LUCAS 8
8
Jesuspajta ruraj huarmicunamanda
1Chai jipami, Taita Dios mandajuj llactamanda ali villanata villashpa, tucui pueblocunapi, uchilla llactacunapi Jesusca purijurca. Chunga ishcai yachajujcunapash, Paihuanmi purinajurca. 2Shinallata, ayacunata llujchishca huaquin huarmicuna, shuj nanaicunamanda alichi tucushca huarmicunapashmi, Jesustaca cumbanajurca. Magdalena nishpa rijsishca Mariapashmi purijurca. Chai huarmimandami, canchis ayacunata llujchishca carca. 3Shinallata, Herodespaj huasipi tucuita ricujuj Chuza shuti runapaj huarmi Juanapash, Susana shuti huarmipash, ashtahuan tauca huarmicunapashmi, Jesuspajta rurashpa purinajurca.
Tarpuj runahuan yarichishpa yachachishcamanda
(Mat. 13:1-15,18-23; Mar. 4:1-20)
4Tucui pueblocunamanda shamushpami, ashtaca gentecuna Jesuspajman tandanajumurca. Chaipimi Jesusca, yarichishpa cashna yachachijurca: 5“Tarpuj runami, muyuta tarpungapa llujshirca. Shina tarpujujpi huaquin muyucuna ñanman urmajpimi gentecunaca sarunajurca. Chaitaca alasyuj animalcunami micunajurca. 6Shinallata, huaquin muyucunaca, rumilla alpapimi urmarca. Chaquishca alpa cajpimi, viñashpapash ñapash chaquircalla. 7Shinallata, huaquin muyucunaca casha chaupipimi urmarca. Cashacuna jundashpami, llapishpa ismuchirca. 8Shinallata, huaquin muyucunaca, ali alpapi urmashpami, juyailla viñarca. Shina viñashpami, shujmandalla patsajta granoshpa fucurca” nircami.
Shina nishpallami, shinllita rimashpa cashna nirca: “Uyangapa rinrita charishpaca, aliguta uyaichi” nircami.
9Chai jipami Paipaj yachajujcunaca, cashna tapunajurca: “Cai yarichishpa yachachishcacunaca, ¿imatata nijupan?” ninajurcami. 10Shina tapujpimi Jesusca cashna nirca: “Taita Dios mandajuj llactamandaca, pipash na yachai ushashcatami cangunamanlla yachachishca. Ashtahuangarin caishuj gentecunaca, ricushpapash ama ricuchun, uyashpapash ama yuyaita japichunmi, 11yarichishpalla yachachijuni. Cai yarichishpa yachachishcacunaca, cashnami: Muyuguca, Taita Diospaj Shimigumi. 12Ñambi urmashca muyucunaca caicunami: Diospaj shimita uyajpipash, Paicuna ama quishpirichunmi, diablo shamushpaca shungumanda anchuchin. 13Rumilla alpapi urmashca muyucunaca caicunami: yachachishca shimita uyashpa cushijushpami chasquin. Shina chasquishpapash, sapita na charij yurashna cashpami, huaquin huatacamanlla crishpa catinajun. Shina cashpami, ali crij cajta ricungapa llaquicuna japijpica huashaman tigranlla. 14Casha chaupipi urmashca muyucunaca caicunami: yachachishcata uyashpapash, cai causaipilla charijyangapa munashpami caruyashpa catinajun. Shina cashpami, cai causaipajtalla imatapash rurashpa ninanda cushijushpa, na fucuj granoshna tucunajun. 15Ashtahuangarin, ali alpapi urmashca muyucunaca, yachachishca shimita uyashpa tucui shunguhuan aliguta catishpami, juyailla fucuj granoshna causanajun.
Imata pacalla rurashcapash ricuringallami
(Mar. 4:21-25)
16Pipash michata japichishpaca, na mangahuan quilpanllu, cama ucupipash na churanllu. Ashtahuangarin, huasi ucuman yaicujcunami ricushpa yaicuchun, michataca churan. 17Na ricurishpa pacalla canaca, imapash na tiyanllu. Pipash ama ricuchun, michaman ama llujshichun pacashca canaca imapash na tiyanllu. 18Shina cashpaca, aliguta yarishpa uyaichi. Ashtacata charijmanmi, ashtahuan caranga. Ashtahuangarin na charijpica, charingapa munajushcatapash tucuillami quichunga” nircami.
Jesuspaj mamamandapash, huauquicunamandapash
(Mat. 12:46-50; Mar. 3:31-35)
19Chai jipami, Paipaj mamapash, huauquicunapash, Jesuspajman shamurca. Ashtahuangarin, gentecuna ninanda jundariyajpimi, Paipajman chayaitaca na ushanajurca. 20Chaimandami Jesustaca:
“Cambaj mamapash, huauquicunapash, Canda ricungapami shamushca. Paicunaca canllapimi shayanajun” nishpa villanajurca.
