LUCAS 2

Jesucristo huacharishcamanda

(Mat. 1:18-25)

1Chai punllacunapica, cashnami tucurca: Augusto César jatun mandajca, tucui gentecuna paicunapaj shuticunata quilcachinajuchunmi, shuj mandashpa quilcashcata cachashpa villachijurca. 2Siria llactata, Cirenio shuti runa mandajujpimi, mashna gentecuna tiyashcata yachangapa yupashpa punda callarirca. 3Tucui gentecunami, shuticunata quilcachingapa, paicunapaj llactacunaman rinajurca. 4Joseca, Galilea llactapi tiyaj Nazaret pueblomandami, Judea llactaman vichai rijurca. Paica, David huacharishca Belén pueblomanmi rirca. Joseca, Davidpaj ayllupura cashpami, chaiman rina tucurca. 5Joseca, paihuan cazarana Mariandimi shuticunata quilcachingapa rijurca. Mariaca vijsayuj, ungunallami carca. 6Paicuna chaiman chayajpimi, unguna punlla pactarca. 7Chaimandami paipaj punda jari huahuaguta ungushpaca, finduguhuan pilluchishpa, animalcuna micuchun churanapi sirichirca. Paicuna mingarishpa puñuna ucu illajpimi chaipi ungurca.

Michij runacunaman angelcuna villashcamanda

8Chai muyundi llactapimi michijcunaca, llamacunata ricushpa pacarinajurca. 9Chaipimi, Jatun Diospaj shuj angelca, paicunaman ñapash ricurimurca. Jatun Diospaj punchapambagumi, paicunapaj muyundipi punchayachijurca. Chaita ricushpami michijcunaca, ninanda manllarinajurca. 10Shina cajpimi angelca cashna nirca: “Na manllarinachu canguichi. Ricuichi, tucui gentecuna ninanda cushijuna, na uyashca ali villanatami villaj shamuni. 11David huacharishca pueblopimi, shuj Quishpichij cunan huacharishca. Paica Jatun Mandaj CRISTOMI. 12Caitami, cangunaman ricuchina carca. Paica animalcuna micuchun churanapimi, finduguhuan pillushca sirijunga” nircami.

13Ashtahuangarin, jahua pachamanda ashtaca angelcuna shamushpami, chai angelhuan pacta ñapash ricurirca. Paicunami, Taita Diosta cashna nishpa alicachinajurca:

14“¡‘Jahua pachapi Taita Diosca,

punchapambagumi cangui’ ni tucushca cachun!

¡Alpapi causaj gentecunapash, shungupi llaqui illaj causaitapash,

Diospaj ali munaitapash charichun!” ninajurcami.

15Chai angelcuna, paicunapaj ñaupajmanda, jahua pachaman tigranhuanmi cashna tucurca: Chai michijcunaca, caishuj chaishujmi cashna ninajurca:

“Cashna tucushcata Jatun Dios ñucanchiman villashcata ricungapa, Belén puebloman jacuchi” ninajurcami.

16Paicunaca, ucha rishpami Mariatapash, Josetapash chaipi tuparirca. Huahuagutaca, animalcuna micuchun churana jahuapi sirijujtami tarigrirca. 17Huahuaguta ricushpami, chai huahuamanda paicunaman imatalla nishcata villanajurca. 18Michijcuna chashna villanajujpica, tucui uyajcunami manllarinajurca. 19Ashtahuangarin Mariaca, tucui chai villashcacunataca aligutapacha yarishpami, paipaj shungupilla huacaichijurca. 20Paicunaman ángel villashcashna, tucuita uyashpa ricushpami chai michijcunaca, Taita Diostaca “punchapambagumi cangui” nishpa, alicachishpa tigranajurca.

Diospaj huasipi huahua Jesusta Diosman mingashcamanda

21Pusaj punlla pactajpimi huahuagutaca, circuncisionda rurarca. Nara vijsayuj tucujpillata, Mariaman ángel nishcashnami, chai huahuagutaca, JESÚS shutita shutichirca.

22Moisés mandashcapi nishcashnami, Diospaj ñaupajpi paicuna mapa illaj cana punlla pactarca. Chaimandami huahuagutaca, Jatun Diosman mingangapa, Jerusalenman apamunajurca. 23(“Punda jari huahuaguta ungujpica, Jatun Diospajlla causachun shicanyachinami canguichi” nishpami, Jatun Diosca mandashpa quilcachirca). 24“Ishcai urpiguta, na cashpaca ishcai palomaguta cashpapash apamuchun” nishpami, Jatun Diosca mandashca carca. Chai nijujshnallatami, Diosman cushpa huañuchinajuchun, apashpa rinajurca. 25Chai punllacunapica, Simeón shuti runagumi, Jerusalenbi causajurca. Paica, alitalla ruraj, Diosta yariashpa causaj cashpami, Israelcunapaj cushijui tiyanata shuyajurca. 26Paimanmi, Jucha Illaj Diospaj Espirituca: “Jatun Dios, aceiteta talishpa javishca Quishpichijta nara ricushpaca, na huañunguichu” nishca carca. 27Diospaj Espíritu yarichijpimi, Diospaj huasiman shamurca. Moisés mandashcata pactachingapami, Diospaj huasiman huahua Jesusta apashpa, taitandi, mamandi paipajman chayamunajurca. 28Simeonga, chai huahuaguta paipaj rigrapi japishpami, Taita Diostaca ninanda alicachijurca:

29“Jatun Dioslla, Can nishcashnallata, cunanga,

Cambajta ruraj ñucataca, shungupi cushijuihuan huañuchun saquihuailla.

