Markus 1

Mangaabar i Yaya Mamamatis#1:1 Mamamatis: Momomonsu di Tinangar do Kinoringan

(Mat. 3:1-12; Luk. 3:1-18; Yaya 1:14-28)

1Itino kotimpuunan di Abar do Aandai pasal di Yisus Koristus, Tanak do Kinoringan, 2irad di nokotulis di nabi Yasaya, i popolombus di tinangaran do Kinoringan pogulu#Antangai Lukas 3:4. do,

“Kadi Kinoringan,

‘Antangaino, monuu Oku di susuuonKu do poguluvononKu mantad Dikau.

Om Isidono monginavau laaid di ralan do vajaanNu,’

kadi Kinoringan.#Antangai Malaki 3:1.

3Om kivaro nogi dolou#1:3 dolou: bongut do tulun i susuuon do Kinoringan

siri padang do kovotuvan do moou-loou do,

‘Tandaiaino laaid ino vajaan do Tuhan,

om loisonno i ralan di vajaanJo,’

kadi tulun moou-loou,” kadi Yasaya.#Antangai Yasaya 40:3.#1:3 Komoion nopo dino ayat 3 nong irad daton kivaro tulun tagajo rumikot siti daton misti do monodia tokou maantad di rikotonJo, om irad tokou nogi dino do misti rumorogo om sumodia do ginavo tokou do orikatan do Tuhan.

4Om irad nopo diri nokorikot dii i Yaya Mamamatis#1:4 Mamamatis: Momomonsu siri padang do kovotuvan do mamatis#1:4 mamatis: mamaptais di tongotulun. Om pangaabarno dii isido di tongotulun do ka, “Rumorogo kouno diri duso muju. Om isaai nopo rumorogo di dusojo aandai dii do mokibatis,#1:4 mokibatis: mokibaptais om ompunani do Kinoringan i dusojo,” kadi Yaya. 5Om oguu dii i tongotulun minongoi siri di Yaya mantad si Vonuvo Yudia om si Bandar Yorusalim. Om isaai nopo nakapangakun do dusojo, irino binotisan#1:5 binotisan: binoptoisan di Yaya siri Bavang do Yurdon.

6Pakaian nopo di Yaya nga vinaal mantad vulu do unta, om kambotjo nopo nga vinaal mantad do kulit. Om taakanonjo nopo nga tongil#1:6 tongil: komboruak om paa do dongkot.#1:6 paa do dongkot: paa do potijukon 7Om minangaabar nogi i Yaya di Abar do Aandai do irad diti, “Kivaro iso tulun i sumusuut dogo, nga Isidono kikuasa mantad dogo. Nga insan tumukupo do mongujad di tali kasutJo nga au oku kobulun do au oku kotumi di kuasaJo. 8Ioku nopo diti om vaig noopo iti pamatisku#1:8 pamatis: pamaptais dikovu; nga Isidono iri mamatis dikovu do Tatod Tolidang,” kadi Yaya.

Binotisan i Yisus

(Mat. 3:13-4:11; Luk. 3:21-22; 4:1-13)

9Om ontok diri nokorikot i Yisus mantad soi Bandar Nasarit si Vonuvo Golilia, om botisaino#1:9 botisai: boptoisai dii di Yaya Isido siri Bavang Yurdon. 10Om pogbatis#1:10 pogbatis: pogbaptais dii di Yaya i Yisus om pampanauno dii i Yisus tumindal, nga naantangan dii Disido ilo suruga minukab, om indaau dii iri Tatod do Kinoringan tumumpo siri Disido irad do kungkur. 11Om norongouJo dii i dolou do Kinoringan mantad soi suruga do minitangar do, “Ikano i TanakKu do au kojuuanKu, om Ikano i kaandaianKu marong,” ka.

Pinonsubaan i Yisus di Kotua do Rogon

(Mat. 4:1-11; Luk. 4:1-13)

12Om turus do sinusuu di Tatod do Kinoringan i Yisus do mongoi silo padang do kovotuvan. 13Apat nopulu tadau linaid Disido siri do pinonsubaan di Soitan, i kotua do rogon. Om poirunggum Isido di dupot tongororongit nga rinumikot i tongomoloikat do monulung Disido.

Kotimpuunon di Yisus Mongoloou di TongotulunJo

(Mat. 4:18-22; Luk. 5:1-11)

14Ontok di nokojiil i Yaya om kogungguli i Yisus siri Vonuvo Golilia do papaabar di Abar do Aandai mantad do Kinoringan. 15Om kaDisido, “Norikotno i maso do oruaino i Kinoringan momorinta di tongotulunJo. Rumorogo kouno di duso muju, om kaparsaya kouno diti Abar do Aandai,” ka.

16Nga manau-panau i Yisus siri disan di Botung Tagajo do Golilia, om kaantangaiJo dii i duvo tulun misulod, do posiling do rambat siri vaig, do iolo nopo nga i monginginsada. Ngaranjo nopo nga i Simun iakajo om iOndorias iadijo, 17Om loovo dii di Yisus iolo do, “Kayono vaja kou Dogo, om onuonKu ikovu mogigium do tulun irad do mangarambat kou do sada,” ka. 18Om nokorongou nopo dii iolo diri, om iduai nopo dii diolo i rambatjo om vajano dii iolo di Yisus.

19Om lombusno dii i Yisus kavagu, om naantanganJo dii kavagu i duvo tulun misulod, i Yakub om i Yaya i tanak di Jobidi siri talud mamatou mongulit di rambat. 20-21Om turus loovo dii di Yisus i duvo misulod, om iduai dii diolo iamojo#1:20 amo: apa i Jobidi om i tulun do gumaji siri talud, om vajano dii iolo di Yisus om ongoino dii iolo si Bandar Kaparnaum.

