Tatanigaina 32

Zekopu Ne Va Tana Mala Dufuina Iso

1Ka ia tatanigai ghahe neke laono ghu Zekopu, ira engizeli ka God dike dufui manei. 2Ne finiri ghu Zekopu, manei neke kahe ghua iahi, “!Iahi mu malauna ia pukuna ira engizeli ka God!” neke ghua. Mahanaimi#32:2 Fafahakanana Mahanaimi mu “palu malau teri” e ghua. neke ghua ghini ghu manei babaolonana malau ianimu.

3Zekopu neke kusu va ghahe kenu lao noni ta hio lao nonomoho ka Iso ia tahinamane taghona neke auno ka ia kavana Seia ta va kudo ghini ia solosona Idomu haro. 4Manei neke va kahe ghidi, “O la va kahe ghini iahi ia faghinagu Iso: ‘Ia nou noni riva Zekopu ne kaheina, ara nato au taremehana to au ghu Labani vuhai dufu ghu ghatunaina. 5Ara mu a tagho bulumakau, dongiki, sipisipi, gouti, nia mane nia ghase mala varituhu, e ghua. Ghatunaina ara na va ghahe agei ghu nonomoho iahi ka agho ia faghinagu ka ia rangerangei ta mala age hio vehana ara ka agho.’ ”

6Leghuna la va dufui ia nonomoho, ira dike hio lao nonomohoro dike leghu ka Zekopu dike la turi ghua ghu iahi, “Ghai nake la dufui mo ia tahiumane Iso, to la meha mala dufuigho ghu agho manei ghatunaina taremehadira 400 mane.”

7Zekopu neke toraina maughena nia angaghena fuludu. Manei neke fotari ghu ira noni dike au taremehanaro ka palu pukudi. Manei neke fotari molamo ira sipisipi, gouti, bulumakau nia kamele ka palu pukudi. 8Manei neke ngana ghua iahi, “Neto meha magari la Iso ia pukuna ta kenu, haeba ia keha pukuna e boka pelo mo.”

9Verevere tuna neke ghua Zekopu, “!Agho ia God ka nogu kakamane Ebarahamu nia God ka nogu mama Aesake, nomoho mehau! Iahova, agho noke va kahe ghinagu ta ke leghuna ka ia kava taghogu nia ka ira taremehagu ta age va veharira ghu agho vahina leghutau nga malaguna ara. 10Ara e deo ga fata ghu hiorira ira leghu nou varisute nga nia va hohoghona nga noke va podolo vanaguro ara ia nou noniriva. Ara nake kadoli ia Ketuhu Zodani deo auna kaike leghutau ghu, nga kaike totongono ma, nga ghatunaina mu ara nato la leghu meha taremehadi palu leghahai pukudi noni. 11Ara na verevere fangaigho ta hio va doliauna ka ia tahigumane Iso, vununa ara na maughegu ta mehana manei ghatu ta magarauna ghu ara nia ira uke taremehadi ira tuudi, e ghua. 12Ghe oka nganakaini ghu noke naiungeneo agho ta mala va veharira vahina leghutau nga malaguna ara nia mala vanagu pagusu ta tehi fuludurira ira garanga ka ia tapuruna tahi ta deo ge boka tahori ghu e ghua, noke ghuao.”

13Zekopu neke epu aianimu ia reduna. Ia keha fufugho manei neke faeteri keha tagukava popohi mala namaha vananina Iso ia tahinamane taghona: 14200 ghasedi gouti, 20 manedi gouti, 200 ghasedi sipisipi, 20 manedi sipisipi, 1530 ghasedi kamele taremehadi ira rekahadi tuudi, 40 ghasedi bulumakau, 10 manedi bulumakau, 20 ghasedi dongiki nia 10 manedi dongiki, e ghua. 16Manei neke nakairi tagukava popohi irahi ka ira pukudi ta varifata taghodi nia nakaini tuna kaike noniriva mala kopu ghinina kaike pukuna neke ghua. Neke kahe ghua ghu iahi manei ka maneri, “Ghahe kenu age ka ara nia o nakai va hauhauri sopai pukudi tagukava popohi nira, e ghua.”

