Tatanigaina 34

Sekemu Neke Sakomo Hioi Daina Neke La Epu Taremehana Ghu

1Kaike ravata Daina ia tuudighase Zekopu ghe Lea neke ghahe la sigho ghidi keha fotatidi Kenani. 2Hamoa mu neke mane babatudira ira noni ka ia butubutu Hivi. Sekemu ia tuunamane manei, ne finini ghu Daina, neke sakomo va gimai neke hioi ghu la epu taremehanana. 3Ghe manei neke age finini fotati foforu iahi ta toraina ngangaguanana neke kabai ghini fuludu ghu, nia turi va lomolomosi tuna neke ghua. 4Sekemu neke la kahe ghua ghu iahi ka Hamoa ia nona mama taghona, “O hio vanagu fotati iahi e mala nogu ghaseboro ghu,” neke ghua ghini.

5Ka ia nomohi Zekopu neke ngovalina Sekemu ia tuunaghase, ira tuunamane dike au ka ira galahedi kava sesehu taremehadi ira nona tagukava popohi, neke au vanemoho ghini ma ghu manei dike vuhai sura ghu maneri.

6Ka fafata iahi, Hamoa ia nona mama Sekemu neke kave lao, neke la nonogele taremehana ghu Zekopu. 7Nomohi di ghua ghu ira tuunamane Zekopu heve neke dufuna ka ia keradi fotati, to sura meha ma maneri sipadira ka ira galahedi kava sare. Maneri dike toraina muko hihingodi nia halari e ghua, dike kahe ghua ghu iahi, “Sekemu neto riva ghini ka hoataida ghita ira noni Isiraeli ia leghutau ta toraina muko ia ta va haghava ghita.”

8Ghe Hamoa neke kahe ghua iahi ka maneri, “Tuugumane iahi ara Sekemu neto kabai ghini fuludu tuumughase nia. O va malumi ko e hioi ghu manei mala nona ghaseborona. 9Aria da riva ghini ghu kaike varivehai: Ghau o age vanamai tuumughase nira maladi tuumaimane idi ghai nia ghai ga age vanamu ghu ghau tuumaighase idi maladira tuumumane nira ghau e ghua. 10Ghau o boka au hinae mo ka hoatamai ghai o au ghu hae ta kabai auna ghau ka kava iahi ghai. Ghau o boka rivai bisinisi mo ka giliona ini, nia noto fini kava ta kabai ghini la ghau, o boka tabari mo tuna e ghua.”

11Ianimu tuna ghe neke kahe ghua nga iahi Sekemu ka nona mama Daina nia ira tahinamane e ghua, “Neto veha la mo ka ghau, o toka ghinagu ta varihiona ara ka manei. Ara a vanamu heve leghutau ta ghuana lama ta fangaina ghau,” neke ghua papadarina. 12“O va kahe ghinagu heve namaha no kabai ghinina ghau nia niha ghu mu tabarana ghase no kabai ghinina ghau e ghua, a vanamu ghu ara heve ta fangaina ghau. Ara na suna kabai ghini ghau ma ta vanaguna fotati nia mala nogu ghaseborona.”

13Ira tuunamane Zekopu dike ungene tughu sesebo lao ka Sekemu nia Hamoa ia nona mama e ghua, vununa Sekemu neke ngovali Daina ia keradi fotati. 14Maneri dike kahe ghua iahi ka maneri palu, “Ghai e deo ga boka va malumi ghu ia keramai fotati ta varihiona ka hei ia ta deo ge papahe va ghilaghila ghu. Ianimu e age hahaghavana leghutau ka ghai. 15Ghai a boka va malumi ma ianimu noto meha taghe ghai noto ghua la ghau papahe va ghilaghilarira ira leghu mane nga ka ghau. 16Ianimu tuna ghe ga age vanamu nga ghai ira tuumaighase nia age hio tamu tuna ghai ira tuumughase ghau malamaina taghomai, ta ghuana. Ghai a age au hinae ka hoatamu ghau a meha kaike noni taremehamu ghu ghau. 17Nga noto deo la ghau go va malumu ghau ghu taghomu ta mala papahe va ghilaghilana mu, ghai a hioi keramai fotati ini a ghahe ghu,” dike ghua ghidi.

