LUCAS 4
4
Jesustami, diabloca pandachingapa munashca
(Mat. 4:1-11; Mar. 1:12-13)
1Jesusca, Jucha Illaj Diospaj Espíritu junda, Jordán jatun yacumanda tigrajujujpimi, Diospaj Espirituca jichushca pambaman pusharca. 2Chuscu chunga punllacaman chaipi cajpimi diabloca, Jesusta pandachingapa shamurca. Chai punllacunapica, imatapash na micushca cashpami, ninanda yarjachijurca. 3Shina cajpimi diabloca, cashna nirca:
“Taita Diospaj Churipacha cashpaca, cai rumita ‘tandaman tigrai’ ni” nirca.
4Shina nijpimi Jesusca cashna nirca:
“Quilcashcapica cashnami nijun: ‘Gentecunaca, na tandahuanlla causangachu. Ashtahuangarin Taita Diospaj Shimicunahuanmi causanga’ nijunmi” nirca.
5Chai jipami diabloca, Jesustaca jatun urcu jahuaman aparca. Chai jahuamandami, cai pachapi mandashpa tiyanajuj tucui llactacunata, ñapash ricuchirca. 6Shina ricuchishpami diabloca, cashna nirca:
“Canmanmi mandana ninan ushaitapash, tucui llactacunapi ninanda alicachi tucushpa tiyajunatapash cusha. Chaicunata mandajuchunga, ñucamanmi saquirca. Chaitaca, piman cungapa munashpapash cushallami. 7Ñucata, Can cungurishpa mañajpica, tucuillatami Canman cusha” nijurcami.
8Shina nijpimi Jesusca, cashna nirca:
“Satanás, Ñuca ñaupajmanda anchuri. Quilcashcapica cashnami nijun: ‘Canda Mandaj Taita Diostalla cungurishpa mañangui. Paipajtalla rurashpa causangui’ nijunmi” nircami.
9Chai jipami, Jerusalenman pusharca. Chaipica, Diospaj huasi jahua umaman apashpami, cashna nirca:
“Taita Diospaj Churipacha cashpaca, caimanda ucuman urmai. 10Quilcashcapica cashnami nijun:
‘Canda ricuchunga Taita Diosmi, Paipaj angelcunata cachamunga.
11Paicunami, Can ama rumipi nitijachumbash, maquipi charinajunga’ nijunmi” nirca.
12Shina nijpimi Jesusca, cashna nirca:
“Cashnatapashmi nijun: ‘Canda Mandaj Taita Diostaca, ama can munashcata rurachun mandanguichu’ nijunmi” nirca.
13Chashna na ali yuyaita cungapa munajushca jipami diabloca, asha punllacunata Jesusta saquishpa rirca.
Jesús, Diospajta rurai callarishcamanda
(Mat. 4:12-17; Mar. 1:14-15)
14Jesusca, Diospaj Espiritupaj ushaihuan pushajpimi, Galilea llactaman tigrarca. Pai chaiman tigrashcataca, tucuilla muyundi llactacunapimi yachaj chayarca. 15Paicunapaj sinagogacunapi yachachishpa purijurca. Shina yachachijujpimi Jesustaca, tucuicuna ninanda alicachinajurca.
Jesús Nazaretpi cashcamanda
(Mat. 13:53-58; Mar. 6:1-6)
16Jesusca, Pai maipi viñashca Nazaret pueblomanmi shamurca. Samana punlla chayajpica, sinagogaman rinapacha cashcamandami, chaiman yaicurca. Chaipimi, Diospaj Shimita quilca catingapa shayarirca. 17Shina shayajujpimi, profeta Isaías quilcashpa pillushcata quilca catichun curca. Chaita pascashpaca, cashna quilcashcatami tarirca:
18“Jatun Diospaj Espiritumi, Ñucapi causajun.
Huajchacunaman, quishpirinamanda ali villanata villachunmi,
Taita Diosca aceitehuan javihuarca.
Shungu junda llaquirishpa causajcunatapash, cushichijuchunmi cachamuhuarca.
Prezui tucushcashna causajcunamambash, cacharinamanda villachunmi cachamuhuarca.
Ñausacunata alichijuchun,
ninanda llaquichi tucushpa causajcunatapash, cacharichijuchunmi cachamuhuarca.
19Jatun Dios quishpichina huata chayamushcata,
villachumbashmi cachamuhuarca” nircami.
20Chai quilcashcata pillushpami, alichij runaman tigrachishpa, tiyarirca. Chai sinagoga ucupi gentecunaca, tucuillami Jesustalla ricurianajurca. 21Shina ricunajujpimi, cashna nishpa villai callarirca:
“Dios quilcachishca Shimipi chashna nijushcacunaca, cunan cangunapaj ñaupajpimi pactamushca” nircami.
22Tucuicunami Jesustaca alicachishpa ricunajurca. Tucuita juyailla yachachijujpimi, Paitaca chashna alicachinajurca. Paicunaca:
“Cai runaca, ¿nachu Josepaj churiyari?” ninajurcami.
