 11.31-32.

Te mach'atic ya sp'ajbeyic te yutsil yo'tan te Diose

12Jich yu'un, ac'beya yich' xan yipic te ac'ab te yaquix ta sayp'ujele soc te awacan te ma'yuquix yipe.#Is 35.3. 13Leaic me te toj bee. Jich me ya xlecub a te awacan te coxobene, soc jich me ya sta xan yip a.

14Leaic me te lamaluc nax q'uinal awu'unic soc spisil te yantique. Ch'ultesbiluquex me, melel teme ma jichuque, ma'yuc mach'a ya xc'o yilbey sit te Cajwaltique. 15Tsajtaya me abaic, ma me ayuc jtuluquex te ma ba ya ataic te yutsil yo'tan te Diose. Ma me ayuc jtuluquex te ay bila ma lecuc ay ta awo'tanique.#Dt 29.18. Melel teme muc'ube, ay me awocolic yu'un, soc jich me ay tsobol ya xbolob yo'tanic yu'un. 16Ma me ayuc jtuluquex te ya xyalex ta mulile, soc te ma'yuc sc'oplal ta awo'tanic te bila ch'ultesbile, jich bit'il Esaú te ma'yuc sc'oplal ta yo'tan te bit'il ba alale. Melel la sjel ta jun nax buelta swe'el te bendición te sc'oplal ya yich'e.#Gn 25.29-34. 17Ana'ojic te ma ba ac'bot bendición yu'un stat te c'alal la sc'an xan ta patile. Ma la staix te bi ya yut ya sujt'es xan te yo'tane, manchuc teme bayal la yoq'uetay sba yu'une.#Gn 27.30-40.

18Te ja'exe ma jichuquex te bit'il israeletic te tey noptsajic bael a ta bay wits te ya xju' ta piquel, soc yac ta tilel c'ajc' ta sba, soc ijc'maxan nax q'uinal, soc xlemlajan nax chawuc, soc tulan ic' tey a. 19Soc ma la awaiybeyic stojol sc'op oq'ues soc sc'op te Dios te c'alal c'opoj ta stojol te lume. Te c'alal la yaiybeyic stojol te sc'ope, la yalbeyic wocol te manchuc ya xc'oponotic xan yu'une.#Ex 19.16-22; 20.18-21; Dt 4.11-12; 5.22-27. 20Yu'un ma ba cujch' yu'unic te bit'il pasotic ta mandale, te jich albotique: “Teme ay mach'a ya stec' te witse, ya me yich' milel ta ch'ojel ta ton, o ta lanza, manchuc teme ja' te chambalame”,#Ex 19.12-13. te xie. 21Xiweltic sba te bila chicnaj la yilique, melel jich la yal yu'un te Moisese: “Ya xiwon soc ya xnijc' co'tan yu'un”,#Dt 9.19. te xie.

22Yan te ja'exe tey noptsajemex bael a ta bay wits Sión soc ta bay te muc'ul lum yu'un te cuxul Diose, ja' bi, ja' te Jerusalén swenta te ch'ulchane, soc ta bay tsobol ta jmil te ch'ul abatetique, 23te stsoboj sbaic ta sc'ajintayel te Diose, soc ta bay stsoboj sbaic te sbabial alnich'anetic yu'un Dios te nacal sbiilic ta bay te ch'ulchane. Soc noptsajemex ta stojol te Diose te Jchajbanwanej yu'un spisil te ants-winiquetique, soc ta bay ay xch'ulelic te mach'atic xch'uunejbeyic smandal Dios te utstesbilic ta jc'axel yu'une, 24soc ta bay teq'uel ta c'op te Jesús ta xchajbanel te yach'il tratoe, soc ta ba ay te xch'ich'el te yich'oj tsijts'anel te c'axem to xan t'ujbil a te bit'il xch'ich'el te Abele.#Gn 4.10.

25Jich yu'un tsajtaya me abaic, ma me xap'ajic te mach'a yac ta c'ope. Melel teme ma ba colic te mach'atic la sp'ajic te c'alal c'oponotic ta tulan yu'un Dios li'to ta balumilale, ¿bit'il c'an colucotic jo'otic teme ya jp'ajtic ta comel yu'un te Mach'a yac ta c'op ta jtojoltic c'alal to ta ch'ulchane?#Ex 20.22. 26Te c'alal c'opoj ta balumilal ta namey te Diose, nijc' balumilal yu'un te sc'ope. Ja'uc me to, jich ya yalbotic ta ora to: “Jun xan buelta ya jnic' te balumilale. Ja'uc me to, ma stuqueluc nax, soc uuc te ch'ulchane”,#Hag 2.6. te xie. 27Te bit'il la yal te “jun xan buelta”, te xie, tey ya jna'tic stojol a te ya yich' jinel yu'un spisil te bila ya stac' ta jinel te pasbile. Ja' xanix ya xjil te bila ma stac' ta jinele. 28Te bit'il jo'otic ya x'ac'ot ainucotic yu'un Dios tey a te banti ma stac' ta jinele, jich yu'un ac'a me calbeytic bayal wocol yu'un. Spisiluc me co'tantic ya cac' jbajtic ta abatinel ta stojol te Diose. Lecuc me yo'tan cu'untic, soc bayaluc me sc'oplal ta co'tantic te ya jlajin jbatic ta stojole. 29Melel te Dios cu'untique, jich ay te bit'il c'ajc' te ya xju' ya xlajinwane.#Dt 4.24; 9.3; Mt 3.12; 2 Ts 1.7-8.

Currently Selected:

Hebreos 12: TZOXCH

Highlight

Copy