Lukas 16

Poiradan di Mandur do Au Moilo Arapon

(Mat. 6:24)

1Om minaganupo kavagu i Yisus do iso poiradan do minonuduk di tongotulunJo do ka, “Kivaro iri iso tulun di akaya do kimandur. Nga kivaro dii norongou di tulun takaya do notuduan i mandurjo do minangakan diri siinjo. 2Om loovono dii di tulun takaya i mandurjo om tangarai disido do ka, ‘Araat bala gaagayanu norongouku niabar do tulun dogo. Nga pataakono dogo kasangkat iri pinonulisannu di barangku, do palapasonkuno ika mantad do karajanu do mandur,’ ka.

3Nga mininsoromono dii i mandur do ka, ‘Kumukuro okuno dii diti do kalapas oku mantad di karajaku siti? Kumaraja do manangkul nga au oku kasanggup, om mokisadaka nga koikum-ikumi. 4Oo, kooyonku bala. Pokurangonku i tutang di tongotulun si di tuanku supaya sombia do kalapas oku diti karajaku oguu i koruang do popoijon dogo siri valaijo,’ kadi ginavojo.

5Om pinloovono dii disido i tongotulun di nokopingutang do barang di tuanjo, om pongoduatno isido di iso tulun do ka, ‘Songkuro iri tutangnu silo di tuanku?’ kadisido.

6Om kadi kotiso tulun, ‘Aatus i suvangan do lana,’ ka.

Nga kadi mandur, ‘Na! Ati surat tutangnu. Sikapono, om potulisoni do limoi nopulu suvangan,’ kadisido.

7Om duatono disido iri koduvo tulun, ‘Songkuro iri dika do tutang?’ kadisido.

Om jawapaino dii di tulun, ‘Aatus i pikul do gandum,’ ka.

Nga kadi mandur do minitangar, ‘Na! Ati surat di tutangnu. Tulisoni do valu nopulu pinikulan,’ kadi mandur.

8Nga karangaai nopo dii di tulun takaya do irad diri gaagayajo om mangarajou#16:8 mangarajou: mongompod dii isido do ka, ‘Opintar bala isido, do apaandai mogium do kaakan-akano,’ ka. Nga i tongotulun nopo do maja di gaagaya siti vonuvo nga lobi opintar do mangatur di tulun vokon mantad di tongotulun do maja di gaagaya do aandai. 9Nga mitangar Oku dikovu do pakajono iri kinakayaan muju do mogium di koruang taandai, supaya ontok do olijot iri kinakayaan muju siti vonuvo om torimawon kovi mijon siri valai di auso korobukan.

10Isai-isai nopo iri rumalan maja do pinonuuan di agaan om iri nogi avagat nga ralanoni disido. Om isai-isai nopo iri au aarap di agaan om iri avagat nogi nga aui aarap. 11Nong au kou rumalan mamakai kaandai-andai do kakayaan muju siti vonuvo, nga aui mangaarap i Kinoringan dikovu do mamakai di kinakayaan do oinomod si suruga. 12Om nong au kou rumalan do mangatur diri barang do vokon om ausoi manaak dikovu diri barang muju kondiri soi suruga.

13Ausoi susuuon do monontuan do duvo tuan, do nong duvo tuan, au kojuu isido diri kotiso nga iri koduvo au kaandaianjo; ko rumalan marong isido diri isuu di kotiso tuan, om tolikudanjo iri isuu di koduvo. Nong irad dino au kadapatko do monontuan di Kinoringan nong monontuanko do siin,” kadi Yisus.

Piipiro Ponudukan di Yisus

(Mat. 5:31-32; 11:12-13; 19:9; Mar. 10:11-12)

14Om korongou nopo dii i kumpulan Porisi diri tangar di Yisus do irad diri, nga irak-irakaino dii diolo Isido, do iolo nopo kumpulan Porisi nga atamaa do siin. 15Nga pitangarno dii i Yisus diolo do ka, “Ikovu nopo nga misimbabanar si gotuvang do tulun, nga oilaani do Kinoringan ino ginavo muju. Do ombo iri rorojoon do tulun, om irino kobonsijan do Kinoringan.

