GÉNESIS 45
45
Joseca, huauquicunahuanmi rijsirishca
1Joseca ninandapacha llaquirishpa ña huacagrijushpami: “Ñuca ñaupajmanda tucuicunata llujchipaichi” nirca. Ña tucuicuna llujshijpimi, paipaj huauquicunahuanlla saquirishpa, paicunapaj huauqui cashcata villajurca. 2Shina rigsirishpami paica ninanda huacajurca. Chaitami Egiptopi causajcunapash, Faraonbaj huasipi causajcunapash yachaj chayarca. 3Shina cashpami Joseca, paipaj huauquicunataca:
“Ñucaca, Josemi cani. ¿Ñuca taitaca causajupanllu?” nirca.
Shina nijpimi paipaj huauquicunaca, ninanda manllarishpa imata nitapash na ushanajurca. 4Shinamandami Joseca, paipaj huauquicunataca:
“Ñucapajman quimirimuichi” nirca.
Shina nijpi paicuna quimirijpimi Joseca, cashna nirca:
“Ñucaca, canguna Egiptoman jatushpa cachamushca, cangunapaj huauqui Josemi cani. 5Cunanga na llaquirinachu canguichi. Ñucata caiman jatumushcamandapash, na fiñanajunachu canguichi. Tucuicuna causaita charichunmi, Taita Diosca ñucataca punda cachamuhuashca. 6Cai llactapica, ñami ishcai huatata yarjai punllacunapi canchi. Shina cajpipash, picha huatacaman yarjai tiyashpa catijpimi, tarpunapash, cozechanapash na tiyanga. 7Cai pachapi cangunapaj miraicunata causaihuan charingapami, Taita Diosca ñucataca punda cachamuhuashca. Shinallata, ninan ushaihuan causaita cungapami, chashna cachamuhuashca. 8Shinamandami, ñucataca na canguna caiman cachamuhuashcanguichi. Ashtahuangarin, Taita Diosmi Faraonbaj taitashna cachun, Faraonbaj huasipipash tucuita mandajuchun, tucui Egipto llactatapash mandajuchun churahuashca. 9Cunanga, ñuca taitapajman ucha rishpa, cashna nishpa villagripaichi: ‘Cambaj churi Josemi cashna nin: Taita Diosmi ñucataca tucui Egiptopi mandaj cachun churahuashca. Cunanga ñucapajman ucha shamuilla. 10Shamushpaca Gosén shuti alpapimi causangui. Shinami, cambash, cambaj churicunapash, cambaj churicunapaj huahuacunapash, ñucahuan caipi causanguichi. Shinallata, cambaj llamacunatapash, huagracunatapash, can tucui imatalla charishcacunatapash apashpa shamuichilla. 11Yarjai huatacunaca picha huata tiyanrami. Cangunamanga, ñucami imata cashpapash carashpa charisha. Cambash, cambaj huasi ucupurapash ali causaita charichunmi, ñuca ricushpa charisha. Can tucui ima charishcatapash, ñucami aliguta ricushpa charisha nijunmi’ nipaichi. 12Ñuca chashna rimajujtaca, cangunapash, ñuca huauqui Benjaminbashmi, ña ricunajunguichi. 13Egipto llactapi ñuca mandajujtapash, tucui imatalla canguna ricushcatapash, ñuca taitaman villagripaichi. Ucha rishpa, ñuca taitata caiman pushamugripaichi” nircami.
14Shina nishpami, paipaj huauqui Benjaminda ugllarishpa ishcandi huacanajurca. 15Tucuilla paipaj huauquicunatapash muchashpami, ugllarishpa huacarca. Chai jipami, paipaj huauquicunaca paihuan parlai ushanajurca.
16Shinallata, Josepaj huauquicuna shamushcatami, Faraonbaj huasipica yachaj chayarca. Chaita uyashpami, Faraonbash, paipajta rurajcunapash cushijunajurca. 17Shinamandami Faraonga, Josetaca cashna nirca:
“Cambaj huauquicunataca, cashna rurachun mandangui: ‘Cangunapaj animalcunapi granota apachishpa, Canaán llactaman tigraichi. 18Shinallata, cangunapaj taitatapash, tucuilla ayllucunatapash pushashpa, ñucapajman shamuichi. Cai Egipto llactapi imalla ali tiyashcata ñuca carajpimi, caipi tucui tiyashcata micushpa causanguichi’ ningui. 19Ashtahuambash, cashnatapash mandangui: ‘Cai Egipto llactamanda carretacunata apashpa, cangunapaj huahuacunata, huarmicunata, taitatapash pushashpa tigramugrichi’ nishpa mandangui. 20Canguna imatalla charishcacunata saquishpa shamushpapash, na llaquirinachu canguichi. Egipto llactapi imalla tiyashcacunapash, cangunapajmi canga” nircami.
21Shina nijpimi, taita Israelpaj churicunaca tucuita chashna ruranajurca. Joseca, Faraón imashna mandashcata rurashpami carretacunatapash, ñambi imata micuchumbash carashpa cacharca. 22Tucui paicunamanmi, mushuj churajunacunata carashpa cacharca. Benjaminmanga, quimsa patsaj culquitapash, mudarichun picha churajunatapashmi cararca. 23Paipaj taitamambash, caicunatami cacharca: Egiptopi ima ashtahuan ali tiyashcatami, chunga burrucunapi apachishpa cacharca. Shinallata, paipaj taita ñambi micuchumbash, chunga burrucunapimi, trigotapash, tandatapash, ashtahuan tucui micunacunatapash apachishpa cacharca. 24Paipaj huauquicunataca: “Ñanda rinajushpaca, na fiñanajunachu canguichi” nishpami, “cayacaman” nishpa cachajpi rinajurca. 25Paicunaca, Egipto llactamanda, Canaán llactaman vichai rishpami, paicunapaj taita Jacobpajman chayanajurca. 26Chaiman chayashpaca, cashna nishpami villanajurca: “Joseca causajushcamari, tucuilla Egipto llactatapash paimari mandajushca” ninajujpimi, Jacobca na chashnachu canga yashpa, shungu junda yarishpa llaquirijurca. 27Chaimandami paicunaca, tucui imatalla José parlashcata villanajurca. Jacobca, paita pushachun José cachamushca carretacunata ricushpami, ninanda cushijujurca. 28Shina cashpami taita Israelca cashna nirca: “Ñuca churi Joseca causajupashcamari. Cunanga, ñuca nara huañushpallata rishpami, paitaca ricugrisha” nijurcami.
Currently Selected:
GÉNESIS 45: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
