Markus 13

Pasal Kouyasan di Valai Sasambayangan Tagajo

(Mat. 24:1-2; Luk. 21:5-6)

1Om kalabus nopo dii i Yisus om i tongotulunJo mantad siri natad do Valai Sasambayangan Tagajo, om kadi iso tulunJo do, “Guru, antangaipo ilo tongovatu siti valai ongaandai mamarong! Nokuro kama ilo vatu dilo do ongagajo marong pamamaal diolo!” kadi tulunJo.

2Om jawapno dii i Yisus disido do, “Aantangannu do ongogagajo pamamaal? Nga kivaro iso tadau do kasangkat dilo vatu pinoititimpak nga uyason,” kadi Yisus.

Kosusaan om Pokorualan do Tulun

(Mat. 10:17-22; 24:3-42; Luk. 12:1-12; 21:7-19)

3Om pampanauno dii oi Yisus do minongoi silo Kulud#13:3 Kulud: Kotud Jaitun. Om ogomno dii i Yisus#13:3 ogomno dii i Yisus: kinaagaman nopo di Yisus nga irino do monuduk Isido di tongotulunJo, do ontok nopo di maso diri nong monuduk i tulun Joudi nga mogom-ogom. siri kukurimbang di kulud do kogotuvang siri ponong do Valai Sasambayangan Tagajo, om iri apat tulun Disido, i Pitrus, i Yakub, i Yaya om i Ondorias minsomok do bubugol iolo do mongoduat di Yisus do, 4“Abarai ikoipo nong sombia naku do uyason ilo Valai Sasambayangan Tagajo, om onu naku pongintutunanja do oruaino korikatan diri koponguyasan dilo Valai Sasambayangan Tagajo?” kadiolo.

5Om timpuun nogi dii i Yisus jumawap diolo do, “Antatangai mujuno, om ada kou mibobojo polidon do tulun. 6Do oguu iri tongotulun do sumangalu Dogo mamalid di tongotulun do ka, ‘Iokuno Koristus,’ kadino, om irino do oguu i tongotulun do apalid diolo. 7Om kivaro nopo orongou muju do moipaparang siti somok, om abar do moipaparang i tongotulun soi vonuvo do osodu, nga ada kou rumosi, do misti orikot kasangkat iti komoionKu. Nga okonko poko korikatan diri gosob do koovion. 8Sabap kivaro vonuvo gumirot lumavan sondiang vonuvo, om kivaro kopomorintaan gumirot lumavan sondiang kopomorintaan. Om inombo-nombo do vonuvo nga kivaro gunggun tana, om mononlikop nogi. Nga insan ajadi kasangkat irad diri om iri nogi dino kotimpuun di kosusaan irad di tongondu monsusu.

9Om antatangai mujuno i kojuvan muju kondiri do kivaro manangkap dikovu dino do mongovit pataak si poibisaraan, om pinlapasan kou siri sasambayangan. Om pogotuvangon kou do tongomontiri om tongoraja do daawaan kou si diolo sabap do maja kou Dogo. Nga irino kosivatan muju do papaabar diolo diri Abar do Aandai. 10Aupo korikot iri koovion do maso, om misti moitotongkop kou mangaabar di Abar do Aandai si kasaangkat bansa. 11Om ontok nopo do tangkapon kou dino om pataakon kou siri poibisaraan nga ada kouno kosurau nong onu i patangaron muju. Do ontok diri pitangar kouno do onu nopo iri ituduk dikovu do irino tinangaran mantad di Tatod Tolidang sino ginavo muju, okoniko toilaan muju kondiri.

12Om pataakon di tulun iri sulodjo do ipapatai di tulun. Om pataakon nogi diamojo#13:12 diamo: diapa iri tanakjo do ipapatai di tulun. Om i tanakjo nga lumavan diamojo om iinojo gosob do ipapatai di tulun. 13Om kasaangkat di tongotulun nga obonsi dikovu sabap maja kou Dogo. Nga isaai nopo iri atagar ginavo gosob do koovion om irino kaanu do kovijaan di auso koovion,” kadi Yisus.

Iri Kobonsijan do Kinoringan

(Mat. 24:15-28; Luk. 17:20-37; 21:20-24)

