Lukas 17
17
Ponudukan Pasal di Tulun Mamamalid
(Mat. 18:6-7, 21-22; Mar. 9:42)
1Om pitangarno dii i Yisus di tongotulunJo do ka, “Mimang do kivaro rumikot ponsubaan iri kapalid do tulun, nga araatno nasip i tulun do i nontodon do ponsubaan diri. 2Gaam nogi do pasandangon do tali om limbagatan do vatu tagajo i lioujo om itobung nogi dino si laut mantad do pokoruol isido do ginavo diri iso tulun i oluoi ginavo. 3Antatangai mujuno!
Nong kapamaal i kosuladannu do duso si dika, om togurono isido. Jadi nong rumorogono isido om ompunaino isido. 4Nong inturu isido kasala si dika saralom sangadau om inturui kavagu isido mingguli do mitangar dika do, ‘Rumorogo okuno dii,’ ka, om misti ompunainuno isido,” kadi Yisus.
Pasal do Kaparsayaan
(Mat. 17:20)
5Om pitangarno dii i tongosusuuon di Yisus do, “Tuhan, ruangaino dagai i kaparsayaanja,” ka.
6Nga jawap dii i Tuhan diolo, “Nong kivaro kaparsayaan muju, insan opoyok irad di sayat do sansam pun, om tangaron muju diti puun do nunuk do, ‘Sakat om tanom silo laut,’ kamuju, misti do sumakati om tumanomi silo laut, do maja di tangar muju,” kadi Yisus.
Karaja di Susuuon
7Om kadi Yisus kavagu, “Nong isai-isai dikovu do kivaro i turipon do kouli mangaradu ko momimiarapo do kambing biri-biri, potungkaponnu naku dino iri monuu poposikap disido mangakan do koririkotpo disido mantad siri dumo? 8Mimang do au buli. Tantu monuuko disido do ka, ‘Ongoino mogonsok om sumalin pakaian. Osiap dino om surungai oku dino mogulu do taakanon om vaig. Oopod oku mangakan om mongiup ampa nogi mangakanko,’ kanu. 9Om monorimakasiko naku dino diri turiponnu nosuut i nisuunu? Mimang au, do irino i karaja di turipon. 10Om ikovu kondiri nogi nga irad diri. Oopod muju nopo monguri iri nipokuri dikovu, om misti tangaron muju do, ‘Ikoi nopo nga turipon toomod. Ombo nopo i ipokuri dagai do Kinoringan, irino vojoonja!’ kanto,” kadi Yisus.
Nolingasan iri Opulu Tulun do Rumanai i Kojuvan
11Ontok di pampanau i Yisus do mongoi soi Bandar Yorusalim, nakavaja Isido siri pivolitan di Vonuvo Somoria om Vonuvo Golilia. 12Om apitno dii i Yisus siri iso kampung, kivaro dii opulu tulun sumamung Disido do rumanai i kojuvan doisido. Nga osodu iolo songingkakat, 13om pongoloouno dii iolo do ka, “Oi Yisus! Guru! Kosianaino dagai!” ka.
14Antangai dii di Yisus iolo, om pitangar dii Isido diolo do, “Ongoi kou pogi soi di imam om poontongono isido dino kojuvan muju!” kadi Yisus. Nga di manau-panaupo iolo si tanga ralan om kolingasaino iolo.#17:14 Komoion nopo do ayat diti nga mongolingos i Yisus diolo, om irino dii kinoponuuan Disido diolo do mongoi sumamung di imam, supaya oporisano om oilaan do nolingasan iolo di toruol diolo.
15Nga kaantangai dii diri iso tulun iri kojuvanjo do nolingasan, om gunggulino dii isido siri di Yisus mivaja mitangar do opuod do mangarajou do Kinoringan, 16om tungubno dii siri somok takod di Yisus, om minonorimakasi isido di Yisus. Nga isido nopo nga tulun do Somoria.
17Kadi Yisus do minongoduat, “Opulu tulun kou do nolingasan. Inombono dii i sivoi tulun mantad dika? 18Nokokuro iolo vokon mantad dika do au ginumungguli kavagu do mangarajou do Kinoringan do ika nogi i tulun di okonko bansa do Joudi nga ginumungguliko nogi siti?” kadi Yisus. 19Om pitangarno dii kavagu i Yisus di tulun do ka, “Ingkakatno om pampanauno, do nolingasankono di toruolnu do aparsayako Dogo,” kadi Yisus.