17Ka ia noniriva ta kopu ghini ia pukuna tagukava popohi ta ghahe kenu lao, Zekopu neke kahe ghua iahi: “Ka ia la dufui ghau Iso ia tahigumane ara, ta notoho ghua ghu iahi manei, ‘?Hei mu faghinamuna ghau? ?Hae mu ta laona ghau? ?Hei mu ta kutamadira tagukava popohi irahi kenumu mo ghau?’ neto ghua la manei, 18ghau o toraina kahe ghua iahi ungene tughuina, ‘Nona Zekopu ia noniriva ka agho. Manei neke va mehari mala taghe kaike namaha vanani Iso ia faghina ka manei. Taghonai Zekopu ne meha mo ka leghumai ghai,’” o ghua ta kaheina.

19Manei neke kahei molamo varifatana nonomoho ianimu ka ia va paluna, ia va litona, nia ira keha haroharo dike kopu ghidiro ira pukudi tagukava popohi: “E varifata haro ma ta toraina kaheina ghau ka Iso ka ia la dufui ghau. 20Ghau o toraina kahei, ‘Ia noniriva ka agho ne meha mo ka leghumai ghai,’ ” ta ghuana. Zekopu neke ngangana ghua iahi, “Ara a age va bualefo hinaei manei ka namaha irahi nia ka ia la dufui ara, haeba e boka hio namahau mo manei,” neke ghua. 21Ira namaha ka Zekopu neke kusu va kenu laori ghu, nga taghonai mu neke epu ia reduna ka ia malau tei.

Zekopu Ne Magara Taremehana God

22Ka redu ianimu Zekopu neke baghunu vona neke hiori ghu ira palu ghaseborona, ira palu nona ghaseriva nia ira tazoi kaike tuunamane neke kadoli ghu ia Ketuhu Zaboko. 23Ka leghuna neke to va ghahe kadolo laoriro, manei neke va ghahe kadolo laori ira vahina nona leghutau ta taghori nga. 24Nga manei mu neke au mo leghu taghonai kakaike. Meha tuna kaike mane ge magari ghu ge vuhai pagasa ghu ia fufugho, neke ghua. 25Ne finini ghu ia mane ta deona taghona ge boka paufi ghu Zekopu, manei neke ruzai Zekopu ka ia soro huma papagusuna neke zuara ghu manei. 26Kahe ghua tuna iahi neke ghua ia mane, “O nakaiau, neto pagasa ia fufugho.”

Ghe Zekopu neke kahe ghua iahi, “Ara e deo boka tarukaighona, noto deo la agho go vanagu veha ghu,” neke ghua ghini.

27“?Hei mu babaolouna agho?” neke ghua notohona ia mane.

“Zekopu,” neke ghua ungene tughuina.

28Ia mane neke kahe ghua ghu iahi, “Babaolouna agho to deo ge Zekopu ghu, nga Isiraeli e ghua, vununa agho noto magara taremehana God nia noni e ghua, noto paufuri ghu.”

29Zekopu neke kahe ghua iahi, “Va kahe vanagu ko babaolou nia.”

Ghe manei neke ungene tughui, “?Ne heve ghe no kabai avohi nga agho babaologu ini?” neke ghua ungene tughuna ia mane. Vanani veha tuna Zekopu aianimu neke ghua manei.

30Zekopu neke kahe ghua iahi, “Ara nato finini God ka ia vari tala taremehana, ghe ara na doli ngama.” Penieli#32:30Penielifafahakanana muhihilina God. neke ghua ghini ghu manei baolina ia malau.

31Ia taunu neke to la vona meha ka ia ghahe fuludi Penueli Zekopu. Manei neke ghahe sutusete, vununa ia papagusuna sorona neke zuara. 32Geta ghua ghu ghatunaina ghe, ira nonidi Isiraeli edika mahaini ghu ia lali ghiho ta gima ka ia papagusuna huma supiaina tagukava, vununa ia mane neke ruzai Zekopu ka lali ghiho ta gima iahi.

Currently Selected:

Tatanigaina 32: kji

Highlight

Copy