Lukas 20

Pongoduatan di Kuasa di Yisus

(Mat. 21:23-27; Mar. 11:27-33)

1Kivaro insan tadau do minonuduk i Yisus do tongotulun toguu, om papaabar Isido di Abar do Aandai siri natad do Valai Sasambayangan Tagajo. Om rikotno dii i tongokotua do tulun Joudi si di Yisus, irino i tongokotua di imam, om i tongotulun monunuduk do Undang-undang Ugama do Joudi om i tongomoloingon. 2Om pongoduatno dii iolo di Yisus do, “Poiloon ikoi nong onu iti kuasaNu do monunsubKo di tongotulun mongojual siti. Om isai minanaak diti kuasaNu?” kadiolo.

3Om jawapno dii i Yisus diolo do ka, “Ioku nogi nga kivaro pongoduatanKu dikovu. 4Nga abarai Oku nong isai minonuu di Yaya mamatis#20:4 mamatis: mamaptais do tulun? Kinoringan ko tulunpo?” kadi Yisus.

5Nga poiupapakatno dii iolo do ka, “Nong tangaron tokou do, ‘Mantad do Kinoringan,’ ka, nga tangaron tokou Disido, ‘Nong irad dino, nokuro do au kou aparsaya di Yaya?’ kadino kama Disido. 6Nong jawapan tokou Isido do, ‘Mantad do tulun,’ ka, nga osusa tokou, do dumpauon tokou diti tongotulun toguu do vatu, sabap atatap iolo aparsaya marong do i Yaya nopo nga iso nabi, i popolombus di tinangaran do Kinoringan,” kadiolo.

7Jadi jawapno dii iolo do, “Taau, aui ikoi nokoilo nong isai minonuu di Yaya,” ka.

8Nga kadii di Yisus kavagu, “Ioku nogi nga au Okupo poilo nong onu do kuasa napakaiKu siti,” ka.

Poiradan di Tulun Minoniwa do Kabun Anggur

(Mat. 21:33-45; Mar. 12:1-12)

9Om minaganu i Yisus diti poiradan do monuduk di tongotulun toguu do i tongokotua nopo do tulun Joudi nga irad di minoniwa do kabun do ka, “Kivaro iso tulun do kitana do minomukabun do anggur, om posiwaai nogi dii disido iri kabun di piipiro tulun, om pakaayai nogi dii disido mongoi soi vonuvo sondiang do piipiro linaid. 10Om norikot nopo dii i koponguvaan diri anggur, om ponuuno dii i sanganu diri kabun do iso turiponjo mongoi siri di tulun minoniwa diri kabun do mokianu daa di boogian disido diri tuva di anggurjo. Nga nokorikot nopo dii iri turipon siri kabun anggur, om kaantangai diri tulun minoniwa di kabun, nga au noonuan, kinamai nogi pinlalapasai, om sunsubo dii pouli do ausoi nipoovit si di tuanjo. 11Om ponuuno kavagu iri sanganu di kabun di turiponjo koduvo do mongoi siri tulun minoniwa di kabunjo. Nga iradi di kotiso do pininlapasan i turipon diri om kinamai poikumo di tulun minoniwa di kabun, om iri nga sinuu nogi pouli do auso nipoovit si di tuanjo. 12Om mantad diri suuono kavagu di sanganu di kabun i turiponjo kotolu nga iri pun pinokorualan om sinunsub pouli mantad siri kabun.

13Nga kadi sanganu di kabun, ‘Kukuroyonkupo naku dino iolo dilo? Nga gaam nogi do suuonku i tanakku di au kojuuanku kaalu nong urumatonpo dino diolo isido,’ kadi ginavo di sanganu di kabun.

14Ombo iti do korikot nopo dii iri tanak di sanganu di kabun om kaantangai dii di tulun minoniwa di kabun, om poitatangarno dii iolo do, ‘Ilono tanak di sanganu diti kabun, nga kayo patajo tokou supaya aanu tokou daa iti kabun, do isidono iri gumanti manansanganu diti kabun diamojo,’#20:14 diamo: diapa kadiolo. 15Om pataamo dii diolo siri labus di kabun, om patajo nogi dii diolo.

