Markus 11
11
Rumikot i Yisus soi Bandar Yorusalim
(Mat. 21:1-11; Luk. 19:29-40; Yaya 12:12-19)
1Di osomokno dii i Yisus om i tongotulunJo siri Bandar Yorusalim, do nokorikotno iolo siri Kampung Boitpagi om Kampung Boitani siri kulud#11:1 kulud: kotud roitan do Jaitun, om ponuuno dii i Yisus di duvo tulunJo, 2om bilinaino dii Disido iolo do, “Ongoi koupo silo kampung ogotuvangan tokou, om korikot kou nopo silo, om koontong kou nopo do pinokogos i tanak kaladai diri aupo insan sakaai do tulun. Om ujadai muju nopo iri, om ovito mujuno siti Dogo. 3Nong kivaro nopo mongoduat dikovu, ‘Kukuroyon muju ino tanak kaladai dino?’ ka nopo, om tangaron mujui do, ‘Kivaro kogunaan di Tuhan diti, nga oruaii pogulionJo kavagu siti,’ kanto nono diolo,” kadi Yisus.
4Om pampanauno dii iolo duvo tulun, om naantangan dii diolo iri tanak do kaladai poingkogos siri pintu di iso valai si disan do ralan, om ujadaino dii diolo i kogos mantad di pinakagasan. 5Om kivaro dii piipiro tulun do songingkakat siri do minitangar, “Nokuro do ujadan muju ino tanak kaladai?” ka.
6Om jawapaino dii diolo iri tongotulun songingkakat siri irad di tinangar di Yisus, om poboyoo dii di tongotulun iolo mampanau mongovit di tanak do kaladai. 7Om ovitono dii diolo i tanak kaladai si di Yisus, om lopikai nogi dii diolo di sabung doisido si likud di kaladai om sako nogi dii i Yisus. 8Om oguu dii tongotulun do pavalad diri tongosabung doisido siri ralan, om kivaro nogi manatas do tongoraan do kaju di kiroun mantad si kabun do nilapik diolo siri ralan do mongurumat di Yisus. 9Om oguu dii i tongotulun sampanau-panau siri gulu om siri touri#11:9 touri: toudi do sonluvapan do mangarajou di Yisus, om kadiolo,
“Usana! Rojoo tokouno i Kinoringan.
Kibarakatno i Yisus do rinumikot Isido saralom ngaran do Tuhan!#Antangai Buuk Sinding 118:25-26.
10Mangarajou#11:10 Mangarajou: Mongompod tokou do auno marong alaid momorinta Isido daton#11:10 daton: ditokou
do irad di Daud i taki tokou i minomorinta pogulu.
Usana! Rojoo tokouno i Kinoringan i poingijon soi savat suruga!”
kadi tongotulun.
11Om ongoino dii iolo siri Bandar Yorusalim, om asu si natad do Valai Sasambayangan Tagajo, om pivoro-vorono dii i Yisus mongontong siri, om labusno dii iolo do osodopno gia dii i tadau, om pogunggulianaino dii Disido om iri opulu om duvo tulunJo siri Kampung Boitani.
Nintulusan di Yisus i Nunuk
(Mat. 21:18-19)
12Om di susuvab pampanauno dii oi Yisus mantad siri Kampung Boitani mongoi kavagu soi Bandar Yorusalim, nga vinitilon dii i Yisus. 13Nga kivaro iso puun nunuk do alabung kaantangan siripo sodu, naantanganno Disido om ongoiono dii insamakai Disido nong kituva daa. Nga roun noopo naantanganJo do aupo gia norikot i koponguvaan. 14Nga pitangarno dii i Yisus diri nunuk do, “Mantad maino antangaipo nong kivaro kaakan dikau,” ka.
Om ontok diri nga poinrongou i tongotulunJo.
Minonunsub i Yisus di Tongotulun Mongojual siri Natad do Valai Sasambayangan Tagajo
(Mat. 21:12-17; Luk. 19:45-48; Yaya 2:13-22)
15Nga korikotno dii oi Yisus siri Bandar Yorusalim, om asuno dii i Yisus siri natad do Valai Sasambayangan Tagajo, om kaantangai dii Disido oguu iri tongotulun do moiboboli siri, om sunsubo dii Disido iri tongotulun. Om pintutuvado dii Disido i tongomija di tongotulun mipalit-palit do siin, om i tongotoogomon di tongotulun pojual do burungasang. 16Om pinotingkod dii di Yisus i tongotulun do mongovit do porompon tumalib siri natad do Valai Sasambayangan Tagajo. 17Om koopod dii iri ponudukno dii i Yisus di tongotulun do irad diti, “Kivaro nokotulis siri Kitab do, ‘Ponguranan do tulun iri valaiKu do valai sasambayangan do kasangkat bansa,’ kadi Kinoringan, nga inombo nogi dii do iradon muju do luvang ijonon di tulun parampuk,” kadi Yisus.#Antangai Yasaya 56:7; Yoromia 7:11.