18Ira turi va fafahaka ka maneri neke nonomoho vehadi mo ka Hamoa nia Sekemu ia tuunamane e ghua. 19Sekemu neke deo ge mamahuge ghu riva ghinina heve dike kabai ghini ani maneri vununa manei neke toraina kuhana ghini ia tuunaghase Zekopu. Sekemu ghu mu kaike ghu ka ia fototatamana maneri ta puina va vonavonai fuludu maneri. 20Hamoa nia Sekemu ia tuunamane, dike lao ghu ka ia malau mala haedu ka ia makatanana malau leghaha dike la turi vanadi ghu ira nonidi ka malau leghaha ani. 21“Noni irahi mu di noni vehadi ka ghita. Va malumuri ta auna ka malau ini ghita edi rivai bisinisi ghu. Kava ini mu ne faa fatadi mo maneri. Ghita da boka varihio mo ka ira tuudi ghase maneri nia maneri edi boka varihio mo ka ira tuuda ghase ghita, e ghua. 22Ghe mane irahi edi va malumuri ma taghodi ta meha au taghe kaike noni ta ghuana maneri taremehadana ghita, dato papahe va ghilaghila taghe taghodi dato ghua la ghita ira mane. 23Dato riva ghini la ghita iahi, ira tagukava popohi nia ira keha leghu ta taghori nga maneri edi boka meha noda mo ghita. Ghita dato leghuri ma ghu heve ta va puhini ani maneri, edi boka meha au hinae ghu maneri ka hoatada ghita.”

24Ira leghu nonidi nga ka malau leghaha ani dike veha vanadi mo ka ngangana dike va vonaio Hamoa ghe Sekemu, dike papahe va ghilaghila haroharo ghu ira mane.

25Leghudi lito ravata ka fafata dike karataro nga maneri haroharo ira papahe va ghilaghiladi, keha palu ghu ka ira tuunamane Zekopu babaolodira Simoni ghe Livae, ira palu kerana maghiha Daina, dike hiori ira nodi leboto sisilufu mala magara dike la haghele magara ghu ka ia malau leghaha dike deoro gedi ke nganai ghu edi boka la magara mo ira kana ta ghuana. La atunguri tuna ira leghu mane nga, dike ghua. 26Maneri dike atunguri Hamoa ghe Sekemu ka ira leboto sisilufu mala magara. Hio kavei tuna Daina ka ia sugana Sekemu gedi ghahe ghu dike ghua. 27Ira keha tuunamane Zekopu dike meha dike hiori ghu ira vahina leghutau dike kabai ghidiro nga. Dike riva ghidi nga leghu irahi nga maneri mu vununa ka ia ghinina ia leghutau ta hahaghavana dike riva ghinio maneri ka ia keradi fotati. 28Maneri dike hiori ira leghu tagukava popohi nga nia ira keha vahina leghutau nga e ghua ka maneri ka giliona malau leghaha ani nia peghuru ka ira galahedi kava sare, e ghua. 29Maneri dike hiori vahina leghutau ta vona tabaradi nga, sakomo hiori ira leghu fotati nga nia rekaha nga, nia hure ghaheri vahina leghutau nga ka ira giliodi suga, dike ghua.

30Zekopu neke kahe ghua iahi leghunana ka Simoni ghe Livae, “Ghau palu no nakaiau ara ka mamarutana. Ghatu ira nonidi Kenani, Perizi nia ira keha leghu noni nga ka malau iahi e ghua, edi age kikipana ghinagu ara. Ara e deo ga kuruau tehi noni ghu. Dito varighara meha la maneri haroharo mala magarauna ara, kamotona butubutu iahi ka ghita e age eongo ghatu,” neke ghua ghidi.

31Ghe maneri palu dike kahe ghua iahi ka Zekopu halidira, “?Heve ghe gada boka va malumi nga ghita kerada fotati ini, ta mala taghe kaike ta kikirasei tabara ta ghua ghinina maneri?”

Currently Selected:

Tatanigaina 34: kji

Highlight

Copy