Deuteronomio 4
4
Moisés la stac'uy israeletic
1“Yo'tic, israeletic, aiya me awaiyic te mandaliletic soc te bitic chapal te la cac'beyex anopique, ja' me xapasic bael spisil ora, swenta yu'un jich me ya xnainex soc ya awich'ic a te lumq'uinal te ya yac'beyex te Cajwaltic te Dios yu'un te antiguo jme'-jtatique. 2Ma me xach'ayic soc ma me xawac'beyic sjoy jxujt'uc te bila mandalil ya calbeyexe.#Ap 22.18-19. Pasaic me te mandaliletic yu'un te Cajwaltic te Dios cu'untic, te yacon ta yalel ta atojolique. 3Ja'ex nix la awilic ta asitic te bila la spas te Cajwaltic ta Baal-peor. La awilic bit'il jc'axel la slajin ta awolilic spisil te mach'atic la xch'uunic te lotil dios yu'unique.#Nm 25.1-9. 4Pero ta apisilic te ja'exe, te jun awo'tanic la awac' abaic ta stojol te Cajwaltic te Dios cu'untique, cuxulex ta ora to. 5Te jo'one la cac'beyexix anopic te mandaliletic soc te bitic chapal, te la yalbon cac'beyex anopic te Cajwal te Dios cu'une, yu'un me ya apasic bael tey ta lumq'uinal te banti ya xc'o awu'uninique. 6Ac'a me c'otuc ta pasel awu'unic, soc jich me xapasic bael spisil ora, melel jich me ya sna'ic a te yantic lumetic te ay sp'ijil awo'tanic soc te spisil ya ana'beyic swentaile. Te c'alal ya sna'ic te bit'il ay te mandaliletic, jich me ya yalic: “Mero bayal sp'ijil yo'tan, soc sna'ojbey swentail spisil, ja' muc'ul nación in to”, xiic me. 7Melel ¿ay bal yan nación te mero muc' te nopol ay ta stojol te diosetic yu'une, jich te bit'il mero nopol ayotic soc te Cajwaltic te Dios cu'untic, te jujun buelta te ya calbeytic wocole? 8¿Bi nacionil te mero muc' te ay mandaliletic soc te ay bitic chapal yu'un te mero stojil aye, te pajal soc te nopjibal ya cac' ta atojolic ta ora in to? 9Ja' yu'un mero tsajtaya me abaic, ma me xach'ay ta awo'tanic te bitic awilojique, soc ma me ayuc bi ora ya xch'ay ta ajolic. Ya me sc'an te ya awalbeyic yaiyic te awal-anich'anic soc te amamataquique.
C'opoj Dios ta wits Horeb
10“Te bi c'aalil la atejc'an abaic ta stojol te Cajwaltic te Dios cu'untic ta wits Horeb, jich la yalbon: “Tsoba te lume, swenta yu'un ya me yaiybonic te jc'ope, soc ya me snopic te ya yich'onic ta muc' te jayeb c'aal ya xcuxinique, soc ya me yac'beyic snop te yal-snich'nabe, swenta yu'un ja' ni me jich ya spasic uuc”, xi'. 11Te ja'exe noptsajex bael ta yoc wits, te yac ta loq'uel c'ajc' ta sba, te yac ta moel bael ta mero toyol, te yac ta spasbel sba ta mero pimil ijc'al tocale. 12Jich te Cajwaltic la sc'oponex ta yolil te c'ajq'ue.#Ex 19.16-18; Heb 12.18-19. Te ja'exe la awaiybeyic te sc'ope, pero ja' nax la awaiybeyic sc'op, ma'yuc bila la awilic te chicnaj tey a. 13Te Cajwaltic la yalbeyex awaiyic te trato chajbanbil yu'une, ja' te lajuneb mandalil la sts'ibuy ta cha'pejch' tonetic,#Ex 31.18. te la spasex ta mandal te ya ach'uunic spasel baele. 14Jo'on la spason ta mandal te ya cac'beyex anopic te mandaliletic#Ex 21.1. soc te bitic chapale, te ja' ya apasic te banti lumq'uinalil ya xc'o awu'uninique.