16Iri nopo Undang-undang Ugama do Joudi om i ponudukan tinulis di nabi, i popolombus di tinangaran do Kinoringan pogulu, nga apakai gosob do nokorikot i Yaya Mamamatis.#16:16 Mamamatis: Momomonsu Om mantad diri timpuunno dii i Yaya do papaabar di tongotulun do monguasa i Kinoringan di tongotulunJo, om pointikid-tikid di tulun nga moisosogulu do masu siri Kopomorintaan di Kinoringan. 17Nga oruai lumijot ilo tavan#16:17 tavan: langit om iti tana ko kivaropo lumijot iri iso titik nitulis diolo siri Undang-undang Ugama do Joudi.

18Isai-isai nopo mangada di savojo om manansavo kavagu do tongondu sondiang, om isidono iri lumapau. Om isai-isai i manansavo kavagu di tongondu di niada di kusai, iri nga kavavaja di tongondu do lumapau nogi,” kadi Yisus.

I Tulun Takaya om i Lajarus

19Om ponoritano dii i Yisus do iso sorita do ka, “Kivaro iso tulun takaya do soumur kipakaian ongaandai om ongoorogo i sabung disido om tikid-tikid tadau do asanang kaakan-akano disido. 20Nga kivaro iso tulun i mokisadaka, i Lajarus ngaranjo. Isido nopo nga notongkop do gotok i kojuvanjo. Om poingoodop dii isido siri somok di pintu valai di tulun takaya 21do oondos daa do kaakan isido diri mumu naratu mantad siri savat mija di tulun takaya. Om pintilaai dii di tasu i gotokjo.

22Nga kapatai nopo dii iri tulun miskin diri, kibitono dii di moloikat do mongovit siri somok diIbraim. Om kosusuut nopo dii iri tulun takaya napatai om lobongono dii diolo. 23Nga nokoongoi dii isido siri poijanan di tulun nongapatai diri kivaro kasansaraan. Om kotingaa dii isido, nga naatuljo iIbraim do siri sodu, om i Lajarus nga poinsomok si disido. 24Om loovono dii disido iIbraim do ka, ‘Uu aki, kosianaino dogo, om suuopo dogo i Lajarus poloob di tunturujo si vaig do potutuon ponogit diti dilaku, do nasansara oku marong siti saralom do tapui,’ kadi tulun takaya.

25Nga jawapno dii iIbraim, ‘Aki, soromonono pogi di poimvijaukopo, nga naanununo kasangkat di dika do kasanangannu, nga i Lajarus nopo om i araat nopurimanan disido. Nga iti nogi dino maino do totoluodon#16:25 toluodon: insasamadon ko kosisian i Lajarus. Ika nopo dino nga asansara. 26Om kavagupo nga au ikoi kadapat mongoi sino dikovu om ikovu nogi nga au kadapat mongoi siti dagai sabap nga kivaro luvang tagajo sino pialatan tokou,’ kadiIbraim.

27Nga kadi tulun takaya, ‘Aki, nong irad dino suuopo marong dogo i Lajarus do mongoi soi valai diamoku,#16:27 diamo: diapa 28do limopo kojuvan iadiku do kusai soi, om iolono iri ongoion dogo abarai, supaya au iolo kosusuut siti pantok kasansaraanku,’ kadi tulun takaya.

29Nga jawapaino dii diIbraim do ka, ‘Aki, kivaro gia buuk di Musa om i buuk tinulis di tongonabi siri diolo. Om aandai daa do rumongou iolo om maja diri tinangaran siri buuk,’ kadiIbraim.

30Nga jawapaino dii di tulun takaya iIbraim do ka, ‘Aki, au rumongou iolo di tinangaran siri Kitab nong okonko i tulun napatai om i novijau kavagu do mongoi si diolo mangaabar, ampa nogi rumorogo iolo di duso doisido,’ kadi tulun takaya.

31Nga jawapno dii iIbraim, ‘Aki, nong aui iolo mongkinongou di tinulisan di Musa om i tongonabi, om au nogi aparsaya iolo insan nong kivaro napatai om mijau kavagu do mangaabar diolo,’ kadiIbraim,” kadi Yisus.

Currently Selected:

Lukas 16: LabukPKV

Highlight

Copy