14Om kadi Yisus kavagu, “Sombia do koontong kou nopo diri patung di kobonsijan di Kinoringan, iri au apatut do pinoingkakat silo saralom Valai Sasambayangan Tagajo, om pogidu kouno marong dikovu tulun siti Vonuvo Yudia do mongoi silo tongokulud.#13:14 kulud: kotud Nga oiduan di Kinoringan iri Valai Sasambayangan Tagajo sabap sirino i patung. -- Nga isaai nopo iri mambasa diti om rotiono i komoion diri.#Antangai Daniol 9:27; 11:31; 12:11. -- 15Om isaai nopo dikovu siri labus do valai, om adano asu siri saralom do mongongongoi do onuu nopo poromponjo. 16Om isaai nopo dikovu si dumo, om adano muli si valai do mongongoi di sabung nga polombusaii mogidu. 17Om ontok nopo dino diri nga okonko naalang-alang kosusa i tongotongondu do momontijan, om i tongotongondu di posusu di tanak topoyok ontok diri nga osusa nogi. 18Nga aandai do sumambayang kou si di Kinoringan do mokitulung supaya do ontok di mogidu kou ada do koontok di musim tosogit. 19Om asansara marong ontok diri, do mantad di voruno do Kinoringan iti vonuvo aupo insan kivaro kasansaraan marong irad dino mantad di pogulupo sampai do maino, nga katalibpo iri kasansaraan om ausono rumikot kavagu kasansaraan do irad diri kasansara. 20Nga nong au pinoruai do Kinoringan i maso diri kasansaraan nga auso tulun ovijau. Nga pinoruai Disido i maso diri supaya ovijau iri tongotulun di piniliJo.

21Om nong kivaro nopo tulun do mitangar dikovu do ontok diri do, ‘Antangai pogi nga sitino i Koristus!’ ka, ko ‘Antangai Isido, nga silono!’ ka nopo, nga ada kouno kaparsayaai diri. 22Do mimbulai piipiro koristus do momumudut om piipiro nabi do momumudut do popoontong di pongintutunan om koiranan do mamalid daa do tulun pinili do Kinoringan. 23Om antatangai mujuno do kasangkat diti kosusaan nga pinoiloKuno ikovu maantad,” kadi Yisus.

Pongintutunan do Korikatan di Sinumiliu do Tulun

(Mat. 24:29-31; Luk. 21:25-28)

24Om kadi Yisus kavagu. “Ontok diri katalib nopo i kasansaraan diri, om osiliu irad do tinangaran si Kitab do,

‘Misokno i vinaang dilo tadau om vulan,

25om tumupitak ilo tongokorombituon mantad si tavan,#13:25 tavan: langit

om ogunggun kasangkat iri tongokuasa soi tavan,’

ka.#Antangai Yasaya 13:10; 34:4.

26Om ontok diri rumikot Oku, i sinumiliu do tulun, om aantangan Oku nogi dino di tongotulun siri kavut do rumikot mivaja do kuasa do agajo om i vinaangKu. 27Om suuonKu nogi dino i tongomoloikatKu do monguntun di tulun piniliKu mantad silo kosilauon, om mantad silo kotonobon om mantad silo disan tana gosob silo disan tavan,” kadi Yisus.

Pinoiradan di Puun do Nunuk

(Mat. 24:32-35; Luk. 21:29-33)

28Om kadi Yisus kavagu, “Sonsodo mujuno minsoromo iri nunuk onuon do poiradan, do momutolid nopo om momuroun kavagu, om oilaan mujuno dii do oruaino musim magadau. 29Om irad nogi dino, ontok do koontong kou di najadi i komoionKu, nga oilaan mujui dino do oruaino i korikatanKu. 30PatangaronKu marong dikovu iti, do aupo apatai kasangkat iti tulun do maso maino om orikotno ino kouyasan do Yorusalim. 31Olijot do laaid ilo tavan om iti tana, nga tinangaranKu nopo nga auso iso olijot,” kadi Yisus.

Auso Iso Koilo Sombo do Tadau ko Jaam

(Mat. 24:36-44)

32Om kadi Yisus kavagu, “Auso iso tulun koilo sombo do tadau ko sombo do jaam do korikatanKu, insan i moloikat silo suruga ko Ioku i Tanak nga au koilo, nga irino i TamaKu do koilo di korikatanKu. 33Om antatangai mujuno, om jaajagawo mujuno do au oilaan muju iri maso do korikatanKu kavagu. 34Om iri nopo nga inong di iso tulun do minampanau mongoi siri vonuvo sondiang, om tantadonjo mampanau, om onuai dii do kuasa i tongoturiponjo, om onuaijo dii iri tongoturiponjo do karaja do moisosondiang, om bilinai nogi dii disido i mangajaga do pintu do, ‘Jaajagawono,’ ka. 35Om sabap diri pipupurimanai mujuno do au oilaan muju iri maso do korikatan di sanganu valai nong minsosodop, ko tanga sodop, ko mongingkukuuk manuk ko minanavaupo. 36Om pipupurimanai mujuno, do au oilaan tigogi ka om korikot isido ontok do koolong kou modop. 37Om iti nopo tangaronKu dikovu, om patangaronKu nogi kasangkat do tongotulun do, ‘Pipupurimanai mujuno,’ kangKu,” kadi Yisus.

Currently Selected:

Markus 13: LabukPKV

Highlight

Copy