馬可福音 12

歹佃農的譬喻

(太 21.33-46；路 20.9-19)

1耶穌閣用譬喻對𪜶講：「有一個人開墾一坵葡萄園，四面圍籬笆，挖一個酒窟，起一個守望台，將此坵園租互佃農，後來出外去真遠的所在。 2收成的時到，伊差一個僕人去佃農遐，欲給𪜶收園裡的果子。 3𪜶掠彼個僕人，給伊拍，趕伊空手倒去。 4伊閣差另外一個僕人去，𪜶傷害伊的頭殼，給伊侮辱。 5後來，園主閣差別個僕人去，𪜶給伊刣死。伊閣差真多僕人去，有的互𪜶拍，有的互𪜶刣死。 6伊猶有一個，就是所疼的子，最後嘛差伊去佃農遐，想講『𪜶會尊重我的子』。 7毋拘許個佃農參詳講：『此個是伊的繼承人。來，咱來給刣死，伊的財產就變做咱的。』 8𪜶就給伊掠起來，給伊刣死，給㧒出去葡萄園的外面。

9「按呢，葡萄園的主人會按怎處理？伊會來剿滅諸個佃農，將葡萄園租互別人。 10恁豈毋曾讀著此段聖經的記載：

起厝師傅所棄拺的石

已經成做上重要的基石。

11這是主的作為，

對咱來看實在真奇妙。」

12許個猶太人的領導者知影耶穌講此個譬喻是啲指𪜶，就想欲給伊掠，毋拘驚群眾，就離開。

納稅的問題

(太 22.15-22；路 20.20-26)

13𪜶差幾若個法利賽派的人及希律黨的人去耶穌遐，欲尋伊的話柄通給伊陷害。 14𪜶就去，對耶穌講：「老師，阮知你真誠實，無論什麼款人，你對待𪜶攏無差別，你只有忠實教示上帝的道理。按呢，納稅互羅馬皇帝凱撒有合律法無？阮著納稅抑毋免？」

15耶穌看出𪜶的詭計，就對𪜶講：「是按怎欲給我試探？提一個銀幣互我看覓咧。」

16𪜶就提一個銀幣來。耶穌問𪜶：「這是什麼人的像，什麼人的字號？」

𪜶應講：「凱撒的。」

17耶穌給𪜶講：「凱撒的物互凱撒；上帝的物互上帝。」

𪜶對耶穌感覺真著驚。

死人閣活的問題

(太 22.23-33；路 20.27-40)

18有一寡主張無閣活的撒都該派的人來耶穌遐，問伊講： 19「老師，摩西所寫的律法給阮講：『若有人伊的兄哥死去，放某無放子，伊作小弟的著娶兄嫂替兄哥傳宗接代。』 20以前曾有七個兄弟，上大的娶某，無留後代就死去。 21第二的娶伊的兄嫂，嘛無留後代就死去。第三的嘛像款。 22此七個兄弟攏無留後代，最後此個婦仁人嘛死去。 23閣活的時，𪜶攏閣活，按呢此個婦仁人是叨一個人的某？因為此七個攏曾娶伊做某。」

24耶穌給𪜶講：「恁毋著，因為恁毋識聖經，嘛毋識上帝的權能。 25𪜶對死人中閣活的時，及天頂的天使像款，無嫁無娶。 26關係死人閣活，恁豈毋曾讀著摩西的冊『啲𤏸的莿』彼段？上帝對摩西講：『我是亞伯拉罕的上帝，以撒的上帝，雅各的上帝。』 27伊毋是死人的上帝，是活人的上帝。恁完全毋著！」

第一重要的誡命

(太 22.34-40；路 10.25-28)

28有一個經學教師來，聽著耶穌及撒都該派的人啲辯論，看耶穌應了真著，就問伊：「所有的誡命中，叨一條第一重要？」

29耶穌應講：「第一是：以色列啊，恁著聽！主 — 咱的上帝是獨一的主。 30你著全心、全情、全意、全力疼主 — 你的上帝。 31第二是：著疼厝邊親像疼家己。無別個誡命比諸個閣較重要。」

32彼個經學教師對耶穌講：「老師，你所講的真著。你講上帝只有一位，伊以外無別個； 33閣講著用全心、全智、全力疼上帝，閣疼厝邊親像疼家己是比獻攏總的燒化祭及祭物閣較要緊。」

34耶穌看著伊應了真有智慧，就給伊講：「你離上帝國無遠。」

彼時以後，無人敢閣問耶穌什麼問題。

關係大闢後代的問題

(太 22.41-46；路 20.41-44)

35耶穌佇聖殿啲教示的時，問講：「經學教師哪會講基督是大闢的後代？ 36大闢本身受聖神感動講：

主給我的主講：

你坐我的正旁，

到我互你的對敵屈服佇你腳下。

37 大闢本身稱呼基督做『主』，基督哪會是大闢的後代？」

持防經學教師

(太 23.1-36；路 20.45-47)

有一大群人愛聽耶穌的教示。 38耶穌教示講：「著持防經學教師。𪜶愛穿長衫行來行去，佇市場口互人請安， 39佇會堂坐高位，佇宴會坐大位。 40𪜶侵佔寡婦的家伙，刁故意祈禱真長。𪜶會受閣較重的刑罰。」

寡婦的奉獻

(路 21.1-4)

41耶穌坐佇聖殿奉獻櫃的對面啲看人獻錢落去。真多好額人獻真多錢。 42有一個散赤的寡婦來，獻兩個銅錢仔，就是一角銀。 43耶穌叫門徒來，給𪜶講：「我實在給恁講，此個散赤的寡婦獻入去奉獻櫃的，比眾人獻的閣較多。 44因為𪜶攏是獻用賰的，毋拘此個寡婦雖然真散赤，猶久提所有的，就是全部的生活費攏獻落去。」

Currently Selected:

馬可福音 12: TTVH

Highlight

Copy