Sinunsub di Yisus Popoidu i Rogon

(Luk. 4:31-37)

Om ontok di Tadau do Koingkajadan do tulun Joudi, om asuno dii i Yisus siri valai sasambayangan do tongotulun Joudi siri Bandar Kaparnaum. Om monuduk Isido di tongotulun siri. 22Nga osumboijan dii marong iolo do nokorongou di ponudukanJo, do Isido nopo monuduk nga inong do kikuasa Isido. Okonko irad di tulun monunuduk do Undang-undang Ugama do Joudi.

23Om ontok di siri i Yisus saralom valai sasambayangan, om kivaro dii iso kusai rinosukan do rogon minasu siri, om ginumijak isido do ka, 24“Yisus! Kukuroyon ikoi Dika? Ika tulun Nasarit, nokuro mongoiKo siti nong mominasaKo dagai? Otutunankui Ika, do Ikano i Tolidang do mantad silo di Kinoringan,” kadi rogon.

25Nga turus sunsubo dii di Yisus i rogon do kaDisido, “Otosno! Pogiduno mantad diti tulun,” ka.

26Pongogijakno dii do opuod i rogon om kumoporno dii i tulun do pinaadan diri rogon om pogidu nogi dii iri rogon mantad siri ginavojo, om aandai nogi dii i ginavo disido. 27Nga oiranan dii marong kasangkat iolo do nolingasan di Yisus i tulun, om moiduduat dii iolo, “Atuuk! Onu gia iti? Ponudukan kavavagu naku iti? Kikuasano Isido monunsub do rogon do antangaipo nga mibobojo ilo rogon sunsubon di Yisus!” kadiolo.

28Om au nakalalaid nokotongkopno siri Vonuvo Golilia iri kosunduvan di Yisus.

Oguu i Tulun Liningasan di Yisus

(Mat. 8:14-17; Luk. 4:38-41)

29Au alaid mantad dii do labusno dii i Yisus om i tongotulunJo, oi Yakub om i Yaya, kasangkat mantad siri valai sasambayangan do mongoi siri valai di Simun om iOndorias. 30Om korikot dii iolo siri valai, tuturanai dii diolo i Yisus do poingodop i tivanon di Simun do kangkagan. 31Om ongoiono dii insamakai di Yisus i tongondu, om kuutai dii i longonjo, om tungago dii di Yisus, turus do nolingasan isido om uupno dii isido papaakan doi Yisus.

32Kotonob nopo dii i tadau#1:32 Kotonob nopo dii i tadau: Otonob nopo dino i tadau di Tadau Koingkajadan nga katalibno dino i koingkajadan di tulun Joudi, om obulino dino do kumaraja kavagu. om ongoino dii i tongotulun do minongovit kasangkat di tongotulun au kataru om iri tulun do rinosukan do rogon siri di Yisus do pokilingasan. 33Kasangkat tulun si bandar diri minongoi untun siri navauon valai di Simun. 34Oguu dii i tulun do moisosondiang toruol nolingasan di Yisus, om oguu nogi tongorogon nosunsub Disido. Om auno pinoungkomipo di Yisus i tongorogon, sabap kotutun i tongorogon Disido.

Minangaabar i Yisus di Abar do Aandai si Vonuvo Golilia

(Luk. 4:42-44)

35Otuutuvongpo di susuvab om tungagno i Yisus, om ongoino siri pantok do ojongou do sumambayang siri. 36Koilaai nopo di Simun om i songkoruanganjo do au sino i Yisus om iumo dii diolo. 37Kaayangai dii diolo i Yisus, om tangaro dii do, “Mogium i tongotulun Dika,” kadiolo.

38Nga kadi Yisus diolo, “Oo, nga aandaipo do lumombus tokou soi tongokampung misoliput siti supaya popoilo Oku nogi diolo di Abar do Aandai. Irino kinorikatanKu,” ka.

39Om ongoino dii oi Yisus tumongkop siri Vonuvo Golilia do papaabar di Abar do Aandai si tongovalai sasambayangan om monunsub di tongorogon.

Nolingasan i Tulun di Rumanai i Kojuvanjo

(Mat. 8:1-4; Luk. 5:12-16; 17:11-19)

40Om kivaro dii iso tulun do rumanai i kojuvanjo rinumikot siri di Yisus, om singkotud dii si gotuvangJo mokilingos marong Disido, “Nong kouvanganNu, olingasan okui Dika,” ka.

41Om kosianai nopo dii i Yisus di tulun rumanai, om porolojono dii Disido i longonJo do mangama disido om kadi Yisus, “KouvanganKui, olingasankono,” ka. 42Om pogtangar di Yisus, turus do nolingasan dii isido. 43Om turus suuono dii marong di Yisus isido do mogidu do ka, “Pampanauno, 44om adano marong sangkaabarai di tongotulun isai-isai osomungannu. Nga ongoino pogi si di imam om poontongno disido dino kojuvannu,#1:44 kojuvan: tinan om mangaabar do, ‘Nolingasan okuno,’ kanto. Om manaakkono do duvo tinan tombolog di imam, onuonnu do isogit maja diri nisuu di Musa di pogulu, supaya oilaan di tongotulun vokon do nolingasanko,” kadi Yisus.

45Nga pampanau nogi dii i tulun minongoi mangaabar tikid-tikid di tongotulun do nolingasanno isido. Jadi nokotongkopno dii iri abar di tulun gosob do au dii kaasu i Yisus mintalang siri bandar do untunan marong Isido di tulun. Om poindada dii Isido siri tana tojongou, nga kivaro dii tongotulun rinumikot siri Disido mantad sombo-sombo pantok.

Currently Selected:

Markus 1: LabukPKV

Highlight

Copy