23Shina nijpimi Jesusca cashna nijurca:
“Cangunaca, maijanguna nishcashnaca: ‘Jambij runa, pundaca, Canllata jambiriyari’ nihuanguichimi. Shinallata: ‘Capernaúm pueblopi imatalla rurashcatapash uyarcanchimi. Chashnallata cai cambaj llactapipash rurayari’ nihuanguichimi” nircami.
24Ashtahuan cashnatapash nircami:
“Na llullashpami cashna nini: Maijan profetatapash, chai llactamandallata cajpipash, na ali chasquinllu. 25Cashnatapash, na llullashpami nini: Elías causajui punllacunapica, ashtaca sapalla huarmicunami, cai Israel llactapica tiyarca. Chai punllacunapica, quimsa huata chaupicaman na tamiajpimi, tucui cai llactapi causajcunapajca ninan yarjai tiyarca. 26Shina cajpipash Eliastaca, maijan chai sapalla huarmicunata yanapachunga na cachamurcachu. Ashtahuangarin, Sidón llactapi tiyaj Sarepta pueblopi causajuj sapalla huarmiguta yanapachunmi cachamurca. 27Shinallatami, profeta Eliseo causajui punllacunapipash, lepra ungüihuan huañujujcunaca, ashtacacuna cai Israel llactapica tiyarca. Chaicunataca, shujllatapash na alichircachu. Ashtahuangarin, Siria llactamanda Naamán shuti runatallami alichirca” nircami.
28Shina nishpa villajujta uyashpaca, chai sinagogapi tucuilla gentecunami, Jesusta ninanda fiñarca. 29Chai gentecuna jatarishpami, pueblomanda llujchishpa paicuna causanajun pueblo urcu pundaman apanajurca. Chaimanda ucuman shitashpa huañuchingapami chashna apanajurca. 30Ashtahuangarin paicunapaj chaupitallatami, Jesusca llujshishpa rirca.
Aya jundashca runatami Jesusca alichishca
(Mar. 1:21-28)
31Jesusca, Galilea llactapi tiyaj Capernaúm puebloman urai rishpami, samana punllacunapi yachachijurca. 32Ninan ushaihuan yachachijujpimi, gentecunaca tucuicuna manllarinajurca.
33Sinagoga ucupica, mapa aya jundashca runami tiyajurca. Chai runami ninanda caparishpa, 34cashna nirca:
“Nazaret pueblomanda Jesús, ñucanchitaca Saquihuailla. ¿Imapata ñucanchitaca fiñachingapa shamungui? ¿Ñucanchita tucuchingapachu shamurcangui? Candaca, rijsinipachami. Canga, Taita Dios cachamushca Jucha Illajmari cangui” nircami.
35Shina nijpimi Jesusca, chai ayataca cashna nirca.
“¡Upallai, cai runamanda llujshi!” nishpami shinllita rimarca.
Shina rimajpimi chai runataca, tucuicunapaj ñaupajpi shitashpa, ayaca llujshirca. Shina shitashpapash, na imata llaquichircachu. 36Chaita ricushpami, gentecunaca ninanda manllarishpa, caishuj chaishuj cashna nishpa rimarinajurca:
“Cai runaca, ¿imashpata chashna rimai ushanlla? Mapa ayacunata ninan ushaihuan rimajpica, llujshinllamari” ninajurcami.
37Jesús chashna rurashcataca, chai tucuilla muyundi llactacunapimi yachanajurca.
Pedropaj suegratami, Jesusca alichishca
(Mat. 8:14-15; Mar. 1:29-31)
38Jesusca, sinagogamanda llujshishpaca, Simonbaj huasimanmi yaicurca. Chaipica, Simonbaj huarmipaj mamami tabardillo ungüihuan huañujurca. Shina huañujujpimi, “alichipai” nishpa ninanda mañanajurca. 39Jesusca quimirishpami, tabardillo ungüica yalichun shinllita rimarca. Shina rimajpi, tabardillo ungüi yalijpica, micunata carajurca.
Indi ña huashajugrijujpimi, huañujujcunata alichishca
40Indi ña huashajunalla cajpimi, shuj shuj nanaicunahuan huañujujcunata, Jesuspajman apamunajurca. Chai huañujujcunapaj umapi maquita churashpami, Jesusca alichijurca. 41Ayacunaca caparishpami:
“Canga, Taita Diospaj Churimari cangui” nishpa, chai gentecunamandaca llujshishpa rinajurca.
Cristo cajta rijsijpimi, Jesusca shinllita rimashpami, ayacuna rimachunga na saquirca.
Galilea llactapimi Jesusca villashpa purijushca
(Mar. 1:35-39)
42Ña punllayajujpimi, Jesusca chai pueblomanda llujshishpa, jichushca pambaman rirca. Gentecunaca, Jesusta mascagrishpa tuparishpami, “caimandaca ama ripaichu” nishpa jarcanajurca.
43Ashtahuangarin Jesusca cashnami nirca:
“Taita Dios mandajuj llactamanda ali villanataca, shuj pueblocunapipash villanami cani. Shina villachunmi, Ñucataca cachamuhuarca” nircami.
44Shina nishpami, Galilea llacta sinagogacunapi Jesusca villashpa purijurca.
Currently Selected:
LUCAS 4: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
