Lukas 15

Poiradan do Iso Kambing Biri-biri Nolijot

(Mat. 18:12-14)

1Om rikotno dii i tongotulun kiduso, irad di tongotulun di momumumpung do sukai om i tongotulun i au maja di Undang-undang Ugama do Joudi do minsomok mongkinongou diri ponudukan di Yisus. 2Om mungos-ungos dii i kumpulan do Porisi om i monunuduk do Undang-undang Ugama do Joudi do mitangar mangaraat di Yisus do ka, “Aa! Antangaipo i Yisus do kumoruang marong dilo tongotulun do kiduso om rumuung diolo mangakan,” kadiolo.

3Nga minaganu dii i Yisus do iso poiradan do ka, 4“Nong kivaro songulun siti pialatan muju do kikambing biri-biri do aatus tinan om nolijot iri iso, om kukuroyonno dii iri? Tantuno do iduan nopo disido iri sivoi nopulu om sivoi siri padang do kovotuvan do mampanau mongoi pogium di iso kambing nolijot gosobi do aayanganjo. 5Om kaayangai nopo dii disido iri, nga simbanojono dii mongovit muli mivaja do aandaian marong iri ginavojo. 6Nga koguli nopo dii isido diri, om loovono dii disido kasangkat i tongokoruangjo om i tongotulun siri somokjo, om pitangarno dii isido diolo do, ‘Asanang ginavo tokouno maino, do naayangankuno dii iri kambing biri-biri di nolijot,’ kadisido. 7Jadi mitangar Oku dikovu do ongosanangno i ginavo kasaangkat diolo soi suruga irad di sanganu di kambing biri-biri do kivaro iso tulun kiduso do rumorogono diri dusojo. Makinpo asanang ginavo diolo soi suruga diri iso tulun i rumorogo do dusojo mantad diri sivoi nopulu om sivoi i tulun diri opurimanan do abanar isido om au rumorogo,” kadi Yisus.

Poiradan di Siin Natatak

8Om minaganu kavagu i Yisus do iso poiradan do tulun kiduso nga irad di siin do natatak do kaDisido, “Nong kivaro iso tongondu do kivaro siin pirak do opulu, om natatak dii iri iso, nga misti do iumon disido iri pirak diri, om ponutud di lampu, om sopuvaino dii marong i valai do mogium marong di siin pirak gosob do naayangan. 9Om kaayangai nopo dii disido iri, nga loovono dii disido kasangkat i tongokoruangjo om i tongotulun siri somokjo, om pitangarno dii isido diolo do ka, ‘Kasanangno i ginavo tokou dii do naayangankuno i siinku di natatak,’ kadii disido. 10Jadi mitangar Oku dikovu nong kivaro iso tulun kiduso do rumorogo di dusojo, i tongomoloikat do Kinoringan nga asanang ginavo irad diri tongondu do asanang ginavo do naayangan i siinjo,” kadi Yisus.

Poiradan di Tanak do Napalid

11Om minaganupo kavagu i Yisus do iso poiradan do i Kinoringan nopo nga irad di tamajo di tanak, do kaDisido, “Kivaro iso tulun do kitanak do duvo kusai. 12Nga pitangarno dii i tanakjo di touri#15:12 touri: toudi diamojo,#15:12 diamo: diapa do ka, ‘Amo,#15:12 Amo: Apa pataakono dogo maino i poromponnu i apatut do songonuvonku do insan tadau,’ kadisido. Nga piboogijono dii diamojo diolo i poromponjo.

13Nga aupo alaid mantad diri om pojualjono dii kasangkat di tanak touri iri poromponjo kondiri, om iri nopo dii siin torogo diri barang nga ovitojono dii mongoi si vonuvo do osodu, om sirino dii isido misinlagak om mokitongondu nopo do mangavi diri siinjo. 14Nga kaavi nopo dii iri siinjo, om korikotno dii i musim do mononlikop do tinumongkop siri vonuvo diri, na, ausono dii nuu-nuupo akanonjo do naavi pojual disido. 15Jadi ongoino dii isido gumaji siri di iso tulun si vonuvo diri, om suuo dii isido siri dumo do monumad do vogok. 16Nga vitilon dii isido om siakan dii diri sumad di vogok, om insan iiso tulun nga auso papaakan disido do taakanon.

