Tatanigaina 22

God Neke Va Sisiva Ghini Ia Va Hohoghona Ka Ebarahamu

1Keha fafatara ka leghuna dike to dufuro leghutau irahi, God neke va sisiva ghini ia va hohoghona ka Ebarahamu. “!Ebarahamu!” neke ghua kudona God.

“Heve, ara aiahi,” neke ghua manei ungene tughuina.

2“Hioi tuumane nia,” neke ghua God, “kaikena tuumane nia Aesake ta namaha ghini fuludu nia agho, o lao ghu ka ia kava ta va kudo ghini Moraea. Ka kaike vuhuku ta age va podolo vananigho ara aianimu, ta la veala ghinina agho manei vanaguna ara taghe kaike saliga togoro ta ghuana.”

3Ia keha fufugho, Ebarahamu magali ma neke vusekeri ghu keha heke malana kaike saliga togoro, nia va hahaghe lao tuna ka ia nona dongiki mala ghahena, neke ghua. Manei neke hio taremehana palu nona maneriva nia Aesake ia tuunamane, e ghua. Ianimu tuna ghe dike tataniga ghahe nga, laona ka ia malau neke va kahe ghinio God. 4Ka ia va litona ravata Ebarahamu neke mato varihau laoi kenuna mo ia malau. 5Manei neke kahe ghua iahi ka ira nona maneriva, “Ghau palu au taremehana dongiki ini aiahi. Ghai palu rekaha mane ini a la va totoana aianihi, ghe gake la leghu meha nga ka ghau palu.”

6Ebarahamu neke va hure ghini Aesake ira heke malana ia saliga togoro, nia taghonai tuna geke posini ghu kaike papahe nia keha sisibe dolidi mala va doli totoi, neke ghua. Ka ia ghaghahe ta lao ghu maneri palu, 7Aesake neke ngengene ghua iahi, “?Mama?”

“?Heve tuugumaneo?” neke ghua ungene tughuna Ebarahamu.

“?Totoi nia heke mu to au ghita mo aiahi, nga hae mu rekahana sipisipi mala saliga togorona?” neke ghua notohona Aesake.

8“Taghonai God ta age va ghono vanadana kaikeu tuguo,” neke ghua Ebarahamu ungene tughuina. Ghahe varighara tuna gedi lao ghu dike ghua maneri palu.

9Ka ia la dufudi ka ia malau neke va kahe ghinio God, Ebarahamu neke la va tetui kaike sopebeana aianimu, neke pata ghidi lao ghu ira heke ka ia fatena. Ianimu tuna ghe neke piligai nga ia tuunamane neke va libo laoi ghu ka fatena sopebeana ani ka fatedi ira heke. 10Ianimu tuna ghe neke posi vonai nga Ebarahamu ia papahe mala atungina ia tuunamane. 11Ghe ia engizeli ka Iahova ka malauo God fate neke kudo lao ka Ebarahamu, “!Ebarahamu, Ebarahamu!”

“Heve, ara aiahi,” neke ghua ungene tughuna manei.

12“Oka va vavahagali ghu rekaha mane nia,” neke ghua ghini. “Oka va riva ghini ghu kaike leghutau ghu. Ghatunaina ara nato avohi ta toraina maughini gheuna agho God, vununa agho deo go sisiro ghini ghu ka ara kaikena tuumane iamu.”

13Ne mato liloho ghu Ebarahamu, manei neke fini laoi leghuna mo kaike manena sipisipi hakena ira gegehona ka kaike rekahana heke. Lao tuna ge la hioi ghu ge atungi ghu neke ghua mala saliga togoro laona ka God, holaranana ia tuunamane. 14Ebarahamu neke baoli malau ianimu, “Iahova ne va ghonoi,” ta ghuana. Geta ghua ghu ghatunaina ghe, ira noni edi kahei nga, “Ka ia vuhuku ta age va ghono vanada Iahova,” edi ghua ngama.

15Ia engizeli ka Iahova ka malauo God fate neke kudoini Ebarahamu kaike va paluna fafata, 16kahe ghuana iahi, “Vununa agho noke leghui ia ngengene ka ara noke deo ghu sisiro ghinina ia tuumane kaikena, ara a va bebereana ka babaologu ini taghogu 17ta age toraina va vehaighona ara. Ara a age va hugarari ira pagusu ka agho taghe tehidi ira babaghunu ka kolangana edi age ghua ghu, ba taghe garanga ka ia tapuruna tahi edi age ghua ghu. Ira pagusu ka agho edi age hio kadolori ira malau leghaha ta taghori ira kana ka maneri. 18Ira leghu noni nga ka malau iahi peka edi age hioi ia va veha ta ghasolo kadolo meha ka ira pagusu agho, taghe nake va vehariro ara ira pagusu ka agho, vununa agho noke leghui ia ungene va gigima ka ara.”

19Ianimu tuna ghe neke leghu lao nga Ebarahamu ka ira nona maneriva dike ghahe varighara leghu lao ghu Biaseba ka neke la au hinaeo Ebarahamu.

Ira Pagusu Ka Nehoa

20Keha fafatara leghuna iahi, kehara dike va kahe ghini Ebarahamu, “Milika ia ghaseborona Nehoa ia tahiumane agho neke va urahari molamo hana tuunamane,” dike ghua ghini. 21Uzi neke kusu dolina, Buzi ka leghuna manei, Kemueli (ia nona mama Aramu), 22ghe dike doli nga Kesedi, Hazo, Pilidasi, Zidilafu nia Betueli. 23Betueli mu neke meha nona mamana Rebeka. Milika neke va urahari hana tuunamane vananina Nehoa ia tahinamane Ebarahamu. 24Reuma ia ghaseboro irogha ka Nehoa neke va urahari molamo keha rodana rekaha mane babaolodira Teba, Gahamu, Tahasi nia Maka, e ghua.

Currently Selected:

Tatanigaina 22: kji

Highlight

Copy