Tatanigaina 31

Zekopu Ne Pelokaini Labani

1Zekopu neke nomohi dike kahe ghuana iahi ira tuunamane Labani, “Zekopu neto hiori ira vahina leghutau nga neke taghoriro nomai mama. Manei neke meha taghotagho ka ira heve neke taghoriro nomai mama.” 2Zekopu neke finini haro molamo neke deona Labani taghe sepao ta ghuana ia puhina manei.

3Ianimu tuna ghe neke kahe ghua nga iahi Iahova ka Zekopu, “Agho o leghu lao ka ia kava ira faau nia ira taremehau agho. Ara ta age au taremehauna agho.”

4Va ghahe ghidi lao ngengene tuna Reseli ghe Lea neke ghua Zekopu mala la dufuina ka ira galahedi kava sare peghuru ka dike auro ira sipisipi nia gouti ka manei. 5Manei neke kahe ghua iahi ka maneri palu, “Ara na finini nomu mama ta deona ira puhina taghe neke ghuao sepao ta ghuana ka ara, ghe ia God ka nogu mama ne au taremehagu ma neto au ghu. 6Ghau palu haro no avohi mo nake toraina riva va katona ara vananina nomu mama. 7Neke ghua mo ianimu ghe, manei neke seboau ara leleghu fafata neke holarari ghu ira tabaragu. Ghe God e deo geke va malumi ghu manei ta va mukoauna ara. 8Neke va kahe ghinaguna manei mu ‘Ira gouti ta doodoo ghiho mu ta mala age tabarauna agho,' neke ghua, nia va doli rekahadi ta doodoo ghiho tuna ira leghu gouti nga neke ghua. Ianimu tuna ghe neke holari nga ia ghaghahena rivai tabara neke kahei ghu, 'Ira gouti ta solasola ghiho mu ta mala age tabarauna agho,' ke va doli rekahadi ta solasola ghiho tuna ira leghu gouti nga neke ghua. 9Ka ghaghahena iahi mu, God neto hio kairi ghu ira sipisipi nia gouti ka nomu mama neto vanagu ghu ara.

10“Ka ia totosona mala vari pauku ira gouti, ara nake finirini ka kaike epubaghunai ira manedi gouti ta solasola, doodoo nia ridorido dike paukurira ira ghasedi ta varifata haro ka ira manedi. 11‘!Zekopu!’ Neke ghua ia engizeli ka God ka ia epubaghunai ara, ‘Heve,’ nake ghua ara ungene tughuna. 12‘Fini lao,’ neke ghua ia engizeli, ‘Ira leghu gouti manedi ta solasola, dodoo, nia ridorido lama di paukura. Ira keha mu deo ma. Na ghua ghini nga ara iahi mu, vununa ara nato finiri ira leghu heve ta va riva ghinigho nga agho Labani. 13Ara lamu ia God neke dufuighono agho ani Betolo. Aianimu lamu noke nakai vonaina agho kaike ghahipa va tetetu mala va ngana ghinigho leghuna ia epubaghunai noke fininio agho. Agho noke va maduana vanagu ara ghahipa ianimu ka ia va oranga ghini lao oelena olivi. Aianimu noke riva ghinina molamo agho ka ara kaike tahuna naiungene. O vatana o ghahe kaini ghu soloso iahi, o leghu lao ghu ka ia kava noke dolio agho.’”

14Reseli ghe Lea dike ungene tughui Zekopu, “To deo kaike leghutau ghu ka nomai mama ta auna ta mala hio kadolina ghaipalu. 15Manei mu taghe noni mehamai ghai palu ne ghua ghini ghai. Manei neke tatabara ghini ghai nia ghatunaina ge kai va noghari ghu ira leghu rongo noke kairio nga agho ka manei mala tabara ghaina ghai palu, ne ghua. 16Leghu taghotagho neke hio kairi irahi nga God ka nomai mama mu, nomai ghai palu nia ira nomai rekaha, e ghua. O riva ghidi agho heve neto va kahe ghinighona God.”

17Va kahe ghidi tuna ira ghaseborona nia ira tuuna ta haghe ghahena ka ira kamele neke ghua Zekopu. 18Ira leghu nona sipisipi nga nia gouti nga e ghua, manei neke aho va ghahe kenu laori kenuna mo taremehadi ira vahina leghutau nga neke hiorio manei ani Padani Aramu mala laona ka Aesake ia nona mama taghona ka ia kava Kenani.

19Ka ia fafata la senge kai kalana sipisipi #31:19 Ira mane ta kopui sipisipi edi sengeri ira kaladi sipisipi ka leghuna rabongi edi hiori ghu ira kaladi mala fihu pokonaLabani, Reseli neke la sikori ira god nguzunguzu teri ka nona mama dike auro ka ia suga manei. 20Zekopu neke seke ghini Labani ka neke deono ge va kahe ghini ghu neto ke ghahena taghona. 21Manei neke hio taremehana ira vahina leghutau neke taghoriro nga neke kadoli ghu ia Ketuhu Iufereti ghahe vai laona ka ira voruhu ta va kudo ghidi Gilidi.

