LUCAS 7
7
Patsaj macanajuj runacunata mandajpajta rurajta Jesús alichishcamanda
(Mat. 8:5-13)
1Jesusca, Paita uyanajuj gentecunaman cai tucuita yachachishca jipami, Capernaúm puebloman yaicurca. 2Chaipica, patsaj macanajuj runacunata mandaj runapajta ruraj ninan juyashca huambragumi, ungushca ña huañunalla sirijurca. 3Jesusmanda parlanajujta uyashpami, chai mandaj runaca: “Ñucapajta ruraj huambraguta alichij shamupai” nigrichun, judiopuramanda mandaj huaquin ancianocunata cacharca. 4Jesuspajman paicuna chayamushpaca, “shamupai” nishpami cashna ninanda mañanajurca:
“Chai runagu mañajujtaca rurapailla. 5Chai runaguca, ñucanchi llactapi causajcunataca, ninandami llaquin. Sinagogatapash, paimi rurachirca” ninajurcami.
6Shina ninajujpimi Jesusca, paicunahuan rijurca. Ashtahuangarin ña huasiman chayagrijujpimi, mandaj runaca huaquin cumbacunata, cashna nigrichun Jesuspajman cacharca: “Apunchi Jesús, na yapa fiñachisha nipanichu. Ama ñuca huasiman chayajta shamupaichu. Jatun pingaipami capani. 7Shina cashpami, Cambajman shamuitaca na ushaparcani. ‘Ali tucui’ nishpa rimajpillata, ñucapajta ruraj huambraguca ali tucupangallami. 8Mandajcuna mandajpimi, ñucapash causajupani. Shinallatami ñucapash, macanajuj runacunataca mandajuni. Shuj runata: ‘Ri’ nijpica rinllami. Shinallata: ‘Shamui’ nijpipash, shamunllami. Ñucapajta rurajtapash: ‘Caita rurai’ nijpica, ruranllami” nigrichunmi cacharca.
9Shina nijta uyashpami Jesusca, ninanda cushijushpa paita catinajuj gentecunata tigrarishpa ricushpa, cashna nirca:
“Cangunataca cashnami nini: Israel llactapipash, cai runagushna alipacha crijtaca, shujtallapash na tarishcanichu” nircami.
10Shina nijpimi chai runacunaca, chai mandajpaj huasiman tigranajurca. Paicunaca, chai huambragutaca ña ali tucushcatami tuparirca.
Naín pueblopi causaj sapalla mamagupaj churitami Jesusca causachishca
11Chai jipami, Naín puebloman Jesusca rijurca. Paitaca, Paipaj yachajujcunapash, shuj gentecunapash, ashtacacunami cumbashpa rinajurca. 12Chai puebloman yaicuna punguman ña chayagrijushpaca, huañushcata pambangapa apashpa rinajujtami ñapash ricurca. Chai huañushca huambraguca, sapalla mamagupaj shujlla churigumi carca. Chai mamagutaca, chai pueblopi causanajuj ashtaca gentecunami cumbashpa rinajurca. 13Chai mamaguta Apunchi Jesús ricushpaca, ninanda llaquishpami:
“Ama huacaichu” nirca.
14Shina nishpalla, huañushcata churashca cajaman quimirishpa tacarijpimi, huandushpa rinajuj runacunaca shayarirca. Shina shayarijpimi, Jesusca:
“Huambragu, candami jatari nini” nirca.
15Shina nijpica, chai huambragu causarishpami tiyarishpa, rimai callarirca. Chai huambragutaca paipaj mamamanmi pushachun curca.
16Tucuicuna ninanda manllarishpami, cashna nishpa Taita Diosta ninanda alicachinajurca:
“Ñucanchipuramandami, ninan ushaita charij profeta llujshimushca. Taita Diosca, pai agllashcacunata ninanda llaquishpami ricuj shamushca” ninajurcami.
17Chashna rurashcataca, tucui Judea llactapi causajcunapash, chai tucuilla muyundi llactacunapi causajcunapash, tucuillami yachaj chayarca.
