1 Pedro 2
2
1Jich yu'un jc'axel me ac'a jiluc awu'unic spisil ta jchajp te bila amen ta pasele, soc spisil te lo'laywaneje, te cha'lam-o'tanil, te bic'tal-o'tanile, soc jiluc me awu'unic spisil ta jchajp le-mulil. 2Jichuquex me te bit'il alaletic te ayinelic toe, c'anaic me te lequil chu'ul yu'un te Espíritu te ma'yuc bila capal ae. Jich me ya xmuc'ubex yu'un stuquel, soc jich me ya ata acolelic ta swenta. 3Melel la amulanbeyiquix te yutsil yo'tan te Cajwaltique.#Sal 34.8.
Ja' cuxul ton te Cristoe
4Noptsajanic tel ta stojol te Cajwaltic te ja' cuxul ton stuquel. P'ajbil yu'unic te ants-winiquetique; yan te Diose, tsabil yu'un stuquel, soc bayal sc'oplal ta yo'tan. 5In te ja'exe, jichex uuc te bit'il cuxul tonetique. Ac'a me abaic ta ts'ajc'uyel ta na ta swenta te Espiritue. Jich me ch'ul sacerdoteex yu'un Dios ya xc'oex te ya awac'beyic milbil majt'anil ta swenta Espíritu te lec yo'tan Dios yu'un ta swenta te Jesucristoe. 6Ja' swentail te jich ts'ibubil jilel ta Sjun te Diose:
“Jo'on ya cac' ta wits Sión te muc'ul ton te tsabil cu'une, ja' te ton te c'ax bayal yutsil stuquel te ja' yiptajib chiquin-na ya xc'ote.
Te mach'a ya xch'uune, ma'yuc ta q'uexlal ya xc'ot yu'un”,#Is 28.16. te xie.
7Te ja'ex te ach'uunejiquixe, bayal sc'oplal ta awo'tanic te ach'uunejiquix te Mach'a “Ton”, xi' sc'oplale. Yan te mach'atic ma xch'uunique, ja' sc'oplalic te bila ts'ibubil jilel ta Sjun te Diose:
“Te ton te ma'yuc stuul c'ot ta yo'tanic te albañiletique,
ja' yiptajib chiquin-na c'otix stuquel”,#Sal 118.22. te xie.
8Soc ja' sc'oplalic xan te bit'il ts'ibubil jilele:
“Ja' te ton swenta c'ojch'injibal soc te ton ya syaleswane”,#Is 8.14-15. te xie.
Melel ya syalesotic ta scaj te ma xyich'beyic ta muc' te sc'ope. Yu'un nanix namey jich albil sc'oplalic yu'un Dios a.
Te lum yu'un te Diose
9Yan te ja'exe, tsabilex yu'un Dios soc te lum yu'une. Sacerdoteex yu'un te Muc' Ajwalile. Ch'ul muc'ul lumex#Ex 19.5-6; Is 43.20. soc manbilex yu'un te Diose,#Ex 19.5; Dt 4.20; 7.6; 14.2; Tit 2.14. swenta yu'un ya me apuquic ta alel te jchajp at'eliletic spasoj te Diose#Is 43.21. te bit'il la yiq'uex loq'uel tel ta bay te ijc' q'uinale soc te la yiq'uex ochel ta bay te saquil q'uinal te jelawen yutsile.#Is 9.2. 10Te ja'exe ma ba lumex yu'un Dios ta neelal to. Yan ta ora to, lum c'oemexix yu'un te Diose. Ta neelal to ma la ataic c'uxtayel. Yan ta ora to, la ataiquix c'uxtayel yu'un te Diose.#Os 2.23.