Labani Ne Bozo Leghui Zekopu

22Leghudi lito ravata ghe neke hadu kavei nga Labani neke to pelona Zekopu. 23Manei neke hio varighara ghidi ira taremehana neke bozo leghui ghu Zekopu vitu ravata neke vuhai la dufui ghu ka ira voruhu ta va kudo ghidi Gilidi. 24Ka kaike epu baghunai ka redu ianimu, God neke meha ka Labani neke la kahe ghua ghu iahi, “Agho o banabana, oka la va kahe ghini ghu Zekopu kaike leghutau tei ghu.”

25Zekopu neke to va tetu vonai ia suga tapole ka manei ka kaike voruhu ka ia soloso ta va kudo ghini Gilidi nia Labani nia ira taremehana gedi ke va tetu vonai ghu ia suga tapole ka maneri aianimu haro, deona ge hau ghu ka maneri, dike ghua. 26Labani neke la kahe ghua iahi ka Zekopu, “Agho geala e deo goke riva ghini ghu iahi. Agho noto seke ghinagu ara noto hio ghaheri ghu tuugughase nira, taghe fotati noke seka ghidi ka magara, ta ghuana. 27?Neke heve ghe noke pelo ghahe poika nga no seboau ghu? ?Neke heve ghe noke deo nga go va kahe ghinagu ghu, gake boka va ghahe ghau ghu ka va ghazaghaza nia kozekoze ka nakeledi selele nia ka mala hilava ta kuru vulohodi, e ghua? 28Agho e deo ghe goke va malumuau ghu angohorira ira tuugughase nia ira tahigu teri, kubaeri ghedira. !Neke toraina kingona leghutau fuludu riva ghinina agho ianimu! 29Ara e kuruau mana mala va mukoighona agho, ghe reduo ia God ka nou mama neke kahe ghua iahi ka ara, ‘Agho o banabana, oka la va kahe ghini ghu Zekopu kaike leghutau tei ghu,’ neke ghua ghinagu. 30Ara na avohi mo neke heve ghe noke ghahe nga agho, vununa agho noke toraina kuhana ghini take leghuna ka ia malauna nou mama. Ghe agho geala e deo goke sikori ghu ira nogu god ara?”

31Zekopu neke ungene tughui Labani, “Ara nake maughegu, vununa ka ia nganganagu, agho go age sagu hio ghahe tagu la tuughase idi nato va kahe ghinigho la ara, nake ghua. 32Ghe noto hadu kavei la agho aiahi hei ne kuruina nou god ari agho, manei mu e mala age va lemei ghatu. Ka kenudi noni taremehamai ta au irahi, agho o finiri heve leghutau ta noura agho o hiori ghu.” Ghe Zekopu e deo geke avohi ghena ghu neke sikorira Reseli ira god nguzunguzu ka manei.

33Haghele tuna neke ghua Labani ka ia suga tapole Zekopu nia ka ia suga tapole Lea nia ka giliona ia suga tapole ira palu fotati mala riva neke ghua, ghe deo ma neke la finina manei. Leghuna ia kave mehana ka ia suga tapole Lea, manei neke la haghele ka ia suga tapole Reseli. 34Reseli mu neke to hiori ira nguzunguzu god na suga neke nakai hagheleri ghu ka kaike mogoha mala haghe ka kamele neke nohe lao ghu fatedi. Labani neke hadu kamoti ia giliona suga tapole, ghe neke deo ma ge finiri ghu.

35Reseli neke kahe ghua iahi ka nona mama, “Mama, go haligho la ka ara ta deo ini ga boka tetu vona ghu ka kenuu agho. Ara ne dufuau fafatana fogara fotati.” Labani neke hadu ghu ka ira leghu pelodi nga, ghe manei neke deo ge boka finiri ghu ira nona god nguzunguzu ta mala au ka ia sugana.

36Zekopu neke toraina minga vanani neke noreki ghu Labani. “?Heve mu muko nake riva ghinina ara?” neke ghua notohina. “?Heve mu vetula nake va mukoina ara ne vananighona ia mana mala zorapa leghuauna agho? 37Vununa agho noto suku sasalapari vahina nogu laghutau nga deona goke fini ghu kaike leghutau ta siko tau mehana ka ia suga agho. Nakai mehai aiahi ka kenudi taremehau idi agho nia ara e ghua, edi kahei ghu maneri hei mo ka ghita palu ne lotorona.