Nga kukuroyonpo dii di sanganu di kabun i tongotulun minoniwa di kabun diri? 16Nga maino nopo dii isido kondiri minongoi siri kabunjo do mamatai di tongotulun minoniwa di kabun, om posiwaaijo nogi dii kavagu i kabun anggur diri di tulun vokon,” kadi Yisus.

Nga korongou nopo dii i tongotulun diri pinoiradan di Yisus, om jawapno dii iolo, “Atukpo dino do irad dino iolo,” ka.

17Om pongontongno dii i Yisus diolo, om pitangar do, “Mimang do irad dino, do irino komoion diri tinangaran nokotulis siri Kitab do irad diti,

‘Iri nopo vatu nitaam di mamamaal do valai,

sabap panantaman daa diolo om au aandai,

ombo bala iri do irino vatu sinumiliu do pinonimpuunan

do mamaal do valai,’

kadiri tinangaran si Kitab.#Antangai Buuk Sinding 118:22.

18Om isaai nopo kootung do vatu diri om irino orumpisak, om isaai nopo ootungan do vatu diri om irino oromumuk,” kadi Yisus, do Isidono pinoiradan di vatu.

19Nga korongou nopo dii di tongokotua do Joudi, irino i tongotulun monunuduk do Undang-undang Ugama do Joudi om i tongokotua do imam, diri poiradan di Yisus om norotijan dii diolo do iolono komoion. Om pokitangkap daa dii diolo i Yisus, nga aui kopusu do rumosi urunan di tongotulun.

Pasal Mamarai do Sukai si di Koisar

(Mat. 22:15-22; Mar. 12:13-17)

20Nga intai-intajon dii di tongokotua do Joudi i Yisus do manangkap daa Disido, om ponuu dii iolo do piipiro tulun do misimpupura inong di tulun aandai do mongoi mongoduat di Yisus do mogium koontodon kapanangkapan Disido supaya adapat diolo mongovit siri di gobonor do daawaan. 21Om pongoduatno dii iolo di Yisus, “Guru, oilaanja do oinomod ino tangarNu om ponudukanNu, om okonko mongontongKo do pamarasan#20:21 pamarasan: vuros di tulun, nga irino monudukKo do gaagaya do oinomod iri kouvangan do Kinoringan. 22Nga potingkuro nong au naku dino kalanggar tokou di undang-undang tokou nong monukai tokou si porinta di Koisar, i raja tagajo siri Ruum, ko aupo?” kadiolo.

23Nga noilaanno di Yisus iolo do monoro noopo Disido. Jadi kadii Disido, 24“Poontongo Okupo dino di siin,” ka. Om paantangaino dii diolo i siin, om kadi Yisus, “Isai do gambar siti siin, om isai do tulisan siti?” ka.

Nga jawap dii iolo, “I Koisar sanganu,” ka.

25Nga kadi Yisus, “Nong i Koisar sanganu, onuai tokouno i Koisar. Nong i Kinoringan sanganu, onuai tokouno i Kinoringan,” ka.

26Om oirananno dii marong iolo diri nijawap Disido, om ootosi dii iolo. Om au kadapat iolo papasala diri tinangaran di Yisus si gotuvang di tongotulun toguu.

Pasal Ovijau Kavagu i Tulun Napatai

(Mat. 22:23-33; Mar. 12:18-27)

27Om kivaropo piipiro tulun do kumpulan Soduki rinumikot siri di Yisus. Om iolo nopo nga tulun do Joudi di au aparsaya do obuli ovijau kavagu i tulun do mantad si kapatajon. 28Om pongoduatno dii iolo di Yisus do, “Guru, kivaro nitulis di Musa do Undang-undang Ugama tokou do ka, ‘Nong napatajan iri iso tongondu do savo, om ausopo tanak pisasavaan di kusai savojo togina, nga ipoguli di sulod diri kusai i longuonjo, om tanak nopo diolo diri nga manangama diri sulodjo kusai i napatai supaya arajat i koturunanjo,’ kadi Musa. 29Nga kivaro dii iri turu kusai moisusulod, do nakasavo iri gulu, nga ausopo tanak om kapataino. 30Om gulio dii di sulodjo koduvo, 31om guliono dii diri kotolu, iri om iiri sampai diri koturu kasangkat nga nongapatai ko kivaro tanak. 32Om koovion nopo dii i tongondu nogi nga napataino dii. 33Jadi sabap do kasangkat turu kojuvan diri nakasavo diri tongondu, isai dii naku manansanganu di tongondu do ovijau kavagu?” kadi kumpulan Soduki.