Jichuc me x'ainex te bit'il abatetic yu'un te Diose
11Quermanotac te c'uxex ta co'tane, ya calbeyex wocol, te jich c'oemex te bit'il jyanlum te beomal nax ayex li'to ta balumilale, ac'a jiluc awu'unic te bila mulanbil ta pasel yu'un te abaq'uetalique te ja' scontro te ach'ulelique.#Sal 119.19. 12Jich yu'un ma me amenuc awat'elic ta stojol te jyanlumetique. Melel ya smuquen ayantayex soc scuyojex te amen te awat'elique. Ja'uc me to, manchuc teme amen awat'elic ta sc'opique, tey me ya sna'ic stojol a te bit'il lec te awat'elique, soc tey me ya yalbeyic lec sc'oplal a te Diose te bi ora ya xtal te colele.
13Ta swenta te Cajwaltic, ich'aic ta muc' te mach'a yich'oj yat'elic li' ta balumilal to, jich bit'il te muc' ajwalil te cajal yat'ele, 14jich nix te gobernadoretique te ja' ticunbilic ta yaq'uel castigo ta stojol te mach'atic amen te bila ya spasique, soc te lec sc'oplal ya yalbeyic te mach'a lec te bila ya spasique. 15Melel ja' sc'anjel yo'tan Dios te ya apasic te bila leque, swenta yu'un jich me ya xmajc' yeic a te mach'atic amen yo'tanic te ma sna'ic bi ya yalique.
16Te bit'il libre ayexe, ma me ja'uc ja' libre ayex yu'un te ya apasic te bila amene. Lequil abatuquex me yu'un te Diose. 17Ich'aic ta muc' spisil yantic. C'ux me x'awaiy ta awo'tanic te awermanotaque. Xi'aic me te Diose. Ich'aic ta muc' te ajwalile.
Te bila ya sc'an spasic te abatetique
18Ja'ex te abatexe junuc me awo'tan ch'uunbeyaic smandal te awajwalique. Ich'aic me ta muc' ta spisil awo'tanic. Ch'uunbeyaic smandal te mach'a lec yo'tan soc te toj ya xmandalaje, soc jich me xapas ta stojol uuc te mach'a ixta yo'tanique. 19Teme ay jowil nax ya yac'beyex c'axuc awocolic te awajwalique, lec me ya yaiy ta yo'tan te Diose teme ya sts'ijc' awu'unique ta scaj te ach'uunejique. 20Yan teme ta scaj amul te ya awich'ic paq'uel ta majele, ¿bila ya xloc' awu'unic a teme jun awo'tan ya ats'iquic te awocolique? Yan, teme ta scaj lec te bila ya apas te ya xc'ax awocolique, soc teme jun awo'tan ya sts'ijc' awu'une, lec me ya xc'oat ta stojol te Diose. 21Ja' la yiq'uex Dios yu'un te jun awo'tan ya ats'ic awocolique. Melel te c'alal c'ax swocol ta jwentatic te Cristoe, tey la yac'botic quiltic te bit'il ya sc'an te ya xc'ax jwocoltic uuc te jo'otique. 22Ma'yuc la sle smul stuquel te Cristoe soc ma ba lo'laywan ta c'op.#Is 53.9. 23Te c'alal laj ta ixtac'optayele, ma la sujt'esbey te yixta-c'opique. Te c'alal c'ax swocole, ma ba loc' utaw ta ye. Ja' nax la yac' sba ta sc'ab te Diose, te toj ya xchajbanwan stuquele.#Is 53.7. 24Ja' la xcuchbotic jmultic ta cruz-te' ta sbaq'uetal stuquel te Cristoe. Yu'un jich ya xlaj sc'oplal ta co'tantic a te mulile, soc jich me ya cat'elintic spasel te bila leque. Melel ja' colemex yu'un te bit'il laj ta ejch'entesele.#Is 53.5. 25Yu'un ta neelal jich ayex te bit'il chijetic te jowejemique.#Is 53.6. Ja'uc me to, sujt'emexix tel ta stojol te Cristoe te ja' Jcanantaywanej awu'unic stuquel te yat'elinej scanantaybel te ach'ulelique.
Currently Selected:
1 Pedro 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.
