GÉNESIS 37

Josetaca paipaj huauquicunami jatushca

1Jacobca, paipaj taita Isaac maipi causashca Canaán llactapimi causajurca. 2Jacobpaj mirai ayllucuna imashna causashcatami cashna villan: Joseca chunga canchis huatata charishpami, paipaj huauquicunahuan llamacunata michishpa purirca. Chai huauquicunaca, Bilha shuti, Zilpa shuti, taita Jacobpaj huarmicunapaj churicunami carca. Joseca, paipaj huauquicuna na alita rurashpa purishcata yachaj chayashpami taitaman villarca. 3Taita Israel ña rucugu cashpa charishca churi cajpimi Josetaca, tucui paipaj churicunata yali ashtahuan juyaj carca. Shina juyashpami, juyailla lishta ahuashca, jahualla churajunata rurashpa cararca. 4Josepaj huauquicunaca, paipaj taitaca, Joseta ashtahuan yali juyajta ricushpami, na ricunayachishpa, rimaitapash na riman carca. 5Joseca shuj muscuita charishca cashpa, paipaj huauquicunaman villajujpimi, paitaca ashtahuan na ricunayachinajurca. 6Joseca cashna nishpami villajurca: “Uyaichi, cunanga cashnatami muscushcani: 7Pamba chaupipimi trigota huangunajushcanchij. Chaipimi ñuca huanguca jatarishpa ali shayarirca. Cangunapaj huangucunaca muyundimi ñuca huangu ñaupajpi cumurinajurca” nircami. 8Shina nijpimi paipaj huauquicunaca: “¿Canllu ñucanchita mandaj tucugringui, na cashpaca ñucanchita mandashpachu charigringui?” ninajurca. Pai muscushcata villajpimi ashtahuan na ricunayachinajurca. 9Joseca, cutinbash shuj muscuita charishpami paipaj huauquicunamanga: “Uyaichi, cutinmi shuj muscuita charircani. Chai muscuipica indipash, lunapash, chunga shuj luzerocunapash ñuca ñaupajpi cumurinajujtami muscurcani” nirca. 10Chaitaca paipaj taitaman, paipaj huauquicunaman villajpimi, paipaj taitaca, cashna nirca: “¿Imatata muscushcanguiyari? ¿Ñucapash, cambaj mamapash, cambaj huauquicunapashchu, cambaj ñaupajpi cunguringapa shamuna canchi?” nircami. 11Josepaj huauquicunaca paitaca ashtahuanmi fiñashpa ricunajurca. Ashtahuangarin paipaj taitaca, chai muscuita villashcataca aliguta yarishpami purijurca. 12Chai jipami Josepaj huauquicunaca, paicunapaj taitapaj llamacunataca, Siquem shuti pueblo pambacunapi michingapa rinajurca.