34Nga jawapaino dii di Yisus iolo, “Tulun nopo siti vonuvo nga moisasavo do kusai om tongondu. 35Nga ausono moisasavo i kusai om tongondu di anggapon do Kinoringan do apatut do vijauon kavagu mantad siri kinapatajon om poijonon silo vonuvo koduvo do insan tadau. 36Do iolo nopo nga auno apatai kavagu, do gaagaya nopo diolo nga irad do moloikat, om tangaanakno dii iolo do Kinoringan do novijauno mantad siri kapatajon. 37I Musa kondiri popoilo siri buukjo do vijauon kavagu i tongotulun nongapatai. Do kivaro i nokotulis di Musa pasal disido kondiri do kivaro sompuun kaju opoyok do kitapui, om siri saralom diri tapui i Kinoringan, om roiton di Musa i Tuhan do, ‘I Kinoringan diIbraim, om iIsak, om i Yakub, i taki tokou,’ kadi Musa.#Antangai Kinolobusan 3:6. 38Komoion nopo diri tinanagaran nga i Kinoringan sanganu di tulun poimvijau i sumamba Disido, okoniko i Kinoringan Isido di tulun do napatai, do insan napataipo iri kojuvanjo, nga ovijau i tatod disido soi suruga, do poimvijaui kasangkat i tulun kaantangan do Kinoringan,” kadi Yisus.

39Om kivaro piipiro tulun di monunuduk do Undang-undang Ugama do Joudi siri do jinumawap di Yisus do ka, “Guru, oinomodno ino tinangarNu!” kadiolo. 40Nga mantad diri auno dii kobulun iolo do mongoduat di Yisus kavagu do nunuu nopo.

Pasal di Koristus i Koturunan di Daud

(Mat. 22:41-46; Mar. 12:35-37)

41Om pongoduatno kavagu i Yisus di tongotulun monunuduk do Undang-undang Ugama do Joudi do, “Potingkuro naku do mitangar i tongotulun do ka, ‘I Koristus nopo nga i koturunan di Raja Daud,’ kadiolo? 42Do i Daud kondiri minitangar do siri Buuk do Sinding, i roitan do Masmur do ka,

‘Sinuu di Tuhan i Kinoringan i Tuhanku do,

“Ogomno siti ponong vananKu#20:42 Ogomno siti ponong vananKu: Antangai “vanan” si Kamus Kitab.

43gosob do ipapasokKu Dikau i tongomusuNu

tanda do nakala iolo,”

kadi Kinoringan,’ kadi Daud.#Antangai Buuk Sinding 110:1.

44Kondiri di Daud mangarait di Koristus do Tuhanjo. Nong irad dino, oinomod naku do i Koristus nga koturunan noopo di Raja Daud? Okoni, kon?” kadi Yisus.

Jumaga-jaga di Gaagaya di Tongotulun Monunuduk do Undang-undang Ugama do Joudi

(Mat. 23:1-4; Mar. 12:38-40)

45Om pitangarno i Yisus di tongotulunJo siri gotuvang di tongotulun tasapou do, 46“Ondodomo mujuno om au kovi otoro di tongotulun di monunuduk do Undang-undang Ugama do Joudi, iri ongaandaian do mamakai do sabung ongolalanggau do manau-panau, om ongaandaian iolo do salamon do tulun si pasar sabap do mokirajou iolo. Om aandaian iolo do mogom siri toogomon di naatur do ogomon di tulun diri ongogagajo pangkat siri saralom do sasambayangan om siri saralom do poginakanan. 47Om monoro iolo di tongotongondu napatajan do savo om monolod di valai diolo, om tomodon diolo palanggau iri sambayangjo do mokiontong-ontongo di tongotulun vokon. Nong irad dino gaagaya diolo, okonko naalang-alang vinagat pongukuman do Kinoringan diolo mantad di tulun vokon!” kadi Yisus.

Currently Selected:

Lukas 20: LabukPKV

Highlight

Copy