Hebreos 11
11
Bayal sc'oplal te xch'uunjel-o'tanile
1Te bit'il ay xch'uunjel co'tantique jich jc'axel ay ta co'tantic te ya xc'ot ta pasel te bila yacotic ta smaliyele, soc jc'axel ay ta co'tantic manchuc teme ma chicanuc ta ilel ya quiltique. 2Te namey q'uinal me'il-tatiletic cu'untique lec yo'tan Dios yu'unic ta swenta bit'il ay te xch'uunjel yo'tanique.
3Ta swenta xch'uunjel co'tantic jich jna'ojtic stojol te tic' pastaj ch'ulchan balumilal a te bit'il c'opoj te Diose.#Gn 1.1; Sal 33.6,9; Jn 1.3. Jich te bila chican ta ilel ya quiltique, ma chicanuc ta ilel te bila pasbil a.
4Ta swenta xch'uunjel yo'tan te Abele, la yac'bey smajt'an Dios te c'axem to xan ay yutsil stuquel a te bit'il la yac' te Caine. Jich lec yo'tan Dios yu'un te Abele, lec sc'oplal c'ot yu'un te majt'anile.#Gn 4.3-10. Ja' swentail te yac to ta c'op c'oem ta ora to, manchuc teme lajemixe.
5Soc ta swenta xch'uunjel yo'tan te Enoque, ma la yaiy stojol lajel. Stelemal ic'ot moel yu'un te Diose, ma ba taot ta leel ta balumilal. Te c'alal ma to x'ic'ot yu'un Dios a te Enoque, lec yo'tan Dios yu'un.#Gn 5.21-24. 6Ma xju' te lec yo'tan Dios cu'untic, ja' to teme ay xch'uunjel co'tantique. Melel ja' to ya xju' ya xnoptsajotic ta stojol Dios a teme jch'uunejtic te ay te Diose soc teme jch'uunejtic te ya yac'bey smajt'an te mach'atic ya xleot yu'unique.
7Ta swenta xch'uunjel yo'tan te Noé, ac'bot sna' yu'un te Dios te ya xc'ot ta pasel te bila ma to chicanuque. Jich jun yo'tan la xch'uun spasel barco te banti col soc sjunal sna.#Gn 6.13-22. Jich yu'un ta swenta xch'uunjel yo'tan, la yac'bey ta ilel smulic te mach'atic ayic ta balumilale. Yan te Noé ta swenta nax xch'uunjel yo'tan te toj ilot yu'un te Diose.
8Ta swenta xch'uunjel yo'tan te Abrahame, la xch'uunbey smandal Dios te c'alal la yich' iq'uel yu'une. Jich loc' tel ta slumal, bajt' ta banti q'uinal te ya x'ac'bot yu'unin yu'un te Diose. Ja'uc me to, ma ba sna'oj stojol te banti ya xc'ot te c'alal jajch' loq'uel ta slumale.#Gn 12.1-5. 9Ta swenta xch'uunjel yo'tan te Abrahame, jun yo'tan nain tey a ta bay ma slumaluc te ja' nix te q'uinal te albot yaiy yu'un Dios te ya sq'uinaline. Tey la snain nailpac' a, soc tey nix la snain nailpac' uuc te Isaaque soc uuc te Jacobe, te jich nix albot yaiyic yu'un Dios uuc te ya sq'uinalinique.#Gn 35.27. 10Melel te Abrahame ja' la smaliy slumalin te muc'ul lum te ay tulan yiptajibe te ja' la xchajban stuquel te Diose soc te ja' nix la spase.#Heb 13.14.
11Soc ta swenta xch'uunjel yo'tan te Sarae, te bit'il ma x'alaje ac'bot xan yip sbaq'uetal yu'un yiq'uel te yale, manchuc teme c'axemix yorail te bit'il ya x'alaje. Jich ayin yal, yu'un xch'uunej yo'tan te ya yac' c'otuc ta pasel Dios te bila yalojixe.#Gn 17.19; 18.11-14; 21.2; Ro 4.17-22. 12Jich uuc te Abrahame manchuc teme nopol xlajix bael a, ja'uc me to, jich yipal sts'umbal c'ot te bit'il eq'uetic ta ch'ulchane soc jich yipal te bit'il sji'al sti'il mar te ma xju' ta ajtayele.#Gn 15.5; 22.17; 32.12.
