Deuteronomio 3
3
Israel la stsal Og muc' ajwalil yu'un Basán
(Nm 21.31-35)
1“Ta patil la jtsactic yan be, tojotic bael ta lumq'uinal Basán, pero te Og te ja' muc' ajwalil yu'un te q'uinale, loc' tel soc spisil te soldadoetic yu'une, tal yac'botic guerra ta Edrei.
2“Te Cajwaltic jich la yalbon: “Ma me x'axi', melel cac'ojbatix ta ac'ab te Og, te soldadoetic yu'un soc te slum-sq'uinale, swenta yu'un jich nix ya apasbey te bit'il la apasbey te Sehón, te muc' ajwalil yu'un amorreoetic, te nain ta Hesbón”, xi'.
3“Te muc' ajwalil Og soc ta spisil te soldadoetic yu'un, la yac'botic ta jc'abtic te Cajwaltic te Dios cu'untique. Spisil la jmiltic, ma'yuquix cuxulic jilel. 4Soc ta spisil te lumetic yu'un la cu'uninbeytic, ma'yuc junuc te ma ba la yich' u'uninele. Ta spisil te lumetic ay oxwinic (60) ta jpam, ja' te ayic ta jsejp q'uinal Argob te wentainbil yu'un Og ta Basán. 5Ta spisilic joybilic ta toyol ts'ajq'uetic, soc macal ta balal taq'uin te muc'ul ochibaletic. Ma ba yich'oj ajtayel stuquel te lumetic te ma'yuc sjoyob ts'ajc'ule. 6La cat'elintic slajinel, jich nix te bit'il la jpasbeytic te Sehón, te muc' ajwalil yu'un lum Hesbón. Spisil la jlajintic winiquetic, antsetic soc alaletic, 7ja' xanix la cu'uninbeytic te chambalametic soc te biluquetic te bayalic stojol, te ja' yu'unic te jcontrotactique.
8“Jich ora och ta jc'abtic te q'uinaletic yu'unic te cheb muc' ajwalil amorreoetic te ayic ta stojol sloq'uib c'aal yu'un te muc'ja' Jordán, jajch'em ta muc'ja' Arnón c'alal ta wits Hermón. 9(Ja' in wits to, Sirión sbiil yu'unic te sidonetique; te amorreoetic, Senir sbiil yu'unic stuquel.) 10Ta spisil te lumetic ayic ta toyol spamlejetic, ja' te Galaad soc Basán c'alal ta lum Salca, soc lum Edrei, ja' te lumetic swentainej a te Og, te muc' ajwalil yu'un Basán, spisilic och ta jc'abtic. 11(Te muc' ajwalil Og ja' slajibal sts'umbal te refaimetique. Te swayibe puro taq'uin pasbil, ay chaneb metro snajt'il soc jteb xanix ma ba staoj cheb metro sjamalul. Chican to ta ilel ta lum Rabá te ay ta sq'uinal te amonetique.)
Rubén, Gad soc te olil sts'umbal Manasés jilic ta nainel ta stojol sloq'uib c'aal yu'un Jordán
(Nm 32.1-42)
12“Te q'uinal och ta jwentatic, la cac'bey te sts'umbal Rubén soc te sts'umbal Gad, te jsejp q'uinal te jajch'em ta lum Aroer, te ay ta sti'il te muc'ja' Arnón, c'alal ta yolil te witstiquil yu'un te lumq'uinal Galaad soc te lumetic yu'une. 13Te jxejt' xan jilem te Galaad soc ta spisil sq'uinal Basán te swentainej a te Og, soc ta spisil sq'uinal Argob, te slum-sq'uinal refaimetic ta alele, la cac'bey te olil sts'umbal Manasés. 14(Jair te patil alnich'an yu'un Manasés, ja' la yu'unin te jsejp q'uinal yu'un Argob c'alal ta banti sts'acoj sba soc te q'uinaletic yu'un Gesur soc Maacá. Jair la yac'bey sbiilin te sq'uinal Basán, Havot-jair c'ot te sbiil yu'une, ja' te sbiil yich'oj c'alal ora.) 15Te Maquir ja' la cac'bey te witstiquil yu'un Galaad. 16Te sts'umbal Rubén soc te sts'umbal Gad, ja' la cac'bey te q'uinal jajch'em ta sti'il Galaad c'alal ta muc'ja' Arnón, ta mero yolil te ja'e, c'alal ta muc'ja' Jaboc te ja' sti'il sq'uinalic te amonetique. 17Soc la cac'bey te suclej Arabá c'alal ta ye'tal wits Pisga, ta stojol sloq'uib c'aal, spisil te q'uinal te ja' sti'il c'oem te muc'ja' Jordán te ya xtal ta Mar Cineret c'alal ta mar yu'un te suclej Arabá, ja' nix te Mar Muerto sbiile.
