Lukas 19

Nakasamung i Yisus di Jokius

1Om korikotno dii i Yisus siri Bandar Yoriku, om polombusaino dii kavagu Disido mampanau mongoi si Bandar Yorusalim. 2Nga kivaro iso tulun siri Yoriku, ngaranjo nopo nga i Jokius, om kotua nogi isido di tongotulun momumumpung do sukai, om akayapo isido. 3Om siontong dii daa isido nong potingkuro i Yisus, nga aui koontong do oguu marong i tongotulun, om odibak marong gia isido. 4Om poginangkusno#19:4 poginangkus: pogundak dii isido do sumogulu mantad di tongotulun toguu om indakodno dii isido si puun do nunuk do mongimpa di Yisus tumalib siri puun.

5Om kapantok dii i Yisus siri puun do nunuk, om notingaa dii Disido i Jokius om kaDisido, “Uu Jokius, indaauno kosikap, do maja Oku mapit silo valainu maino,” kadi Yisus. 6Om piogo dii i Jokius mindaau om asanang dii marong i ginavojo do nakapangangat di Yisus siri valaijo.

7Nga kaantangai nopo di tongotulun i Yisus minaja di Jokius mongoi siri valaijo, om mungos-ungos dii iolo mitangar do, “Nokuro i Yisus minongoi silo valai di Jokius do isidono tulun do kiduso!” kadiolo.

8Nga korikot nopo dii i Jokius siri valaijo mivaja di Yisus om i tongotulunJo, om ingkakatno dii i Jokius, om pitangarno dii isido di Tuhan do ka, “Ou Tuhan, pintangawonku iri barangku do pataak siri tulun tongomiskin. Om onuu nopo do pinonoroku do tulun nga pogulionkui kavagu kasangkat iri do inggapatku lipato iri kinoguuo di naanuku,” kadi Jokius.

9Nga pitangar dii i Yisus do ka, “Tadau mainono diti do novijau kou sanganak-anak, do naparsayako di Kinoringan irad diakinu, iIbraim. 10Do Iokuno i Sinumiliu do Tulun do rumikot mogium om momijau do tulun di napalid,” kadi Yisus.

Poiradan di Opulu Turipon Inonuan do Pirok

(Mat. 25:14-30)

11I Yisus nopo diri nga minsosomokno dii silo Yorusalim, om panantaman daa di tongotulun nong au kalalaid dino om porintawon iolo di Kinoringan. Nga minaganu i Yisus do iso poiradan do monuduk di tongotulun di songinrongou Disido siri, supaya oilaan diolo do alaidpo om momorinta nogi i Kinoringan diolo. 12Jadi kaDisido, “Kivaro iri iso tulun tagajo do mampanau mongoi do gumotuvang di rajajo tagajo siri vonuvo di osodu, do isido nopo nga silion do raja. Osiliu nopo dino isido do raja om gumungguli nogi dino kavagu. 13Di tantadonjo mampanau om pinloovojopo dii i opulu tulun i turiponjo, om noonuan dii iolo do torosongkiluan pirok tokodou, om pomilin dii isido diolo do, ‘Padagango muju iti gosob do koguli oku,’ kadisido.

14Nga iri nopo i tongotulun sabansajo nga obonsi disido, om ponuu dii iolo diri piipiro tulun do sumuut do mongoi siri raja tagajo om bilinaino do mitangar di raja tagajo do, ‘Au ikoi dii uvang do sumiliu raja iri tulun diri,’ ka.

15Nga potingkuropo nga nosiliui do raja isido. Om koguli nopo dii isido diri, ponuuno isido diri iso tulun do ka, ‘Loovopo kasangkat iri tongoturiponku iri noonuanku do pirok, supaya oilaanku nong komurono untung diolo diri pirok i nidagang diolo,’ kadi raja.