38“To varadaki komuhu ghatunaina mu tataniga ia au taremehau nake mehao ghu ara. Ira sipisipi nia gouti ka agho e deo kaike fafata tadi deo ghu va doli rekahadira nia ara e deo kaike manena sipisipi nato ke mahainina ka ira sipisipi nia gouti agho, e ghua. 39Ara e deo gake hio vananigho meha sipisipi nia gouti ta ghani va samosamoreri ghu tagukava mauke. Ara nake holarari ira ta leme ka ira nogu dolidi taghogu. Nia agho noke fanga tabara ka ara maladira ira heve ta sikori ka ravata ba redu. 40Tehi fafatani ara nake vavahagala ka dangava ka ia ravata nia ka kaporo ka ia redu. Ara e deo gake boka epu va veha ghu. 41Taghe iahi neke ghua ka ira varadaki komuhu kamoto nake auno ara ka ia suga agho. Tazoi rodana komuhu ara nake riva mala hiorira ira palu tuughase agho nia keha onomo komuhuni mala vanagu sipisipi nia goutina agho nake ghua. Nia tehi fafata agho noke holarari ira tabaragu ara, e ghua. 42Geke deo la ge au taremehagu ghu ia God ka nogu kakamane Ebarahamu nia nogu mama Aesake, geala agho toke va ghahe kamegu kakato ara. Ghe God toke finini ia mamarutana ka ara nia ia riva ngazuluai ka ara, neke va podolo vananigho ghu agho reduo ta zeana agho.”

43Labani neke ungene tughui Zekopu, “Fotati irahi mu tuugughase ara. Ira rekaha ka maneri mu nogu rekaha ara, nia ira sipisipi nia gouti mu nogu ara, e ghua. Vahina leghutau ta finiri nga agho mu nogu ara. Ghe e deo heve ta boka riva ghinina ara ghatunaina mala posi va gimarira tuugughase idi nia ira tuudi maneri, e ghua. 44Meha agho da riva ghini ghu kaike varivehaina bule ghita palu. Aria da riva ghidi ghu keha leghutau ta mala va ngana ghini ghita leghu tuduna varivehai iahi.”

45Zekopu neke hioi ghu kaike ghahipa neke va nohe tetu vonai ghu mala taghe kaike merumeru va tetetu ta ghuana. 46Manei neke kahe ghua iahi ka ira taremehana, “Da varighara ghidi keha ghahipa,” neke ghua ghidi. Varighara ghidi tuna keha ghahipa gedi va kabu toghuru vonari ghu, dike ghua. Ianimu tuna ghe dike mahai nga maneri ka gheremena kabu ghahipa ani. 47Labani neke va kudo ghini Zegara Sahaduta#31:47 Ka Erameiki Zegara Sahadutafafahakanana mu kabu ghahipa mala va ngana leghu ghini ghita. kabu ghahipa ani, nia Zekopu geke va kudo ghini Galidi#31:47 Ka Hiburu muGalidifafahakananakabu ghahipa mala va ngana leghu ghini ghita. ghu, neke ghua.

48Labani neke kahe ghua iahi ka Zekopu, “Kabu ghahipa iahi mu e age toka ghini ghita ta mala va ngana ghini ghita leghuna noda varivehai iahi.” Ne ghua mamu ghe neke va kudo ghini Galidi nga malau ianimu. 49Mizipa#31:49Mizipa fafahakanana mukoku mala kakae. neke ghua ghini haro molamo babaolonana vununa Labani neke kahe ghua iahi, “Verevere fangai Iahova e mato ghita ghu ka ia fafata sopai au ghita palu.” 50Labani neke kahe ghuani iahi, “Noto deo la agho go sute va vehari ghu tuugughase idi, ba noto varihio la agho ka keha fotatira, God e age fini mo, geta deo ghu ara avohiguna.”

51Labani neke kahe ghua molamo iahi ka Zekopu, “Irahi mu ira ghahipa nato ke kabu ghidi vonaro ara ka varihoataida ghita palu nia iahi mu ia ghahipa merumeru va tetetu. 52Kabu iahi nia ghahipa merumeru va tetetu iahi mu e mala ke va ngana ghini ghita leghu. Ara aka puina ghahe fuludi ghu kabu iahi mala magarighona agho, nia agho oka puina ghahe fuludi haro ghu manei, ba ghahe fuludi ghu ghahipa merumeru va tetetu iahi mala magarauna ara. 53Ia God ka Ebarahamu nia ia God ka Nehoa ta age va kilasina hei mo ka ghita palu ne deona ge lototoro ghu.” Zekopu neke va bebereana ghu ka babaolona ia God neke va totoana ghinio Aesake ia nona mama taghona, ta suteina ia nona naiungene. 54Manei neke atungi kaike rekahana gouti neke mala veala ghu ka ia kobosona ta voruhi, neke fangari ghu manei ira taremehana ta la holara mahai taremehanana. Leghuna ia mahai, maneri dike epu ka ia vuhuku redu ianimu. 55Ka ia torai fufughona ia keha ravata, Labani neke angohori ira rekaha tahina teri nia ira tuunaghase neke fangai ghu God ta mala ghahe va vehana maneri, ghe neke ghahe nga ke leghu laona ka malaunao.

Currently Selected:

Tatanigaina 31: kji

Highlight

Copy