18“Ta sc'aalelal in to, la calbeyex mandal: “Te Cajwaltic Dios cu'untic ya yac'beyex awu'uninic te lumq'uinal in to. Ta apisilic ja'ex te ya ana'ic yaq'uel guerra, tsacaic te awat'ejibic yu'un guerra, baanic soc te alumale, ja' te israeletique. 19Ja' nax me ya xjilic tey ta lumetic la cac'beyex, te antsetic awu'unic, te alaletic soc te chambalametic te jna'oj te ayix awu'unique. 20Te Cajwaltic ya me yac'bey ta banti ya xcux yo'tanic ta nainel uuc te awermanotaque. Jich nix te bit'il te la yac'beyexix te ja'exe, jich ni me ya yac'bey yu'uninic te q'uinal, ya me yac'bey sq'uinalic ta jejch' ja' Jordán. Teme jich c'ote, ja' to me ya sujt'ex bael a ta aq'uinalic te la cac'beyexe, chican banti ayex ta juju-jtul”, la cutex.#Jos 1.12-15.
21“Te Josué la jpas ta mandal uuc, jich la calbey: “La me awil ta asit te bitic la spasbey te Cajwaltic te Dios cu'untique, ja' te bila la spasbeyix te cheb muc' ajwaliletique. Jich me te bit'il la spasbeyix, ja' ni me jich ya spasbey ta stojol te yantic ajwaliletic te banti ya to xc'axate. 22Ma me x'axi', melel te Cajwaltic Dios cu'untic, ja' me ya yac'bey guerra stuquel, ya me sna'beyex yo'bolil abaic”, la cut.
Cajwaltic ma ba ya yac' ochel ta Canaán Moisés
23“Ja' nix ta yorail a, la calbey wocol te Cajwaltique, jich la calbey: 24“Cajwal, jajch' awac'bonix quil te smuc'ul awu'el te jo'on te awabatone. Ma'yuc yan Dios ta ch'ulchan ni ta balumilal te ya xju' yu'un spasel te bitic jelawen yutsil te yacat ta spasele. 25Ya calbat wocol te yacuc awac'on c'axel ta jejch' ja' Jordán, yu'un co'tan xquil te buen lequil q'uinale, ja' te buen t'ujbil witstiquil soc te Líbano”, xoon. 26Pero te Cajwaltic ilin ta jtojol, ja'ex ta awentaic te iline. Ma ba la yac'bon te bila la jc'anbeye. Ja' nax la yal: “¡Tic' a! Ma xc'opojatix. 27Moan bael ta stoyolil te wits Pisga, tey me ya awil bael a ta norte soc ta sur, ta stojol sloq'uib c'aal soc ta stojol smalib c'aal, pero te Jordán ma xju' ya xc'axat bael.#Nm 27.12-14; Dt 32.48-52. 28Pasa ta mandal te Josué, ac'beya yip yo'tan soc ac'beya smuc'ul yo'tan, melel ja' me te ya yic' ta beel te israeletique, soc te ya yac'bey yu'unin te lumq'uinal ya awil yo'tic”, xi' te Cajwaltique.
29“Tey jilotic ta muc'ul stenlej xatal q'uinal te yelawinej sba soc te Bet-peor.
Currently Selected:
Deuteronomio 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