Bautizaj Juanga villajcunatami Jesuspajman cachashca
(Mat. 11:2-19)
18Tucui chaicunata Jesús rurajujtaca, Bautizaj Juanbaj yachajujcunami, Paiman villanajurca. Shina villajpimi Juanga, paipaj yachajujcunamanda ishcaipurata cayarca. 19Paicunataca, cashna nishpa tapuchunmi cacharca: “¿Canllu, ñucanchi shuyanajushca Cristo capangui? Na cashpaca, ¿shujtachu shuyapashun?” nichunmi cacharca. 20Paicuna Jesuspajman chayamushpaca, cashnami ninajurca:
“Bautizaj Juanmi, cashna tapuchun cachamupan: ‘¿Canllu, ñucanchi shuyanajushca Cristo capangui? Na cashpaca, ¿shujtachu shuyapashun?’ nishpa tapuchunmi cachamun” ninajurcami.
21Paicuna chaipi cajpillatami huañujujcunata, nanaicunahuanlla llaquinayaita causajcunata, aya jundashca gentecunata, ñausacunatapash ashtacacunata Jesusca alichijurca. 22Jesusca, Juan cachamushca runacunataca cashnami nirca:
“Canguna imata uyashcata, imata ricushcatapash, Juanman cashna nishpa villagrichi: ‘Ñausacunapash ricunajunmi. Jangacunapash purinajunmi. Lepra ungüihuan causajcunapash, ali tucunajunmi. Rinri na uyajcunapash uyanajunmi. Huañushcacunatapash causachijunmi. Imagutapash na charijcunamambash, na uyashca villaitami villajun’ nigrichi. 23Ñucata crishpa na pandajcunaca, ninandami cushijunga” nircami.
24Juan cachamushca runacuna rijpimi, Jesusca gentecunaman Juanmanda cashna villai callarirca: “Jichushca pambapica, ¿imata ricungapata llujshircanguichi? Sucusta huaira cuyuchijujta, ¿ricungapachu rircanguichi? 25Shina cashpaca, ¿imata ricungapata llujshircanguichi? ¿Juyailla churajushca runatachu ricungapa rircanguichi? Ricuichi, juyailla churajunata churajushpa ninanda cushijujcunaca, jatun mandajcunapaj huasicunapimi causanajun. 26Ashtahuanga, ¿imatata ricungapa rircanguichi? ¿Profetata ricungapachu rircanguichi? Ari, cangunataca cashnami nini: Cangunaca, profetatapash yalitami ricungapa rircanguichi. 27Juanmandaca, cashna nishpa quilcashcami tiyajun:
‘Ricui, ñucamanda villajtaca, canda ñaupashpa rishpa,
can purina ñanda punda alichijuchunmi cachamugrini’ nijunmi.
28Cangunataca cashnami nini: Huarmimanda huacharishca jaricunaca, Bautizaj Juanda yali, ali profetaca na tiyanllu. Ashtahuangarin, tucuita yali uchillashna causaj runagumi, Taita Dios mandajuj llactapica, Juandaca ashtahuan yali canga” nircami.
29Shina villajujpimi, chai tucuilla gentecunapash, impuestota japishpa causanajujcunapash, Taita Diostaca: “Canga, alitallami rurapashcangui” ninajurca. Chaimi paicunaca, Juan bautizashcata catishpa bautizarinajurca. 30Ashtahuangarin fariseocunahuan, mandashca shimita yachachijcunahuanga, Juan bautizajujpi na bautizarishpami, paicunaman Taita Dios aliguta rurangapa munashcataca, yangapi churanajurca. 31Apunchi Jesusca, cashnatapashmi nirca: “Cunan punllapi causajcunataca, ¿imahuanda chimbapurashpa yarichisha? ¿Paicunaca, imashnata causanajun? 32Huahuacuna tandanajushpa plazacunapi tiyarishpa, caishuj chaishuj caparishpa pugllanajunshnami causanajun. Paicunaca, cashna nishpami caparinajun: ‘Cangunaca gaitajpipash, na tushushpami purircanguichi. Llaqui llaquita taquijpipash, na huacashpami purircanguichi’ ninajunmi. 33Bautizaj Juan shamushpaca, tandatapash na micushpa, vinotapash na ufiashpami purijurca. Shina cajpimi paitaca: ‘Aya jundashcami’ ninajunguichi. 34Runa Aichayuj tucushca Ñuca shamushpaca, micunatapash micushpa, vinotapash ufiashpami purijuni. Chaimandami cashna nihuanguichi: ‘Cai runaca yapata micujmi, vinotapash ufiajmi. Impuestota japishpa causajcunahuan, juchata rurajcunahuanmi tandanajun’ nihuanguichimi. 35Ashtahuangarin Diospaj jatun yachaitaca, imatapash alicunata rurashpami ricuchina” nircami.
