GÉNESIS 38

Judamandapash, Tamarmandapash

1Chai huatacunami cashna tucurca: Judá shuti runaca, paipaj huauquicuna causanajuj pushtumanda rishpami, Adulam shuti pueblopi causajuj Hira shuti runapaj huasipi causagrirca. 2Chaipimi Judá runaca, cananeopura Súa shuti runapaj ushihuan cazarashpa, paihuan pacta causajurca. 3Chai huarmi vijsayu tucushpa, shuj jari huahuata charishpami, chai huahuataca Er shutita shutichirca. 4Cutin vijsayu tucushpa shuj jari huahuata charishpami, chai huahuataca Onán shutita shutichirca. 5Cutinbash vijsayu tucushpa, shuj jari huahuata charishpami chai huahuataca Sela shutita shutichirca. Chai punllacunapica, Quezib shuti pueblopimi causajurca. 6Chai jipami Judá runaca, Er shuti paipaj punda churiman huarmita mascarca. Chai huarmica Tamar shutimi carca. 7Judá runapaj punda churi Er shuti huambraca, Mandaj Diospaj ñaupajpica na alita rurashpami causarca. Chaimandami Mandaj Diosca, causaita quichurca. 8Chai jipami Judá runaca, Onán shuti paipaj churitaca cashna nirca: “Cambaj huauquipaj huarmihuan cazarashpa, paihuan pacta causailla. Shina cajpimi, cambaj huauquipaj miraicunaca tiyashpa catinga” nircami. 9Chai miraicunaca na paipaj huahuacuna canata yachashpami, Onán shuti runaca, paipaj huauquipaj huarmihuan pacta puñushpapash, paipaj huauquipaj miraicuna ama tiyachun nishpa, muyu yacutaca alpapi shutuchijurca. 10Chashna na alita rurajushcacunaca, Mandaj Diospaj ñaupajpica na alipachami ricurirca. Chaimandami paitapash causaita quichurca. 11Chai jipami Judá runaca, paipaj jachun Tamartaca cashna nirca: “Ñuca churi Sela viñangacaman cambaj taitapaj huasipi sapalla causajuilla” nircami. “Sela shuti huambrapash, paipaj huauquicunashna huañungami” yashpa manllashpami chashna nirca. Shina nijpimi Tamarca, paipaj taitapaj huasiman tigrashpa chaipi causajurca. 12Tauca punllacuna jipaca, Súa shuti runapaj ushi, Judá runapaj huarmipashmi huañurca. Shina llaquilla cashpapash cutin cushijuita japishpami, paipaj llamacunata rutujcunapajman Timnat shuti puebloman vichai rijurca. Paica Adulam shuti pueblomanda, Hira shuti paipaj cumba runahuanmi rijurca. 13Chaitami Tamarman cashna ninajurca: “Ricui, cambaj cusapaj taitaca, paipaj llamacunata rutuchingapami Timnat puebloman vichai shamujun” ninajurcami. 14Chaita uyashpami Tamarca, sapalla cashpa churajushcata anchuchishpa, umatapash quilparishpa, baitahuan ali pillurishpa, Timnat puebloman rina ñambi, Enaim puebloman yaicuna pungupi tiyarirca. Sela shuti huambra ña viñashca cajpipash, chai huambrapaj taitaca chai huambrahuan na cazarachishca cajpimi chashna rurajurca. 15Tamartaca, chashna ñavita quilparishca tiyajujta Judá ricushpami, cai huarmica culquimanda huainayaj huarmimi yajurca. 16Judaca chai huarmipajman quimirishpami: “Canhuan pacta puñungapami munani” nirca. Paipaj jachun cajtaca na yachashpami chashna nijurca. Shina nijpimi chai huarmica: “¿Canhuan puñujpica imatashi cuhuangui?” nirca. 17Shina nijpimi Judaca: “Shuj huahua chivotami canman cachamusha” nirca. Shina nijpimi chai huarmica: “Can chaita cachamungacaman, imatallapash saquinami cangui” nirca. 18Shina nijpimi Judá runaca: “¿Imatata saquichun munangui?” nijpica, chai huarmica: “Sellota churana cambaj surtijata, caupushca puchandi, cambaj maquipi charijuj tauna caspitapash cuhuai” nirca. Shina nijpimi Judaca chaicunata cushpa, chai huarmihuan puñujpi, chai huarmica vijsayu tucurca. 19Chai jipaca jatarishpa rishpami, umata quilparishcata anchuchishpa, sapalla cashpa churajunata cutin churajurca. 20Judaca huahua chivotami, Adulam shuti pueblomanda paipaj cumbahuan cacharca. Chai huarmiman cushcacunata cutin apamugrichunmi, chashna cacharca. Ashtahuangarin chai huarmitaca na tuparircachu. 21Na tuparishpami, Enaim shuti pueblopi causaj runacunataca: “Enaim pueblo ñambi tiyaj, ¿culquimanda huainayaj huarmica maipita causan?” nishpami tapujurca. Shina nijpimi paicunaca: “Caipica, culquimanda huainayaj maijan huarmipash na tiyashcachu” ninajurca. 22Shina nijpimi chai runaca, Judapajman tigrashpa cashna nirca: “Chai huarmitaca na tuparinichu. Chai pueblopi causaj runacunapash: ‘Caipica culquimanda huainayaj huarmica na tiyashcachu’ nihuarcami” nircami. 23Shina nijpimi Judaca cashna nirca: “Ñucanchita pipash ama yanga juchachishpa rimachun, chaicunataca apachun saquilla. Cai huahua chivota cungapapash, chai huarmitaca na tuparishcanguichu” nircami. 24Ña quimsa quilla jipami Judamanga, cashna nishpa villanajurca: “Cambaj jachun Tamarca shujhuanmi pacta causajun yarin, cunanga vijsayujmi purijun” ninajurcami. Shina nijpimi Judá runaca: “Paitaca, rupachinapachami canguichi” nirca. 25Ashtahuangarin rupachingapa apanajujpimi chai huarmica, paipaj cusapaj taitaman cashna nishpa villachun cacharca: “Cai sellota churana surtijapash, caupushca puchandi, tauna caspipash, ¿pipajta canga? Maijambaj cajpipash paipajtami vijsayu cani” nichunmi cacharca. 26Judá runaca chaicunata rijsishpami cashna nirca: “Paica ñucataca ashtahuan yali alita rurajmari cashca. Ñucami Sela shuti ñuca churitaca na paihuan cazarachircani” nircami. Judá runaca chai huarmihuanga cutinga na pacta causarcachu. 27Huahuata charina punlla ña pactajpica: Paipaj vijsapica ishcai huahuacunami ricurirca. 28Shina cashpami, huahuata ungujujpica shuj huahuara maquita llujchirca. Shina llujchijpi, huahuata unguchij huarmi japishpami: “Caimi punda huacharirca” nishpa, paipaj maquipi shuj puca puchata huatachirca. 29Ashtahuangarin maquita llujchij huahuaca, maquita cutin ucuman aisajpimi, paipaj huauquira punda llujshirca. Shina llujshijpimi unguchij huarmica: “¡Maitata canra punda llujshimunguiyari!” nishpa, Fares shutita shutichirca. 30Chaipaj cati puca puchata maquipi huatachishca huahua llujshimujpimi, chai huahuataca Zara shutita shutichirca.

Currently Selected:

GÉNESIS 38: QVI16

Highlight

Copy