13Spisilic in to, te c'alal lajic baele, ma to ac'bot yu'uninic te bila la yal te Diose. Ja'uc me to, ta swenta xch'uunjel yo'tanic c'ubul to yacalic ta yilel, la xch'uun yo'tanic, soc bayal sbujts' yo'tanic yacalic ta sna'el. Jich la yalic ta jamal te c'axel c'axel nax ayic soc beom nax ayic ta smajanel te q'uinale.#Gn 23.4; 1 Cr 29.15; Sal 39.12. 14Spisil te mach'a jich la yalique, tey la yaq'uic ta ilel ta jamal a te yacalic to ta sleel te mero slumalique. 15Te ja'uc yacalic ta sna'el te slumalic te la yijq'uitayic jilele, ju' yu'unic te sujt'ic bael tey a te jichuque. 16Ja'uc me to, ja' yantayejic te slumalic te c'axem to xan ay yutsilal stuquele, ja' bi ja' te ch'ulchane. Ja' swentail te ma xq'uexaw Dios yu'un te ja' Dios yu'unique, melel xchajbanejbey muc'ul lum te ya yac'bey slumalinique.
17Ta swenta xch'uunjel yo'tan te Abrahame, c'an smilbey smajt'anin te jip jtul snich'ane, ja' te Isaaque, te c'alal pasot ta prueba yu'un te Diose. Jun nax yo'tan c'an yac'bey smajt'anin te jip jtul snich'ane#Gn 22.1-14. manchuc teme albotix sc'oplal yu'un Dios: 18“Ja' ta swenta Isaac te ay ats'umbal ya xc'ot”,#Gn 21.12. te xie. 19Melel te Abrahame c'oem ta yo'tan te ay yu'el Dios ta xcha'cusesel te animaetique. Jich ya caltic te cha'cuxesot tel ta bay animaetic c'oem te snich'an#Gn 22.13. te bit'il cuxul la yic' sujt'ele.
20Ta swenta xch'uunjel yo'tan te Isaaque, la yac'bey bendición te Jacobe soc te Esaú ta swenta te bitic ya x'ac'botic ta patile.#Gn 27.27-29,39-40. 21Ta swenta xch'uunjel yo'tan te Jacobe, te c'alal ya xlajix a, la yac'bey yich' bendición ta juju-jtul te snich'nab José, soc la snijan sba ta sjol snabate' ta sc'oponel te Diose.#Gn 47.31—48.20. 22Ta swenta xch'uunjel yo'tan te Joseje, te c'alal nopol ya xlajix a jich la yalbey sc'oplal te israeletic te bit'il ya xloq'uic bael ta patil ta sq'uinal Egipto, soc la yal jilel mandal te bi ya sc'an ya yich' pasel te sbaquele.#Gn 50.24-25; Ex 13.19.
23Ta swenta xch'uunjel yo'tan te sme'-stat te Moisese, la snaq'uic oxeb u,#Ex 2.2. yu'un la yilic te buen t'ujbil te alale. Soc ma la xi'ic te ya xc'axintaybeyic smandal te muc' ajwalile.#Ex 1.22. 24Ta swenta xch'uunjel yo'tan te Moisés, te c'alal muc'ul winiquix a ma la sc'an la sme'in te yantsil-nich'an te muc' ajwalil yu'un te Egiptoe.#Ex 2.10-12. 25Ja' lec la yaiy te pajal ya yich' uts'inel soc te lum yu'un te Diose, soc ma la sc'an smulanbey yutsil che'oxebuc c'aal te bila swenta mulile. 26La snop te ja' mero sc'ulejal ya xc'ot te bolc'optayel ya yich' te mach'atic tsabil yu'un te Diose. Ma ja'uc la sna'bey yutsil sc'ulejal te lum Egiptoe; ja' bajt' ta yo'tan te majt'anil ya x'ac'bot yu'un te Diose. 27Ta swenta xch'uunjel yo'tan la yijq'uitay jilel te sq'uinal Egiptoe.#Ex 2.15. Ma ba xiw yo'tan yu'un te yilimba te muc' ajwalile, melel ja' smuc'ulinej yo'tan te Dios te yac ta yilel ta site, manchuc teme ma chicanuc ta ilele.
