Lukas 18

I Momumutus do Bisara om i Tongondu di Napatajan do Savo

1Om minaganu i Yisus do iso poiradan do monuduk di tongotulunJo do papaarati marong Isido supaya soumur iolo sumambayang mokitulung do Kinoringan om au oluvau ginavo do mangaarap di Kinoringan. 2Do kadi Yisus, “Kivaro iso bandar om siri nopo nga kivaro iso momumutus do bisara. Isido nopo nga au rumosi do Kinoringan om au momoduli do tulun. 3Om kivaro nogi iso tongondu napatajan do savo siri bandar diri do soumur miguguli siri di momumutus do bisara do mokitulung supaya isido abanar si gotuvang di tulun diri mangaraat disido.

4Jadi alaidno i tongondu diri miguguli mokitulung nga au podulionon daa di momumutus do bisara, nga kinoompusanjo minsoromo iri momumutus diri, kadii di ginavojo do, ‘Au okui rumosi do Kinoringan om au okui momoduli do tulun vokon, 5nga monusa gia dogo iti tongondu napatajan do savo diti. Gaam nogi do pabanaronku isido om auno dino miguguli isido siti do momoringou dogo,’ kadi ginavo di momumutus do bisara,” kadi Yisus.

6Om kadii di Tuhan kavagu, “Rumongou kouno di tangar diri momumutus do bisara, do insan au otulid isido do momutus nga minonulungi isido. 7Jadi nong irad diri, nga makinpo i Kinoringan do pabanar di tulun i lumoou Disido tadau sodop, irino i tulun piniliJo. Alaid naku i Kinoringan monulung diolo? Aui alaid. 8I Kinoringan nopo nga osikap pabanar diolo. Nga iripo nong korikot Oku kavagu, i Sinumiliu do Tulun, nga okuyak i tulun do kivaro kaparsayaan siti vonuvo,” kadi Yisus.

Iso Tulun do Kumpulan Porisi om i Tulun Momumumpung do Sukai

9Om minaganu kavagu i Yisus do iso poiradan diri tongotulun do misimbabanar kondiri, om pakaraat do taakanon do vokon do ka, 10“Kivaro duvo tulun do minongoi sumambayang siri Valai Sasambayangan Tagajo. Iri nopo i kotiso nga tulun do Porisi, om iri nopo i koduvo nga momumumpung do sukai. 11Ingkakatno dii iri tulun Porisi om sumambayangno kondiri do ka, ‘Ou Kinoringan, monorimakasi okuno Dika, do ioku nopo diti nga okoniko irad oku do tulun vokon do oolian mongkimamaa, om au otulid, om lumapau, om kavagupo okoniko irad oku dilo momumumpung do sukai silo. 12Do ioku nopo nga sominggu induvo mogpuasa om saralom opulu pandapatanku nga iso boogian pataakonku Dika,’ kadi tulun Porisi.

13Nga iri nopo i tulun momumumpung do sukai om siiri isido sosodu do mingkakat, om au kopusu isido tumingaa silo tavan,#18:13 tavan: langit nga muntung-duntung nopo di kangkabjo do osusa marong i ginavo do dusojo om pitangar do ka, ‘Ou Kinoringan, kosianaino dogo, tulun do kiduso!’ kadi momumumpung do sukai.

14Jadi mitangar Oku dikovu, do ulino dii iolo nga irino i momumumpung do sukai i abanar si di Kinoringan, om okoniko iri tulun do Porisi. Do pointikid-tikid do tulun di misinggagajo nga irino poinsuribakon, nga isaai nopo tulun iri sumuribak i ginavo, nga irino poinggojoon,” kadi Yisus.

Minamarakat i Yisus di Tongotangaanak

(Mat. 19:13-15; Mar. 10:13-16)

15Kivaro insan tadau do rinumikot i tongotulun do minongovit di tongotangaanak di ongopopoyok mongoi siri di Yisus do mokikama supaya barakatan. Nga koontong nopo dii i tongotulun di Yisus om ponogur nogi dii do, “Ada kou marong mongovit dino tongotangaanak do ongopopoyok si di Yisus,” kadiolo.

16Nga loovono dii di Yisus iolo do ka, “Poboyoo muju bo ino tongotangaanak rumikot siti Dogo. Ada muju ovudai iolo, do tulun nopo do irad diti tongotangaanak nga irino porintawon do Kinoringan. 17PatangaronKu marong dikovu iti do isaai nopo iri au minsuribak monorima do Kinoringan momorinta disido irad di gaagaya di tanak topoyok diti, isidono iri au kaasu si Kopomorintaan di Kinoringan,” kadi Yisus.

Iso Kotua di Tulun Joudi di Akaya

(Mat. 19:16-30; Mar. 10:17-31; Luk. 10:25; 12:33)

18Insan tadau kivaro iso kotua di tulun Joudi do minongoduat di Yisus, kadisido, “Guru do aandai, potingkuro naku gaagayaku om kaanu oku do kovijaan di auso koovion?” kadisido.#Antangai Lukas 10:25; 12:33.