18Om korongou dii i tongokotua do tulun Joudi, irino i tongokotua di imam om i tulun monunuduk do Undang-undang Ugama do Joudi, nga rumosi dii iolo di Yisus do kasangkat tongotulun nga osumboijan diri ponudukan Disido, om irino dii do mogium iolo do koontodon sipamatai di Yisus.
19Om mintutuvong dii i tadau om pampanauno dii i Yisus om i tongotulunJo mantad siri Yorusalim do gumuli si Kampung Boitani.
Ponudukan pasal do Nunuk
(Mat. 21:19-22)
20Om asarappo dii di susuvab, om pampanauno oi Yisus siri vavajaanJo do katalib di nunuk do mongoi si Bandar Yorusalim. Nga kaantangai dii diolo i nunuk do norujouno dii sampai si gamut. 21Nga kaandamai dii di Pitrus om kadisido di Yisus, “Rabi, antangai dii ilo puun do nunuk inintulusanNu, norujouno dii,” ka.
22Jawapno dii i Yisus diolo, “Sagai aparsaya kouno do Kinoringan. 23PatangaronKu marong dikovu iti, nong aparsaya kou do Kinoringan om aui opiduvo i ginavo muju, insan ilopo kulud#11:23 kulud: kotud nong tangaron muju do, ‘Valiuno silo laut,’ ka, nga misti do maliu ilo kulud do suuon muju. 24Om mitangar Oku dikovu do onuu nopo iri pokionuon muju saralom sambayang muju nong aparsaya do naanu muju, nga misti do kaanu kou di pokionuon muju. 25Om sombia nopo do mingkakat kou sumambayang, om ompunai mujupo iri tulun kivaro karaatan muju, supaya iri kasalaan muju ompunan nogi di Tama tokou silo suruga. 26[Nga nong au kou mangampun do vokon, i kasalaan muju nga aui ompunan di Tama tokou soi suruga],” kadi Yisus.#Antangai Matius 6:15.
Pongoduatan di Kuasa di Yisus
(Mat. 21:23-27; Luk. 20:1-8)
27Om koongoi dii oi Yisus kavagu soi Bandar Yorusalim, om ongoino dii iolo siri natad do Valai Sasambayangan Tagajo. Om ii manau-panau dii i Yisus siri natad, om rikotno dii i tongokotua do tulun Joudi, irino i tongokotua do imam, om i tongotulun monunuduk do Undang-undang Ugama do Joudi, om i tongomoloingon siri do mongoi sumamung di Yisus. 28Om pongoduatno dii iolo Disido do, “Onu iti kuasaNu do monunsubKo di tongotulun mongojual siti? Om isai minanaak diti kuasaNu?” kadiolo.
29Nga jawapno dii i Yisus diolo do, “Ioku nogi nga kivaro pongoduatanKu dikovu. Jawapai Okuno dikovu, om poiloonKu nogi ikovu diri nontodon diti kuasaKu. 30Nga isai bato minonuu di Yaya mamatis#11:30 mamatis: mamaptais do tulun? Kinoringan ko tulunpo? Jawapai Okuno dikovu,” kadi Yisus.
31Nga poiupapakatno dii iolo do ka, “Nong tangaran tokou do, ‘Mantad do Kinoringan,’ ka, nga tangaron tokou Disido do, ‘Nong irad dino, nokuro do au kou aparsaya di Yaya,’ kadino kama Disido. 32Nong jawapan tokou Isido do, ‘Mantad do tulun,’ ka, nga osusa tokou,” kadiolo, sabap rumosi iolo di tongotulun toguu do oilaan diolo do panantaman kasangkat do tulun do i Yaya nopo nga oinomod do nabi, i popolombus do tinangaran di Kinoringan.
33Jadi jawapno iolo do, “Taau, au ikoi nokoilo nong isai minonuu di Yaya,” ka.
Om kadii di Yisus kavagu, “Ioku nogi nga au Oku popoilo nong onu do kuasa napakaiKu siti,” ka.
Currently Selected:
Markus 11: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