16Om rikotno dii iri iso kojuvan do mongoi mangaabar do ka, ‘Tuan, iri nopo songkilu piroknu nga nakaanu oku kavagu opulu kilu pirok untung,’ kadisido.

17‘Oo, aandai marong!’ kadi raja, ‘Ikano turiponku di aandai, aandai iti karajanu, do insan okuyakpo nga rumalankoi padagang. Jadi maino ponguasawonku ika do opulu bandar,’ kadi raja.

18Om rikotno dii iri koduvo do ka, ‘Tuan, iri nopo songkilu piroknu nga nakaanu oku vagu do limo kilu pirok untung,’ kadisido.

19Om jawapaino dii di raja do ka, ‘Ika nopo nga ponguasawonku ika do limo bandar,’ kadi raja.

20Om rikotno dii iri iso turiponjo di vokon, om pitangar do, ‘Tuan, atii iti songkilu piroknu linopotku somputangan#19:20 somputangan: soputangan om pinataauku.#19:20 pinataau: pinotoo 21Do rumosi oku do onuonnu iri untung di nidagangku sabap oilaanku do tulunko do orongit. Onuonnu iri okonko dika, om mogiumko di kountungan i okonko dika do tumos,’ kadi turipon.

22Nga jawapno i raja disido, ‘Ikano turiponku do araat! Inono tangarnu do kopongukumanku dika, sabap oilaannu do tulun oku do orongit, om maganu oku di okonko dogo om mogium oku diri kountungan i okonko dogo do tumos. 23Om nokuro do aunu pinobiing iti pirokku supaya kivaroi daa bunga ongoionku do korikot oku?’ kadi raja.

24Om pitangar nogi dii i raja di tulun vokon i poingkakat siri somok, ‘Ongoio muju ilo pirok songkilu silo disido, om pataakono di turiponku diri kivaro opulu kilu pirok,’ kadi raja.

25Om kadi tulun, ‘Tuan, kivaro opulu kilu pirok si disido!’ ka.

26Om jawapno i raja, ‘Mitangar oku dikovu, do iri nopo tulun di kivaro onuu nopo nga onuan kavagu. Nga iri nopo tulun di auso, nga insan kivaropo okuyak si disido nga solodon kasangkat.#Antangai Markus 4:25; Lukas 8:18. 27Nga iolo nopo kasangkat di tongomusuku di au uvang do sumiliu oku raja diolo, om ovito iolo siti om patajoni si gotuvangku!’ kadi raja,” kadi pinoiradan di Yisus.

28Om noopodno dii i Yisus monorita di tongotulun, om linumombusno Isido mogulu mampanau mongoi siri Yorusalim.

Rumikot i Yisus soi Bandar Yorusalim

(Mat. 21:1-11; Mar. 11:1-11; Yaya 12:12-19)

29Om osomokno dii i Yisus siri Kampung Boitpagi om Kampung Boitani siri kulud#19:29 kulud: kotud roitan do Jaitun, om ponuuno dii Isido di duvo tulunJo, 30om bilinaino dii Disido iolo do, “Ongoi koupo silo kampung do ogotuvangan tokou, om korikot kou nopo silo, om koontong kouno do pinokogos i tanak kaladai diri aupo insan sakaai do tulun, om ujadai muju nopo iri om ovito mujuno siti Dogo. 31Nong kivaro nopo mongoduat dikovu, ‘Kukuroyon mujuno ino tanak kaladai dino,’ ka nopo, om tangaron mujuno do, ‘Kivaro kogunaan di Tuhan diti,’ kanto nono disido,” kadi Yisus.

32Nga pampanauno dii iri duvo kojuvan sinuu di Yisus, om naantangan dii diolo di tanak do kaladai poingkogos irad di tinangar di Yisus. 33Om ujadai nopo dii diolo i tanak do kaladai diri nga pongoduatno dii iri sanganu do, “Kukuroyon muju ino tanak kaladai?” ka.

