GÉNESIS 34

Dina shuti cuitsata huaglichishcamandami llaquichishca

1Jacobca, Leahuanmi, Dina shuti ushita charirca. Shuj punllami chai cuitsaca, chai llactapi causanajuj cuitsacunata ricungapa rirca. 2Chai llactapi causajcunata mandaj, heveo gentepura Hamor shuti runapaj churi, Siquem shuti huambrami, Dina cuitsata ricushpaca, munai na munai paihuan pacta puñushpa, na alita rurarca. 3Chai jipaca paica, Leapaj ushi Dinata, tucui shunguhuan juyashpami, chasquihuachun yashpa, juyailla shimicunahuan rimajurca. 4Siquem shuti huambraca, paipaj taita Hamor shuti runatami: “Cai cuitsaguhuan cazarachihuai” nijurca. 5Ashtahuangarin Jacobca, paipaj ushi Dinataca, chai huambra na alita rurashcata yachashpami fiñarishca carca. Shina cashpapash, paipaj churicuna, animalcunata pambapi michinajujpimi, paicuna shamungacaman, upalla shuyajurca. 6Chaicamanga, Siquem huambrapaj taita Hamor shuti runaca, Jacobhuan parlangapami rirca. 7Jacobpaj churicunaca, panita chashna na alita rurashcata yachaj chayashpami, pambamanda tigramunajurca. Jacobpaj ushita na alita rurashpa, Israelpurapi jatun pinganayaita rurashcamandami, paicunaca ninandapacha fiñarishca carca. 8Shina cajpipash Hamor shuti runaca, paicunataca cashnami nijurca: “Ñuca churi Siquem huambraca, tucui shunguhuanmi, cangunapaj ushigutaca juyapan. Chaimandami, paipaj huarmi cachun cazarachipashun nishpa, mañajupani. 9Cunanga, ayllupura tucupashunchilla. Cangunapash, ñucanchi ushicunahuan, ñucanchipash, cangunapaj ushicunahuan cazarashpa causapashunchilla. 10Shina rurashpaca, cai alpacunapi ñucanchihuan, randishpa, jatushpa causanguichillami. Chai alpacunataca, cangunapaj cachun randishpa japipaichilla” nijurcami. 11Shinallata, Siquem shuti huambrapashmi, Dinapaj taitatapash, paipaj turicunatapash, cashna nirca: “Canguna, ñucata chasquijpica, imata canguna mañashcatapash cupashallami. 12Shuj huarmimanda imatalla cuna cashcataca, ashtahuan mirachishpa mañahuaichilla. Ñucaca, mashnata nijpipash cupashallami. Cuitsagutaca, ñuca huarmi cachun cuhuaichilla” nirca. 13Ashtahuangarin, Jacobpaj churicunaca, paicunapaj pani Dinata na alita rurashcamandami Siquem huambratapash, paipaj taita Hamor runatapash, umachishpalla, ari nij tucunajurca. 14Shinamandami cashna ninajurca: “Ñucanchica, ñucanchi panitaca, circuncisionda na rurashca runahuan cazarachitaca, napacha ushapashunllu. Chashnata ruranaca, ñucanchipurapica, napacha alichu capan. 15Ashtahuangarin, cangunapash, ñucanchishnallata, tucuilla jaricuna, circuncisionda rurarina cajpica, ari ninchimi. 16Shina rurajpica, ñucanchi ushicunata cangunaman cushunllami. Shinallata ñucanchipash, cangunapaj ushicunahuan cazarashunllami. Shina rurashpaca, shujlla llactami tucushun. 17Ashtahuangarin, circuncisionda rurangapa canguna na munajpica, ñucanchi panitaca pushashpa rishunllami” ninajurcami. 18Paicuna nishca shimicunaca, Hamor shuti runapajpash, paipaj churipajpash, alimi uyarirca. 19Jacobpaj ushita ninanda juyashpami, chai huambrapash, circuncisionda uchalla rurarirca. Paica, paipaj taitapaj ayllupurapica, ninanda alicachi tucushcami carca. 20Chashnamandami Hamor shuti runapash, paipaj churipash, paicunapaj puebloman yaicuna punguman shamushpa, chai pueblopi causaj runacunaman cashna ninajurca: 21“Jacobpaj churicunaca ali gentecunami cashca. Paicunami, randishpa jatushpa caipi causanajunga. Cai alpacunaca tucuicunapaj pactangallami. Ñucanchipash, paicunapaj ushicunahuan, paicunapash, ñucanchi ushicunahuanmi, cazarashpa causashunchij. 22Ashtahuangarin cai runacuna, ñucanchihuan shujlla llacta tucushpa causachunga, ñucanchipuramanda tucui jaricunami, paicuna rurashcashnallata circuncisionda rurana canchi. 23Paicunapaj tucui animalcunapash, paicuna imatalla charishcacunapash, ñucanchipajmi canga. Paicuna ima nishcata ñucanchi pactachijpica, paicunaca ñucanchihuan causangallami” ninajurcami. 24Hamor shuti runahuan, paipaj churihuan chashna ninajushcataca, pueblo punguta yalijcunaca tucuicunami pactachinajurca. Shina cashpami, chaipi tucuilla jaricunatapash, chai punguta yalinajuj tucuilla jaricunatapash, circuncisionda ruranajurca. 25Ña quimsa punlla yalijpimi, Dinapaj turi, Jacobpaj churicuna Simeonbash, Levipash, paicunapaj espadacunahuan cungashcapi rishpa, chai pueblopi causajcunataca, tucuilla jaricunata huañuchirca. Chai runacunaca, nanaihuan na ushanajushpami, na macanajui usharca. 26Hamor shuti runatapash, paipaj churitapashmi, espadahuan huañuchirca. Shina huañuchishpami Dinataca, chai huambrapaj huasimanda pushanajurca. 27Shinallata Jacobpaj churicunaca, chai pueblomanda tucui ima tiyashcatapash apashpami, paicunapaj panita chashna na alita rurashcamandaca, llaquichinajurca. 28Paicunaca: Llamacunata, huagracunata, burrucunata, chai pueblopi ima tiyashcacunata, pambapi tucui imalla tiyashcacunatapashmi apanajurca. 29Paicuna imatalla charishcacunatapash, tucuillata apashpami, huahuacunatapash, huarmicunatapash prezu apanajurca. Huasicunapi imalla tiyashcacunatapash, tucuillatami apanajurca. 30Chashna rurashcamandami Jacobca, Simeondapash, Levitapash shinllita cashna nishpa rimajurca: “Cangunaca, cai llactapi causaj cananeo, ferezeo gentecuna ñucata na ricunayachichunmi chashna rurashcanguichi. Ñucanchica, huaquinllami canchi. Ñucata fiñajcunaca tucuilla tandanajushpami, ñucatapash, ñuca huasipi tucui ima tiyashcatapash tucuchij shamunga” nijurcami. 31Ashtahuangarin paicunaca: “Ñucanchi panitaca, ¿culquimanda huainayaj huarmitashnachu, paica na alita ruranalla carca?” ninajurcami.

Currently Selected:

GÉNESIS 34: QVI16

Highlight

Copy