21Shina nijpimi Jesusca cashna nirca:
“Diospaj Shimita uyashpa pactachijcunallami Ñucapaca mama, Ñucapaca huauquicuna” nircami.
Ninan huairahuan cucha jatarijujtami Jesusca chulunyachishca
(Mat. 8:23-27; Mar. 4:35-41)
22Shuj punllami cashna tucurca, Jesusca, Paipaj yachajujcunandi barcoman yaicushpaca:
“Cai cuchata chimbashunchi” nircami.
Shina nishpaca rircallami. 23Ashtahuangarin barcopi ña rinajushpa, Jesús puñujujpimi ninan huaira shamushpa, cucha yacuta jatarichirca. Shinamandami, barcopi yacu jundai callarijpi ña huashajugrijurca. 24Shina tucujpica Jesusta rijchachingapa shamushpami:
“¡Yachachij, Yachachij, ñucanchica huashajushpa huañugrinchimari!” ninajurca.
Shina nijpi jatarishpami huairatapash, yacu quilpamujujtapash, Jesusca jarcashpa rimarca. Shina rimajpica chulunlla, casilla tucurcallami. 25Chai jipami paicunataca:
“Canguna Ñucata crishcapash, ¿maipitayari?” nirca.
Shinamandami ninanda manllarishpa, paipura ricurishpa, caishuj chaishuj cashna ninajurca:
“Cai runaca, ¿pitayari? Huairapash, cuchapash Pai rimajpica cazunllamari” ninajurca.
Aya jundashca runami Gadara llactapi tiyashca
(Mat. 8:23-27; Mar. 4:35-41)
26Paicunaca, Galilea llacta chimbaman tiyaj Gadara shuti llactamanmi cuchata chimbashpa rirca. 27Ña chayashpa manñaman Jesús llujshijhuanmi, pueblomanda shuj runa, Jesusta tuparingapa shamurca. Chai runaca, unaitapachami aya jundashca causajurca. Shinamandami, churajunatapash na churajushpa, huasipipash na causashpa, huañushcata pambana utujucunapilla causajurca. 28Chai runaca, Jesusta ricushpami ninanda caparirca. Jesuspaj ñaupajpi cungurishpami, cashna nishpa ninandapacha caparijurca:
“Jahua pachapi mandaj Taita Diospaj Churi Jesús, Canga ñucahuanga, ¿imatata ricunata charingui? Ama ñucataca llaquichihuaichu nipanimi” nircami.
29(Chai runamandami ayata llujchishpa cacharca. Paica, unaitapachami aya jundashca causajurca. Shinamandami cadenacunahuan, shuj huatanacunahuan huatan carca. Ashtahuangarin cadenacunata fitishpami, aya apajpi rishpa, jichushca pambacunapilla purijurca). 30Chai runataca:
“¿Ima shutita cangui?” nishpa Jesús tapujpimi:
“Huaranga huaranga shutimi cani” nirca.
Ashtaca ashtaca ayacuna jundashca causajushpami chashna nijurca. 31Chai ayacunaca:
“Ñucanchitaca, manllanayai ucu ucuman ama cachahuaichu” nishpami, Jesustaca ninanda mañanajurca.
32Chai urcupica, ashtaca ashtaca cuchicunami micushpa purinajurca. Shinamandami chai ayacunaca:
“Chai cuchicunapi yaicuchun, ñucanchitaca cachahuai” nishpa, Jesustaca ninanda mañanajurca. Shina mañajpimi, chai cuchicunapi yaicugrichun saquirca. 33Chai runamanda ayacuna llujshishpaca, cuchicunapimi yaicugrirca. Shina yaicujhuanmi, chai ashtaca cuchicunaca, jaca jahuamanda cuchaman huashajushpa huañunajurca. 34Chaipi imalla tucunta ricushpami michijcunaca, pueblopi causajcunaman, pambacunapi causajcunaman villangapa, ninanda calpanajurca. 35Shina villajpimi, ima tucushcata ricungapa llujshinajurca. Gentecuna Jesuspajman chayamushpaca, ayacuna llujshijpi ali tucushca runataca, Jesuspaj ñaupapi tiyajujtami ricunajurca. Chai runaca, churajunatapash churajushca, ali yuyaimi tiyajurca. Shina cajpipash, gentecunaca ninandami manllanajurca. 36Chaita ricushca gentecunami, aya jundashca runata Jesús imashna alichijta ricushcacunaca villanajurca. 37Shina villajpimi, Gadara llacta muyundimanda tucui gentecuna ninanda manllarishpa, paicunapaj llactamanda llujshishpa richun ninanda mañanajurca. Shina ninajujpimi Jesusca, barcopi tiyarishpa tigrarca. 38Shina cajpipash, ayacunata llujchi tucushca runami, paita pushashpa richun ninanda mañajurca.
