LUCAS 5

Jesús mandajpimi ashtaca pijicunata japi ushanajushca

(Mat. 4:18-22; Mar. 1:16-20)

1Genesaret cucha manñapimi Jesusca, Diospaj Shimita villajurca. Shina villajujta uyangapami, ashtaca gentecuna llapiripi jundamurca. 2Chai cucha manñamanda llujshimunapica, ishcai barcocunami shayanajurca. Chaipimi, pijita japij ishcai runacuna barcomanda uriajushpa, paicunapaj linllicunata tajshanajurca. 3Jesusca, Simonbaj barcoman yaicushpami: “Cai manñamanda ashaguta junduman suchuchipai” nirca. Paica, chai barcopi tiyarishpami ashtaca gentecunaman yachachijurca. 4Ña villaita tucuchishpallami, Simondaca:

“Ashtahuan junduman yaicushpa, pijicunata japingapa linllicunata shitagrichi” nirca.

5Shina nijpimi Simonga:

“Yachachij, ñucanchica tucui tutami pijicunata mascanajushca pacaripanchi. Ashtahuangarin shuj pijitallapash na tarishpami punllayarcanchi. Cunanga, Can mandajpillami linllita shitagripani” nirca.

6Shina nishpa shitanhuan pijicuna jundajpimi linllipash ñalla liquirirca. 7Shina tucujpimi, shuj barcopi purinajuj cumbacunata, yanapaj shamuichi nishpa maquihuan cayanajurca. Shinami ishcandi barcopi ñalla huashajujta jundachirca. 8Chaita Simón Pedro ricushpaca Jesuspaj ñaupajpi cungurishpami, cashna nirca:

“Juchayu runamari capani, ñuca ñaupajmanda anchuripai, Apunchi Jesús” nijurcami.

9Paicunaca, ashtaca pijicunata japishpami, Simón Pedropash, paipaj cumbacunapash ninan manllaihuan carca. 10Zebedeopaj churicunaca Jacobopash, Juanbashmi, Simonbaj cumbacuna carca. Paicunapash manllarijpimi Jesusca, Simonda cashna nirca:

“Ama manllaichu. Canga, cunanmandapachami pijita japijshna, gentecunata tandachishpa causangui” nirca.

11Canoacunata alpaman llujchimushpaca, tucuita saquishpami, Jesusta catishpa rinajurca.

Lepra ungüihuan runatami Jesusca alichishca

(Mat. 8:1-4; Mar. 1:40-45)

12Shuj pueblopi Jesús purijujpimi lepra ungüihuan jundashca runa chayamurca. Paica Jesuspaj ñaupajpi cungurishpami alpaman chayajta cumurishpa, “ñuca mapa ungüita nacha anchuchipanguiman” nishpa ninanda mañajurca.

13Shina nijpimi Jesusca, maquita chutashpa chai runataca tacarirca. Shina tacarishpami:

“Ari, mapa illaj cachun ninimi” nirca.

Shina nijpimi chai lepra ungüica, chai runamandaca ñapash anchurirca. 14Shina alichishpami Jesusca:

“Ñuca alichishcataca pimambash ama villanguichu” nishpa mandarca. “Ashtahuangarin, sacerdotepajman rishpa can ali tucushcata ricuchigri. Shinallata, Moisés mandashcashna ofrendacunata apashpa tucuicuna yachachun ringui” nijurcami.

15Ashtahuangarin, Jesús alichishcata yachaj chayashpami, gentecunaca ninanda tandanajushpa uyangapa rinajurca. Shinallata, huañujujcunapash, ali tucungapa munashpami rinajurca. 16Ashtahuangarin, Jesusca anchurishpa rishpami, jichushca pambacunapi Taita Diosta mañajurca.

Na cuyuri ushajuj runatami Jesusca alichishca

(Mat. 9:1-8; Mar. 2:1-12)

17Ashtahuangarin, shuj punlla yachachijujpimi, fariseocunapash, mandashca shimita yachachijcunapash uyangapa shamushca tiyanajurca. Paicunaca, Galilea muyundi llactacunamanda, Judea muyundi llactacunamanda, Jerusalén pueblo muyundi llactacunamanda shamushcami carca. Jatun Diospaj ninan ushaihuanmi huañujujcunata Jesusca alichijurca. 18Chaimanmi huaquin runacunaca, na cuyuri ushajuj runaguta, pai sirijushcapillata apamunajurca. Paicunaca, huasi ucuman yaicushpa, Jesuspaj ñaupajpi churangapami munarca. 19Shina munashpapash, ashtaca gentecuna jundariyajpimi, maita yaicuitapash na usharca. Chaimandami huasi jahuaman aisarishpa, tejacunata pascashpa, chai na cuyuri ushajuj runataca, pai sirijushcapillata apashpa, gentecunapaj chaupipi, Jesuspaj ñaupajman uriajuchirca. 20Tucui shunguhuan crishpa paicuna shamushcata Jesús ricushpami, cashna nirca:

“Runagu, cambaj juchacunataca ñami anchuchishca cangui” nirca.

