馬可福音 11
11
耶穌光榮進入耶路撒冷
(太 21.1-11；路 19.28-40；約 12.12-19)
1耶穌及門徒啲欲到耶路撒冷，來到橄欖山山腳的伯法其及伯大尼的時，伊差兩個門徒， 2給𪜶講：「恁去對面的庄社，入去，隨時會看著一隻毋曾互人騎過的驢仔子縛佇遐；恁給伊解開，牽來遮。 3若有人問恁是按怎按呢做，著給伊講：『主欲用伊，連鞭會閣牽轉來還。』」
4𪜶去，看著路邊有一隻驢仔子縛佇門口，就給伊解開。 5有一寡徛佇遐的人問𪜶講：「恁解驢仔子欲創什麼？」
6𪜶照耶穌所吩咐的給𪜶回答；許個人就准𪜶牽去。 7𪜶牽彼隻驢仔子來耶穌遐，將家己的外衫袚佇驢仔頂，耶穌就𬦰起去騎。 8有真多人用𪜶的外衫鋪佇路裡，嘛有人對野外剉樹椏鋪佇路裡給伊歡迎。 9前行後隨的人大聲喝：
和散那！
奉主的名來彼位應該受稱讚！
10啲欲來咱祖先大闢的王國應該受稱讚！
至高的上帝，和散那！
11耶穌進入耶路撒冷，入去聖殿，逐項看一輪。因為天已經暗，伊就及十二使徒出城去伯大尼。
耶穌咒詛無花果樹
(太 21.18-19)
12隔日，耶穌及門徒對伯大尼出來的時，耶穌腹肚枵。 13伊佇遠遠看著一欉有真多葉的無花果樹，就行倚去欲看有果子抑無。伊行到遐，樹頂葉仔以外，攏無看著半項，因為毋是無花果的季節。 14伊就對彼欉無花果樹講：「永遠無人會閣食你的果子！」
伊的門徒攏有聽著。
耶穌潔淨聖殿
(太 21.12-17；路 19.45-48；約 2.13-22)
15後來𪜶來到耶路撒冷，耶穌入去聖殿，起手將佇殿內啲買賣的人趕出去，閣捙倒換錢的人的桌及賣粉鳥的人的椅。 16伊嘛毋准人提物件用聖殿做通路過來過去。 17伊教示𪜶講：「聖經豈無記載：
我的厝欲叫做萬民祈禱的殿，
恁煞給伊變做土匪仔窟。」
18祭司長及經學教師聽著，就一直想辦法欲害死耶穌，毋拘𪜶驚伊，因為群眾對伊的教示攏真感服。 19黃昏的時，耶穌及門徒出去城外。
對無花果樹得著教示
(太 21.20-22)
20隔早起，耶穌及門徒對遐經過的時，看著彼欉無花果樹歸欉攏焦去。 21彼得會記得，就給耶穌講：「拉比，你看，你咒詛彼欉無花果樹已經焦去。」
22耶穌應講：「恁著信上帝。 23我實在給恁講，無論什麼人對此座山講『起來，去填海』，伊心若無憢疑，信所講的一定會實現，嘛會按呢互伊實現。 24所以，我給恁講，恁祈禱的時無論求什麼，信已經得著就會得著。 25恁徛啲祈禱的時，若對某人心有不平，著給伊赦免；按呢，恁的天父嘛會赦免恁的過失。」#11.25 有的抄本有 26 節「恁若無赦免，恁的天父嘛𣍐赦免恁的過失。」
質問耶穌的權柄
(太 21.23-27；路 20.1-8)
27𪜶閣來到耶路撒冷。耶穌佇聖殿啲行的時，祭司長、經學教師，及長老來伊遐， 28問伊講：「你靠什麼權柄做諸個代誌？什麼人互你此個權柄來做諸個代誌？」
29耶穌給𪜶應講：「我欲問恁一句話。恁給我應答，我才給恁講我靠什麼權柄做諸個代誌。 30約翰洗禮的權柄是對天抑是對人來的？恁給我講。」
31𪜶互相議論講：「咱若講『對天』，伊會講『按呢恁是按怎無信約翰？』 32毋拘咱若講『對人』，恐驚群眾反感，因為𪜶攏想講約翰真正是先知。」 33𪜶就應耶穌：「阮毋知。」
耶穌就對𪜶講：「按呢，我嘛毋給恁講我靠什麼權柄做諸個代誌。」
Currently Selected:
馬可福音 11: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
