Deuteronomio 6

Te muc' mandalile

1“Ja' spisil ta jchajp te mandaliletic soc te bitic chapal yu'un Cajwaltic te Dios cu'untic te ya sc'an ya cac'beyex anopique, swenta yu'un ya me apasic bael spisil ora ta lumq'uinal te ya yac'beyex awu'uninique. 2Jich me ich'bil ta muc' awu'unic a te Cajwaltic te Dios cu'untique, soc jich me ya xc'ot ta pasel awu'unic a te jayeb c'aal cuxulex, spisil ta jchajp te mandaliletic yu'un te la yalbeyex apasic, ja'ex soc te awal-anich'nab soc te amamataquique. Teme jich ya apasique, ya me xcuxinex bayal ja'wil. 3Ja' yu'un, israeletic, pasaic me bael. Jich me lec ya x'ainex, soc jich me muc'ul lum ya xc'oex, ta lumq'uinal te banti ya x'oquin leche soc chab c'oem, jich nix te bit'il yaloj te Cajwaltic te Dios yu'un te antiguo jme'-jtatique, te ya x'ac'bot yu'uninique. Jich ay:

4“Aiya awaiyic, israeletic: Te Cajwaltic te Dios cu'untique ja' nax Ajwalil stuquel.#Mr 12.29.

5“Te Cajwaltic te Dios cu'untique, c'ux me x'awaiy ta awo'tan, ta spisil awo'tan, ta spisil acuxlejal, soc ta spisil awip.#Mt 22.37; Mr 12.30; Lc 10.27.

6“Ac'a me ta ajol, ac'a ta awo'tan spisil te bitic la calbat awaiy ta ora in to. 7Spisil me ora xawac'bey snop te awal-anich'nabe. Ac'beya snopic ta ana soc ta be, te c'alal ya xwayat soc te c'alal ya xjajch'at ta wayele. 8Ich'a me spisil ora te mandaliletique, chuca me ta ac'ab soc chuca me ta ati'ba swenta seña, 9soc ts'ibuya ta yoyal ana, soc ta sti' ana.#Dt 11.18-20.

Moisés la yalbey yaiy israeletic te ja' lec ya xch'uunic mandal

10“Te Cajwaltic te Dios cu'untic ya me yaq'uex ochel ta lumq'uinal te jc'axel yalojbey te antiguo jts'umbaltic Abraham,#Gn 12.7. Isaac#Gn 26.3. soc Jacob.#Gn 28.13. Te lumq'uinal ay buen t'ujbilic niwac lumetic yu'un te ma ja'uquex la apasique. 11Ay nanatic te nojelic ta bitic buen lec te ma ja'uquex la anojesique. Ay pozoetic te ma ja'uquex la ajoq'uique, ts'usubiletic soc olivoetic te ma ja'uquex la ats'unique, pero ja'ex me ya awe'elinic, lec me ya xnoj ach'ujt'ic yu'un. 12Te c'alal jich ya xc'ot ta pasele, ma me xch'ay ta awo'tanic te Cajwaltic te la sloq'uesex tel ta Egipto, te banti ayex ta mozoil. 13Ch'uunaic me te Cajwaltic te Dios cu'untique, ja' nax me xawac' abaic ta abatinel yu'un stuquel.#Mt 4.10; Lc 4.8. Teme ay bi ora ya ac'anic te ay bi jc'axel ya awalic ta jamale, ja' nax me xapasic ta swenta te Cajwaltique. 14Ma me xat'unic yantic diosetic te xch'uunejic te yantic lumetic te nopol ayex soque, 15melel te Cajwaltic te Dios cu'untic te ay ta atojolic, mero stuquel nax ya sc'an ch'uunel. Teme ya x'ilin ta atojolic, jich me ya slajinex ta jc'axel.

16“Ma me x'awilbeyic yo'tan te Cajwaltic Dios cu'untique,#Mt 4.7; Lc 4.12. jich bit'il la apasic ta Masah.#Ex 17.1-7. 17Mero jun me awo'tan xach'uunic spasel te mandaliletic yu'un te Cajwaltic te Dios cu'untic, spisil ta jchajp te mandaliletic te la yalbeyex te ya ach'uunic spasele. 18Ja' me xapasic te bila yich'oj swentail soc te bila lec ta ilel ya yil te Cajwaltique, swenta yu'un jich me lec ya xc'oex a, soc jich me ya xc'ot ta awentaic te buen lequil q'uinale, te jc'axel yaloj te Cajwaltic te ya yac'bey te antiguo jme'-jtatique, 19Te Cajwaltique, ya me yac' xloc'uc ta anel ta atojolic te mach'atic ya xloc' smaquexe, jich nix te bit'il yaloje.

20“Teme ay bi ora ya sjojc'obeyex te awal-anich'nabique: “¿Bi swentail spisil ta jchajp te mandaliletic soc te bitic chapale, te ya yac' jch'uuntic spasel te Cajwaltic te Dios cu'untique?” teme xiique, 21jich me xawalbeyic: “Melel te jo'otique smozootic faraón ta Egipto a. Te Cajwaltique ta swenta smuc'ul yu'el te la sloq'uesotic tel tey a. 22Te jo'otic la quiltic te bitic jchajpic soc xiweltic sba señailetic la spas te Cajwaltic ta Egipto ta stojol te faraón soc te mach'atic ay ta sna. 23Yan te jo'otique la sloq'uesotic tel tey a. La yic'otic tel ta lumq'uinal te banti yaloj ya yac'bey te antiguo jme'-jtatique; la nix yac'botic a te lumq'uinale. 24Te c'alal la yac'botic te lumq'uinal te Cajwaltique, la yalbotic te ya sc'an te ya jch'uuntic spasel bael ta spisil ora te mandaliletic yu'une, soc te ya me quich'tic ta muc' stuquele, swenta yu'un jich me lec ya x'ainotic, soc swenta yu'un ya me scanantaybotic jcuxlejaltic, jich nix te bit'il yac ta spasel ta jtojoltic ta ora in to. 25Ja' yu'un mero jich nix ya sc'an a te buen tsajtaybiluc cu'untic ya cac'tic c'otuc ta pasel ta stojol Cajwaltic te Dios cu'untic te mandaliletic yu'une, jich nix te bit'il la yalbotic jpastique”, utaic me te awal-anich'nabique.

Currently Selected:

Deuteronomio 6: TZOXCH

Highlight

Copy