瑪拉基書 2
2
1上主 — 萬軍的統帥對恁諸個祭司講：「此個命令是互恁的： 2恁若毋聽趁，毋囥佇心內，無將榮光歸互我，我就欲互咒詛臨到恁，互恁的福氣變做咒詛。無毋著，我已經給恁咒詛啦，因為恁無將我的命令囥佇心內。 3我欲責罰恁的後代，用恁佇節期獻的牲生的糞抹恁的面，給恁提出去糞堆㧒确。 4彼時恁就知我有互恁此個命令，是欲互我及利未的後代所立的約會當確立。上主 — 萬軍的統帥按呢宣告。
5「我及利未的後代立的約是應允賜活命及和平的約，目的是愛𪜶敬畏我。𪜶確實有敬畏我，尊重我。 6𪜶有傳授真理的教示，無講不義的話。𪜶及我仝步調行和平正直的路，互真多人越倒轉離開罪惡。 7祭司的責任是維護智識，人人著對𪜶尋求教示，因為𪜶是上主 — 萬軍的統帥的使者。
8「毋拘恁諸個祭司離開正路，互真多人因為恁的教示跋倒犯罪。恁已經破壞我及利未人立的約。上主 — 萬軍的統帥按呢講。 9所以，我顛倒欲互以色列子民給恁看輕，互恁佇大眾面前受凌辱；因為恁無遵守我的旨意，看人的面色解說律法。」
人民對上主不忠背信
10咱大家豈毋是有像一個老父？豈毋是像一位上帝創造咱？按呢，是按怎咱互相背信，違背上帝及咱列祖所立的約？ 11猶大人民的行為詭詐，佇以色列及耶路撒冷做可惡的代誌，因為𪜶有拍垃墋上主所意愛的聖殿，娶服事外邦神明的女子做某。 12做此款代誌的，無論什麼款人，雖然𪜶獻祭物互上主，願上主 — 萬軍的統帥對以色列族群中給𪜶趕出。
13恁另外有閣做一項代誌。恁悲慘哀哭，目屎淹滿上主的祭壇，因為伊無閣再歡喜接納恁獻互伊的祭物。 14恁問：「是按怎上主無愛接納？」是因為你有背叛你少年的時娶的某，伊是你的匹配，你有及伊立約。上主是你及伊中間的證人。 15人若是猶有一屑仔靈性，伊𣍐按呢做。上帝所意愛的豈毋是對伊忠誠的後代？所以，著謹慎，毋通背叛恁少年的時娶的某。 16上主 — 以色列的上帝按呢講：「我討厭離婚。我討厭恁中間有人對家己的某做此款殘忍的代誌。所以，著謹慎，毋通對家己的某不忠背信。」上主 — 萬軍的統帥按呢宣布。
審判的日啲欲到
17恁的談論互上主厭倦操煩。恁猶啲問：「阮按怎啲互伊厭倦操煩？」是因為恁講：「上主看所有作歹的人做好人，閣合意此款人。」閣講：「公義的上帝佇叨位？」
Currently Selected:
瑪拉基書 2: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