34Om jawapaino dii diolo do, “Kivaro dii guna di Tuhan diti,” ka.

35Om ovitono dii diolo i tanak do kaladai si di Yisus, om lopikai nogi dii diolo di sabung doisido si likud di kaladai, om posokoono dii diolo i Yisus. 36Om ontok di poinsako i Yisus di kaladai do mongoi si Yorusalim, om pimvalado dii diri tongotulun iri tongosabung doisido siri ralan do mongurumat di Yisus.

37Om korikot nopo dii i Yisus siri ruukon mantad siri Kulud do Jaitun, do nokoinsomokno dii iolo si Yorusalim, om timpuunno dii i tongotulun i minaja di Yisus do lumuvap mangarajou do Kinoringan sabap naandaian do nokoontong di tongokosunduvan vinaal di Yisus di pogulu.

38Kadiolo,

“Kibarakatno i Raja tokou do rinumikot Isido saralom do ngaran do Tuhan!” ka.

“Kopiandai tokouno dii do Kinoringan silo suruga maino.

Pogojoon tokouno Isido i poingijon soi savat suruga!”

kadi tongotulun.#Antangai Buuk Sinding 118:26.

39Nga kivaro piipiro tulun do kumpulan do Porisi siri tulun toguu do mitangar di Yisus do ka, “Guru, pootosono ino tulunNu,” ka.

40Nga jawapno dii i Yisus diolo do ka, “Au obuli pootoson iolo. Mitangar Oku dikovu, insan pootosonKu iolo, nga sumuvoli iti tongovatu lumuvap rumajou Dogo,” kadi Yisus.

Minogiad i Yisus di Tongotulun si Yorusalim

41Om koinsomok dii i Yisus si Bandar Yorusalim, om kaatulno diri bandar om pogiad dii Isido do osianan di tongotulun siri. 42Om kaDisido mitangar di tongotulun si Yorusalim, “Atukpo dii! Aandai daa nong koilo kouno nong nuu iri gaagaya muju supaya kopiandai kou sino bandar! Nga maino nopo diti om au koupo koilo. 43Do kivaro insan tadau do rumikot i musu muju sumoliput monguvung dikovu om pumpunan do tana i vajaan mindakod sino rinding di bandar muju om mongogipit dikovu. 44Om patajon kou nogi dino om uyason ino bandar muju gosob do opupud. Insan isopo nga ausono vatu moititimpak sino tobon do bandar muju, sabap nga au kou nokoilo do korikatan di Kinoringan do momutus dikovu,” kadi Yisus.

Minonunsub i Yisus di Tongotulun Mongojual siri Natad do Valai Sasambayangan Tagajo

(Mat. 21:12-17; Mar. 11:15-19; Yaya 2:13-22)

45Om asuno dii i Yisus siri natad do Valai Sasambayangan Tagajo, om kaantangai dii Disido iri tongotulun do moiboboli siri om sunsubo dii Disido. 46Om pitangar dii i Yisus diolo, “Kivaro nokotulis siri Kitab do, ‘Roiton do tulun iri valaiKu do valai sasambayangan,’ kadi Kinoringan, nga inombo nogi dii do iradon muju do luvang ijonon di tulun parampuk,” kadi Yisus.#Antangai Yasaya 56:7; Yoromia 7:11.

47Om tadau-tadau monuduk dii i Yisus siri Valai Sasambayangan Tagajo. Nga pokipapatajanno daa di tongokotua di tulun Joudi i Yisus, irino i tongokotua do imam om i tongotulun monunuduk do Undang-undang Ugama do Joudi om i tongokotua di tulun Joudi vokon. 48Nga sabap do aandaian marong kasangkat iri tongotulun mongkinongou di tinangaran do Yisus nga au kaayang i tongokotua do koontodon do kapamatajan Disido.

Currently Selected:

Lukas 19: LabukPKV

Highlight

Copy