30Ñuca ñavihuanmi Quishpichijtaca,

Can cachamushcata, ricuparcani.

31Paitaca, tucui gentecuna ricuchunmi cachamupashcangui.

32Na Israelcunataca michashnami punchayachinga.

Can agllashca Israelcunataca, Canmi Mandangui” nircami.

33Huahua Jesusmanda chashna tucuita nijpimi Josendi, huahuagupaj mamandi manllarishpa uyanajurca. 34Simeonga, paicunata bendiciashpami, Jesuspaj mama Mariataca cashna nirca:

“Cai huahuagutaca, ashtaca Israelcuna chingagrichun, na cashpaca quishpirichunmi, Taita Diosca cachamushca. Diospajlla causanata yachajujpimi, taucacuna Paitaca fiñanga. 35Paimi ashtacacuna paicunapaj shungupi imata yarinajujta yachanga. (Cambaj shungupica, espadahuan tujsijpishnami, ninanda llaquiringui)” nircami.

36Shinallata, Ana shuti profeta huarmipashmi, chaipi carca. Paica, Aser shuti ayllupura, Fanuel shuti runapaj ushimi carca. Paica, chaira viñai cuitsagu cazarashca cashpapash, canchis huatacamanllami cusayuj causarca. 37Shina cashpapash paica, pusaj chunga chuscu huatatami sapalla causajurca. Paica, Diospaj huasi ucumandaca, llujshitapash na llujshishpami, Diospajta rurashpa tutandi punllandi na micushpa Diosta mañashpa causajurca. 38Paica, chai huahuagumanda villajujpi chayamushpami, Taita Diosta pashi nijurca. Chai huahua Jesusmandaca, Jerusalenbi causajcuna quishpiringapa shuyanajuj tucui gentecunamanmi villajurca.

Nazaret puebloman tigrashcamanda

39Jatun Dios mandashcata tucuita pactachishpami, paicuna causanajushca Galilea llactapi tiyaj Nazaret puebloman tigranajurca. 40Chai huahuaguca, Taita Dios ninanda juyashpa Paihuan cajpimi, ashtahuan viñashpa, shinlli tucushpa, tucuita alipacha yachajushpa catijurca.

Jesusca, chaira viñai cashpami Diospaj huasipi cashca

41Jesuspaj taita, mamaca, Pascua punllacuna chayajpimi, huatandi Jerusalenman rinata yachaj carca. 42Jesusca, ña chunga ishcai huatata charijpimi, chai cushijui punllacunaman rinata yachan cashcashnallata Jerusalenman vichai rinajurca. 43Shinallata, chai cushijui punllacuna yalijpimi, huasiman tigranajurca. Ashtahuangarin Josepash, Jesuspaj mamapash na yachajtami Jesusca, Jerusalenbi saquirishca carca. 44“Gentecunapaj chaupipimi catimujunga” yashpami, shuj punlla chishangacaman rinajurca. Na ricurijpica, paicunapaj ayllucunata, cumbacunata tapushpami mascanajurca. 45Ashtahuangarin na tarishpallatami, Jerusalenman mascashpandi tigranajurca. 46Quimsa punllata mascashca jipami, Diospaj huasi ucupi, mandashca shimita yachachijcuna villajpi uyashpa, imatapash tapushpa, paicunapaj chaupipi tiyajujta tarigrirca. 47Paita tapujpica, aligutapacha yarishpa tigrachijpimi, tucuicuna manllarishpa uyanajurca. 48Chaipi tiyajujta ricushpaca, ninandami manllarinajurca. Shina ricushpami, paipaj mamaca cashna nirca:

“Ñuca huahualla, ¿imashpata ñucanchitaca cashna ninanda llaquichinguiyari? Taitandi ñucandimari, ninanda llaquirishpa mascashpa shamunchi” nircami.

49Shina nijpimi Jesusca cashna nirca:

“Ñucataca, na mascanachu carcanguichi. Ñuca Taitapajta ruranapacha cajtaca, ¿nachu yacharcanguichi?” nircami.

50Ashtahuangarin, imamanda chashna nijtapash paicunaca na yacharcachu. 51Paipaj taita, mamahuan Nazaret puebloman urai tigrashpapash, aliguta cazushpami causajurca. Tucui ima tucushcatapash, Paipaj mamaca na cungashpami, paipaj shungupilla huacaichijurca. 52Jesusca, aliguta yachajushpami, viñashpa catijurca. Shinallata, Taita Diospash, gentecunapash ninanda juyajpimi causajurca.

Currently Selected:

LUCAS 2: QVI16

Highlight

Copy