ÉXODO 15
15
Moiseshuan, Mariahuan, Diosta alicachishcamanda
1Moisesca, Israel gentecunandimi cashna nishpa Diosta alicachishpa candanajurca:
“Mandaj Diostaca ninandami alicachisha.
Paica ninan ushaihuanmi, caballocunatapash, caballopi tiyarishcacunatapash, mama cuchapi pambarca.
2Mandaj Diostaca, ñucaman ushaita carashcamandami, ninanda alicachisha.
Paimi, ñucataca quishpichihuarca.
Paica, ñucapaj Taita Dios cajpimi alicachisha.
Ñuca taitapaj Taita Dios cajpimi, Paitaca ninanda alicachisha.
3Mandaj Diosmi macanajuna ushaitaca charin.
Paipaj shutica, ¡Mandaj Dios! shutimi.
4Faraonbaj carretacunataca, paipaj macanajuj runacunandimi mama cuchapi pambarca.
Macanajuj runacunata mandaj, macanajuj runacunatapash, Puca Cuchapimi pambarca.
5Ucu ucuman pambarishpami, mama cuchapica jatun rumishna huashajunajurca.
6Mandaj Dioslla, Cambaj ali maquimi ninan ushaitaca charin.
Mandaj Dioslla, cambaj ali maquihuanmi, ñucanchita fiñajcunataca ñutujshna tucuchircangui.
7Canda fiñashpa jatarijcunataca, cambaj jatun ushaihuanmi tucuchircangui.
Canga ninanda fiñarishpami, chaquishca fangacunata rupachijshna tucuchircangui.
8Cambaj samaihuan fucushpami, yacutaca caiman chaiman shicanyachircangui.
Ninanda rinajuj yacucunapash, shujllapi tandanajunshnami saquirirca.
Mama cucha ucu yacucunapash, casillami saquirirca.
9Fiñaj runaca cashnami nijurca:
‘Paicunata catishpami prezu japisha.
Paicuna imata charishcacunata quichushpami chaupisha.
Chashna rurashpami, ñuca almaca ninanda cushijunga.
Ñuca espadata llujchishpami, ñuca maquihuan tucuchisha’ nijurcami.
10Cambaj samaihuan fucushpami, paicunataca mama cucha yacuhuan quilparcangui.
Plomo jirrushnami, ninanda shitarijun cuchapica huashajunajurca.
11Mandaj Dioslla,
¿pita Canshna shuj Diosca tiyangayari?
Canshna jucha illaj jatun Diosca, ¿pita tiyangayari?
Canllamari tucuitapash rurai ushaj,
pipash na rurai ushanallacunata ruraj, Jatun Diosmi cangui.
12Cambaj ninan ushaita charishpami, paicunataca alpa ucuman pambarcangui.
13Can llaquishpa quishpichishca gentecunataca, ninanda juyashpami pusharcangui.
Cambaj ushaihuanmi, jucha illaj cambaj llactaman pusharcangui.
14Gentecunaca chaita uyashpami, ninanda manllarishpa chujchunajunga.
Filisteo gentecunataca, jatun llaquicunami japinga.
15Edom llactata mandajcunaca, imata ruraitapash na ushanajungachu.
Moab llactapaj ninan shinlli runacunapash, manllaimandami chujchunajunga.
Canaán llactapi causajcunapash, ninanda manllarishpami imata ruraitapash na ushanajunga.
16Paicunaca, ninan manllai japijpimi chujchunajunga.
Cambaj ninan ushaita ricushpaca, rumicunashna saquirinajunga.
Mandaj Dioslla, Can agllashca gentecuna yalingacaman chashna cachun.
Can agllashpa quishpichishca gentecuna yalingacaman chashna cachun.
17Can carashca lomaman chayachishpami, tarpujshna chaipi churangui.
Mandaj Dioslla, Can causangapa shicanyachishca llactaman pushashpami chaipi churangui.
Mandaj Dioslla, Cambaj maquihuan shayachishca, Cambajlla huasimanmi pushangui.
18Mandaj Diosmi causaita causaicaman, tucui causaipi mandajungalla” nishpami candanajurca.
19Faraonga, caballopi tiyarishcami, paipaj carretacunandi, caballocunapi tiyarishca paipaj gentecunandi, mama cuchaman yaicurca. Chaipimi Mandaj Diosca, mama cuchata pascashcataca, cutin tigrachimushpa paicunataca quilparca. Ashtahuangarin Israelcunaca, cucha chaquishca chaupitami yalinajurca. 20Shinallata Aaronbaj pani, profeta María shuj panderota japijpimi, tucuilla huarmicunapash, panderota huactashpa, tushushpa, Mariata catishpa llujshinajurca. 21Mariaca cashna nishpami alicachijurca:
“Mandaj Diosta jatunyachishpa alicachishunchi.
Paimi, caballocunatapash, caballopi tiyarishca macanajuj runacunatapash,
mama cuchapi quilpashpa, paipaj ninan ushaitaca ricuchirca” nijurcami.
Mara shuti pushtupi jayaj yacu tiyashcamanda
22Israelcunataca, Puca Cuchamanda caruyachun Moisés mandajpimi, Shur shuti jichushca pambaman rirca. Paicunaca, quimsa punllacamanmi, yacutaca na tarishpa, chaquishca pambapi purinajurca. 23Chai jipaca, Mara shuti pushtumanmi chayarca. Mara shuti pushtupi yacuca jayaj cajpimi, ufiaitaca na ushanajurca. Chaimandami, Mara nishpa shutichinajurca.
24Shina cashcamandami, Israelcunaca: “¿Imatata ufiana canchi?” nishpa, Moisestaca fiñashpa na alicachinajurca. 25Chaimandami Moisesca, Mandaj Diostaca ninanda mañajurca. Shina mañajpimi, Mandaj Diosca shuj quiru yurata ricuchirca. Chai quiruta yacupi shitajpimi, yacuca mishquiyarca.
Chaipimi, paicuna llaquita apachun saquirca. Shinallata mandashca shimicunatapashmi paicunaman curca. 26Chaipica cashnami nijurca: “Canda Mandaj Taita Dios rimashcataca, aligutapacha uyashpa, Paipaj ñaupajpipash alitalla rurashpa causangui. Pai mandashca shimicunatapash ali uyashpa, tucuita pactachishpa causangui. Shina causajujpica, Egipto llactapi causajcunaman cachamushca ungüicunataca na cachamushachu. Ñucami, cambaj ungüita alichij Mandaj Dios cani” nijurcami.
27Chai jipaca, chunga ishcai pugyu yacucuna tiyaj, shinallata canchis chunga palmera quirucuna tiyaj, Elim shuti pushtumanmi chayarca. Chaipimi yacu manñacunapi, carpacunata shayachishpa tiyanajurca.
Currently Selected:
ÉXODO 15: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
