GÉNESIS 33
33
Jacobhuan, Esauhuan ali tucushcamanda
1Jacob vichai ricushpaca, paipaj huauqui Esautami, chuscu patsaj runacunandi shamujujta ricurca. Shina ricushpami, Lea shuti, Raquel shuti paipaj huarmicunata, ishcandi gañan huarmicunatapash, paicunapaj huahuacunandi, shicanyachirca. 2Gañan huarmicunatami, paicunapaj huahuacunandi pundapi churarca. Chaipaj catipica Lea huarmitami, paipaj huahuacunandi churarca. Raquelta, Josetaca ashtahuan huashamanmi churarca. 3Chashna churashpami Jacobca, paicunata ñaupashpa rishpa, paipaj huauquihuan tuparishpaca, canchiscaman alpaman chayajta urai cumurirca. 4Ashtahuangarin Esauca, Jacobta tuparingapa calpamushpami, ugllashpa, mucharca. Chaipimi ishcandi ugllarishpa huacanajurca. 5Esauca, huarmicunata, huahuacunata ricushpami:
“¿Paicunaca picunata?” nirca.
Shina nijpimi Jacobca:
“Cambajta ruraj ñucaman, Taita Dios carashca huahuacunami capan” nirca.
6Chai jipami gañan huarmicunapash, paicunapaj huahuacunandi shamushpa, Esaupaj ñaupajpi alpacaman cumurinajurca. 7Shinallata Lea huarmipash, paipaj huahuacunandi shamushpami, alpacaman cumurinajurca. Chaipaj catica, Josepash, Raquelpashmi chayamushpa alpacaman cumurinajurca. 8Chaipimi Esauca cashna nirca:
“Canga, ¿ima nishpata cai tucui animalcunahuanga tuparij shamungui?” nircami.
Shina nijpimi Jacobca:
“Can ñucata mandaj ama fiñarishpa, ñucata chasquihuachun nishpami, chashna ruraparcani” nirca.
9Shina nijpimi Esauca:
“Ñuca huauquigulla, ñucaca yapallapashmi charini. Can charishcacunaca, cambajllata saquirichunlla” nirca.
10Shina nijpimi Jacobca:
“Ama chashna nihuaichu nipanimi. Cambaj ñaupajpi cunan ali ricurishca cajpica, ñuca carashcacunata chasquipailla. Can cushijuihuan ñucata tuparijpimi, candaca Taita Diospaj ñavita ricujshna ricujuni. 11Canman carangapa ñuca apamushcataca, chasquipailla nipanimi. Taita Dios juyashpa carashcamandami, tucui caicunataca charipani” nircami. Chashna nijujpillatami, Esauca chai carashcacunataca chasquirca. 12Chaimandami, Esauca: “Jacupaichi, ñucami canda ñaupashpa rigrini” nirca. 13Shina nijpimi Jacobca: “Ñucata mandajlla, huahuacuna llullura cajtaca yachapanguimi. Shinallata llamacuna, huagracunapash, chairalla huachashcacunatami charini. Paicuna shaijushpaca, shuj punllapillami tucuilla huañunga. 14Ñucata mandajlla, cunanga ñucata ñaupashpa ripailla. Ñucaca, animalcuna imashna rijpipash, huahuacuna imashna rijpipash, asha asha rishpa, Seir shuti llactaman, ñucata mandaj chayangacaman catishpa shamupashallami” nircami. 15Shina nijpimi Esauca: “Cunanga, ñucahuan shamushca gentecunataca, canhuan saquingapami munani” nirca. Shina nijpimi, Jacobca: “Ama saquipaichu. Ñucataca, ñamari aliguta chasquihuashcangui” nirca. 16Shinami Esauca, chai punllallata, Seirman rina ñanda catishpa rirca. 17Jacobca, Sucot shuti llactamanmi rirca. Chaipimi, paipaj huasita shayachishpa, animalcunamambash corralta rurarca. Shinamandami chai pambataca, “Sucot” shutita shutichirca. 18Chai jipami Jacobca, Padan-aram llactamanda shamushpaca, Canaán llactapi tiyaj Siquem puebloman, ima llaquitapash na apashpa, ali chayagrirca. Shinami paica, chai pueblo chimbapurapi, carpacunata shayachirca. 19Chaipimi Jacobca, Hamor shuti runapaj churicunata, patsaj culquipaj alpata randishpa, carpacunata shayachirca. Hamor shuti runaca, Siquem shuti runapajpash taitami carca. 20Chaipica, shuj altarta rurashpami, chai altartaca, “El-Elohe-Israel” nishpa shutichirca.
Currently Selected:
GÉNESIS 33: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