Jesusca, Simón shuti fariseopaj huasipi cashcamanda
36Shuj fariseo runami, Jesustaca: “Ñuca huasigupi micungapa ripashun” nirca. Chai fariseopaj huasiman Jesús chayashpaca, micungapa tiyarircallami. 37Chai fariseopaj huasipi Jesús micujujta yachashpami, shuj huarmica alabastro uchilla fundugupi, mishquilla ashnajun yacuguta apashpa shamurca. Chai huarmica, chai pueblopi juchata rurashpa causaj huarmimi carca. 38Paica, Jesuspaj chaquiman quimirishpami, huacashpa tiyarirca. Paica viquihuan maillachishpami, ajchahuan fichachishpa, chaquita muchajurca. Shinallata, mishquilla ashnajun yacuguta talishpami, Jesuspaj chaquipi javichijurca. 39Micunata carangapa pushaj fariseo ricushpaca, cashnami yajurca: “Profeta cashpaca, imashna causaj huarmi Paipaj chaquita tacarijujtapash yachanmanmi. Chai huarmica, juchata rurashpamari causan” yajurcami. 40Shinamandami Jesusca cashna nirca:
“Simón, candaca caitami ningapa munani”,
nijpimi:
“Villahuailla, Yachachij” nircami.
41Shina nijpimi Jesusca cashna nirca:
“Culquita mañachij runami, ishcaipura runacunaman mañachishcata charirca. Shuj runaca, picha patsaj denario culquita, shuj runaca picha chunga denario culquitami nara tigrachishca carca. 42Imagutapash na tigrachi ushashpa purijpimi, culquita mañachij runaguca, ishcanditallata ‘saquinguichilla’ nirca. Shina saquijpica, chai ishcaipura runacunamandaca, ¿maijanda ashtahuan juyashcanga?” nishpami tapurca.
43Shina tapujpimi, Simonga:
“Culquita yapalla mañaj runagumi, ‘saquilla’ nijpica, ashtahuan juyashcanga yanimi” nirca.
Shina nijpimi, Jesusca:
“Aliguta yarishpami shina tigrachingui” nirca.
44Shina nishpallami, chai huarmita tigrarishpa ricushpaca, Simonda cashna nirca:
“Cai huarmi, cunan imata rurajujta ricunguimi. Paica, viquihuan ñuca chaquita maillachishpaca, ajchahuanmi fichachihuan. Ashtahuangarin, cambaj huasiman ñuca yaicumujpica, chaquita maillachun yacutallapash, na carahuarcanguichu. 45Canga, Ñucata mingachishpapash, na muchahuarcanguichu. Ashtahuangarin cai huarmica, Ñuca yaicumushpa tiyarishcamandapacha, Ñuca chaquita muchanataca na shaijunllu. 46Canga, aceitetallapash Ñuca umapica na talishpa javihuarcanguichu. Ashtahuangarin cai huarmica, mishquilla ashnajun yacuguta Ñuca chaquipi talishpami javihuarca. 47Chaimi candaca cashna nini: Juchacunata cai huarmi ninanda rurashcapash, Ñucata ninanda juyashpa llaquishcamandami, ña anchuchi tucushca. Ashtahuangarin, ashalla juchacunata anchuchi tucushcacunaca, ashallatami juyahuan” nircami.
48Shina nishpami Jesusca, chai huarmitaca:
“Cambaj juchacunataca, ñami perdonashca cangui” nirca.
49Shina nijpimi Jesushuan mezapi tiyanajuj runacunaca:
“Paica, ¿ima cashpata juchacunata anchuchingalla?” nirinajurca.
50Ashtahuangarin Jesusca, chai huarmitaca cashnami nirca:
“Canga, crishcamandami quishpirishca cangui. Cunanga, shungupi cushijushpa rilla” nircami.
Currently Selected:
LUCAS 7: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
