ÉXODO 16

Taita Dios, Maná shuti tandata carashcamanda

1Tandanajushca Israelcunaca, Elim shuti pushtumanda llujshishpaca, Sin shuti jichushca pambamanmi chayarca. Chai pambaca, Elim pushtuhuan, Sinaí urcuhuan chaupipimi carca. Paicuna, Egipto llactamanda llujshishca punllamandaca, shuj quilla, chunga picha punllapimi chaimanga chayarca. 2Chai jichushca pambapica, tucuilla tandanajushca Israelcunami Moisestapash, Aarondapash fiñashpa na alicachishpa rimanajurca. 3Israelcunaca, paicunataca cashnami ninajurca:

“Egipto llactapillata, Mandaj Diospaj maquipi huañushpami ali canchiman carca. Chaipica, aicha mangacunahuanmi micungapa tiyarinajun carcanchi. Tandatapash, na ushangacamanmi micunajun carcanchi. Cai tucui ñucanchitaca, yarjaimanda huañuchingapami, cai jichushca pambaman llujchimushcanguichi” ninajurcami.

4Shina ninajujpimi Mandaj Diosca, Moisestaca cashna nirca:

“Ñucami, jahua pachamanda tandata tamiachimusha. Chaitami gentecunaca, llujshishpa shuj punlla micui pactanatalla pallanajunga. Ñuca mandashcata cazujta, na cazujtapash yachangapami chaita rurachun mandajuni. 5Ashtahuangarin sucta punllapica, shuj punlla micungapa japij cashcamandaca, chaupi yalitami pallanga. Shinami cayandi punlla micungapa charinga” nircami.

6Shina nijpimi Moisespash, Aaronbash, tucuilla Israelcunataca cashna ninajurca:

“Mandaj Dios cangunata Egipto llactamanda llujchishcataca, cai chishillatami ali yachanguichi. 7Mandaj Diospaj ninan ushaitaca, caya tutamandami ricunguichi. Mandaj Diosca, canguna na alicachinajujtami uyashca. Canguna ñucanchita na alicachishpa rimanajuchunga ¿ñucanchica, pita canchiyari?” ninajurcami.

8Moisesca cashnatapashmi nirca:

“Mandaj Diosca, cunan chishillatami aichata micuchun caranga. Caya tutamandaca, tandatami na ushangacaman micuchun caranga. Mandaj Diosca, canguna na alicachishpa rimanajushcataca uyashcami. Ñucanchica, ¿pita canchiyari? Canguna ñucanchita na alicachishpa rimanajushpaca, Mandaj Diostami na alicachishpa rimashcanguichi” nircami.

9Chai jipami Moisesca, Aarondaca cashna nirca:

“Tucuilla tandanajushca Israelcunata cashna ningui: ‘Mandaj Diospaj ñaupajman quimirichi. Paica, canguna na alicachishpa rimanajujtaca uyashcami’ ningui” nircami.

10Tandanajushca tucuilla Israelcunaman Aarón villajujpillata, jichushca pambata paicuna ricushpaca, Mandaj Diostaca fuyupi punchapamba cajtami ricunajurca. 11Chashna ricurishpami Mandaj Diosca, Moisestaca cashna nijurca:

12“Ñucami, Israelcuna na alicachishpa rimanajujtaca uyarcani. Chaimanda, paicunamanga cashna nishpa villangui: ‘Cunan chishica aichatami micunguichi. Caya tutamandaca, tandatami na ushangacaman micunguichi. Chashna rurajpimi, Ñucataca, cangunata Mandaj Taita Dios cajtaca yachanguichi’ nishpa villangui” nircami.

13Chai chishillatami, ashtaca codornizcuna vichai shamushpa carpacunata quilparca. Tutamandapica jamzi tamiami, carpa muyundicunapi urmamujurca. 14Jamzi tamia shutumushca jarcarijpica, ñapashmi jichushca pambapica, shuj jamzi yuraj cazashnalla ricurirca. 15Chaita Israelcuna ricushpaca, ima cajta na yachashpami: “¿Caica imata?” nishpa, caishuj chaishuj tapurinajurca.

Shina ninajujpimi Moisesca cashna nirca:

“Chaicunaca canguna micuchun, Mandaj Dios carashca tandami. 16Shinallata Mandaj Diosca cashnatapashmi mandarca: ‘Chaitaca, canguna micui ushana canatalla, tucuicuna pallanguichi. Mashnapura carpapi causajpipash, tucuillamanmi pallashpa apana canguichi. Shuj runaca ishcai kilo canatallami micunga’ nishpami mandarca” nircami.

