Markus 12

Poiradan di Tulun Minoniwa do Kabun Anggur

(Mat. 21:33-46; Luk. 20:9-19)

1Om timpuunno dii i Yisus monorita diolo do pinoiradan do i tongokotua do tulun Joudi nga irad di minoniwa do kabun do ka, “Kivaro iso tulun do kitana do minomukabun do anggur, om pagarono dii disido misoliput, om vaalaijo do pamagaan di tuva do anggur i vinaal mantad do vatu linuvangan, om pamaal nogi dii isido do tinimbalai pangajagaan di kabun anggur. Om koopod nopo dii iri, om posiwaai nogi dii disido iri kabun di piipiro tulun, om pakaayai nogi dii disido mongoi soi vonuvo sondiang. 2Om norikot nopo dii i koponguvaan diri anggur, om ponuuno dii i sanganu diri kabun do iso turiponjo mongoi siri di tulun minoniwa diri kabun do mokianu daa diri boogian disido diri tuva di anggur. 3Nga nokorikot nopo dii iri turipon siri kabun anggur, om kaantangai diri tulun minoniwa di kabun, nga au noonuan, kuutai nogi dii diolo om pinlapasai dii diolo, om sunsubo dii pouli do auso nipoovit si di tuanjo. 4Om ponuuno kavagu iri sanganu di kabun di turiponjo koduvo do mongoi siri tulun minoniwa di kabunjo. Korikot nopo dii i turipon siri tulun minoniwa di kabun, om pimbabagai dii diolo iri tulujo, om poikumo dii di tulun minoniwa di kabun isido. 5Om ponuuno dii kavagu i sanganu di kabun di turipon kotolu do mongoi si di tulun minoniwa, om kaantangaino kavagu diolo om patajo nogi dii iri, om oguupo iri tongoturipon sondiang do sinuu di sanganu di kabun. Nga irad nogi diri do kivaro pininlapasan, om kivaro pinatai diolo.

6Nga kivaro isopo suuon di sanganu kabun, irino i tanakjo do au kojuuan disido, do sinuujo mongoi soi di tulun minoniwa, do andasan nopo daa dii di sanganu diri kabun om urumaton diri minoniwa iri tanakjo.

7Ombo iti, korikot nopo dii iri tanak di sanganu di kabun, om poitatangarno dii iolo do, ‘Ilono tanak di sanganu diti kabun, nga kayo patajo tokou supaya aanu tokou iti kabun do isidono iri gumanti manansanganu diti kabun diamojo,’#12:7 diamo: diapa ka. 8Om kuutaino dii diolo, om patajono dii om pataamo nogi dii siri sampaping do pagar.

9Nong irad diri, om kukuroyonpo dii di sanganu di kabun? Nga maino nopo dii isido kondiri mongoi siri kabunjo do mamatai di tongotulun minoniwa di kabun, om posiwaaijo nogi dii kavagu i kabun anggur diri di tulun vokon. 10Nakabasa kou bo gia di tinangaran siri Kitab do ka,

‘Iri nopo vatu nitaam di mamamaal do valai,

sabap panantaman daa diolo om au aandai,

ombo bala iri do irino vatu sinumiliu do pinonimpuunan do mamaal do valai.

11Om irino vinaal mantad do Tuhan,

om irino kinoiranan tokou mongontong,’

kadiri tinangaran si Kitab,”

kadi Yisus, do Isidono pinoiradan di vatu.#Antangai Buuk Sinding 118:22-23.

12Om korongou nopo dii di tongokotua do tulun Joudi diri pinoiradan di Yisus, om norotijanno diolo do iolono komoion. Om pokitangkap daa dii diolo Isido. Nga aui kopusu iolo do rumosi urunan di tulun toguu, om iduaino dii diolo i Yisus mampanau.

Pasal Mamarai do Sukai si di Koisar

(Mat. 22:15-22; Luk. 20:20-26)

13Om kivaro piipiro tulun kumpulan do Porisi om tulun diIrudis sinuu do mongoi mangakal#12:13 mangakal: monimbuu di Yisus supaya kivaro koontodon diolo do manangkap Disido. 14Om korikot nopo dii iolo siri di Yisus, om pitangarno dii iolo do, “Guru, oilaanjai do Ikano tulun do oinomod. Om isai-isai nopo nga auso iiso korosijanNu, do okonko mongontongKo di tulun do kipangkat om auso pangkat, nga irino monudukKo do gaagaya do oinomod iri kouvangan do Kinoringan. Nga potingkukuro nong au naku dino kalanggar tokou di Undang-undang Ugama tokou nong mamarai tokou do sukai si porinta di Koisar, i Raja Tagajo siri Ruum, ko aupo? Barajan tokou ko au?” kadiolo.