13Taita Israelca Josetaca cashnami nirca: “Cambaj huauquicunaca, Siquem shuti pueblo pambapimi michinajun. Candaca chaimanmi cachagrini” nirca. Shina nijpimi Joseca: “Shinaca rishallami” nirca. 14Taita Israelca cashnami nirca: “Cunanda rishpa cambaj huauquicunapash, llamacunapash imashna cajta ricushpa tigramugri” nircami. Hebrón pugru pambacunapi cashpa cachajpimi, Siquem shuti pueblo pambaman chayagrirca. 15Josetaca pambapi chingashca purijujta shuj runa tuparishpami: “¿Imatata mascangui?” nishpa tapurca. 16Shina nijpimi Joseca: “Ñuca huauquicunatami mascajupani. ¿Maipi michinajujtapash nachu ricupashcangui?” nirca. 17Shina nijpimi chai runaca: “Ñami caimandaca rishca. ‘Dotán puebloman jacuchi’ ninajujtami uyarcani” nirca. Shina nijpimi Joseca, paipaj huauquicunata catishpa rishpa, Dotán pueblo pambacunapi japigrirca. 18Paicunaca caruta shamujujta ricushpallatami, narapash paicunapajman chayajpillata, Josetaca huañuchingapa parlarinajurca. 19Paicunaca, caishuj chaishujmi cashna ninajurca: “Ricuichi, muscushpa causajca shamujunmi. 20Cunanga paita huañuchishpa, shuj jatun utujupi shitashunchi. Paitaca: ‘Imapash millai animalmi, micushcanga’ nishunchillami. Chai jipaca, pai muscushcacunaca imami tucun, ricushunchi” ninajurcami. 21Chashna ninajujta Rubén uyashpami, paipaj huauquicuna ama huañuchinajuchun yashpa: “Na huañuchinachu canchi” nirca. 22Rubenga, cashnami nijurca: “Ñucanchica, paipaj yahuartaca na jichanachu canchi. Paitaca yacuta tandachingapa rurashca, cai jichushca pambapi tiyaj utujupilla shitashunchi. Cangunapaj maquihuanga imatapash na ruranachu canguichi” nircami. Paipaj huauquicunapaj maquimanda Joseta cacharichishpa, paipaj taitapajman tigrachingapami chashna nijurca. 23Paipaj huauquicunapajman José chayagrijpica, juyailla lishta ahuashca churajunata, José jahualla churajushcatami llujchichinajurca. 24Chai jipami Josetaca, yacuta tandachingapa rurashca utujupi shitarca. Chai utujuca chaquishcami carca. 25Chai jipaca paicunaca micushpa tiyanajushpa vichai ricushpami, taucapura Ismaelita runacuna shamunajujta ricunajurca. Paicunaca, Galaad llactamandami shamunajurca. Paicunapaj camellocunaca, mishquilla ashnajun yacucunata, balsamocunata, mirracunatami aparishca, Egiptoman rinajurca. 26Chaimandami Judá runaca, paipaj huauquicunataca cashna nirca: “Ñucanchi huauquita huañuchishpa, na villashpa pacashpaca, ¿imatata tarina canchi? 27Paitaca, Ismaelitacunaman jatushpa cachashpami ñucanchi maquihuanga na llaquichishunchi. Paica ñucanchi huauqui, ñucanchi aichamari” nircami. Shina nijpimi paipaj huauquicunapash, pai nishcataca alicachinajurca. 28Randishpa, jatushpa purij Madián llacta gentecuna yalinajujpimi Josetaca, yacuta tandachingapa rurashca utujumanda llujchinajurca. Shina llujchishpa, ishcai chunga culquipaj Ismaelitacunaman jatujpimi, Josetaca Egiptoman aparca. 29Rubenga chai utujuman cutin tigrashpa Joseta chaipi na tarishpami, pai churajushcata pilarijurca. 30Paipaj huauquicunapajman tigrashpaca: “Huambraca illashcamari, cunanga ¿imata tucushayari?” nirca. 31Paicunaca, Josepaj jahualla churajunata japishpami shuj huahua chivota cungata cuchushpa, chai yahuarpi javinajurca. 32Shina rurashpami, juyailla lishta ahuashca jahualla churajunata paipaj taitapajman apashpa cashna ninajurca: “Caitami tarircanchi. Caica, ¿nachu cambaj churipaj jahualla churajuna imata?” ninajurcami. 33Jacobca chai churajunata rijsishpami cashna nijurca: “Cai churajunaca ñuca churipajmi capan. Paitaca, imapash millai animalmi micushcanga. Josetaca caita chaita fitishpamari tucuchipashcanga” nijurcami. 34Shinamandami Jacobca, pai churajushcacunata pilarishpa, cañamuta churajushpa, paipaj churimandaca tauca punllacunata llaquillapacha causajurca. 35Shina cajpimi paipaj churicunapash, ushicunapash, taita ama llaquilla cachun cushichingapa rinajurca. Ashtahuangarin Jacobca, ninan llaqui cashpami: “Seolpi ñuca churihuan tuparingapa ringacamanmi, cashna llaquilla churajunata churajushpa causajusha” nishpami huacajurca. 36Madián llactamanda runacunaca, Egipto llactapi Potifar shuti runamanmi Josetaca jaturca. Chai runaca macanajuj runacunata mandaj, Faraonbajta rurashpa causajmi carca.

Currently Selected:

GÉNESIS 37: QVI16

Highlight

Copy