Comel ta xch'uunel loc'omba
15“Te bi c'aalil la sc'oponex ta yolil c'ajc' te Cajwaltique, ja' te la sc'oponex ta wits Horeb, ma'yuc bila la awilic chicnaj tey a. Ja' yu'un tsajtaya me abaic, ma me xyalex ta mulil te mero ilaybil sbae. 16Ma me xapasbeyic sloc'ombail#Ex 20.4; Lv 26.1; Dt 5.8; 27.15. winic o sloc'ombail ants, 17soc ma me xapasbeyic sloc'ombail chambalametic, mutetic, 18chayetic soc te bitic staslajan ya xbeenic ta lum.#Ro 1.23. 19Te c'alal ya awilic te ch'ulchan, te c'aal, u, eq'uetic, ja' spisil te bitic ayic ta toyole, ma me xamulanic xch'uunel, melel ja' me te Cajwaltic te Dios cu'untic te la spas te bitic ayic ta toyole, ja' yu'un te lumetic te ayic ta swolol te balumilale. 20Te ja'exe la stsobex loq'uel tel ta Egipto te Cajwaltique, ta yutil horno yu'un yultesel taq'uin c'oem. Jich la yaq'uex te bit'il ayex ta ora in to: Ja'ex lumex yu'un stuquel.#Ex 19.5; Dt 7.6; 14.2; 26.18; 1 R 8.51; Jer 11.4; Tit 2.14; 1 P 2.9. 21Pero te Cajwaltic ilin ta jtojol ta scaj amulic ja'ex. La yal ta jamal te ma xju' ya xc'axonix bael ta jejch' ja' Jordán, soc ma xju' ya x'ochon ta buen lequil q'uinal te ja' ya yac'beyex awu'uninique.#Nm 20.12; 27.12-14. 22Ya me xlajon jilel li' ta lumq'uinal in to, ma ba ya xc'axonix bael ta Jordán. Yan te ja'exe ya me xc'axex bael, ya me awu'uninic te buen lequil q'uinale. 23Jich yu'un ya me sc'an te ya atsajtay abaic, ma me xch'ay ta awo'tanic te trato la xchajban ta jtojoltic te Cajwaltic te Dios cu'untique. Ma me xapas awajcanan, soc ma me xapasbeyic sloc'ombail te bitic la scomex ta spasel te Cajwaltic te Dios cu'untique, 24melel te Cajwaltic Dios cu'untique jc'axel ma smulan teme ay mach'a yan ya xbajt' awo'tanic ta stojole. ¡Te Diose jich c'oem te bit'il c'ajc' te spisil ya xchiq'ue!#Heb 12.29.
25“Te c'alal ayix awal-anich'anic a soc amamataquic, teme mamalubex li' ta lumq'uinal to, teme och ajin abaic, teme ay bitic jajch' apasbeyic sloc'ombaile, ja' tulan mulil ta pasel ta stojol te Cajwaltic te Dios cu'untique. Teme jich ya ajajch'beyic yilimba, 26ja' me testigoetic cu'un te ch'ulchan soc te balumilale, ora me ya awich'ic ch'ojel loq'uel ta lumq'uinal te ya xba awu'uninic ta jejch' ja' Jordán. Ma me jaluc c'aal ya xnainex ta q'uinal, ya me awich'ic lajinel ta jc'axel. 27Te Cajwaltic ya me spuquex bael ta yantic nacionetic, ma me ayuquix bayal cuxul ya xjilex. 28Tey me ya yabatinex diosetic te pasbilic yu'un te winiquetique, loc'omba te pasbil ta tonetic soc te'etic,#Dt 28.36; 2 R 17.4-6; 25.8-12; Is 4.3. te ma xyilic q'uinal, ma xyaiyic c'op, ma xwe'ic soc te ma xyich'ic iq'ue. 29Yan teme spisil awo'tanic soc spisil ach'ulelic ya aleic te Dios awu'unic te c'alal tey ayex a, ya me ataic ta leel.#2 Cr 15.2-15; Jer 29.13; Mt 7.7-8. 30Te c'alal c'axix awu'unic spisil a te tulan wocoletique, teme ya asujt'es xan awo'tanic ta stojol te Cajwaltic soc te ya ach'uunbeyic te smandale, 31te bit'il mero lec yo'tan stuquel, ma me ba ya spijt'esex, soc ma me ba ya slajinex. Ma ba ya xch'ay ta yo'tan te trato la spas soc te antiguo ame'-atatic, te jc'axel yaloj te ya sc'otes ta pasele.