17Shina nijpimi Israelcunaca chaita pactachinajurca. Shujcunaca ashtacata, shujcunaca ashatallami pallanajurca.

18Chai tandachishcata pezajpica, llashajta pallajpajpash, ashatalla pallajpajpash, tucuicuna micujpi pactanallami carca. Tucuicunallatami, micungapa pactanatalla tandachishca carca.

19Moisesca:

“Chai tandataca, cayapaca pipash na puchuchinachu canguichi” nircami.

20Ashtahuangarin paicunaca, Moisestaca na cazushpami, huaquingunaca cayandi punllapajpash puchuchinajurca. Chai puchushcapica, jurushpa ashnayashca cajta ricushpami, Moisesca paicunahuanga ninanda fiñarirca.

21Shina cajpimi, chai tandataca punllandi mashnata micui ushanatalla, tutamandata rishpa tucuicuna tandachinajurca. Chai tandataca, indi llujshimushpaca yacuyachinllami carca. 22Sucta punllapica, chaupi yalita pallashpami, shujpajlla chuscu kilo chaupitashna tandachinajurca. Chaitaca, Israelcunata mandajcunami, Moisespajman shamushpa villanajurca. 23Shina villajpimi Moisesca cashna nijurca:

“Mandaj Diosca cashnami nirca: ‘Cayapaca, Diospajlla shicanyachishca samana punllami. Mandaj Diosmanlla shicanyachishca samana punllami. Cusana cashpa, yanuna cashpapash cunanllata yanuichilla. Canguna micujpi tucui puchushcataca, cayapa saquichilla’ nircami” nijurcami.

24Shina nijpimi Moisés mandashcashna cayandipaj alichijpipash, chaicunaca na jurushpa ashnayarcachu. 25Shinamandami Moisesca cashna nirca:

“Chaitaca cunan punlla micuichilla. Cunanmi, Mandaj Diospaj samana punlla. Cunanga pambapica imallapash na tiyangachu. 26Sucta punllatami micunataca tandachina canguichi. Ashtahuangarin, canchis punllapica samana punllami. Chai punllapica, imapash na tiyangachu” nircami.

27Canchis punllapica huaquinguna pallangapa llujshishpaca imatapash na tarircachu. 28Shina cajpimi Mandaj Diosca, Moisestaca cashna nijurca:

“¿Ima punllacamanda, Ñuca ima nishcatapash, Ñuca mandashca shimicunatapash na cazushpa causagringuichi? 29Samana punllataca, Mandaj Dios Ñucami churarcani. Chaimandami, tandataca sucta punllapica ishcai punllapaj pactana canata caramujuni. Maipi cashpapash, chaipi saquirishpa pipash na llujshinachu canguichi” nijurcami.

30Chashnami Israelcunaca canchis punllapica samanajurca.

31Israelcunaca chai tandataca, Maná nishpami shutichinajurca. Chai tandaca, yuraj culantropaj muyushnalla, balun mishquihuan javishcashnalla, mishqui ñutu tandagumi carca.

32Moisesca cashnami nirca:

“Mandaj Diosca cashnatapashmi mandarca: ‘Ishcai kilotashna tandachishpa, cangunapaj miraicuna rijsichun alichinguichi. Egipto llactamanda cangunata, Ñuca llujchimushpa, jichushca pambapi carashca tandata rijsichunmi chashna rurana canguichi’ nishpami mandarca” nircami.

33Moisesca, Aarondaca cashnami nirca:

“Maná tandataca, Ishcai kilotashna pezashpa fundupi alichingui. Chaitaca, cangunapaj miraicunaman alichiriyajuchun, Mandaj Diospaj ñaupajpi churangui” nircami.

34Shina nijpimi Aaronga, Taita Diosta yarishpa causanata ricuchina arcapi tandataca alichirca. Mandaj Dios, Moisesman mandashcata pactachingapami chashna rurarca.

35Shinami Israelcunaca, chuscu chunga huatacaman, Maná tandataca micunajurca. Paicunaca, Canaán llacta mujunman chayanapi, gentecuna causaj alpacunaman chayangacamanmi, chai tandataca micunajurca.

36(Shuj efa nishpaca chunga gomerta tandachishcatami chashna nijun).

Currently Selected:

ÉXODO 16: QVI16

Highlight

Copy