Tatanigaina 21

Ia Urahana Aesake

1Iahova neke va vehai Sera taghe neke to naiungene ghinio, 2neke meha pote ghu manei va uraha vananina Ebarahamu kaike tuunamane ka neke mamanekusuno manei. Ia rekaha mane neke uraha ka ia toraina fafata neke to kaheio God ta mala urahana manei. 3Ebarahamu neke vanani ghu babaolo Aesake ia tuudimane. 4Ne age hana ravatana ghu Aesake, Ebarahamu neke papahe va ghilaghilai leghuina taghe neke to kahe ghini va gigimano God. 5Ebarahamu neke to 100 komuhuna ka ia fafata urahana Aesake ia tuunamane.

6Sera neke kahe ghua ghu iahi, “God neke va paghopaghoau ka va ghazaghaza. Heiri haroharo ta nomohi iahi mu edi age pagho taremehagu ara.” 7Ianimu tuna ghe neke kahe ghuani nga iahi manei, “Sepao mu e deo hei neke boka kahe ghuana iahi ka Ebarahamu, ‘Kaike ravata Sera e age kurui rekaha. Ghita da age finini manei ta boro ghinina kaike rekaha.’ ta ghuana. Ghe ghatunaina mu ara nato vanani kaike tuunamane, geta to kaike manekusu ghu manei.”

Ebarahamu Neke Tuhu Ghaheri Palu Tati Hegari Ghe Isimaeli

8Ka ia fafata faa vonana Aesake ta age kaiputi ghu manei, Ebarahamu neke riva ghini kaike leghahai mahai varighara mala va manemane ghinina fafata ianimu. 9Kaike ravata Isimaeli ia tuunamane Ebarahamu neke va doli vananio Hegari ia tanina Izipi neke pagho vela ghini Aesake ia tuunamane Sera. 10Sera neke va kahe ghini ghu, “O va ghahei fotati mala varituhu ianihi, nia tuunamane ani, e ghua. Manei e deo ge age hio tufa taremehana ghu tuugumane ini ara Aesake ka ira taghotagho agho.”

11Puhi iahi neke deo ge age veha vanani ghu Ebarahamu, vununa Isimaeli neke tuunamane molamo taghona. 12Ghe God neke kahe ghua iahi ka Ebarahamu, “Oka anga ghini ghu rekaha mane foforu nia, nia fotati mala varituhu iamu ka agho, e ghua. O riva ghini heve tei ta va kahe ghinighona Sera, vununa ka Aesake lamu ta la mehara ira pagusu ka agho tato naiungene ghidi ara. 13Ara a age vanani tehi rekaha haro molamo ia tuunamane foforu fotati mala varituhu iamu, mala maneri edi meha kaike butubutu noni haro ghu molamo, vununa manei mu tuu mane haro ma agho.” 14Ka ia torai fufughona ia keha ravata, Ebarahamu neke vanani Hegari keha ghano nia kaike baiki ta riva ghini ka kafuna gouti ta foudu ketuhuna. Ebarahamu neke va hihiori ka piru ghe neke va sarabae ghini lao nga ka rafanani Hegari neke va ghahe taremehana ghu rekaha mane foforu ani. La ghahe lao meha tuna neke ghua Hegari ka giliona Biaseba ia malau koroghana ta karango.

15Ka ia katona ia ketuhu, manei neke la nakai kaini ia rekaha mane foforu ka pekana kaike rekahana heke. 16Ianimu tuna ghe neke ghahe varihau lao nga fatana gahafulu kangafa sipana ka rekaha mane foforu ani, neke la nohe hinae ghu ngangana ghuana iahi, “Ara toraina deo ma ga kabai fini ghu lemena nogu rekaha mane ini.” Ka ia nohe ta au ghu aianimu, manei neke tatanigai nakele ghena.

17Ghe God neke nomohi ia rekaha mane tei nakele ghenana neke kudo ghu ka malauo God fate ia engizeli ka God kahe ghuana iahi ka Hegari, “?Hagari, heve mo ne zeana? !Oka maugheu ghu! God neto nomohi ia rekaha mane foforu nakele ghenana ka ta epu ani manei. 18Tetu vona o la posi vonai ghu rekaha mane foforu ani la va kakapotina. Ara a age riva ghini ghatu kaike leghahai butubutu noni ka ira pagusu manei.”

19Ianimu tuna ghe neke tobeheri nga God ira hibana neke fini ghu manei kaike ketuhu seu. Lao tuna ge la va foudi ghu ia baiki ta riva ghini ka kafuna gouti ge vanani ketuhu ghu ia rekaha mane tei neke ghua.

20God neke au taremehana rekaha mane foforu ani ka ia faa vonana manei. Manei neke au Parani ka ia malau koroghana ta karango neke meha kaike mane ta avohoai fefera ghu ka bokala. 21Ka ia fafata auna manei Parani ka ia malau koroghana ta karango, nona uke neke hio vanani kaike ghaseborona ka ia malau Izipi.

Ia Varivehai Ka Ebarahamu Taremehana Abimeleki

22Ka fafata ianimu ia mane ginitaukela Abimeleki, nia Fikolo ia manefaana ia punugara, dike kahe ghua iahi ka Ebarahamu, “God mu ne au taremehau agho ka vahina leghutau ta riva ghidi nga agho. 23Va bebereana vanagu ghu aiahi ka kenuna God ta deona agho go age sesebo ghu ka ara, ira nogu rekaha, ba ka ira pagusu ara. Va podolo vanagu ara nia soloso ka ta au taghe kaike noni mehana ta ghua nia agho, ia varisute ta varifata ka taghe nake va fini ghinighono la ara.”

24Ebarahamu neke kahe ghua iahi, “Ta riva ghinina ara mu a va bebereana.”

25Ianimu tuna ghe neke nominomi nga Ebarahamu ka Abimeleki ghinina kaike ketuhu seu dike hio kadolio ira noniriva ka Abimeleki. 26Ghe Abimeleki neke kahe ghua iahi, “Ara e deo ga avohi ghu hei neke riva ghinina iahi. Agho deo goke va kahe ghinagu ghu ghinina iahi. Ghatunaina lama ghe ga nomohi ghegu nga.”

27Ianimu tuna ghe neke hiori nga Ebarahamu keha sipisipi, gouti nia bulumakau ka taghona neke vanani ghu Abimeleki, dike riva ghini ghu maneri palu kaike varivehai. 28Ebarahamu neke nai nenemari haro molamo vitu rekahadi sipisipi ta ghasedi ka neke pohiriro, 29neke notoho ghu Abimeleki, “?Neke heve ghe noke riva ghini nga agho ianimu?” neke ghua ghini.

30Ebarahamu neke ungene tughui, “O hiori vitu rekahadi sipisipi irahi taghe mala kahe kaveina agho nake tohai mamu ara seu iahi ta ghuana.”

31Malau ianimu neke va kudo ghini Biaseba ghu, vununa aianimu dike riva ghinina kaike va bebereana maneri palu.

32Leghuna riva ghini ia varivehai ani Biaseba, Abimeleki nia Fikolo ia manefaana ia punugara dike leghu lao Filisitia. 33Ianimu tuna ghe neke numa ghini nga Ebarahamu kaike heke ta va kudo ghini tamarisiki, dike va totoana ghini ghu aianimu maneri Iahova, ia God toghunaina. 34Ebarahamu neke au soduai ka ia kava ira nonidi Filisitia.

Currently Selected:

Tatanigaina 21: kji

Highlight

Copy