瑪拉基書 1
1
1下面是上主交代瑪拉基對以色列子民宣告的信息。
上主疼以色列
2上主給伊的子民講：「我一直攏有啲疼恁。」
毋拘恁講：「你按怎表現你有啲疼阮？」
上主應講：「以掃豈毋是雅各的兄哥？毋拘我較疼雅各， 3較無疼以掃。我互以掃的山嶺荒廢，將伊的土地交互曠野的豺狼。」
4 以掃的後代以東人若講：「雖然阮受毀壞，毋拘欲閣重建起來。」彼時上主 — 萬軍的統帥會回答：「出在𪜶去起造，我會給𪜶拆毀，直到人叫𪜶做『邪惡的國家』抑是『互上主永遠受氣的人民』。」
5 以色列人一定會親目看見；𪜶會講：「上主佇以色列境外嘛受尊崇！」
譴責祭司的腐敗
6上主 — 萬軍的統帥給恁諸個祭司講：「子兒尊重老父；僕人敬畏主人。既然我是老父，我應該有的尊重佇叨位？既然我是主人，我應該有的敬畏佇叨位？恁藐視我的名，竟然敢問：『阮曾按怎給你藐視？』 7恁將無清氣的食物獻佇我的祭壇頂，竟然閣敢問：『阮曾按怎拍垃墋祭壇？』恁甚至想講上主的祭壇通藐視。 8恁獻失明的牲生做祭物，按呢豈著？將腳跛的抑是有病的獻互上帝，按呢豈著？恁提此款禮物獻互恁的省長，伊豈會合意抑是歡喜接納？這是上主 — 萬軍的統帥講的。」
9今，恁諸個祭司，去對上帝求情，求伊寬容咱。恁提彼款祭物獻互伊，伊豈會歡喜接納？上主 — 萬軍的統帥按呢講。
10上主 — 萬軍的統帥講：「我偌呢愛恁中間有人會給聖殿的門關起來，才免恁佇我的祭壇白白起火。我無合意恁，嘛無愛接納恁獻的祭物。」 11上主 — 萬軍的統帥閣講：「全世界，對日出的所在到日落的所在，我的名佇萬國中受敬重，佇逐所在有人對我燒香，獻潔淨的祭物，因為我的名佇萬國中受敬重。 12毋拘恁褻瀆我的名；恁想講主的桌受污染，桌頂的食物無清氣。 13恁講『諸個有夠囉嗦費氣』。恁竟然給我看輕侮辱！這是上主 — 萬軍的統帥講的。恁提搶來的、腳跛的，抑是有病的牲生做禮物獻互我；我豈會接納恁此款祭物？上主 — 萬軍的統帥按呢問。 14若有人下願欲將羊群中的羊獻互我，顛倒用有缺陷的來獻，欺騙我，伊應該受咒詛！因為我是大君王；我的名佇萬國中受敬畏。」
上主 — 萬軍的統帥按呢宣布。
Currently Selected:
瑪拉基書 1: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