19Nga kadii di Yisus do, “Isai Oku batoi do roiton Oku dika do tulun do aandai, do ausoi tulun do aandai, do isono i Kinoringan do aandai? 20Nokoilokono kama do undang-undang nisuu di Kinoringan do inong diti do ka, ‘Adako lumapau, adako mamatai do tulun, adako manakau, adako momudut sumaksi do tulun. Urumatono iamonu#18:20 amo: apa om iinonu,’ ka,” kadi Yisus.#Antangai Kinolobusan 20:12-16; Gulion 5:16-20.

21Nga kadi kotua diri, “Navajakuno kasangkat ino ponudukan dino mantadpo di minsusukod okupo,” ka.

22Nga karangaai nopo dii di Yisus iri om kaDisido, “Kivaropo iso au nosuutnu, irino pouliaino om pojualono i nunuu nopo i siri dika om popintaakono di tongotulun do miskin iri torogo, do irino irad do aratanu potoouon silo suruga, om gumuliko nogi dino kavagu siti Dogo, om maja Dogo,” kadi Yisus.

23Nga korongou nopo dii i kotua diri tinangaran di Yisus om osusano dii iri ginavojo do akaya marong isido. 24Om antangaino dii di Yisus do osusa iri ginavojo, om pitangar do, “Apagonno marong i tulun takaya do masu si Kopomorintaan di Kinoringan. 25Kouma nogi ilo songinan unta masu siri luvang do lavus mantad diri tulun takaya posuribak do ginavo om masu si Kopomorintaan di Kinoringan,” kadi Yisus.

26Nga kadii di tongotulun songinrongou di Yisus, “Nong irad dino, isaipo dii bala kaanu kovijaan do auso koovion?” ka.

27Nga kadi Yisus, “Onuu nopo iri au aanu do tulun nga aanui do Kinoringan do nong mantad do Kinoringan onuu nopo nga osiliu,” kadi Yisus.

28Om kadi Pitrus, “Kasaangkat i onuu nopo si dagai nga noiduanja do maja ikoi Dika?” ka.

29Om kadi Yisus, “Oinomodno ino, nga patangaronKu marong dikovu iti, do isaai nopo iri iniduan iri valaijo, ko savojo, ko tongotangaanakjo, ko sulodjo ko moloingonjo sabap popitongkop diti abar do monguasa i Kinoringan di tulunJo, 30nga maso maino kaanu isido do oguu mantad diri, om kaanupo vagu isido do kovijaan diri auso koovion do insan tadau,” kadi Yisus.

Kumointolu di Yisus Popoilo diri KapatajanJo

(Mat. 20:17-19; Mar. 10:32-34)

31Om untunono dii di Yisus iri opulu om duvo tulunJo, om pitangarno do, “Maino tumakad tokou mongoi soi Bandar Yorusalim, nga misti orikot iri komoion di nitulis diri tongonabi pogulu do kosusaanKu komoion diolo, do Iokuno i Sinumiliu do Tulun. 32Do pataakon Oku si di tulun do okonko bansa do Joudi, insasanawon Oku diolo, poikum-ikuman Oku diolo, pindulaan Oku diolo, 33pinlobunan Oku diolo om patajon Oku nogi dino diolo. Nga apatai Oku nopo, om kotolu tadau om ovijau Oku kavagu,” kadi Yisus.

34Nga au kaarati i tongotulun di Yisus di komoion Disido, do tinangaran nopo diri nga aralom kopurimanan diolo om kavagupo nga aupo koilo nong onuno i komoion di Yisus diri.

Minongolingos i Yisus di Tulun Nobolou

(Mat. 20:29-34; Mar. 10:46-52)

35Om ontok diri minsosomok i Yisus siri Bandar Yoriku, kivaro dii iso tulun nobolou mogom-ogom siri disan do ralan do mokisadaka. 36Korongou dii isido do oguu tulun tumalib, om pongoduat dii do, “Onu kai iri?” ka.

37Kadiolo, “I Yisus mantad si Bandar Nasarit bo tumalib,” ka.

38Om luvapno dii i tulun nobolou di Yisus do irad diti, “Uu Yisus, Ikano i koturunan di Daud, kosianaino dogo!” ka.

39Nga i tongotulun di nokopogulu di kinoguuan nga monogur dii di tulun nobolou do ka, “Onu iti nakalavanu! Otosno!” ka.

Nga makin nogi dii do lumuvap isido di Yisus, do, “Ikano i koturunan di Daud, kosianaino dogo!” ka.

40Karangaai nopo dii di Yisus i tulun nobolou, om indadano dii Isido, om suuoJono dii i tulun do mongongoi di tulun nobolou pokoyon si Disido. Koinsomok dii i tulun nobolou si Disido, om duatono, 41“Onu pokitulungonnu Dogo?” ka.

“Tuan, mokitulung oku supaya koontong iti matoku,” ka.

42Om pitangarno dii i Yisus disido do ka, “Koontongkono dii, do nolingasankono di toruolnu do aparsayako Dogo,” ka. 43Om turus koontong i tulun nobolou, om vajano dii di Yisus mivaja do papagajo di Kinoringan. Om kasangkat do tongotulun nokoontong do irad diri nga mangarajou#18:43 mangarajou: mongompod do Kinoringan.

Currently Selected:

Lukas 18: LabukPKV

Highlight

Copy