21Shina nijpimi mandashca Shimita yachachijcunapash, fariseocunapash, paicunapaj shungu ucupilla cashna ninajurca: “¿Cai runaca Diosta na ali shimicunata rimajchu, imatayari? Diosllamari juchacunataca anchuchi ushan” ninajurca. 22Chashna yarinajujta Jesús yachashpami, cashna nirca:

“¿Imashpata cangunapaj shungupica, chashnatara yarinajunguichi? 23Cai runagutaca: ‘Cambaj juchacunataca, ñami anchuchishca’ ¿ninachu ali? na cashpaca: ‘Jatarishpa rilla’, ¿ninachu ashtahuan ali canga? 24Runa Aichayuj tucushca Ñucataca, juchacunata anchuchi ushachunmi cai pachaman, Taita Diosca cachamuhuarca. Chaita yachachunmi” (chai na cuyuri ushajuj runataca):

“Jatarishpa, can sirijushcacunata apashpa huasiman rilla” nirca. 25Shina nijhuan jatarishpami tucuicuna ricunajujpi, paipaj sirijushcata apashpa Jatun Diostaca alicachishpandi rijurca. 26Chaita ricushpami, gentecunaca tucuilla manllarishpa, Taita Diostaca ninanda alicachinajurca. Ninandapacha manllarishpami: “Cunan punllamari, cashna juyaillataca ricunchi” ninajurca.

Leví shuti runata cayashcamanda

(Mat. 9:9-13; Mar. 2:13-17)

27Chai jipa llujshishpa rijushpami, impuestota japishpa causaj Leví shuti runata Jesusca ricurca. Paitaca, impuestota japij huasipi tiyajujpimi, “Ñucata catihuai” nirca.

28Shina nijpica, tucuita saquishpa jatarishpami, catishpa rirca. 29Leví runaca, paipaj huasipimi, jatun micuita rurarca. Chai huasipica, impuestota japishpa causaj ashtaca cumbacunapash, shuj gentecunapashmi, paicunahuan tandanajushpa micungapa tiyarirca. 30Shina tiyanajujpimi fariseocunapash, mandashca Shimita yachachijcunapash, Jesuspaj yachajujcunataca ninanda na alicachishpa, cashna ninajurca:

“¿Imashpata impuestota japishpa causajcunahuan, juchayuj runacunahuan micushpa, ufiashpa tiyanajunguichi?” ninajurcami.

31Shina ninajujpimi Jesusca, paicunataca cashna nirca:

“Nanaita na charijunaca, jambij runataca na mascanllu. Huañunajuj gentecunallami mascan. 32Alitalla rurajcunata cayangapaca na shamurcanichu. Ashtahuangarin, juchayuj gentecuna ninanda llaquirishpa Diospajman tigrarichun cayangapami shamurcani” nircami.

Na micushpa Diosta mañanamandami tapushca

(Mat. 9:14-17; Mar. 2:18-22)

33Paicunallatami cashna ninajurca:

“Bautizaj Juanbaj yachajujcunapash, fariseocunapaj yachajujcunapash, tauca punllacunatami na micushpa, Diosta mañashpa chishanajun. Ashtahuangarin ¿imashpata Cambaj yachajujcunaca, micushpa, ufiashpa tiyanajun?” ninajurcami.

34Shina nijpimi Jesusca cashna nirca:

“¿Boda huasipica, cazarajuj noviota cumbashpa tiyanajujcunataca, na micushpa chishapaichi ni ushanguichimanllu? 35Ashtahuangarin, cusata apana punllacunaca chayamungami. Chai punllacunami na micushpa chishanajunga” nircami.

36Cashnatapashmi chimbapurashpa yachachijurca:

“Pipash mushuj churajunata rutushpaca, na mauca churajunataca siranllu. Shina rurajpica, mushuj churajunapash huaglingami. Shinallata, chai mauca churajunapi mushujta sirashcapash, napacha ali ricurinllu. 37Shinallata, chaira rurashca vinotaca, mauca cara muchilapica pipash na churanllu. Chashna rurajpica, chaira rurashca vinoca muchilata liquishpa jicharishpami, muchilandi tucuringa. 38Ashtahuangarin chaira rurashca vinotaca, mushuj cara muchilapimi churana. Shina rurajpica vinopash, muchilapash na huaglishpa tiyajungallami. 39Fucushca vinota ufiajcunaca, chaira rurashca vinotaca na munanllu. Paicunaca: ‘Fucushca vinomari ashtahuan ali’ nishpami, chashna na munan” nircami.

Currently Selected:

LUCAS 5: QVI16

Highlight

Copy