17Nga nokopuriman nogi dii isido diri gaagayajo, om kadii di ginavojo, ‘Gaam nogi i tongotulun gumaji siri diamo#15:17 diamo: diapa kolobi iri taakanonjo, nga ioku nogi diti i tanakjo matai do olikapan siti. 18Nga gaam nogi mampanau oku muli soi diamoku. Om korikot oku nopo dino, tangaronkuno dino iamoku#15:18 amo: apa do, “Amo, nokoduso okuno diti bala soi di Kinoringan om sino dikau. 19Nga au apatut do roiton oku do tanaknu, nga jodion oku nono do tulunnu do gumaji,” kangku nono disido,’ kadi ginavojo. 20Om pampanauno dii isido muli siri diamojo.

Nga siripo isido sodu, om kaatulno dii diamojo isido do rumikot, nga kosianaino dii marong iamojo di tanakjo, om panangkusno#15:20 panangkus: pogundak dii isido mongoi sumamung, om gopusono dii om siumono dii disido i tanakjo.

21Nga pitangarno dii isido diamojo do, ‘Amo, nokoduso okuno si di Kinoringan om sino dika. Amo, om au apatut do roiton oku dika do tanaknu,’ kadisido.

22Nga pongoloou nogi dii iamojo di tulunjo gumaji si disido om pitangarno dii iamojo do ka, ‘Sikapo mujuno mongongoi di sabung di aandai om pakajaino dogo iti tanakku, om pondulungaino isido, om kosutaino, 23om ongoiono i tanak do sapi di olomu, om sumboliono, do moginakan tokou maino mivaja do asanang iti ginavo tokou. 24Do tanakku nopo diti om napataino daa, nga novijaui kavagu, om nolijotno daa nga nokoulii kavagu,’ kadiamojo.#15:24 kadiamo: kadiapa Om timpuunno dii iolo do mograramai.

25Nga ontok nopo diri i tanakjo gulu nga siripo dumo. Om pampanau dii isido muli, om minsosomok dii di valai, korongou dii disido iri togunggu om manari si valai, 26om loovono dii iri iso susuuon diamojo, om duatono dii ka, ‘Nokuro iolo silo valai?’ kadisido. 27Nga kadii di turipon, ‘Nokouli dii iadinu, om irino sabap do nipoputung dii diamonu i tanak di sapi muju diri olomu, do naandaian do nokouli kavagu iadinu si dikovu om aandaii auso toruol,’ ka.

28Nga araatan dii marong i tanak gulu dii, do nokorongou diri tangar di turipon, om au dii moo masu siri valai. Om labusno dii iamojo do minongoi monoluod disido. 29Nga kadi tanakjo, ‘Antangaipo amo, noujan okuno marong do piro notounku do muup-uup dikau kumaraja om aupo insan oku lumavan onuu nopo isuunu dogo. Nga au insan oku putungainu do tanak do kambing, do pograramaianku do tongotandam-andamku. 30Isido nogi dii i tanaknu koririkot do minangavi do barangnu siri sundal, om isido nogi dii pinatajannu do tanak do sapi diri olomu,’ kadi tanak gulu.

31Nga kadiamojo, ‘Uusau, ika nopo gia om munggum-runggumi dogo, onu nopo arataku irino aratanu,’ ka. 32‘Iadinu nopo nga napataino daa, nga novijaui dii kavagu; napalidno daa, nga nokoulii dii kavagu, sabap diri do apatut do mograramai tokou om sopiandai tokou,’ kadiamojo,” kadi poiradan di Yisus.

Currently Selected:

Lukas 15: LabukPKV

Highlight

Copy