32“Ilawil teme ay jich c'oem ta pasel ta namey tel, te c'alal Dios la spas te ants-winic ta balumilal; ilawil ta spamal balumilal, teme ay jich c'oem ta pasel te c'ax muc' sc'oplal te bila c'oem ta pasel ta ora in to. 33¿Ay bal jich lum yaiyoj te ya xc'oponot yu'un Dios ta yolil c'ajc', te ma ba lajic yu'une, jich te bit'il ja'exe? 34¿Ay bal dios te ba sloq'ues jchajp lum ta yolil yantic lumetic ta swenta bayal pruebaetic, señailetic, jchajp señailetic soc guerraetic, te tey la yac' ta ilel spisil yu'el a, te mero xiweltic sba te bila la spase, jich bit'il la spas ta atojolic soc ta stojol te acontroic ta Egipto te Cajwaltic te Dios cu'untique? 35La yich' aq'uel awilic spisil, swenta yu'un jich me ya ana'ic a te ja' mero Dios stuquel te Cajwaltic, soc te ma'yuc yan te pajal soque.#Ex 20.2-3; Is 43.10-13; Mr 12.32. 36La sc'oponex c'alal ta ch'ulchan ta swenta ap'ijubteselic, ta lumq'uinal la yac'beyex awilic buen muc'ul c'ajc' yu'un, soc la awaiybeyic sc'op ta yolil te c'ajq'ue. 37C'ux la yaiy ta yo'tan te antiguo ame'-atatique, soc la stsabey te patil alnich'anetic yu'unic, te la scoltay loq'uel tel ta Egipto ta swenta te smuc'ul yu'ele. 38La xch'ojbeyex loq'uel ta atojolic te nacionetic te c'axem jich yipalic, soc c'axem jich yipic a te bit'il ja'ex, swenta yu'un la awich'beyic te slum-sq'uinalique, soc la awu'uninbeyic ta jc'axel, jich te bit'il yac ta c'oel ta pasel ta ora in to.
39“Ja' yu'un ac'a ta awo'tanic soc ta ajolic, te bit'il ja' Dios stuquel te Cajwaltic cu'untique. Ja' Dios ta ch'ulchan soc ja' nix Dios ta balumilal, ma'yuc yan te Diose. 40Ch'uunaic te sc'op soc te bitic ya yal te mandaliletic yu'une, ja' te yacon ta yalel ta atojolic ta ora in to. Teme jich ya apasique, bin nax me awo'tanic a te ja'ex soc te patil alnich'anetic awu'unique; soc bayal me ja'wil ya xcuxinex ta lumq'uinal te ya yac'beyex awu'uninic sbajt'el q'uinal te Cajwaltic te Dios cu'untique —xi' te Moisese.
Anjibal lumetic ayic ta stojol sloq'uib c'aal yu'un muc'ja' Jordán
41Te Moisés la stsa oxeb lumetic te ayic ta stojol sloq'uib c'aal yu'un muc'ja' Jordán, 42swenta yu'un tey me ya xbajt' ta anel a te mach'a ma yolojuc ya smil te slumal, te ma'yuc bi ora ay c'op yu'unique. Teme bajt' ta anel tey ta lume, bayuc lumil ya xbajt' ta yoxebal, tey me ya xcol a, ma me ba ya yich' milel. 43Te lumetic ja'ic te Beser, te ay ta jochol taquin q'uinale, ja' te muc'ul spamlej, ja' yu'unic te sts'umbal Rubén; Ramot, ta lumq'uinal Galaad, ja' yu'unic te sts'umbal Gad; soc Golán, ay ta lumq'uinal Basán, ja' yu'unic te sts'umbal Manasés.#Jos 20.8-9.
Xjajch'ibal sc'oplal lajuneb mandaliletic
44Ja' in to ja' te p'ijtesel la yac'bey israeletic te Moisés. 45Ja' la yalbey yaiyic spisil ta jchajp te mandaliletic in to soc te bitic chapale, te c'alal loq'uic tel ta Egipto, 46te c'alal ayic ta stojol sloq'uib c'aal yu'un Jordán a, ta muc'ul stenlej xatal q'uinal te yelawinej sba soc Bet-peor, ta sq'uinal Sehón, ja' te muc' ajwalil yu'un amorreoetique. Te Sehón nainem ta lum Hesbón a, te tsalot yu'un Moisés soc te israeletic, te c'alal loq'uic tel ta Egipto. 47Te israeletic la yich'beyic te slum-sq'uinale, soc nix te sq'uinal muc' ajwalil Og ta Basán, cheb muc' ajwalil amorreoetic te nainemic ta stojol sloq'uib c'aal yu'un Jordán. 48Te sq'uinalique jajch'em ta Aroer te ay ta sti'il muc'ul ja' Arnón, c'oem c'alal ta wits Sirión, te Hermón yan sbiile, 49soc ta spisil te Arabá ta stojol sloq'uib c'aal yu'un Jordán, c'alal ta Mar Muerto ta ye'tal wits Pisga.
Currently Selected:
Deuteronomio 4: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