Korikatan Kavagu di Yisus
(Mat. 24:23-28, 37-41; Mar. 13:15-21)
20-21Kivaro i kumpulan Porisi do minongoduat di Yisus nong sombia i Kinoringan korikot momorinta di tongotulunJo. Nga jawap dii i Yisus do ka, “Korikatan nopo do Kinoringan momorinta nga siri saralom ginavo di tongotulun do au aantangan rumikot. Om ausoi tulun mitangar do, ‘Antangai pogi nga sitino ko silono i Kopomorintaan do Kinoringan,’ kadino, do sitino dikovu i Kinoringan do momorinta!” kadi Yisus.
22Om pitangarno kavagu i Yisus di tongotulunJo do, “Kivaro maso do insan tadau do miintong kou do tadau do korikatanKu kavagu, do Iokuno i Sinumiliu do Tulun, nga aui aantangan Oku dikovu. 23Om tangaron kou nopo do tulun do irad diti, ‘Antangaipo silono Isido!’ kadino ko, ‘Antangai sitino Isido!’ kadino, nga ada kou ongoi siri om ada kou vaja diolo. 24Do Iokuno i Sinumiliu do Tulun,” kadi Yisus, “om gaagayaKu do rumikot kavagu nga irad do tungkilap silo tavan,#17:24 tavan: langit do monungkilap nopo silo somputul do tavan gosob do korikot silo sampaping do tavan. 25Nga aupo orikot iri, om misti do asansara Okupo marong om iada-ada Oku nogi diti tongotulun do maino.
26Do korikatanKu nopo, i Sinumiliu do Tulun, nga irad di jaman di Nuu pogulupo. 27Do i tongotulun do mogiginakanon, mogiginiupon om moikakawin irad di koubasan gosob do norikot i tadau do kinasakaan di Nuu siri kapal. Om ontok do au noilaan diolo om rikotno dii i loni tagajo, nga nobinasa kasaangkat i tongotulun do nolosod.
28-30Om tadau nopo do kointalanganKu nogi nga irad di maso di Luut, do iri nopo i tongotulun moginakanon, moginiupon, momoli, padagang, mananom om mamaal do valai. Nga ontok nopo di tadau do minogidu i Luut mantad siri Bandar Sudom, om tigogi dii rinumikot i tapui om i borilang irad di vinuuk do avangug i tavau mantad silo tavan irad di darun do mogontinongkop do mominasa kasangkat di tongotulun siri, om irad nogi dino i tadau do pointalangon Oku, i Sinumiliu do Tulun.
31Om ontok do tadau diri nga isaai nopo dikovu siri labus do valai, om adano asu siri saralom valai do mongongoi do onuu nopo porompon muju siri. Om irad nogi dino i tulun siri dumo, do ada kouno muli siri valai nga polombusaino mogidu. 32Soromonono i savo di Luut do kinumovili isido mongontong di valaijo di poguulupo om sinumiliu do tasin. 33Do isai-isai nopo iri mongingkikit marong diri kovijaanjo kondiri, nga iri nogi do mupud i kovijaanjo. Nga isai-isai nopo do olijatan do kovijaanjo, iri nogi kaanu kovijaan diri auso koovion.#Antangai Markus 8:35. 34Nga mitangar Oku dikovu nong rumikot Oku di totuvong om kivaro duvo tulun do kopidudun, iri nopo iso nga angatan, om iri koduvo koopung. 35Om kavagupo nga kivaro duvo tongondu do misaud monutu do parai, iri nopo iso nga angatan om iri koduvo koopung. 36[Om kavagupo nong kivaro duvo kusai kumuri siri dumo, iri nopo iso nga angatan, om iri koduvo koopung,]” kadi Yisus.#Antangai Matius 24:40.
37Om pitangarno dii i tongotulunJo do mongoduat Disido, “Tuhan, sinombono?” ka.
Nga jawapno dii i Yisus, “Misti orikot iti tinangaranKu do irad di tongotombolog do misti rumikot monutuk di tongobangkai,” kadi Yisus minonuduk.
Currently Selected:
Lukas 17: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