15Nga noilaanno di Yisus iri kumpulan Porisi om tulun diIrudis do puupurai. Om duato dii di Yisus iolo, “Nokuro bala do monginam kou Dogo? Onuai Oku sakaping siin pisa, antangaiKu,” kadi Yisus. 16Om pootodono dii diolo iri siin siri di Yisus. Om pongoduatno dii Isido diolo, “Isai do gambar diti, om isai do tulisan diti?” ka.

Nga jawap dii iolo, “Di Koisar sanganu,” ka.

17Nga kadi Yisus, “Nong i Koisar sanganu, onuai tokouno i Koisar. Nong i Kinoringan sanganu, onuai tokouno i Kinoringan,” ka.

Nga oiranan dii marong iolo di Yisus.

Pasal Ovijau Kavagu i Tulun Napatai

(Mat. 22:23-33; Luk. 20:27-40)

18Om kivaro piipiro tulun do kumpulan Soduki nokorikot siri di Yisus. Om iolo nopo nga tulun do Joudi di au aparsaya do obuli ovijau kavagu i tulun do mantad si kapatajon. Om pongoduatno dii iolo di Yisus do, 19“Guru, kivaro nitulis di Musa si Undang-undang Ugama tokou do ka, ‘Nong napatajan iso tongondu do savo om ausopo tanak pisasavaan di kusai savojo togina, nga ipoguli di sulod diri kusai i longuonjo, om tanak nopo diolo diri nga manangama diri sulodjo kusai i napatai supaya arajat i koturunanjo,’ kadi Musa. 20Nga kivaro dii iri turu kusai moisusulod, do nakasavo iri gulu nga ausopo tanak om kapataino. 21Om gulio dii di sulodjo koduvo, nga ausopo tanak om kapataino. Om gulio dii diri kotolu om irad nogi dii diri. 22Sampai di koturu irad om irad diri, ausopo tanak om kapataino. Om pongovian nopo dii om kapatai nogi i tongondu. 23Jadi sabap do kasangkat turu kojuvan diri nakasavo diri tongondu, nga isai dii naku manansanganu di tongondu do ovijau kavagu?” kadi kumpulan Soduki.

24Jawapno dii i Yisus, “Nakasala kouno dino bala do au muju orotijan i komoion siri Kitab, om i kuasa do Kinoringan! 25Do ovijau nopo kavagu i tongotulun mantad siri kinapatajon, nga ausono dino moisasavo kusai om tongondu, do gaagaya nopo diolo nga irad do moloikat silo suruga. 26Om monuduk Oku nogi dikovu diti nong potingkuro vijauon iri tulun napatai. Do nakabasa kovi bo gia diri buuk di Musa do nokotulis di Musa pasal disido kondiri do kivaro sompuun kaju opoyok do kitapui, om siri saralom diri tapui i Kinoringan minitangar di Musa do, ‘Iokuno i Kinoringan diIbraim, om iIsak, om i Yakub, i taki muju,’ kadi Kinoringan.#Antangai Kinolobusan 3:6. 27Komoion nopo diri tinangaran nga i Kinoringan sanganu di tulun poimvijau i sumamba Disido, okoniko i Kinoringan Isido di tulun do napatai, do insan napataipo iri kojuvanjo, nga ovijau i tatod disido soi suruga. Nga nong irad dino nakasala kouno marong, nong kamuju au ovijau i tulun kavagu,” kadi Yisus.

Ponuuan di Opigot Marong

(Mat. 22:34-40; Luk. 10:25-28)

28Nga kivaro iso tulun vokon, iri nga monunuduk nogi do Undang-undang Ugama do Joudi do nokorikot siri, om karangaai nopo dii disido i kumpulan Soduki kumisival di Yisus, om oilaanjo do aandai i nijawap di Yisus di kumpulan Soduki. Om pongoduatno dii isido di Yisus do, “Onu naku iri nisuu do Kinoringan di opigot marong?” ka.

29Om jawapai di Yisus, “Itino nisuu do Kinoringan di opigot marong, ‘Oou tulun Israil, pongkinongouno! Tuhan nopo nga irino Kinoringan tokou, om sosoiso Isido Tuhan tokou. 30Misti do ovi-oviono ino ginavonu, om ovi-oviono ino kovijaannu, om ovi-oviono ino sinoromonu, om ovi-oviono ino kogiratannu do au kojuuko di Tuhan i Kinoringannu,’ ka.#Antangai Gulion 6:4-5. 31Itino nisuu do koduvo, ‘Misti do auko kojuu di tulun vokon irad dino kojuvannu kondiri,’ ka. Ausono vokon nisuu do opigot mantad dino,” kadi Yisus.#Antangai Imam 19:18.