Ashtahuangarin Jesusca, chai runataca cayacaman nishpami cashna nirca: 39“Taita Dios canman cashna jatun alita rurashcataca, cambaj huasiman rishpa chaipi villagrilla” nircami.
Shina nijpi chai runa rishpaca, paiman juyailla jatun alicunata Jesús rurashcataca, tucui pueblopimi villashpandi rijurca.
Jairopaj ushimanda, Jesuspaj churajushcapi tacarishca huarmimanda
(Mat. 9:18-26; Mar. 5:21-43)
40Jesús cutin tigramujujpica, ashtaca gentecuna shuyanajushca cashpami, ninanda cushijushpa chasquinajurca. 41Chaimanmi, sinagogapi mandaj Jairo shuti runapash chayamurca. Paica, Jesuspaj ñaupajpi cungurishpami:
“Ñuca huasiguman yaicupashunyari” nishpa ninanda mañajurca.
42Chai runaguca, chunga ishcai huatatashna charij, shujlla ushigutami charirca. Chai ushiguca, ña huañunallami carca. Ñanda ña rijujpica, ashtaca gentecunami llapiripi catishpa rinajurca. 43Chaitaca, yahuar shamujuj ungüihuan chunga ishcai huatata huañujujlla causaj huarmipashmi rijurca. Chai huarmica, jambijcunapajman rishpami, tucui imatalla charishcatapash tucuchishca carca. Paitaca, maijan jambijpash alichitaca na ushashcachu carca. 44Chai huarmica, huashata quimirimushpami, Jesús jahualla churajushca pundagupi tacarirca. Shina tacarijhuanmi, yahuarca na ashtahuan shamushpa ali tucurca. 45Shina tacarijpimi Jesusca:
“¿Pita Ñucata tacarirca?” nishpa tapurca.
Shina tapujpipash, pipash na imata nijpimi Pedroca, paipaj cumbacunandi cashna nirca:
“Yachachij, candaca cai tucui gentecunamari saruripi, llapiripi catimunajun. ¿Shinachu: ‘¿Pita Ñucata tacarirca?’ nishpa tapujungui?” ninajurca.
46Ashtahuangarin Jesusca cashnami nirca:
“Maijanllari Ñucataca tacarircami. Ñucamanda ushai llujshishcata yachanimi” nirca.
47Chai huarmica, ña japi tucushpami, chujchurishpa Jesuspaj ñaupajpi cungurimurca. Paica, imamanda tacarishcatapash, imashna ñapash ali tucushcatapash, tucuitami gentecuna uyajta villajurca. 48Shina villajpimi Jesusca:
“Ñuca huahualla, can tucui shunguhuan crishcamandami, ali tucushcangui. Cunanga, cushijushpa rilla” nirca.
49Shina nijujpillatami, sinagogapi mandaj Jairopaj huasimanda, shuj runa shamushpaca:
“Yachachijtaca, ama ashtahuan fiñachijuichu. Cambaj ushica ña huañurcamari” nirca.
50Chashna ninajujta Jesús uyashpami, cashna nirca:
“Ama manllaichu. Tucui shunguhuan cri. Cambaj ushiguca causaringami” nirca.
51Chai huasiman yaicushpaca, pitapash Paihuan yaicuchunga na saquircachu. Pedrota, Jacobota, Juanda, chai cuitsagupaj taita, mamatallami Paihuan yaicuchun saquirca. 52Chai cuitsagumandaca, tucuicunami ninandapacha llaquirishpa huacanajurca. Ashtahuangarin Jesusca cashnami nirca:
“Na huacanachu canguichi. Paica na huañushcachu. Puñuitallami puñujun” nircami.
53Shina nijpimi huañushcatapacha yachashpa, Jesustaca asishpa ricunajurca. 54Ashtahuangarin Jesusca, maquita japishpami:
“Cuitsagu, jatari” nishpa, shinllita rimarca.
55Shina nijpimi chai cuitsagupaj alma tigramujpi, ñapash causarishpa jatarirca. Shina jatarijpimi:
“Micunaguta carapaichi” nishpa, Jesusca mandarca.
56Chai cuitsagupaj taitapash, mamapash ninandapachami manllarinajurca. Ashtahuangarin Jesusca:
“Pimambash cashna tucushcataca na villanachu canguichi” nishpami mandarca.
Currently Selected:
LUCAS 8: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