28Ta swenta xch'uunjel yo'tan te Moisés, la yac' ta milel te chijetic swenta Pascua, soc la yal mandal te ya stsijts'anbeyic xch'ich'el ta bay sti' sna'ic te israeletique, yu'un jich ma xlajic ta milel yu'un ch'ul abat te sba yal-snich'anique.#Ex 12.21-30. 29Jich uuc te israeletique, ta swenta xch'uunjel yo'tanic te c'axic bael ta yolil te Tsajal Mar te jich c'ot bit'il taquin lum te banti c'axic baele. Soc te c'alal c'an c'axuc bael uuc te Egiptoetic te nutsbilic yu'une, tey la sjic'anic ja' ta ora stuquelic a.#Ex 14.21-31.
30Soc ta swenta xch'uunjel yo'tanic te israeletique, jin coel sts'ajc'ul te muc'ul lum Jericó te c'alal ts'acajix ta joyintayel juqueb c'aal yu'unic a.#Jos 6.12-21. 31Ta swenta xch'uunjel yo'tan te jmulawil ants Rahab, jich ma la sjoin ta lajel te mach'atic jc'axintayej-mandale,#Jos 6.22-25. te melel ay yutsil yo'tan la yic' ochel ta sna te israeletic te tal stsajtay yilic te bi yilel te lume.#Jos 2.1-21.
32Ta ora to ma xju' te ya calbeyex xan bayale, melel ma niwan xlaj cu'un ta cholel spisil te bit'il ay sc'oplal te Gedeone,#Jue 6.11—8.32. te Baraque,#Jue 4.6—5.31. te Sansone,#Jue 13.2—16.31. te Jeftee,#Jue 11.1—12.7. te Davide,#1 S 16.1—1 R 2.11. te Samuele,#1 S 1.1—25.1. soc te j'alwanejetic yu'un te Diose. 33Ta swenta xch'uunjel yo'tanic ju' yu'unic stsalel bayal ta jchajp lum, soc lec ju' yu'unic chajbanwanej, soc ju' yu'unic yich'el te bila yaloj Dios te ya x'ac'botic yu'une, soc ju' yu'unic smaquel yeic te león-chojetique,#Dn 6. 34soc ju' yu'unic stup'el yip te c'ajq'ue,#Dn 3. soc ju' yu'unic te ma la yich'ic milel ta puñal te bit'il chapal sc'oplalique, soc ac'bot stulanilic te mach'atic ma'yuc yipique, soc ju' yu'unic guerra, soc ju' yu'unic snutsel bael te soldadoetic yu'un te yajcontroique, 35soc ay antsetic te la yich'ic cha'cuxesel te mach'atic ay yu'unique.#1 R 17.17-24; 2 R 4.25-37.
Soc ay yantic la sts'ic swocolic ta uts'inel. Ma la sc'anic te ya xcolic ta libre, yu'un ja' ay ta yo'tanic te ya staic te xcha'cuxele. 36Soc ay c'ax swocolic ta bolc'optayel, ta majel ta nujc'ul,#Jer 20.2; 37.15. ta chuquel ta cadena soc ay ochic ta chucjibal.#1 R 22.26-27; 2 Cr 18.25-26; Jer 20.2; 37.15; 38.6. 37Ay la yich'ic milel ta ch'ojel ta ton,#2 Cr 24.21. ay lajic ta tuyel ta sierra, soc ay la yich'ic milel ta puñal.#Jer 26.23. Chican nax te banti ayic ta beel c'axele. Smacoj sbaic ta snujc'ulel chij soc ta snujc'ulel tentsun. Mero me'ba ayic ta q'uinal, soc ay yo'bolil sbaic ta uts'inel. 38In winiquetic to, ma'yuc yantic ta balumilal te jich ay yutsil yo'tanique. Chican nax te banti beenic ta jochol q'uinal, soc ta bay witstiquil, soc ta bay tsalal ch'entiquil, soc ta nailch'enetic.
39Ta spisilic in to lec c'otic ta loq'uel stuquelic ta swenta bit'il ay xch'uunjel yo'tanic. Ja'uc me to, ma to bay c'ot ta swentaic te bila yaloj Dios te ya x'ac'bot yu'uninique, 40yu'un ay yan te c'axem to xan ay yutsilal te xchajbanej te Diose. Melel ayotic ta yo'tan uuc te jo'otique. Jich ma stuqueluc nax te ya yich'ic utstesel ta jc'axele, melel jo'otic ya me quich'tic utstesel ta jc'axel uuc.
Currently Selected:
Hebreos 11: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