32Pitangarno iri tulun monunuduk do Undang-undang Ugama, “Guru, oinomodno ino tinangarNu, do sosoiso i Kinoringan, auso sondiang mantad Disido. 33Om misti do ovi-oviono ino ginavo tokou, om ovi-oviono ino sinoromo tokou om ovi-oviono ino kogiratan tokou do au kojuu tokou di Kinoringan. Om misti au tokou kojuu di tulun vokon irad do kojuvan tokou kondiri. Nga irino opigot marong mantad di tongonisogit di sorobon, om i tongonisogit vokon i pataakon do Kinoringan,” kadi tulun monunuduk do Undang-undang Ugama do Joudi.

34Om noilaan dii di Yisus iri tulun do opintar jumawap, om kadi Yisus disido, “Auno osoduko bo dino do Kopomorintaan do Kinoringan,” ka.

Om irad nopo dii diri, om auno dii kobulun i tongotulun mongoduat di Yisus kavagu.

Pasal di Koristus i Koturunan di Daud

(Mat. 22:41-46; Luk. 20:41-44)

35Om ponudukno dii kavagu i Yisus siri natad do Valai Sasambayangan Tagajo do irad diti, “Potingkuro naku do mitangar iri tulun monunuduk do Undang-undang Ugama tokou do ka, ‘I Koristus nopo nga i koturunan di Raja Daud,’ kadiolo? 36Do sinuu di Tatod Tolidang i Daud do kondiri minonulis irad diti,

‘Sinuu di Tuhan i Kinoringan i TuhanKu do,

“Ogomno siti ponong vananKu#12:36 Ogomno siti ponong vananKu: Antangai “vanan” si Kamus Kitab.

gosob do ipapasokKu Dikau i tongomusuNu,”

kadi Kinoringan,’ kadi Daud.#Antangai Buuk Sinding 110:1.

37Kondiri di Daud mangarait di Koristus do Tuhanjo. Nong irad dino, oinomod naku do i Koristus nga koturunan noopo di Raja Daud Isido? Okoni, kon?” kadi Yisus. Om aandaian dii i tongotulun do mongkinongou di tinangar di Yisus.

Jumaga-jaga di Gaagaya di Tongotulun Monunuduk do Undang-undang Ugama do Joudi

(Mat. 23:1-36; Luk. 20:45-47)

38Om saralom do ponudukan di Yisus, minitangar Isido di tongotulun do, “Antatangai mujuno om aui kovi otoro di tongotulun di monunuduk do Undang-undang Ugama do Joudi iri ongaandaian do mamakai do sabung ongolalanggau do manau-panau, om ongaandaian iolo do salamon do tulun siri pasar sabap do mokirajou iolo. 39Om aandaian marong iolo do mogom siri toogomon di naatur do ogomon di tulun diri ongogagajo pangkat siri saralom do sasambayangan, om siri saralom do poginakanan. 40Om monoro iolo di tongotongondu napatajan do savo om monolod di valai diolo, om tomodon diolo palanggau diri sambayangjo do mokiontong-ontongo do tulun vokon. Nong irad dino gaagaya diolo okonko naalang-alang vinagat pongukuman do Kinoringan diolo!” kadi Yisus.

Iso Tongondu Napatajan do Savo do Miskin

(Luk. 21:1-4)

41Om ogom-ogomno dii i Yisus siri gotuvang do poijanan do parsambaan si natad do Valai Sasambayangan Tagajo, om kaantangai dii Disido i tongotulun do paasu do siin siri poijanan. Nga ii nopo tongotulun takaya om oguu dii iri siin poosuon siri. 42Nga korikotno dii iri iso tongondu napatajan do savo iri miskin do papaasu diri itaak disido di Kinoringan i siin tambaga duvono tinan, om irino torogo do sosoiso siin diolo.

43Om loovono dii di Yisus i tongotulunJo, om kaDisido diolo do, “PatangaronKu marong dikovu iti do oguu nogi siin niasu dilo tongondu napatajan do savo do miskin silo poijanan do parsambaan mantad kasangkat dilo tongotulun vokon. 44Do kasangkat dilo tongotulun vokon nga minanaak diri siin iri itaak di Kinoringan om oguupo i siin noolu diolo. Nga ilo nopo tongondu miskin, insanpo mai osimpitan isido, nga pinaasu kasangkat i kovivijaanjo siri poijanan do siin,” kadi Yisus.

Currently Selected:

Markus 12: LabukPKV

Highlight

Copy