Tatanigaina 35

Zekopu Neke Leghu Betolo

1Ianimu tuna ghe neke kahe ghua nga iahi God ka Zekopu, “O lao Betolo o la au hinae ghu aianimu. La riva ghini aianimu kaike sopebeana vanagu ara ia God neke podolo ghinighono ka ia fafata pelo kaini agho ia tahiumane Iso.”

2Neke kahe ghua ghu iahi Zekopu ka ia fototatamana taghona nia ka heiri haroharo dike au taremehanaro e ghua, “O nai kairi ira god nguzunguzu ta kuru ghau noke hio mehariro nia va mamalahu ghau taghomu nia va vona poko ta ghighiho e ghua, mala taghe kaike va ghilaghilana noto va mamalahu ghau taghomu mala va totoana ghinina God ta ghuana. 3Ghita da vona age ghatunaina ani Betolo ka ta age riva ghinio ara kaike sopebeana vananina God ia neke ungene tughuriro ira nogu verevere ka ia fafata nake auno ara ka mamarutana, nia ia ta ghahe leleghuau tudu hae ghe hae ta laona ara, e ghua.” 4Maneri dike vanani ghu Zekopu ira leghu nguzunguzu god nga dike kururiro maneri nia ira teteke dike va vonariro e ghua, neke zoe tamunu ghidi ghu Zekopu ka pekana ia heke oko ani Sekemu. 5Maneri dike ghahe, ghe deo hei neke bozo leghu laorira leghudi mo, vununa God neke va mamaghuri ira noni ka rekanana malau ianimu.

6Zekopu taremehadi ira leghu noni nga ka manei dike la sabara ani Luzi, ia ta va kudo ghini Betolo ghatunaina ka ia kavana Kenani. 7Manei neke riva ghini kaike sopebeana aianimu, neke va kudo ghini Ele-Betolo#35:7Ele-Betolo fafahakanana mu God na Betolo. ghu malau ani, vununa God neke podolo ghini manei aianimu ka ia fafata pelo kaini manei Iso ia tahinamane.

8Debora ia ghaseriva ka Rebeka neke leme ghena dike gilu ghini ghu ka pekana ia heke oko pelopekana mo Betolo. Aloni Bakuti#35:8Aloni Bakuti fafahakanana mu heke oko na muko hihingo. dike ghua ghini ghu baolina heke ani.

9Ka ia ke leghu mehana Zekopu sipana ani Padani Aramu, God neke podolo ghini leghuni manei neke vanani ghu ia va veha. 10God neke kahe ghua iahi ka manei, “Babaolouna agho mu Zekopu,#35:10 Zekopufafahakanana mune rekete lao ka ia susubina, ungene talevarana, 'ne sesebo manei'. ghe ghatunaina vai vona ghu, babaolouna agho mu Isiraeli.#35:10 Isiraeli fafahakanana mu ne magara taremehana God. ” Isiraeli neke ghua ghini ghu God baolina manei.

11Nia God neke kahe ghua iahi ka manei, “Ara mu God Torai Mana.#35:11 Ka Hiburu mu Ele-Sadai. O nai va tehi rekaha o hugara ghu. Ira butubutu noni edi age pagusu meha ka agho, nia agho o age faadi ira mane ginitaukela, e ghua. 12Ara a age vananigho haro agho ia kava nake vanadio ara Ebarahamu ghe Aesake, nia ara a age vanadi haro molamo heiri ira ta pagusu meha ka leghuu agho, e ghua.” 13Ka ia leghuna turi taremehanana Zekopu aianimu, God neke ghahe kaini manei.

14Zekopu neke va nohe tetu vonai kaike ghahipa merumeru va tetetu aianimu ka neke turino God taremehana manei. Ianimu tuna ghe neke va oranga ghini lao waeni nia oelena olivi nga mala nai va maduanaina vananina God. 15Betolo#35:15 Betolo fafahakanana mu sugana God. neke ghua ghini ghu Zekopu baolina malau ianimu.

Ira Leme Ka Reseli Ghe Aesake

16Ianimu tuna ghe dike ghahe kaini nga maneri Betolo. E deo ngama gedi dufu ghu Efarati to karata mala va dodoli ghu Reseli, ghe neke puina mamarutana vanani fuludu. 17Ka ia neke puina vavahagalao manei ka ia karatana rekaha, ia fotati ta mala va doli rekaha neke kahe ghua iahi ka manei, “Oka maugheu ghu Reseli, kaike tuumaneni agho koini,” neke ghua ghini. 18Ghe Reseli neke to namo leme, neke vanani ghu babaolo Beni-Oni#35:18 Beni-Oni fafahakanana mu tugumane muko hihingo ka ara. ia tuunamane ghe neke hingokai va nonoghana nga manei. Ghe nona mama neke vanani babaolo Benizemeni#35:18 Benizemeni fafahakanana mu tugumane kame mautugu. mo.

19Ka ia lemena Reseli maneri dike gilu ghini ka ia gheremena hangana ta lao Efarati, ta va kudo ghini Betilehemu ghatunaina. 20Zekopu neke nai vonai kaike ghahipa va tetetu aianimu mala va ghilaghilanana ia lianga bekuna Reseli. Ghahipa ianimu e au ngama aianimu ka ravata iahi.

21Zekopu neke rizu ghaheni neke la riva ghini ghu kaike malau tei ka manei ka ia keha pelona ia malau dike va kudo ghini Migidala Eda no maneri. 22Ka ia auna Zekopu ka kava ianimu, Rubeni neke haghele la epu taremehana Biliha, kaikeu ka ira ghaseboro irogha nona mama, neke nomohi ghu Zekopu.

Zekopu mu neke kurui tazoi palu tuunamane:

23Tuunamanera Lea mu:

Rubeni (doli kenuna ka Zekopu),

Simoni, Livae, Zuda, Isaka nia Zebulani.

24Tuunamanera Reseli mu:

Zosepu ghe Benizemeni.

25Tuunamanera Biliha ia fotati mala varituhu ka Reseli mu:

Dani ghe Nafutalae.

26Tuunamanera Zilipa ia fotati mala varituhu ka Lea mu:

Gadi ghe Asa.

Irahi lamu tuunamanera Zekopu dike dolira ani Padani Aramu.

27Zekopu neke lao ka Aesake ia nona mama taghonai ani Mamare gheremena Kiriataba ia ta va kudo ghini Heboroni ghatunaina ka dike auro Ebarahamu ghe Aesake. 28Aesake mu neke doli dufui 180 komuhuna. 29Manei neke leme ka ia toraina ta mamanekusu ghena, dike gilu ghini ghu Iso ghe Zekopu ira palu tuunamane.

Currently Selected:

Tatanigaina 35: kji

Highlight

Copy